YOHANE 9
9
Yesu heé tinda taampu'uumár al laqwaál nguwa ila' qaytsitís
1Yesu qoomár iwa waaraahhi heeko guna ár, inós a taampa iimír kuwa laqwaali. 2Yesu eeharuuseerós guri yaahás iri ó', «Intsaahhatusámo, heewí iimír kuwa laqwaali gár tas taampa a tlakweemaawóse laqaá awa xwayliteérós.»
3Yesu iri oó', «Heewí tlakweemaawós ngwa taampuy'iiká, laqaá tam tlakweemaá xwayliteérós, ala as gadiyér Mungú iwa geehhouur ar inós. 4Gár atén tiwa hariím a gadiyér kudá' án iga ya/aaw ngiwa tleehhaan, dír tlaatla/aangw ir kumiiti. Xweera ni hardihiyá' awa hee gadiyeé tleehhamooro ngiwa aleeslayká. 5Qoomaarí án niwa baraá yaamií dirii', aníng a gwa/aateemaá yaamu.»
6Adoorí ooaro ngiwa hhe'eés, iri yaamií tsuúq, baa/í gari tleéhh ar tsuuqaadá', baa/ídá' gari sliík ar ilaá taampadá'. 7Guri báy, «Tláw, hamtlo aweek baraá tlahhasár Siloamu.» (Gídaabárós, «Oo taa ya/aáw»). Iri tláy, iri hamtlór áy. Niwa kií/ naxés i xumiis.
8Inslaawaywós kudá' aáng gu xuú' adór heewí tar heedaádá' firaariím, tari oó', «Ahaá, heewí a kudá' iwaawiítaáke nee oo firaariím?»
9Múk hatlá' iri oó', «An inós.» Bahh'alé tari oó', «Aasla'áy, ala kudaeeká, an slaqamiimís nee kudá'.»
Heedaáduú kilá' iri oó', «An aníng.»
10Tari oó', «Adór ilaawók nira qaytsitiyé' a adoomá?»
11Inós iri oó', «Heedaádá' ta bay Yesu baa/í gana tleéhh, ilaaeé' giri sliík, iri báy, ‹Tláw, hamtlo aweek baraá tlahhsár Siloamu.› Aníng niri daqáw, niri hamtliím, ilaaeé' niri qaytsitiyé'.»
12Tari oó', «Heesíng i amá?»
Inós giri báy, «Aníng u xuaaká amór i dirii'i.»
Múk Farisayo i kángw hungu/uusadá' yaahamiis
13Heedaáduú aáng taampa kuri huúw amór múk Farisayo. 14Nee bál ilaawós Yesu ngiwa qaytsitís a deelór Sabaáto. 15Múk Farisayo sleeme heedaádá' kuri malé yaahamiís, adór ilaawós nira qaytsiitiyé'. Inós iri oó', «Ilaaeé' gina baa/ír ar sliík, án niri hamtlór áw, nee hám a xumiís.»
16Múk Farisayo bahh'alé tari oó', «Heesíng i amór Mungú dahhiiká, asma hara'ayár deelór Sabaáto ga eeharahariiká.»
Ala bahh'alé tari oó', «Heé tlakweemaá koóm, layár adór tí tleehhamooro adór ngir aleeslay a adoomá?» Tiri kilooín afo dakumiisiyé'.
17Heedaáduú aáng taampa kuri sagaáwa tsár wa báy, «Kuúng ma kát daanduú heesinge? Asma ilaawók ngaa qaytsitís.»
Iri oó', «A aarusmo.»
18Ala múk Yahudi adór heedaádá' aáng tar taampa nee kuri ila qaytsitís kaa haratlinti'iiká. Xwaylitér heedaádá' taa ila' qaytsitís kari ateét, 19kari yaahaás, «Garmaawí a koohúnge, kudá' tawa kata' a taampa iimír kuwa laqwaali? Adór ilaawós nira qaytsitiyé' a adoomá?»
20Xwayliteérós iri ó', «Atén gár ta xuaan garmaawí an koorén, nee an taampa iimír kuwa laqwaali. 21Ala adór hamí ir xumiisi atén a xuaanaaká. Slám heé ilaawós gaa qaytsitis u xuanaaká. Inósuú kilá' yaahasaak, asma inós a heé úr. Inósuú kilá' ngi ooi.» 22Xwayliteérós adoorí gana ó', asma i múk Yahudír da'ayuumít. Asma múk Yahudi gaa qaroó al'axweés tawa kaahi, hee bar Yesu ngwa ya/án, adór inós tar Kristo, heedaádá' ku baynitis dír doó saaliingo. 23Gaarí an gár xwayliteérós isa ó', «Inósuú kilá' yaahasaak, asma inós a heé úr.»
24Múk Farisayo heedaáduú aáng taampa kuri ateét sagaáwa tsare, tari oó', «Mungú xirfuú i haniseek. Atén a xuaán adór heedaádá' tar heé tlakusmo.»
25Heedaáduú taampa iri oó', «Adór tar tlakusmo, aníng a xuaaká. Aníng gár ni xuu' a wak, ‹Aníng aáng a taampa, nee hám daxta a xumiís.› »
26Tari oó', «Gár naa kuúng i tleéhh a milá? Nee adór ilaawók ngira qaytsitís a adoomá?»
27Iri oó', «Aníng kuungá' naa qaroó ádbáw. Ahaá, kuungá' mas axmamisa'aaká? Mas malé axaasár wa sla'á'. Kuungá' sleeme a sla'á'a tawa eeharuuseerós tleehhita'?»
28Kuri niqimís tari oó', «Kuúng an eeharusmoó heesíng. Ala atén a eeharuusér Mose. 29Atén a xuaán adór Mungú ira axweés nee Mose. Ala amór heesíng i dahhi a xuanaaká.»
30Heedaádá' iri oó', «Gaarí a gár waa/oo/amo, bar kuungá' amór i dahhi a xua'aaká, ala inós ilaaeé' gina qaytsitís. 31A xuaán adór Mungú múk tlakweemaá koóm ngur iiárií qaminká. Ala heé Mungú ilaiwawaá/ nee sla'aarír Mungú ga tlehhiít, heé adoorí Mungú gu iiárií qaas. 32Iimír iimu/úngw yaamuwo kángw adoorí kwa axaasiiká oo hee ilaá heé tinda taampu'uumár al laqwaál ngiwa qaytsitisi. 33Ala heewí bir amór Mungú dahhiiká, gár tleehhamooro geera i aleeslay i káhh.»
34Inooín tari oó', «Kuúng bartuna laqwaál baraá tlakweema, kuúng daxta atén adór tir intsaahhatimis a adoomá?» Kuri tsee/ií duúx baraá doó saaliingo.
Taampu'uumár baraá qeeru
35Yesu gari axaás adór heedaádá' kura tsee/ií duúx baraá doó saaliingo. Nguwa ár guri báy, «Kuúng Garmoó Hee u haratlintatía?»
36Heedaádá iri oó', «A heemá, Aáko, as án nguwa haratlintii'.»
37Yesu iri oó', «Kuúng ugwa aán hamí heé nee kuúng axweesá' an inós.»
38Heedaádá' iri oó', «Án ugwa haratlintií', Aáko.» Guri i tumbarara'aát.
39Yesu iri oó', «Aníng nina hardáh baraaká' yaamu as kwasleema, as múk xumiisaaká iwa qaytsiti, nee múk xumiís iwa taampuuti.»
40Múk Farisayo bahh'alé, oo didaádií dirií', adoodá' kawa axaás, tari oó', «Ahaá, atén sleeme a taampúwo?»
41Yesu iri oó', «Kuungá' geera bar taampu, geera alók a tlakweemaá koonda'aaká. Ala hám kuungá' a kata', ‹Atén a xumiisaán,› gawaá adoorihe tlakweemaahúng i gawaahúng i kahhiyá'.»
Šiuo metu pasirinkta:
YOHANE 9: IRQW
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The Bible in Iraqw © Bible Society of Tanzania, 2004.