YOHANE 5
5
Tiqtuusér dír tlahhsár Betesda
1Aluudae deelór ur ar múk Yahudi nay hardát. Yesu sleeme iri tsa/án ay Yerusalemu. 2Nee amoodár Yerusalemuro dír afkuko ta babay afkú Bee/aangw, tlahhsár ma'aay i deer. Tsifrír múk Ebraniaro a Betesda. Nee dír tlahhsaadae isleeraá kooán i dayá'. 3Baraá isleeridae boo/oó yaariír oo tiqtuuse aa qaqataatín, nee taampu, taqooraay nee múk aa sol'omiit, [ta ma'aá daamaarán iwa dahhiya'. 4Asma siiwarkaaro malaykamoó Aako nin awdaadiit, iri baraá tlahhsadá' i dah, ma'aydá' giri xwaraanxwaar. Nee heé aa giirin baraá ma'aydá' i /etaango, tiqtirós tidá' i kon in hungú/.] 5Nee didaádae heeko i deer, oo tiqaaqiím kureeri mibeeri tám nee dakaát. 6Qoomár Yesu heewí nguwa ár aa qaát gawaá hhaftuuwós, guri tsaáhh adór tar heé aa tiqaaqin deelór yaariire, guri báy, «A slá'a tawa hungu/?»
7Tiqtusmoodá' iri oó', «Aáko, aníng hee u koomaaká oo i /aytiís baraá tlahhasaár i aleeró, qoomár ma'aay birka xwaraanxwaár. Ala qoomár án bar adoorí wa mak /eét, heé hatlá' in geeraaeé' wa /eet.»
8Yesu iri oó', «Sihhiít, hhaftuuwók gagaareek, tláw.» 9Hamtidár kilae heedaádá' iri hunguú/, hhaftuuwós guri gagaár, iri tláy.
Nee baalaadá' a deelór Sabaáto. 10Múk Yahudi heedá' taa hungu/uús kuri báy, «Laarí a deelór Sabaáto, i hariindaaká kuúng tawa hhaftuú gagariin.»
11Ala heedaádá' taa hungu/uús giri báy, «Heedá' aníng iga hungu/uus, aníng ina báy, ‹Hhaftuuwók gagaareek, tláw.› »
12Kuri yaahaás, «Heesíng kuúng ugwa bay, ‹Hhaftuuwók gagaareek, tláw,› a heemá?»
13Ala heedaádá' inós gwa hungu/uus umuuwós gu xuiiká'. Asma Yesu qoomaadae taa paraátl, asma didaádae muu qoomaadae ku úr.
14Aluudae heedaádá' taa hungu/uús kuri harasliqiít nee Yesu baraá Doó Mungú. Yesu iri oó', «Qaytsiít, kuúng hamí aga hungú/. Tlakweema mi malé tleehhaar, as gár tlaakw ar adór tidá' ba/a muwa sleér.»
15Heedaádá' iri tláy, múk Yahudi guri xu'utisár áy iwa kaahi, «Heedaádá' aníng iga hungu/uus a Yesu.» 16Gawaá adoorihe múk Yahudi Yesu kuri iimu/ún slahh'eemisuuwo, asma adoodá' aa tleéhh bál deelór Sabaátoro. 17Ala Yesu inooín giri báy, «Baabuúeé' i gadiyuus tam hamí, nee aníng sleeme an gadiyuús.»
18Gawaá adoorihe múk Yahudi loohi kari ak leelehhiít ar Yesu kur gaasi. As gídaabaheeká hara'ayaadá' kilós ar deelór Sabaáto gana sií', ala sleeme as adoodá' Mungú nguwa Baabuúwós ar ateetin, asma adoorihe tin Mungúr qoomeemees.
Aleesleemuú Garma i kon
19Yesu iri oó', «Án a kah, Garma gár tleehharo kilós i aleeslay i káhh, aqo har tidá' Baabá i tlehhiiti gan tleehh. Asma tidá' sleémeero Baabá i tlehhiiti an tidá' Garma i tlehhiiti. 20Baabá Garma gu slaa'. Nee tidá' sleémeero inósuú kilá' i tlehhiiti gan laqaaqán. Tam gadiyér ak ur tidá' ba/a gan laqán, as kuungá' tawa waa/o/a'. 21Asma adoodá' Baabá tu'u ngir waaslee/atimisi nee ngir slafimisi, Garma sleeme mukdá' inós aa tsawaár, gun slafimis. 22Slám Baabá heé i sakwasleemuuti i kaahh. Ala sakwasleema sleémeero gaa Garmií haniís, 23as muu sleémeero Garma nguwa ilaiwawa/i, adoodá' Baabá kur ilaiwawa/i. Heé Garma gu ilaiwawa/aaká, tam Baabuúdá' Garma ngwaa ya/aaw gu ilaiwawa/iiká sleeme.
24«Án a kah, heé axweesante'eé' ga axamiís, nee kudaádá' aníng iga ya/aaw guri haratlintii', slafíngw alhhe'eesay wásl gu kón, slám i dahiiká baraá sakwasleema. Ala ina waaraáhh ar baraá gwa'ara, iri hardáh baraá slafiingw. 25Án a kah, qooma ni hardát, nee hám naa hardát, ar tu'u afór Garmoó Hee ngiwa axaasiya', nee kudá' afo ngaa axaasiye' tari slaaf. 26Asma adoodá' Baabá ir slafíngw kon, nee Garma sleeme gwa slafíngw i haniís. 27Slám aleesleemuú sakwasleema gwa amoorós i haniís asma tawa Garmoó Hee. 28Axweesanaywí mu waa/oo/amiimara', asma qooma ni hardát ar muu sleémeero, kuduú baraá /aantu, afór Garmoó Hee kawa axaasi. 29Nee inooín tindiri ti'iit. Mukdá' tlehhema'aá hho' gaa tleehh, kun waasle/atis tari dah baraá slafiingw, ala mukdá' tlehhema'aá tlakw gaa tleehh, kun waasle/atis kuri sakwasleemuut.»
Lamabu'uusér Yesu
30«Aníng gár ni kilooeé' tleehh i káhh. Aníng an sakwasleemuút ar adoodá' Baabá naa oó'. Nee sakwasleemar'eé' i ganá', asma aníng sla'aarir'eé' a leelehhiitaaká, ala ar Baabá, kudá' aníng iga ya/aaw.
31«Án birti kilooeé' lamabu'uúm, lamabu'ungw'eé' oo loeeká. 32Heé hatlá' i deer oo aníng i lamabu'uúm. Nee aníng a xuú' adór lamabu'uungós kudá' aníng iwa lamabu'un tar oo ló'. 33Kuungá' muu una ya/abé' amór Yohane, nee inós looeema ngiri lamabu'ún. 34Ala aníng lamabu'úngw muu u ilaohiimaaká. Ala aníng muruuwí ngun dirhúngií káh, as kahhó' kuungá' tawa ba/aanda'. 35Yohane a tsaa'asi tidá' tsaa'amiis nee ar gwa/aat. Nee kuungá' gwa/aateemaadá' ina slaé', kay sa qwalaala/é' ar har qoomár niina. 36Ala lamabu'úngw án ni koom ku ak úr ta kuduú Yohanewo. Asma gadiyeédár Baabuúeé' naa haniís ngiwa alhhe'ees. Nee gadiyeédár kilá' án ni tleehh, aníng i lamabu'uún sleeme adór aníng Baabá ira ya/aáw. 37Slám Baabuúdá' aníng iga ya/aaw, aníng iga lamabu'ún. Kuungá' afoorós ar kilá' qoomár kawa axasé' i káhh, slám slaqsaywós ugwa aandi'iiká. 38Nee axweesantós i baraahúng wa hotká, asma kuungá' kudá' inós naa ya/aáw u haratlintatia'aaká. 39Kuungá' tidá' taa gooín baraá Gooiro a mak tsee/ariindá', asma kawa xua', kuungá' slafíngw alhhe'eesay wásl u koondá' baraawose. Nee Gooisíng an tidá' aníng i lamabu'uum. 40Ala kuungá' a sla'a'aaká niwa amor'eé' hardata' as slafiingw kuwa sleera'.
41«Aníng xirfuú amór múk daáhh u ilaohiimaaká. 42Ala án kuungá' naa tsaáhh adór sla'aarír Mungú ir káhh baraahunge. 43Aníng nina hardáh ar umuú Baabuúeé'. Ala án kuungá' i ilaohiinda'aaká. Heé hatlá' bar naa hardáh ar umuuwós, kuungá' heedá' u ilaotá'. 44Kuungá' adór tar haratlintia' a adoomá, kuungaásingá' ti kiloohúng xirfayeemisá'. Nee xirfuudá' amór Mungú kudá' wák daáhh u leelehhita'aaká. 45Ma kaahara' aníng kuungá' nun sakwasleemuút dír Baabahe. Heé kuungá' nu sakwasleemuút i deer. An Mose, kudá' kuungá' taa harahhifé'. 46Asma kuungá' geera Mose bura haratlintié', aníng sleeme geera iga haratlintié'. Asma inós kángw daanduueé' guna gooín. 47Ala bar kuungá' gooirós haratlintaaooro aga sié', kuungá' adór axweesanay'eé' kur haratlintia' a adoomá?»
Šiuo metu pasirinkta:
YOHANE 5: IRQW
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The Bible in Iraqw © Bible Society of Tanzania, 2004.