YOHANE 2
2
Duuxór Kanár Galilaya
1Bál tame duuxo i deer baraá Kana, gixsár yaamaá Galilaya. Nee aayór Yesu i baraadií dirí' sleeme. 2Yesu dinkwa nee eeharuuseerós sleeme kina dahi'is baraá duuxoodá'. 3Difaái iwa aleén, aayór Yesu iri hardát dír Yesu, iri ó', «Difaái aa aleén.»
4Yesu gari báy, «Aáyo, án nee kiíng gaa a milá? Siiwar'eé' aa xeeriiká.»
5Aayór Yesu sagadiyuuseedá' gadiyuus gari beér, «Umuúqo gaaro ar naa ooi ka tlehhá'.»
6Didaádae sidaá lahhoó' awa taa tleéhh ar tlaa/e i dayá'. Sidoodá' kina didaádí qaás as tlehhemuú múk Yahudi, as hamtlo. Umuúqo sirwiro a har qoomoó deebedaá kooán ay faanqw. 7Yesu iri oó', «Sidoosíng dalaa/aak ma'aywo.» Sidoodá' kiri dalaá/, kay milalaá/. 8Giri báy, «Daxta i hheekaak, nee ki hubá' dír heedá' úr oo muruú /aymár qasmiís.» Kiri huúw. 9Heedaádá' úr oo muruú /aymár qasmiís ma'aydá' naa difaái tleehhitiye' giri tsaáq. Inós difaáirí amór i dahh gaa xuiiká, (ala sagadiyuuseedá' gaa i hhek gaa xú'). Heedaádá' úr oo muruú /aymár qasmiís heé duuxuuxuúm gway ateét, 10gway báy, «Umuúqo heewo difaáír tsuu' gan geerií haniis dír muu. Ala muu bira hhe'eés wahaango, aluuwo tidár maánjirí gari duux. Ala kuúng difaáír tsuu' ana aluutís ay hamí.»
11Layaarí Yesu aa tleéhh amór Kanár Galilayár wa ale, a layaarós ar har geera. Xirfuuwós guri geehhooatís, nee eeharuuseerós guri haratlintí'.
12Aluuwo iri aweér ay Kapernaumu, inós nee aayoorós nee hhaeewós nee eeharuuseerós. Tari amoodá' wa hoót deelór niinawe.
Yesu múk baraá Doó Mungú wa weerimiís nguwa gusiisín
(Mat 21:12-13; Marko 11:15-17; Luka 19:45-46)
13Nee deeloodae deelór ur ar múk Yahudi, tidár Pasaáka, aa naká/. Yesu iri tsa/án ay Yerusalemu. 14Muu guri ár oo baraá Doó Mungú i dirií', i hikwaá weerimiis, nee bee/aangw nee hhooka. Nee múk peésár gaamiís i didá' i dirii' sleeme, taa iwiít dír meesaduuín. 15Yesu himuú taa tlaatlaáw guri amohhe'eés, mukdá' sleémeero baraá Doó Mungú i dirií' guri guús dinkwa nee bee/angw'ín nee hikwaawo. Mukdá' peésár gaamiís, peésar'ín Yesu gari yaamií ku'uús, nee meesaduuín giri /aankwaratsín. 16Mukdá' hhookár weerimiís guri báy, «Muruusíng sleémeero hingeesaak. Doó Baabuúeé' mu doó halaanu'uuma tleehhara'.» 17Eeharuuseerós tidá' taa gooín gari insleér, tidá' kah, «Sla'aarír doó Baabuúeé' aníng i gás.»
18Múk Yahudi iri oó', «Layár kuúng ta tlehhit ar aleesleemuuwók gu laqaaqaam oo muruuwí kur tlehhit a gaalá?»
19Yesu iri oó', «Do'wí oo Mungú fee/aak, daqaní aníng u sihhitís har deelo tame.»
20Múk Yahudi iri oó', «Do'wí oo Doó Mungú kuna tlehhahhiít ay kureeri mibeeri tsiyáhh nee lahhoó', nee kuúng unqo sihhitísa deelo támií ale?»
21Ala Yesu kángw Doó Mungú oo aa káh a slaqwtós. 22Aluuwo qoomár inós niwa waasleé/ baraá múk aa qaátl wa aleeró, eeharuuseerós kangwdá' Yesu aa káh guri insleér. Gooidá' gari haratlintí', nee /aymuudá' Yesu aa kaahi.
Yesu muu sleémeero gu xuu'
23Qoomár Yesu iwa baraá Yerusalemúr i dirii'i, bál deelór ur ar Pasaákuwo, múk yaariír inós guri haratlintií', as layuudá' inós aa tleéhh kiwa ár. 24Ala Yesu taa ak amor'íní hanisiiká, asma inós muner'ín gaa ló'wa tsaáhh. 25Inós lamabu'úngw heé i slai i kaahh daanduú heewo. Asma tidá' baraá muunuú heé i dirii' inós gaa qaroó xuú'.
Šiuo metu pasirinkta:
YOHANE 2: IRQW
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The Bible in Iraqw © Bible Society of Tanzania, 2004.