Mateo 12
12
Liyipu lya ha Mutena Wakukatala*
(Mako 2:23-28; Luka 6:1-5)
1 # Nday 23:25. Ku shikati shiyo Yeshu wapitile mu mafuba a loto ha Mutena Wakukatala*. Bandongesha bendi bekalile na nzala, pe batatikile kupulula loto na kulya. 2Oho Bafwalishi bamonene eshe, bambile kuli Yeshu ngayi, “Mona, bandongesha bobe bakutenda shakubula kufwanina ha Mutena Wakukatala.”
3 # 1 Sham 21:1-6. Yeshu wambile kukwabo ngayi, “Hinga mwatanga shilolo mulabe eshe atendele Ndavita, shikati shiya oho ekalile na nzala, hamo na bantu bendi. 4#Bal 24:9. Ndavita wenginine mu Litala lya Nyambi, niye na bantu bendi balile mankende aya atupuliwile kuli Nyambi ayo abulile kufwanina kulya ndele bakankombela tuhu nibo bafwanini kuwalya. 5#Kul 28:9. Hinge kati shilolo mulabe mu Ndayano za Moshesha eshe bakankombela bazilululanga Mutena Wakukatala mu Litala lya Nyambi* ngoboni bawanangaha mulandu? 6Nikumitongweza ngayi umo wakupitakana Litala lya Nyambi uli kuno. 7#Mat 9:13; Hosh 6:6. Shinga mukulimuka kutontoloka kwa mazu awa akwamba ngayi, ‘Nashinga nceshe kaliha nkombela.’ Shinga mufwako kuyata bakubula mulandu. 8Ndaba Mwana Muntu wenga Mwene wa Mutena Wakukatala.”
Mulume wakunyata liboko
(Mako 3:1-6; Luka 6:6-11)
9Yeshu wafumine ku mwanya uyo, niho ayile na kwingina mu shinangonge. 10Muyo mushinangonge mwekalile mulume wakunyata liboko. Bantu bashingile kubangila Yeshu byambo, pe bamwipwile ngayi, “Kati shinafwanina kunyongomanisha muntu ha Mutena Wakukatala ndi?”
11 #
Luk 14:5. Ngoboni wabatongwezele ngayi, “Kati yani hakati kenu uli na mbelele ndi ukuwila mu liteke ha Mutena Wakukatala, hakubula kumukwata na kumufumishamo? 12Muntu ukupitakana mbelele shikuma. Nohobene shinafwanini kutenda shiwahe ha Mutena Wakukatala.”
13Niho Yeshu ambile ku mulume wakunyata liboko ngayi, “Olola liboko lyobe.” Wolwele, pe lyanyongomanine, lyolokele nehi lyamina. 14Niho Bafwalishi bafumine bayile na kulyambashana ngayi bawane mwakuzihila Yeshu.
Mukamulimo wa Nyambi wakuhatiwa
15Oho Yeshu alimukile ebye balyambashaninenga, wafumine kumwanya uyo. Bantu babengi bamukonkele, pe wanyongomanishile nimwabo bakolelenga. 16Wabacincikile ngayi hinga bamutumbalalisha. 17Kwatendiwile eshe ambile Ishaya ngayi,
18 # Isha 42:1-4. “Monenu mukamulimo wami ou nahatile, wakuhakiwa,
wangwahililishanga shikuma,
nikayaka Moyo wami hahendi,
pe ukaleta kwoloka ku matunga.
19Kukakuwa hinge kubilika
na lizu lyalinene wufwako,
hinge kuya na kubilika mu mikwakwa wufwako.
20Kukapokola litete lyakubofwoka wufwako,
kami kukazima lumuni lwancishilile wufwako,
hantu kwoloka kukakone.
21Mu lizina lyendi matunga akamulumbeza.”
Yeshu na Mbelezebule
(Mako 3:20-30; Luka 11:14-23)
22Niho baletele kuli Yeshu mulume wa mayimbwe, wengile wakubula kwamba. Yeshu wamunyongomanishile, pe watatikile kwamba na kumona. 23Bantu nimwabo bakomokele bambile ngayi, “Kati ou kaliha niye Mwana Ndavita ndi?”
24 #
Mat 9:34, 10:25. Ngoboni Bafwalishi oho bayuvwile noho bambile ngayi, “Ou ukufumisha mayimbwe na ngovu za Mbelezebule mwene wa mayimbwe.”
25Yeshu walimukile bihanganiko byabo, pe wabatongwezele ngayi, “Wene nimwawo ukulitapulula na kulilwisha ukaloba. Kami munzi nimwawo hinge litala linalitapululu na kulilwisha kukatwesha kwimana bifwako. 26Ndi Shatana ukutanda Shatana unalitapululu na kulilwisha niye mwine. Pe wene wendi ukashuma nahiti? 27Ndi nikufumisha mayimbwe na Mbelezebule, pe bandongesha benu bakuwafumisha na yani? Nohobene bandongesha benu bakenga bakakumiyata. 28Ngoboni ndi nikufumisha Mbelezebule na Moyo wa Nyambi, limukenu ngayi Wene wa Nyambi wakumakale hahenu.
29“Kami muntu ukutwesha nahiti kwingina mu litala lya muntu wa nyala ngayi apukule byuma byendi? Ndele atatike taha kumanga uya muntu wanyala, niho akapukule litala lyendi.
30 #
Mak 9:40. “Muntu nimwendi wakubula kundwila, ukundwisha, nimwendi wakubula kukungula nanami, ukupanzanisha. 31Nohobene nikumitongweza ngayi, wubi nimwawo na lihandu bikayatiwila ku bantu, ngoboni ou ukuhandula Moyo Wakuyela kukayatiwila wufwako. 32#Luk 12:10. Kami ou ukutoya shibi Mwana Muntu, ukayatiwila, ngoboni ou ukutoya shibi Moyo Wakuyela kukayatiwila wufwako hinge mu myaka ino hinge mu myaka ikeza kumbili.
Mutondo na mikabo yawo
(Luka 6:43-45)
33 #
Mat 7:20; Luk 6:44. “Lamenu mutondo shiwahe mwanga wikale na mikabo yayiwahe, ndi mukwikala na mutondo wawubi, pe mukekala na mikabo yayibi. Ndaba mutondo walimukiwanga na mikabo yawo. 34#Mat 3:7, 23:33, 15:18; Luk 3:7, 6:45. Enu bana babipili, mukutwesha nahiti enu bababi kwamba byambo byabiwahe? Ndaba ngayi kanwa kambanga ebye byenzala mu mutima. 35Muntu wamuwahe watutwishanga byabiwahe bili mu shikongelo shendi shashiwahe, kami muntu wamubi watutwishanga byabibi bili mu shikongelo shendi shashibi.
36“Ngoboni nikwamba kukwenu ngayi ha Mutena wa Kuyata muntu nimwendi ukayatiwa na mazu endi owa aya nimwawo ambile. 37Ndaba na mazu obe ukashambishiwa, kami na mazu obe ukayatiwa.”
Bakunyepa shikomokesho
(Mako 8:11-12; Luka 11:29-32)
38 #
Mat 16:1; Mak 8:11; Luk 11:16. Niho bamo bakakulongesha ndayano na Bafwalishi bambile kuli Yeshu ngayi, “Mulongeshi! Tukushinga tumone shikomokesho kukwobe.”
39 #
Mat 16:4; Mak 8:12. Ngoboni Yeshu wabakumbwile ngayi, “Enu mukoka wa wubi wa wujenge! Mukushinga shimonekesho, ngoboni kowa shimonekesho nikumipanika, ndele shimonekesho sha muluwe Yona. 40#Yon 1:17. Ngonehe Yona ekalile mu livumo lya inci wamunene matena ahatu mwaana na wushiku, na Mwana Muntu ukekala mu limvu mwa kunonka matena ahatu mwaana na wushiku. 41#Yon 3:5. Ha Mutena wa Kuyata, bantu ba ku Nineva bakemana na kuyata ou mukoka. Ndaba baka Nineva batengulukile na kushimikila kwa Yona, ngoboni wakupitakana Yona uli kuno! 42#1 Bamy 10:1-10; 2 Bya 9:1-12. Lihano wa ku mabukubuku ukemana na nou mukoka ha Mutena wa Kuyata, pe ukawuyata. Ndaba niye wafumine kwakumina hanci kwiza mukuyuvwa ngana za Sholomoni, ngoboni wakupitakana Sholomoni uli kuno!
Kuboka kwa mayimbwe
(Luka 11:24-26)
43“Oho mayimbwe anafumu mu muntu, ayanga mu ngawungawu na kushinga mwanya wakukatalila, ngoboni abulanga kuwana kukatala, 44niho akwamba ngayi, ‘Nikaboka mu litala lyami omo nafumine.’ Oho akukuma akuwana litala lya mukungulu, linakombiwi, na kuwahishiwa. 45Niho akaya mukuleta mayimbwe amina a mutanu na abili akupitakana niwo, pe akwingina na kwikalamo. Nohobene nyinkalo ya muntu uyo yikenga yayibi kupitakana ya kutatika. Kukenga nahiyo kami ku mukoka ou wa wubi.”
Mandiyendi Yeshu na bakonzo bendi
(Mako 3:31-35; Luka 8:19-21)
46Oho ushili kwamba ku likunge lya bantu, kwezile mandiyendi na bakonzo bendi. Bemanine ha munkanda, bashingile kwamba nendi. 47Muntu wamina watongwezele Yeshu ngayi, “Bamandi yobe na bakonzo bobe bali ha munkanda, bakushinga kwamba nobe.”
48Yeshu wakumbwile ngayi, “Kati bamawa bayani? Na bakonzobami bayani?” 49Niho enikile bandongesha bendi, pe wambile ngayi, “Aba nibo bamawa na bakonzobami. 50Ndaba muntu nimwendi ukutenda shamutima wa Tate uli muyilu, niye mukonzowami na mpanzami na bamawa.”
Šiuo metu pasirinkta:
Mateo 12: KK2008
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
New Testament in Nkoya © The Bible Society of Zambia, 2008.