Mateo 10
10
Bantumwana likumi na babili
(Mako 3:13-19; Luka 6:12-16)
1Yeshu wehanine bandongesha bendi likumi na babili, wabapanine ngovu zakutanda mayimbwe na kunyongomanisha malweli nimwawo na kukola nimwako.
2Awa niwo mazina a bantumwana likumi na babili. Wa kutatika Shimoni (ukutumbiwa Pita) na Anduleu mukonzowendi na Yakoba na mukonzowendi Yowano bana ba Zebende. 3Fwilipu na Mbatolomewu, Tomashi na Mateo mukakutelesha, Yakoba mwana Alufweya na Tandeya, 4Shimoni wa ku Kanana na Yundashi Ishikalyote ou wabebele Yeshu.
Yeshu ukutuma balikumi na babili
(Mako 6:7-13; Luka 9:1-6)
5Oho Yeshu atumine aba balume likumi na babili, wabatongwezele ngayi, “Hinga muya ku Bakamatunga, hinge kwingina mu minzi ya baka Shamaliya.* 6Ngoboni yenunga ku bambelele bakuyongala ba litala lya Ishalela. 7#Luk 10:4-12. Muye na kushimikila ngayi, ‘Wene wa muyilu uli hahepi.’ 8Nyongomanishenu bakakukola, shangulenu bakufwa, nyongomanishenu bakabimakwa, pe kafumishenu mayimbwe. Munatambulu nahiya, panikenu nahiya. 9Hinga mushimba mali a ngolinde, hinge a shiliva, hinge kopa mu mapokoto enu. 10#1 Koli 9:14; 1 Tim 5:18. Hinga mushimba mpamba ya mpanda, hinge bikobelo bibili, hinge ncangwa, hinge mushako, ndaba mukamulimo ukufwanina kupanikiwa byakulya.
11“Nimwamo mu munzi hinge mu kanzi mukengina, mwipwizize ndi kuli muntu ukushinga kumitambula, pe mwikale kukwendi hantu mutena wakuya. 12Oho mukwingina mu litala, shangwishenu baya balimo. 13Ndi bantu bamuya mu litala kukamitambula bafwako, kumwena kwenu kwikala hahabo kufwako. Ndi kumitambula bafwako, kumwena kwenu kukaboka kukwenu. 14#Mil 13:51. Ndi muntu wamina ukabula kumitambula, hinge kubula kuyuvwa mazu wenu, oho mukufuma ku litala liyo hinge mu uya munzi, totomonenu lukungu lwa ku mawulu wenu. 15#Mat 11:24; Shi 19:24-28. Nikumitongweza kupwisha ngayi ha Mutena wa Kuyata, Nyambi ukayuvwila nceshe shikuma ku bantu ba mu Shondoma na Ngomola kupitakana bantu ba mu munzi uyo.
Kuyandishiwa kwa bantumwana
(Mako 13:9-13; Luka 21:12-17)
16 #
Luk 10:3. “Nikumituma ngonehe bambelele mukati ka bambinzi. Nohobene mwinge bakukeya ngonehe mayoka kami mwinge bakubomba ngonehe nkilimba. 17#Mak 13:9-11; Luk 12:11-12, 21:12-15. Keyenu na bantu, ndaba ngayi bakamitwala ku nkuta, bakamikama mu mashinangonge wabo. 18Bakamitwala kami ku batulela na ku bamyene ndaba yami, ngayi winge wupaki kukwabo naku Bakamatunga. 19Ngoboni oho bakamitwala na kumiyatisha, hinga mukalikekula ngayi tukamba nahiti. Hashikati shiyo, mukapanikiwa ebye mukambe. 20Ndaba kaliha enu mukwamba ngoboni Moyo wa Tatiyenu, niwo ukamba mumwenu.
21 #
Mak 13:12; Luk 21:16. “Muntu ukabeba kawushinda wendi ku kufwa na tata muntu ukatenda noho kuli mwanendi. Bana bakafutukila bahemi babo, pe bakabazihiwisha. 22#Mat 24:9, 13; Mak 13:13; Luk 21:17. Mukazimbiwa ku bantu nimwabo ndaba ya lizina lyami, ngoboni ou ukazumanana kukuma ku mamaninino niye akapuluke. 23Oho bakamiyandisha ku munzi umo, tininenu ku munzi wamina, mwashikuma nikwamba kukwenu ngayi, Mwana Muntu ukeza oho shilolo mumanishe kupita mu minzi nimwayo ya Ishalela.
24 #
Luk 6:40; Yowa 13:16, 15:20. “Kowa ndongesha ukupitakana mulongeshi wendi, kami kowa mukamulimo wakupitakana hekulyendi. 25#Mat 9:34, 12:24; Mak 3:22; Luk 11:15. Nohobene ndongesha unafwanini kwinga ngonehe mulongeshi wendi, na mukamulimo unafwanini kwinga ngonehe hekulyendi. Ndi banatumbu mutwe wa litala ngayi Mbezebule,* pe bakalitala lyendi bakatumbiwa na mazina amabi shikuma!
Yani wakufwanina kutiniwa
(Luka 12:2-7)
26 #
Mak 4:22; Luk 8:17. “Nohobene hinga mutina bantu, shuma nimwasho shakufwikiwa shikafwikuluka, kami shuma nimwasho shakulimba, shikalimukiwa. 27Ebye nikumitongweza mu mincimpwe, mukabyambe mwaana ncanana. Ebye mukayuvwa byakuyebetela, kabibilikenu hinga mwemana hayilu ya matala. 28Hinga mutina aba bakuziha lutu, kami bakubula ngovu zakuziha moyo. Ngoboni yuvwilenu Nyambi bowa ou ukutwesha kunongesha moyo na lutu mu ngehena. 29Kati tuntungisha tubili kaliha tukulandiwa na kamali kamo ndi? Ngoboni kowa hinge kamo kakawila hanci kwakubula kulimuka Tatiyenu. 30Hinge huki zaku mitwe yenu zinalabiwi nimwazo. 31Nohobene hinga mutina ndaba mukupitakana tuntungisha twatwingi.
Kulishisha na kukana Kilishitu
(Luka 12:8-9)
32“Nohobene muntu nimwendi ukunyitabila ku meho a bantu, nami nikamwitabila ku meho a Tate uli muyilu. 33#2 Tim 2:12. Ngoboni ou nimwendi ukunkana ku meho a bantu, nami nikamukana ku meho a Tate uli muyilu.
Kulifutukila kwa bantu ndaba ya Yeshu
(Luka 12:51-53, 14:26-27)
34“Hinga muhanganika ngayi nalete kumwena hano hanci, kaliha nalete kumwena, ngoboni nalete mukwale. 35#Mik 7:6. Ndaba nalete zimbo, ndumbana ukafutukila tatiyendi, mbuyama ukafutukila mandiyendi, mukazi ukafutukila mukowendi wa mbeleki. 36Kami bawushinda wa muntu bakenga bamalamo bendi.
37“Nimwendi ukuhaka tatiyendi hinga mandiyendi kupitakana ami, kufwanina kwinga ndongesha wami wufwako. Nimwendi ukuhaka mwanendi wa ndumbana hinge wa mbuyama kupitakana ami, kufwanina kwinga ndongesha wami wufwako. 38#Mat 16:24; Mak 8:34; Luk 9:23. Nimwendi ou ukubula kushimba shishempakano shendi ngayi mwanga ankonke, kufwanina kwinga ndongesha wami wufwako. 39#Mat 16:25; Mak 8:35; Luk 9:24, 17:33; Yowa 12:25. Nimwendi ukwezeka kulama wumi wendi niye mwine, ukawuyongesha, ngoboni nimwendi ukuyongesha wumi wendi ndaba yami ukawuwana.
Zincungu
(Mako 9:41)
40 #
Mak 9:37; Luk 9:48; 10:16; Yowa 13:20. “Ou ukumitambula ukuntambula, kami ou ukuntambula ukutambula ou wantumine. 41Nimwendi ukutambula muluwe wa Nyambi ndaba ngayi nengi muluwe wa Nyambi, ukutambula ncungu ya muluwe wa Nyambi, kami nimwendi ukutambula mukakwoloka ndaba ngayi nengi mukakwoloka, ukatambula ncungu ya wakwoloka. 42Ou nimwendi ukapana hinge nkomoki ya mema akubombola ku umo wa naba babashe ndaba ngayi unengi ndongesha wami, mwashikuma nikumitongweza ngayi uya muntu ukatambula ncungu yendi.”
Šiuo metu pasirinkta:
Mateo 10: KK2008
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
New Testament in Nkoya © The Bible Society of Zambia, 2008.