मत्ती 4
4
उजाड ग्लारी येसुइ परीक्ष
(मर्कुस् १:१२-१३; लुका ४:१-१३)
1हुजु लीप्चे सैतानचे परीक्ष स्य्हेङ्नलबरी पबीत्र आत्माचे येसुत उजाड-ग्लारी स्येःन लजेत्ज्यी। 2ओसेम् उजाड-ग्लारी येसुचे दीन् खल् ङ्य्हीतेङ् म्हुन् खल् ङ्य्ही सम्म ङ्यीम्बु टीब बीसेम् थेङ् ख्रेन्जेत्ज्यी। 3ओसेम् सैतान थेङ् मुबे ग्लारी खज्यीम् पङ्ज्यी, “थेङ् पर्मेस्वर्की ज य्हीन्ब पङ्सम् चु युङ्बमात ग्येङ् तउ बी कुल्जेतो।” 4तर येसुचे जोहाप् न्हङ्ज्यी, “धर्मसास्त्ररी चोले ब्रीबल मुब, ‘म्ही ग्येङ्चेकीनो असो, तर पर्मेस्वर्की स्य्हल् ग्यम्से डोङ्बे जम्म फ्रोइचे सोब।’#ब्यबस्था ८:३”
5हुजु लीप्चे सैतानचे येसुत पबीत्र सहर् यरुसलेमरी बोर्ज्यीम् पर्मेस्वर्की दीम्की गोदोब्न्हङ् जोमी जोरी रप्पुङ्ज्यी, 6ओसेम् पङ्ज्यी, “थेङ् पर्मेस्वर्की ज य्हीन्सम् चु जोसे दुङ्री छ्योङ्जेतो, तलेपङ्सम् धर्मइ छ्येःरी चोले ब्रीबल मुब-
‘पर्मेस्वर्चे थेङ्त चुङ्बे लागीरी स्वर्गदुत्मात कुल्जेत्स्ये मुब
ओसेम् युङ्बचे थेङ्की स्य्हब्री म्हग अङ्यीखइ बी थेङ्यीमाचे थेङ्त र्हङ्की या-यारीनो तास्ये मुब।’#भजनसंग्रह ९१:११-१२”
7येसुचे थेत सुङ्ज्यी, “धर्मसास्त्ररी चोलेएनो ब्रीबल मुब, ‘एचे परमप्रभु एइ पर्मेस्वर्की जाच थस्य्हेङो।’#ब्यबस्था ६:१६”
8हुजु लीप्चे सैतानचे येसुत य्हक्को नोबे गङ्री बोर्ज्यीम् जम्बुलीङ्की जम्मा य्हुल्मातेङ् ज्यबे ङ्हच्छ्यङ् स्हेमा ङोन्ज्यी। 9ओसेम् थेङ्त पङ्ज्यी, “थेङ्चे ङत पुइ जुःज्यीम् तेन्ज्यी पङ्सम् चु जम्मा स्हेमा ङ थेङ्त पीन्स्ये मुब।” 10येसुचे थेत सुङ्ज्यी, “सैतान, चु ग्लासे य्हरो! धर्मइ छ्येःरी ब्रीबल मुब, ‘एचे परमप्रभु एइ पर्मेस्वर्त तेनो, ओसेम् थेङ्तकीनो स्य्हप्तो स्य्हेङो।’#ब्यबस्था ६:१३”
11ओसेम् सैतानचे येसुत पीत्ज्यीम् य्हर्ज्यी, ओसेम् स्वर्गदुत्मा खज्यीम् थेङ्की स्य्हप्तो स्य्हेङ्ज्यी।
येसुचे प्रचार तीप्जेत्पल
(मर्कुस् १:१४-१५; लुका ४:१४-१५)
12बप्तीस्मा पीन्बे युहन्नात जेल्री च्युप्पल मुब पङ्बे तम् येसुचे थ्येःब बीसेम् थेङ् गालीलक्योर् स्येजेत्ज्यी। 13थेङ् नासरत ख्लेथेन्ज्यीम् कफर्नहुम् पङ्बे ज्यीद सहर्री स्य्हुबरी स्येजेत्ज्यी। कफर्नहुम सहर गालील ग्येइ रेइकी जबुलुनतेङ् नप्तालीइ प्रदेस्री मुबल। 14यसैया अगम्बक्तचे पङ्बे तम् चोले टोप् तज्यी-
15“यर्दन ग्येन्दीइ क्योम्सङ्की ग्येक्योर् ङ्यीबे ग्यम्की जबुलुनतेङ् नप्तालीइ म्हीमा,
ओसेम् गालीलरी टीबे ल्हो-ल्हो जात्की म्हीमा,
16म्हुन्दुङ्न्हङ् टीबे म्हीमाचे ङ्हच्छ्यङ् य्हल् गीः म्रङ्बल मुब।
ओसेम् स्यीबे म्हुन्दुङ्की ब्लरी टीबलमाकी
जोरी य्हल् गीः फ्याबल मुब।”#यसैया ९:१-२
17हुजु बेलो य्हङ्से येसुचे प्रचार् स्य्हेङ्ब तीप्जेत्ज्यीम् चोले सुङ्ज्यी, “पस्चताप स्य्हेङो, तलेपङ्सम् स्वर्गइ य्हुल् ज्यदङ् खबल मुब।”
येसुइ ङोन्ग्यम्की डबमा
(मर्कुस् १:१६-२०; लुका ५:१-११)
18तीरेत् येसु गालील ग्येइ यचे ब्रजेत्टीबे बेलोरी थेङ्चे पत्रुस पङ्बे सीमोनतेङ् थेइ अले अन्द्रीयसत ग्येरी ग्यङ् ल्हीटीबल म्रङ्जेत्ज्यी। थेङ्य्ही तर्ङ सेत्पे म्ही मुबल। 19थेङ्चे थेङ्य्हीत, “ङइ लीप्चे ब्रऊ, ङ एङ्यीमात तर्ङ अय्हीन्, म्हीमात ङइज बबे म्ही स्य्हेङ्स्ये मुब” बी सुङ्ज्यी। 20चु थ्येःब साच्चेनो थेङ्हीचे ग्यङ्मा ख्लेथेन्ज्यीम् येसुइ लीप्चे ब्रज्यी।
21ओसेम् येसु हुजु ग्लासे स्येटीमम् थेङ्चे जब्दीयाकी ज ङ्य्ही याकुबतेङ् युहन्नात म्रङ्जेत्ज्यी। थेङ्य्ही र्हङ्की अप जब्दीयातेङ् दोङ्गरी टीज्यीम् ग्यङ् क्योन्टीबल मुबल। ओसेम् थेङ्चे थेङ्य्हीतएनो ङ्होत्जेत्ज्यी। 22थेङ्य्हीचे ग्योन्-ग्योन्नो थेङ्यीमाकी दोङ्ग अपत पीत्थेन्ज्यीम् येसुइ लीप्चे ङ्यीज्यी।
येसुचे प्रचार स्य्हेङ्जेत्पलतेङ् नबे म्हीमात फेन्न लजेत्पल
(लुका ६:१७-१९)
23ओसेम् येसु गालील प्रदेस्की जम्मा ग्लामारी स्येजेत्ज्यी। थेङ्चे यहुदीमा र्हुब् तबे दीम्मारी स्येज्यीम् म्हीमात लोप्जेत्ज्यी। ओसेम् पर्मेस्वर्की य्हुल्की ज्यबे सम्तर् स्येत्जेत्ज्यी। ओसेम् थेङ्चे जम्मा थोइ रोग स्यप्ज्यीम् नबे म्हीमातेङ् नबलमात फेन्न लजेत्ज्यी। 24होत्तज्यीम् थेङ्की तम् सीरीयाकी जम्मा ग्लामारी थ्येःज्यी। ओसेम् म्हीमाचे जम्म थोइ रोगतेङ् नबछबचे दुख यङ्बे म्हीमात थेङ्ज बज्यी। हुजु नबछबे म्हीमा न्हङ्री डेत्-डेत् म्हङ् स्यप्पल मुबल, डेत्-डेत् स्ह स्यप्पल मुबल, ओसेम् डेत्डेत्मी या कङ् अचल्तीबे म्हीमा मुबल। थेङ्चे थेङ्यीमा जम्मतनो फेन्न लजेत्ज्यी। 25य्हक्को म्हीमा थेङ्की लीप्चे ब्रज्यी। ओसेम् थेङ्यीमा गालील प्रदेस्, सहर् च्यी मुबे डेकापोलीस, यरुसलेम, यहुदीयातेङ् यर्दन ग्येन्दीइ क्योम्सङ्चे खबल मुबल।
Šiuo metu pasirinkta:
मत्ती 4: WTDG
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2024 (Active), Wycliffe Bible Translators, Inc. All rights reserved.