मर्कूस 3
3
मीहुट छोक्च भर्मी गेप्च
(मत्ती १२:९-१४; लुका ६:६-११)
1होटै फेरी येशू यहूदीकुङ सभा ङुच इमाङ नुङा। होला मीहुट छोक्च काट जना भर्मी लेया। 2होसकै म्हुङ बाट्च डीनाङ होसे भर्मीकी गेपाक्लेकी डेयार होसकोकी डोस लैडीकी डेम भर्मीको चीवा जाट्न ङुम्या। 3अनी येशूये होसे मीहुट छोक्च भर्मीकी डेया, “इला रान्ही अनी पट्टकुङ म्याहासाङ टोङ्न्ही।” 4होटै येशूये होखुरीककी डेया, “म्हुङ बाट्च डीनाङ भलो जाट्की की मासेछ जाट्की, भर्मीयो जीवन जीवाक्की की नास जाट्की, कुसे चहीँ व्यवस्थौ लागी ठीक ले?” टर होखुरीक माच्याक्ङ ङुवा। 5र होखुरीकुङ कठोर मीमनौ कारनै होसको डुखी छाना होटै मीरीसै होखुरीककी ङोसा र मीहुट छोक्च भर्मीकी डेया, “नाकुङ मीहुट टन्कडीनी।” अनी होचे मीहुट टन्कडीया र होच्यौ मीहुट गेपा।
6होटै फरीसीको सभा इमीङ ख्योव्हार नुङा र येशूकी कुट जाट्न साट्की डेयार तुरुन्तै हेरोद राजाकी डुट्च भर्मीको खाटा सल्लाह जाटा।
7अनी येशू लहो चेलाको खाटा टालौ छेउलाक नुङा। होला गालील लकीङ वास्टै भर्मीकुङ भीडै होसकोकी डुटा। 8होला यहुदिया, यरूशलेम, इदुमिआ, यर्दन नदि पारी टुरोसौ वरीपरी र सीदोन लकीङ भर्मीकुङ भीड होसकुङ अचम्मौ काम सेयार होसको लेठाङ राहा। 9होटै भर्मीयो भीडै लाहाकी मापीचीख्यौ डेम येशूये लहो चेलाकोलाक काट डुङ्गा मेखोल्हौ लागी तयार जाट्की लैडीया। 10अनी होसकै वास्टै छाच भर्मीकोलाक गेपाक्च बाटै छाचको पट्टकै न होसकोकी छुकी डेयार ढुसाढुस जाट्न न लेया। 11अशुद्ध आत्मा लक्डीस्च भर्मीकै येशूकी डाङ्च बीट्टीकै होसकुङ अगाडी खुखुप छानार इट डेचै च्याक्ङन्या, “नाको परमेश्वरौ मीजा हो!” 12टर येशूये लाहाकी अरु भर्मीकै माचीन्डीख्यो डेम होखुरीककी कडा आज्ञा याहा।
येशूये बार्ह जना प्रेरितको भाक्च
(मत्ती १०:१-४; लुका ६:१२-१६)
13होटै येशू डाँडाङ नुङार लहे मीमनै ज्याच कोलाक आर्घा र होखुरीक होसको लेठाङ राहा। 14अनी लाहा खाटा व्हास्की र प्रचार जाट्की बीर्न्हकाकी डेम बार्ह जनाकी प्रेरित डेयार भाका। 15होटै होखुरीककी भूतको छ्युक्च अधिकार याहा। 16होसे बार्ह जना चेलाकुङ म्यार्मीन इसे न हो सीमोन, होसकी येशूये पत्रुस म्यार्मीन डा। 17अनी जब्दियौ मीजाको याकुब र मेन भाइ युहन्ना, होसकै होखुरीककी “बोअनर्गेश” डेच म्यार्मीन डा। इच्यो अर्थ चहीँ गर्जनौ मीजा हो। 18र अन्द्रियास, फीलीप, बारथोलोमाइ, मत्ती, थोमा, अल्फयासौ मीजाको याकुब र थेदियस, सीमोन कनानी होसे चहीँ लहो देशकी माया जाट्च भर्मी डेयार चीन्डीमन्या, 19र येशूकी घोवाक्च यहूदास इस्करीयोट।
येशू र बालजीबुल भूत
(मत्ती १२:२२-३२; लुका ११:१४-२३; १२:१०)
20होटै येशू इमाङ नुङा। फेरी होला वास्टै भर्मीकुङ भीड भेला छानार येशू र होसकुङ चेलाकै ज्यामा ज्याच फुर्सड ढरी माढीन्हा। 21जब येशूओ जहानकै इसे कुरा सेया टब होसकोकी आल्खी डेयार होखुरीक येशू लेठाङ नुङा। हीजैडेनाङ होखुरीकै होसकुङ मीमन ठेगानाङ माले डेयार डेमन्या।
22होटै यरूशलेम लकीङ राछ व्यवस्थौ धर्मगुरुकै डेया, “होसे खाटा बालजीबुल भूत ले र भूतकुङ मालीक लकीङ न होचे भूतको छ्युक्ले।”#३:२२ सैटानौ अर्को म्यार्मीन बालजीबुल र हो।
23टर येशूये होखुरीककी लाहा लेठाङ आर्घार उदाहरण याछै डेया, “शैतानै शैतानकी कुट जाट्न छ्युक्की य्होक्ले? 24अनी होसे राज्यौ लाहा लाहाङ न झगडा छाना डेनाङ होसे राज्य टीक्डीस्की माय्होक्ले। 25कुसे इमाङ र लाहा लाहाङ न झगडा छाना डेनाङ होसे इम र टीक्डीस्की माय्होक्ले। 26होटजाट्न न इडीक शैतानै शैतानौ न विरुद्धाङ सोवार झगडा राका डेनाङ होसे टीक्डीस्की माय्होक्ले टर होच्यौ अन्त्य छानार नुङ्ले। 27सुयेर बलीयो भर्मीयो इमाङ नुङार होच्यौ माल्मट्टाको स्याट्की माय्होक्ले, टर होचे होसे बलीयो भर्मीकी पहीला छ्याका डेनाङ होच्यो इमाङ पर्यार माल्मट्टाको स्याट्की य्होक्ले।
28“साँच्ची न ङा नाखुरीककी डेले, भर्मीकुङ पट्ट न पाप र निन्दा क्षमा छान्की य्होक्ले। 29टर पवित्र आत्मौ विरुद्धाङ निन्दा जाट्चकी ही जाट्न र क्षमा माछान्ले। होसे अनन्त पापौ डोसी ठहरीस्ले।” 30होसकै इसे बचन डेया, हीजैडेनाङ “होसे खाटा दुष्ट आत्मा ले” डेयार होखुरीकै डेमन्या।
येशूओ मोइ र भाइको
(मत्ती १२:४६-५०; लुका ८:१९-२१)
31होडीक बेला येशूओ मोइ र भाइको होला टाराहा र बाहीर टोङ्हा अनी होसकोकी आर्घाकी लैडीया।
32भर्मीकुङ भीड होसकुङ वरीपरी ङुमङुम्या र होखुरीकै येशूकी डेया, “ङोस्नी, नाकुङ मोइ र भाइको बाहीर नाकोकी आर्घामन ले।” 33अनी होसकै होखुरीककी जबाफ याछै डेया, “ङौ मोइ र ङौ भाइको सु हो?” 34होटै लहो वरीपरी ङुमङुच भर्मीकी ङोसार होसकै डेया, “ङोस्नी इखुरीक न हो ङौ मोइ र भाइको। 35हीजैडेनाङ सुये परमेश्वरौ इच्छा मन्डीले होखुरीक न ङौ भाइ, बहीनी र मोइ हो।”
Šiuo metu pasirinkta:
मर्कूस 3: EMGP
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2024 (Active), Wycliffe Bible Translators, Inc. All rights reserved.