Fuɗɗoode 1
1
No Laamɗo tagiri huunde fuu
1Gilla fuɗɗoode, Laamɗo tagi kammu e leydi. 2Leydi ndiin walaano sifa, wo ndi ɓoldi. Nimre na huurunoo luggeefi. Ruuhu Laamɗo na weeyannoo dow diyeele. 3Laamɗo wi'i:
— Annoora laatoo!
De annoora laatii.
4Laamɗo tawi annoora oon na wooɗi. Ndeen o senndi annoora oon e nimre. 5O inndiri annoora oon nyalooma, nimre ndeen du, jemma. Hiiri weeti, laatii nyalaande go'aɓerde.
6Laamɗo wi'i:
— Njaayri waɗa hakkunde diyeele ɗeen faa sennda ɗe.
7Laamɗo waɗi njaayri hakkunde ndiyam ngonɗam dow e ngonɗam ley. Ɗum laatorii noon. 8O inndiri njaayri ndiin kammu. Hiiri weeti, laatii nyalaande ɗiɗaɓerde.
9Laamɗo wi'i:
— Ndiyam leyijam ɗaam hawrita nokku gooto faa leydi njoorndi ɓannga.
Ɗum laatorii noon. 10O inndiri njoorndi ndiin leydi, diyeele ɗeen du, maayo. Laamɗo tawi iɗum wooɗi.
11Laamɗo wi'i:
— Leydi funna fungooji: ɗum woni huɗo rimooho aawdi muuɗum e leɗɗe feere feere dimooje aawdi muɓɓen, lekki fuu e sii muuɗum.
Ɗum laatorii noon.
12Leydi funni huɗooji dimooji aawdi muɓɓen, huunde fuu e sii muuɗum. Leydi funni leɗɗe dimooje aawdi muɓɓen, lekki fuu e sii muuɗum. Laamɗo tawi iɗum wooɗi. 13Hiiri weeti, ɗum laatii nyalaande tataɓerde.
14Laamɗo wi'i:
— Annooraaji ngaɗa dow kammu faa ɗi cennda jemma e nyalooma. Ɗi laatoo maandeeji kollooji wakkati iidiiji, e nyalaaɗe e duuɓi. 15Annooraaji ɗiin laatoo pooyngol faa yaynana leydi.
Ɗum laatorii noon. 16Laamɗo waɗi annooraaji ɗiɗi mawɗi, annoora ɓurɗo manngu oon laamoo nyalooma, pamaro oon du laamoo jemma. O waɗi koode du. 17Laamɗo yowi ɗi dow kammu faa ɗi njaynana leydi, 18ɗi laamoo jemma e nyalooma, de ɗi cennda nimre e annoora. O tawi iɗum wooɗi. 19Hiiri weeti, ɗum laatii nyalaande nayaɓerde.
20Laamɗo wi'i:
— Kulle buurɗe jinotooɗe keewa ley ndiyam, pooli du piira dow leydi mbeeya e njaayri kammu.
21O tagi daabaaji mawɗi ley maayo manngo e kulle buurɗe jinotooɗe ley ndiyam, huunde fuu e sii muuɗum. O tagi pooli, ngel hem fuu e sii muuɗum. Laamɗo tawi iɗum wooɗi. 22O barkini ɗi, o wi'i:
— Ndimee, ɗuuɗon, keewon ley diyeele maayo. Pooli du keewa e leydi.
23Hiiri weeti, laatii nyalaande joyaɓerde.
24Laamɗo wi'i:
— Leydi wurtina kulle buurɗe, huunde fuu e sii muuɗum. Daabaaji wuro e ko ladata#1:24 Ko ladata ɗuum ina waawi laataade ko mennyata du. e kulle ladde, ngel hem fuu e sii muuɗum.
Ɗum laatorii noon. 25Laamɗo tagi kulle ladde, ngel hem fuu e sii muuɗum, daabaaji wuro, ngel hem fuu e sii muuɗum, ko ladata e leydi, ngel hem fuu e sii muuɗum. Laamɗo tawi iɗum wooɗi.
26Laamɗo wi'i:
— En taga neɗɗo e alhaali meeɗen, o nannda e meeɗen. O laamoo liƴƴi maayo e pooli piirooji e daabaaji gonɗi e leydi e ko ladata e mayri fuu.
27Laamɗo tagi neɗɗo e alhaali muuɗum. Wo e alhaali makko o tagi neɗɗo oon. Laamɗo tagi ɓe gorko e debbo.
28Laamɗo barkini ɓe, wi'i:
— Ndimee ɓeydoɗon, keewon adunaaru, ndawranon ndu. Laamoɗon liƴƴi maayo e pooli piirooji e kulle buurɗe ladooje e leydi fuu.
29Laamɗo wi'i:
— Mi hokkii on sii huɗooji dimooji aawdi muɓɓen dow leydi e leɗɗe dimooje aawdi muɓɓen fuu. Ɗuum laatanoo on nyaamdu. 30Daabaaji leydi e pooli e ko ladata ko woni dow leydi, ko foofata fuu, mi hokkii ɗum'en huɗooji e haakooji kecci laatoo nyaamdu muɓɓen.
Ɗum laatorii noon.
31Laamɗo ndaari ko golli ɗuum fuu, tawi iɗum wooɗi sanne. Hiiri weeti, laatii nyalaande jeegaɓerde.
Šiuo metu pasirinkta:
Fuɗɗoode 1: FBF
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© SIM International 2012, 2022