Lûke 3
3
Kə̂ mu pö ndə̂ Jâan-Batîse
(Mat 3.1-12; Mar 1.1-8; Jan 1.19-28)
1Lə̂ ngû lə̂ könô gbɛ̂ tchêpâ nə̈ mïndûu nə̈ ndə̂ Tibëre wâ alême gbölö gbïɛ̈, Pônse Pïlâte wâ alême tə̂ goverenëre pâ cho ndə̂ Judë. Hërôde wâtə̂ kömändâ pâ cho ndə̂ Galilë, ânyë yîngâ yê Fïlîpe wâtə̂ kömändâ pâ cho ndə̂ Iturë la Träkönîte. Lïzänïâse wâtə̂ kömändâ pâ cho ndə̂ Äbïlêne. 2Lə̂ ngû nə̈ lâme, Hâne la Käyîfu wä ndjë alême tə̂ agbölö a-earə̂ kə̂ wa ngela sə̈ Ndjapä, ânyë Ndjapä zâ pö sə̈ Jâan modô ndə̂ Zakarï, bhâlə̂ kpaɛ̈gâ ndə̂kə̂ to rə̂ sə̈ azü. 3Jâan ê kulə̂ agö ndə̂ âwâ ndola ngû ndə̂ Jurudɛ̈n. Tche ë lakə̂ mu pö sə̈ azü päkëdə̂: «Nyë gbötə̂ bəndɨ kə̂ mbo rə ndə̂ nyê, kə̂ gbo batɛ̂me, Ndjapä ko pö lə̂ küma nyê!»
4Rə lâme wütu gundə̂sə̂ nə̈ ndə̂ Ezayï earə̂ ndə̂ma Ndjapä mbô rə̂ lə̂ mbëtï dokʉ̈tchê alême päkëdə̂:
«Ngâ akrə ön bhâlə̂ kpaɛ̈gâ päkëdə̂:
Nyë nyïkrə köbo Gbölö Gbïɛ̈,
nyë nyïkrə aköbo yê ngbêwôn-ë!
5Akudû gbɛ̂ ndə̂ âwâ lə̂ köbo,
a âmeadje rə̂,
aga la akoto gbɛ̂,
a ândjoadje tchə̂lə̂ nə̈ âwa kpalakata.
Ângôlê-ngölë köbo,
a ânyikrəadje rə̂.
Aköbo ndə̂ âwâ la täme,
a â-uadje atäme nə̈
ânyë köbo nə̈ nyikrətə̂ yê.
6Käko ânyë azü gbɛ̂ wun-adje
kə̂ tcha tchô ndə̂ Ndjapä.»
7Angbängbä kpûlû azü nə̂ pu Jâan ndə̂kə̂ gbo batɛ̂me. Tche tô rə̂ sə̈ andjê päkëdə̂: «Nyënyê ndə̂ nyë wâtə̂ akângê âtə! Tchabâ kä ndə̂ ânyîsə̂ nə̈ sə̈ nyê päkëdə̂ nyë kpe wa mêrâ ndə̂ Ndjapä ndə̂ ânə lâme? 8Nyë mbö rə ndə̂ ânyîsə̂ nə̈ pä nyë gbôtə̂ bəndɨ kə̂ mbo rə ndə̂ nyê nə̂. Nyë jëäbô jêtə̂ kə̂ to rə̂ bhâtə̂ su nyê päkëdə̂: ‹Abrahâmo də̈ bha ârâ!› Bëte më tö rə̂ sə̈ nyê päkëdə̂, atäme ndə̂ nyê wun rə̂ âtə, Ndjapä kä la gbôgbô ndə̂kə̂ mbo rə̂ pä ädotə̂ yê tə̂ abechë ndə̂ Abrahâmo. 9Dekâ kä tchêtchêtchê ndə̂kə̂ de ada yö la chëchë nə̈ gbɛ̂. Ayö gbɛ̂ ndə̂ âlêâbô atchôtchô lêlê nə̈ lê-ê, a âdeadje rə̂ kə̂ yi rə̂ bhâlə̂ wo.»
10Akpûlû azü nə̈ yû Jâan päkëdə̂: «Giamâ kä ndə̂ ârâ wâ ndə̂kə̂ mbo rə̂?» 11Jâan tô rə̂ sə̈ andjê päkëdə̂: «Akrə ndə̂ tche wâ la lə̂ba bïchuû, äwäpä tche za ngânə̈ sə̈ akrə ndə̂ tche wâbô wâ la rə̂-ê. Akrə ndə̂ tche wâ la kɨ̈zɨ̂, äwäpä tche za ngânə̈ sə̈ akrə ndə̂ tche wâbô wâ la rə̂-ê.»
12Azü ndə̂ andjë pala makətche-lapöo nə̂ ndjë ndə̂kə̂ gbo batɛ̂me, andjë yû Jâan päkëdə̂: «Earə̂ kə̂ nyisə̂ rə, giamâ kä ndə̂ ârâ wâ ndə̂kə̂ mbo rə̂?» 13Jâan tô rə̂ sə̈ andjê päkëdə̂: «Nyë yüäbô kû rə yû âropâ anə̈ ndə̂ ndïɛ̈ nyîsə̂ nə̈-ê.»
14Aturûgu yû ndjë tchë päkëdə̂: «Ânyë andə̂ ârâ nə̈? Giamâ kä ndə̂ ârâ wâ ndə̂kə̂ mbo rə̂?» Tche tô rə̂ sə̈ andjê päkëdə̂: «Nyë zäbô makətche ndə̂ akrə zâ la gbôgbô-ê, kə̂ yiabô pö yî lə̂ küma akrə ndə̂kə̂ kʉ makətche ndə̂ yê-ê, äwäpä nyë za su nyê kütû tə̂ makətche-kua ndə̂ nyê.»
15Batə̂ rə̂ ndə̂ azü nə̈ gbɛ̂ sə̂ lakə̂ krʉ bëte Krîsiti, andjë sə̂ lakə̂ yutə̂ andjê päkëdə̂: «Jâan kä ndə̂ âdə̂ Krîsiti nə̈.» 16Jâan tô rə̂ sə̈ andjê gbɛ̂ päkëdə̂: «Mëmê, më zä kütû batɛ̂me ndə̂ ngû sə̈ nyê. Ngâ akrə ndə̂ tche wâ la gbôgbô kə̈ rô mê nəadje. Më ndôâbo la sə̂ yê ndə̂kə̂ zu wû dakpo tə̂ da yê-a. Tchê zadje batɛ̂me ndə̂ Kpɨ̂ki Yingö la andə̂ wo sə̈ nyê. 17Tche kä la tchëkrɨ̈ tchânə̂ yê ndə̂kə̂ pe tchə̂lə̂ rəgʉ ndə̂ yê lakə̂ rʉa akrətche nə̈ lə̂ andjî rəgʉ nə̈. Tchê paladje andjî rəgʉ ndə̂ yê gbɛ̂ kə̂ kʉ rə̂ bhâlə̂ gro ndə̂ yê. Praâbalë tchê paladje akrətche nə̈ kə̂ to wo ëtâ, wo nə̈ də̈ wo ndə̂ âwâbô wâ ndə̂kə̂ wrʉ-ê.»
18Jâan tö angâ apö tə̂ gbölösə̂nə̈ ndə̂kə̂ za gbôgbô tə̂ su azü, lakə̂ nyisə̂ Tchôtchô Pö sə̈ andjê.
19Praâbalë Jâan hrô tə̂ gbölösə̂nə̈ la Hërôde ndə̂ tche wâtə̂ goverenëre pâ cho ndə̂ Galilë, bëte rə̂ ndə̂ tche tô Hërödîâde tchânə̂ yîngâ yê, ndjë bëte rə̂ ndə̂ tche mbô angâ angbongbo arə tə̂ gbölösə̂nə̈. 20Käko Hërôde kä mbô ngâ ngbongbo rə ndə̂ ârô masə̂nə̈, tche zâ Jâan kə̈ yî tchë bhâlə̂ nda kângâ.
Batɛ̂me ndə̂ Jezü
(Mat 3.13-17; Mar 1.9-11)
21Ndə̂ azü gbɛ̂ gbô batɛ̂me, Jezü gbɛ̂ nə̂ ndjë ndə̂kə̂ gbo rə̂. Sə̂nə̈ ndə̂ Jezü âsə̈ to pö sə̈ Ndjapä, manda tchêlafô krô-ê, 22Kpɨ̂ki Yingö jrê pâ yê batə̂ grôgrô puli. A djê tchə̂lə̂ ngâ gɨ̈ bhâ lafô päkëdə̂: «Mo də̈ Modô ndə̂ mê ndə̂ më nyîndə̂ zə̈ tə̂ gbölösə̂nə̈, su mê fü la mö gbɛ̂.»
Araâta Jezü
(Mat 1.1-17)
23Ndə̂ Jezü jêtə̂ kə̂ mbo kua ndə̂ yê, tche wä alême la ngû ndola tə̂ akrə gbɛ̂ la lə̂ könô gbɛ̂. Azü wûntî pä tche wätə̂ modô ndə̂ Jozêfu, ndə̂ tche wâtə̂ modô ndə̂ Helï. 24Helï wätə̂ modô ndə̂ Matä, Matä wâtə̂ modô ndə̂ Levï, Levï wâtə̂ modô ndə̂ Melekï, Melekï wâtə̂ modô ndə̂ Janayï, Janayï wâtə̂ modô ndə̂ Jozêfu, 25Jozêfu wâtə̂ modô ndə̂ Mätätîâse, Mätätîâse wâtə̂ modô ndə̂ Ämôse, Ämôse wâtə̂ modô ndə̂ Nähûme, Nähûme wâtə̂ modô ndə̂ Eselï, Eselï wâtə̂ modô ndə̂ Nagayï, 26Nagayï wâtə̂ modô ndə̂ Mähâte, Mähâte wâtə̂ modô ndə̂ Matatiä, Matatiä wâtə̂ modô ndə̂ Chemeyɛ̈n, Chemeyɛ̈n wâtə̂ modô ndə̂ Jösêke. Jösêke wâtə̂ modô ndə̂ Jodä.
27Jodä wâtə̂ modô ndə̂ Yohanä, Yohanä wâtə̂ modô ndə̂ Resä, Resä wâtə̂ modô ndə̂ Zöröbäbêle, Zöröbäbêle wâtə̂ modô ndə̂ Chëälätïyêle, Chëälätïyêle wâtə̂ modô ndə̂ Nerï, 28Nerï wâtə̂ modô ndə̂ Melekï, Melekï wâtə̂ modô ndə̂ Adï, Adï wâtə̂ modô ndə̂ Kösâme, Kösâme wâtə̂ modô ndə̂ Ëlëmädâme, Ëlëmädâme wâtə̂ modô ndə̂ Êre, 29Êre wâtə̂ modô ndə̂ Jezü, Jezü#3.29 Jezü nə̈ âtə wâbo tə̂ modô ndə̂ Ndjapä-a. wâtə̂ modô ndə̂ Eliezëre, Eliezëre wâtə̂ modô ndə̂ Jörîme, Jörîme wâtə̂ modô ndə̂ Matä, Matä wâtə̂ modô ndə̂ Levï. 30Levï wâtə̂ modô ndə̂ Simeyön, Simeyön wâtə̂ modô ndə̂ Judä, Judä wâtə̂ modô ndə̂ Jozêfu, Jozêfu wâtə̂ modô ndə̂ Jönâme, Jönâme wâtə̂ modô ndə̂ Ëlïäkîme.
31Ëlïäkîme wâtə̂ modô ndə̂ Meleä, Meleä wâtə̂ modô ndə̂ Menä, Menä wâtə̂ modô ndə̂ Matatä, Matatä wâtə̂ modô ndə̂ Natän, Natän wâtə̂ modô ndə̂ Davîdi, 32Davîdi wâtə̂ modô ndə̂ Jesë, Jesë wâtə̂ modô ndə̂ Öbêde, Öbêde wâtə̂ modô ndə̂ Böâze, Böâze wâtə̂ modô ndə̂ Selä, Selä wâtə̂ modô ndə̂ Nasön, 33Nasön wâtə̂ modô ndə̂ Ämïnädâbo, Ämïnädâbo wâtə̂ modô ndə̂ Ädïmîne, Ädïmîne wâtə̂ modô ndə̂ Arinï, Arinï wâtə̂ modô ndə̂ Eserön, Eserön wâtə̂ modô ndə̂ Përêse, Përêse wâtə̂ modô ndə̂ Judä, 34Judä wâtə̂ modô ndə̂ Jakôbo, Jakôbo wâtə̂ modô ndə̂ Izâke, Izâke wâtə̂ modô ndə̂ Abrahâmo, Abrahâmo wâtə̂ modô ndə̂ Terä, Terä wâtə̂ modô ndə̂ Nähôre. 35Nähôre wâtə̂ modô ndə̂ Sërûge, Sërûge wâtə̂ modô ndə̂ Rewü, Rewü wâtə̂ modô ndə̂ Pëlêge, Pëlêge wâtə̂ modô ndə̂ Ebëre, Ebëre wâtə̂ modô ndə̂ Chelä, 36Chelä wâtə̂ modô ndə̂ Kënâme, Kënâme wâtə̂ modô ndə̂ Äräpäkäsâde, Äräpäkäsâde wâtə̂ modô ndə̂ Sême, Sême wâtə̂ modô ndə̂ Nowë, Nowë wâtə̂ modô ndə̂ Lëmêke, 37Lëmêke wâtə̂ modô ndə̂ Mätüsälême, Mätüsälême wâtə̂ modô ndə̂ Hënôke, Hënôke wâtə̂ modô ndə̂ Yërêde, Yërêde wâtə̂ modô ndə̂ Mähälälêle, Mähälälêle wâtə̂ modô ndə̂ Kenän, 38Kenän wâtə̂ modô ndə̂ Ënôse, Ënôse wätə̂ modô ndə̂ Sête, Sête wâtə̂ modô ndə̂ Adâme, Adâme wâtə̂ modô ndə̂ Ndjapä.
Šiuo metu pasirinkta:
Lûke 3: lnl
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Wycliffe Bible Translators, Inc.