Lûke 2
2
Pö ndə̂kə̂ zɨ Jezü
(Mat 1.18-25)
1Lo nə̈ lâme, gbölö gbïɛ̈ Sezäre Ogûste zâma ndə̂kə̂ pa a mbo rə̈ azü gbɛ̂ lə̂ agö ndə̂ yê gbɛ̂ lə̂ mbëtï ndə̂kə̂ wunsə̂ kə̂ ngba ndə̂ andjê. 2Dokʉ̈ kə̂ mbo rə̈ lə̂ mbëtï kä, äwä sə̂nə̈ ndə̂ Kïrïnûs wâtə̂ goverenëre ndə̂ gö ndə̂ Sirï. 3Azü balë balë gbɛ̂ ê ndə̂kə̂ mbo rə̈ andjê lə̂ mbëtï lə̂ gö ndə̂ andjê la tə̂ andjê. 4Jozêfu âlafô ndjë bhâ Näzärête ndə̂ âwâtə̂ ngâ gö ndə̂ Galilë ndə̂kə̂ e atə̂ Bêtelehêmo ndə̂ âwâtə̂ ngâ gö ndə̂ Judë, sə̂ tchô ndə̂ a zɨ̂ gbïɛ̈ Davîdi tâ. Bëte tchetchë ndə̂ Jozêfu, tche wä pâ mawo ndə̂ Davîdi. 5Jozêfu ê ndə̂kə̂ mbo rə̈ yê lə̂ mbëtï, tchetchë la Malê, ɛ̈chë ndə̂ tche sə̂ lakə̂ nə ngbâ yê, dëkë Malê kä la güzu. 6Ndə̂ andjë sə̂ bhâ Bêtelehêmo, lö nə̈ tâ tâ ndə̂kə̂ pa Malê zɨ. 7Tche zɨ̂ dokʉ̈ bechë ndə̂ yê tə̂ köchë, kə̈ gʉ̂â tchë la lə̂ba, kə̈ zâ tchë lə̂ ngâ rə ndə̂ agia zɨ rə lə̂nə̈, bëte sə̂ ngâ tchô ndə̂kə̂ pa andjë lo tâ lə̂ nda ndə̂ ayirə wâbo-a.
Ânje tö pö ndə̂ Jezü sə̈ a-earə̂ kə̂ bata aɛ̈bro-ngbaga
8Lə̂ tchô nə̈ lâme, a-earə̂ kə̂ bata aɛ̈bro-ngbaga sə̂ bhâlə̂ güsü lə̂ bütchî lakə̂ bata aɛ̈bro-ngbaga ndə̂ andjê. 9Ngâ ânje ndə̂ Gbölö Gbïɛ̈ wûtu ëtə̂ andjê, golowäre ndə̂ Gbölö Gbïɛ̈ tâ pâ andjê. Wawa mbô andjê tə̂ gbölösə̂nə̈. 10Praâbalë ânje nə̈ tô rə̂ sə̈ andjê päkëdə̂: «Wa mböäbô nyê mbô-ê, bëte më nə̈ la tchôtchô pö, ndə̂ âzadje mômô tə̂ su azü gbɛ̂. 11Angêta âtə lə̂ gö ndə̂ Davîdi, a zɨ̂ earə̂ kə̂ tcha nyê nə̂. Tche də̈ Krîsiti, Gbölö Gbïɛ̈. 12Rə ndə̂ nyê wunsə̂ yê la rə̂ wä kâkë: Nyê gboadje ngâ ngbelɛ̂ bechë ndə̂ a zɨ̂ tchë, kə̈ gʉ̂â tchë la lə̂ba, tche kä lakə̂ lo lə̂ ngâ rə ndə̂ agia zɨ rə lə̂nə̈.»
13Kpro kâkë angbängbä aânje tchêlafô jrê ëtə̂ kʉ̂tê ânje lâme, andjë sə̂ lakə̂ voga Ndjapä lakə̂ to rə̂ päkëdə̂:
14«Azə̈ vöga Ndjapä ndə̂ tche sə̂ bhâ lafô,
zɨtɨ su wä bêche âtə bëte azü ndə̂ tche nyîndə̂ andjê!»
A-earə̂ kə̂ bata aɛ̈bro-ngbaga ë ndə̂kə̂ wun Jezü
15Ndə̂ aânje nə̈ gbôtə̂ a-earə̂ kə̂ bata aɛ̈bro-ngbaga nə̈ ânyë kə̈ gû atə̂ lafô, a-earə̂ kə̂ bata aɛ̈bro-ngbaga lâme tô rə̂ lə̂ gbâtə̂ andjê päkëdə̂: «Azə̈ êë zoo bhâ Bêtelehêmo, kə̈ wûn rə ndə̂ âwûtu bhâye, ndə̂ Gbölö Gbïɛ̈ nyîsə̂ nə̈ sə̈ azə̂ lâme.» 16Andjë ê wândâ wändä kə̈ gbô Malê la Jozêfu, la ngbelɛ̂ bechë nə̈ ndə̂ tche lô lə̂ ngâ rə ndə̂ agia zɨ rə lə̂nə̈. 17Ndə̂ a-earə̂ kə̂ bata aɛ̈bro-ngbaga lâme âsə̈ wun ngbelɛ̂ bechë nə̈, andjë tô tchêngbâ pö ndə̂ ânje tô rə̂ pâ yê. 18Azü gbɛ̂ ndə̂ andjë djê pö ndə̂ a-earə̂ kə̂ bata aɛ̈bro-ngbaga lâme, tchə̂lə̂ küma andjê gbɛ̂ djîngɨli. 19Andə̂ Malê, tche bâta rə̂ lə̂ su yê lakə̂ za küma yê tâ. 20Ndə̂ a-earə̂ kə̂ bata aɛ̈bro-ngbaga lâme sə̂ lakə̂ gu lə̂ köbo, andjë sə̂ lakə̂ lusə̂ Ndjapä lakə̂ voga tchë, bëte rə gbɛ̂ ndə̂ andjë djê rə̂ ânyë kə̈ wûn rə̂, âmbô batə̂ rə̂ ndə̂ ânje nə̈ tô rə̂ sə̈ andjê dokʉ̈tchê.
A zä rə̈ pâ Jezü
21Lö mïndûu manə̈ vötaâ pânə̈, andjë wâ bechë nə̈ la gasa, kə̈ zâ rə̈ pâ yê pä Jezü, bëte ânje nyïsə̂ rə̈ lâme dokʉ̈tchê ndə̂kə̂ pa Malê za güzu.
A zä Jezü sə̈ Ndjapä
22Pânə̈ ndə̂ Malê zɨ̂, lo nə̈ tâ tâ ndə̂kə̂ pa a djutu kâkpö ndə̂ andjê batə̂ rə̂ ndə̂ ndïɛ̈ ndə̂ Möyîze#2.22 Nyë dɨ̈ Lev 12.3,6. yûkû nə̈, käko andjë ê la Jezü atə̂ Jerûzalêmo ndə̂kə̂ za tchë sə̈ Gbölö Gbïɛ̈. 23Bëte ndïɛ̈ ndə̂ Gbölö Gbïɛ̈ tö rə̂ päkëdə̂: «Dokʉ̈ bechë tə̂ köchë ndə̂ a zɨ̂ tchë, äwäpä a za tchë ngbî bëte Gbölö Gbïɛ̈#2.23 Nyë dɨ̈ Eki 13.2,12. .» 24Jozêfu la Malê wâ ndjë ngela batə̂ rə̂ ndə̂ ndïɛ̈ ndə̂ Gbölö Gbïɛ̈ yûkû nə̈: Äwäpä a kʉ apuli bïchuû, âdəndjë agroô bïchuû#2.24 Nyë dɨ̈ Lev 12.8..
25Ngâ köchë alême kädje bhâ Jerûzalêmo, rə̈ yê wü pä Simeyön. Köchë lâme wätə̂ djîrə̂ akrə, kə̈ kpê wa Ndjapä. Tche sə̈ bëte akrə ndə̂ tche nə ndə̂kə̂ tro ngûla azü ndə̂ Isarayële. Kpɨ̂ki Yingö kä pâ yê. 26Kpɨ̂ki Yingö tö rə̂ sə̈ tchë päkëdə̂, tchê tchuabô tee-a, zoo kə̂ wun Krîsiti ndə̂ Gbölö Gbïɛ̈ wan tchë. 27Kpɨ̂ki Yingö tôngo tchë atə̂lə̂ gbölö nda Ndjapä. Ndə̂ bha Jezü la anyï nə̈ ê la tchë ndə̂kə̂ pa a mbo rə ndə̂ ndïɛ̈ yûkû nə̈ tə̂ yê, 28Simeyön zâ tchë ëtchânə̂ yê, kə̈ zâ ayîabâ sə̈ Ndjapä, ânyë kə̈ tô rə̂ päkëdə̂:
29«Angaâtə Gbölö Gbïɛ̈,
Äwäpä mo gbotə̂ earə̂ kua ndə̂ zə̈ tche tchu la zɨtɨ su,
gundə̂sə̂ pö ma zə̈.
30Bëte mê wûn earə̂ kə̂ tcha azü ndə̂ mo wân tchë la lala mê nə̂,
31ndə̂ mo nyîkrə tchë tchâtchu azü gbɛ̂.
32Tche wätə̂ ngbänga ndə̂kə̂ nyisə̂ zə̈ sə̈ azü pâ cho âtə gbɛ̂,
ânyë a lusə̂ Isarayële, azü ndə̂ zə̈.»
Simeyön tö ndə̂ma Ndjapä
33Tchə̂lə̂ küma Bha la anyï Jezü djîngɨli tə̂ pö ndə̂ Simeyön tô rə̂ pâ Jezü. 34Simeyön ê tchôtchô pö pâ andjê, kə̈ tô rə̂ sə̈ Malê anyï Jezü päkëdə̂: «Ndjapä zä bechë âtə ndə̂kə̂ pa lə̂ köbosə̂ yê angbängbä azü ndə̂ Isarayële te, ânyë angânə̈ alafô. Tche âwa me tə̂ ngâ sɨ̂nyî rə ndə̂ Ndjapä, praâbalë azü koadje sə̂nə̈, 35käko ânyë pö bhâtə̂ su azü wutu gbɛ̂ kraâ ësûwu. Âdə andə̂ zə nə̈ Malê, käkä nə̈ âkadje mö batə̂ besala ndə̂ a sû mö la rə̂.»
Âna wätə̂ earə̂ ndə̂ma Ndjapä
36Ngâ ɛ̈chë kä tâ ndə̂ tche to ndə̂ma Ndjapä, rə̈ yê wü pä Âna. Tche də̈ ɛ̈wünrə ndə̂ Fanuwɛ̈le, pâ mawo ndə̂ Asëre. Tche dû nə̂. Ndə̂ tche tô köchë lə̂ bechë-ɛ̈chë tə̂ yê, andjë mbô ngû mïndûu manə̈ bïchuû. 37Pânə̈ köchë nə̈ tchû tə̂ yê. Tche wä la ngû tə̂ azü voanə̈ la tchêpâ nə̈ voanə̈. Logbɛ̂ tche kä kütû bhâlə̂ gbölö nda Ndjapä. Tchə̂lə̂ bütchî la tchêdalo, tche mbö kua ndə̂ Ndjapä, tche kösə̂ kɨ̈zɨ̂, kə̂ to pö sə̈ Ndjapä. 38Kpôtə̂ lo nə̈ lâme, tchetchë ndjë gbɛ̂ tche wûtu, kə̈ sə̂ lakə̂ za ayîabâ sə̈ Ndjapä. Tche tô pö ndə̂ bechë nə̈ sə̈ azü gbɛ̂, ndə̂ andjë sə̂ bëte lo nə̈ ndə̂ Ndjapä ji azü ndə̂ Jerûzalêmo lə̂ yûkü.
Bha la anyï Jezü dôtə̂ andjê la Jezü atə̂ Näzärête
39Ndə̂ bha Jezü la anyï nə̂ mbô rə gbɛ̂ ndə̂ ndïɛ̈ ndə̂ Ndjapä yûkû nə̂, andjë dôtə̂ andjê atə̂ Näzärête ndə̂ âdə̂ ngâ gö ndə̂ Galilë, gö ndə̂ andjê. 40Âdə andə̂ bechë nə̈, tche kʉ̂che kə̈ kpôkpo tə̂ yê. Küma yê wâ lanə̈ tə̂ gbölösə̂nə̈, ânyë tchôtchô su ndə̂ Ndjapä kä pâ yê.
Jezü wä la ngû 12, kə̈ lî atə̂lə̂ gbölö nda Ndjapä
41Lə̂ ngû balë balë, bha Jezü la anyï nə̈ ë atə̂ Jerûzalêmo bëte kpülü ndə̂ Pâke ndə̂ ajuîfu. 42Ndə̂ Jezü wâ la ngû lə̂ könô gbɛ̂ tchêpâ nə̈ bïchuû, tchetchë la anyï nə̈ la bha nə̈ andjë ê ndə̂ kpülü nə̈ batə̂ rə̂ ndə̂ ndïɛ̈ ndə̂ ajuîfu yûkû nə̈. 43Ndə̂ kpülü nə̈ kâ, bha Jezü la anyï nə̈ gû gutə̂. Jezü sə̂ andə̂ yê nə̂ po bhâ Jerûzalêmo. Bha nə̈ la anyï nə̂ wûn-âbo sə̂nə̈-a. 44Andjë wûntî pä Jezü kä lə̂ gûtə̂ angâ andjê ndə̂ andjë pâla la andjê pâ köbo nə̈. Andjë mbô lö balë lə̂ köbo. Pânə̈ andjë jêtə̂ kə̂ pu tchë lə̂ gûtə̂ arə̂mâ ndə̂ andjê la araagü andjê. 45Praâbalë andjë gbôâbo tchë-a, ânyë kə̈ dôtə̂ andjê lakə̂ pu tchë bhâ Jerûzalêmo. 46Lə̂ vötaâ lö nə̈, andjë gbô tchë lə̂ gbölö nda Ndjapä, dëkë tche sə̂ nə̂ lə̂ gûtə̂ agbölö a-earə̂ kə̂ nyisə̂ ndïɛ̈. Tche kä lakə̂ dje andjê lakə̂ yu andjê la pö. 47Azü gbɛ̂ ndə̂ andjë djê tchë, tchə̂lə̂ küma andjê djîngɨli tə̂kə̂ wunsə̂ rə ndə̂ yê, lakə̂ to tchêngbâ pö ndə̂ tche to rə̂ sə̈ andjê. 48Ndə̂ bha Jezü la anyï nə̈ âsə̈ wun tchë, tchə̂lə̂ küma andjê djîngɨli, anyï nə̈ tô rə̂ sə̈ tchë päkëdə̂: «Modô ndə̂ mê, bëte giamâ mo mbô tə̂ ârâ kâkë? Bha zə̈ la mëmê, su ârâ wä ngbɨ̂ɨ̂ ngbâ zə̈ lakə̂ pu mö.» 49Jezü tô rə̂ sə̈ andjê päkëdə̂: «Nyë pü mê bëte giamâ? Nyë wûn-âbo sə̂nə̈ pä, äwäpä më sə lə̂ nda ndə̂ Bha mê?» 50Praâbalë bha nə̈ la anyï nə̈ djêâbo tchə̂lə̂ pö nə̈ ndə̂ tche tô rə̂ lâme-a.
51Pânə̈ Jezü dôtə̂ yê la andjê atə̂ Näzärête. Tche djê ma bha nə̈ la anyï nə̈. Rə gbɛ̂ ndə̂ âwûtu lâme, anyï nə̈ bâta rə̂ tə̂ su yê. 52Jezü kʉ̂che, ânyë küma yê ndə̂ âwâ lanə̈ sə̂ lakə̂ gêgë, ânyë kə̂ mbo rə ndə̂ yê fû tə̂ Ndjapä la azü gbɛ̂.
Šiuo metu pasirinkta:
Lûke 2: lnl
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Wycliffe Bible Translators, Inc.