Lûke 14
14
Jezü tchä ngâ earə̂ tə̂kömbô
1Lə̂ ngâ lö sabäa, Jezü ê bhândə̂ ngâ makündji ndə̂ afarizïɛ̈n ndə̂kə̂ zɨ kɨ̈zɨ̂. Azü ndə̂ andjë sə̂ bhâye sə̂ lakə̂ cheko Jezü gbôô. 2Ngâ köchë ndə̂ ngbêɛ̂ngbâ mbo tchë krʉ̂ tchâtchu yê. 3Jezü zâ pö, kə̈ yû a-earə̂ kə̂ nyisə̂ ndïɛ̈ la afarizïɛ̈n päkëdə̂: «Nyë tö rə̂ sə̈ mê, ndïɛ̈ ndə̂ azə̂ zä köbo ndə̂kə̂ pa a tcha akrə lə̂ lö sabäa? Âdəndjë rə̂ ndə̂ ndïɛ̈ zâbo köbo ndə̂kə̂ mbo tâ käko-a.» 4Praâbalë andjë sə̂ lə̂ wûtû nə̈. Jezü zâ earə̂ tə̂kömbô nə̈, kə̈ tchâ tchë, kə̈ tô rə̂ sə̈ tchë päkëdə̂: «Gûgü etə̂.» 5Pânə̈ Jezü tô rə̂ sə̈ andjê päkëdə̂: «Âdə ngâ akrə lə̂ gbâtə̂ nyê âwa la modô ndə̂ yê, âdəndjë bâgala ndə̂ yê ndə̂ tche tê lə̂ kudû-ngû, tchê gbɨabô tchë tee posə̂nə̈ ësûwu lə̂ lö sabäa?» 6Köbo ndə̂kə̂ pa andjë to ngâ pö balë ndə̂ pö lâme wâbo-a.
Nyë sə̈äbô sə̂ lə̂ ngendë ndə̂ agbölö azü-î
7Jezü wûn rə̂ ndə̂ azü ndə̂ a ê andjê ndə̂kə̂ zɨ rə, nə̂ kə̈ sə̂ lə̂ angendë ndə̂ agbölö azü, tche tô ndoka âtə sə̈ andjê päkëdə̂: 8«Âdə akrə âe mö ndə̂ kɨ̈zɨ̂ lə̂ kpülü ndə̂kə̂ totə̂ ndə̂ köchë la ɛ̈chë, âwâbo pä mo sə lə̂ ngendë ndə̂ agbölö azü-a. A wûn-âbo sə̂ ngâ rə-a, akrə ndə̂ tche ê mö ndə̂ kpülü lâme, tche ê ndjë ngâ akrə ndə̂ sə̂ yê lû kə̈ rô mö. 9Akrə ndə̂ tche ê nyê lâme, tche nə kə̂ to rə̂ sə̈ mö päkëdə̂: ‹Amö alafô, kə̂ gbotə̂ tchô nə̈ sə̈ akrə ndə̂ sə̂ yê lû lâme.› Mo âalafô me la ganô kə̂ e ndə̂kə̂ sə dəngbânə̈. 10Praâbalë âdə ngâ akrə âe mö ndə̂kə̂ zɨ kɨ̈zɨ̂, äwäpä mo sə bhângbâ nə̈, ndə̂kə̂ pa tche ânə nə̂, kə̂ to rə̂ sə̈ mö päkëdə̂: ‹Agü mê, amö nə kə̂ sə lə̂ ngendë ndə̂ agbölö azü.› Käko sə̂ zə̈ luadje lə̂ la azü gbɛ̂ ndə̂ nyê zɨ rə la andjê. 11Bëte akrə ndə̂ tche mbôtə̂ yê gbölö, a âmboadje tchë tche wa kpîɛ̂kpîɛ̂ rə̂, ânyë akrə ndə̂ tche mbôtə̂ yê kpîɛ̂kpîɛ̂ rə̂, a âmboadje tchë tche wa gbölö.»
12Pânə̈ Jezü tô rə̂ sə̈ akrə ndə̂ tche ê tchë ndə̂ kɨ̈zɨ̂ lâme päkëdə̂: «Âdə mo ânyikrə kɨ̈zɨ̂ ndə̂ tchêdalo, âdəndjë andə̂ tchêndə̂gölo, amö eabô araagü zə̈ ê, kə̂ eabô azü pâ mawo ndə̂ zə̈ ê, kə̂ eabô arə̂mâ ndə̂ zə̈ ê, âdəndjë azü ndrotə̂ nda ndə̂ zə̈ ndə̂ rə ndə̂ andjê wâ tâ; bëte tə̂ngâlo, andjë âe ndjë mo ndə̂ kɨ̈zɨ̂ bhândə̂ andjê, käko dâkâ ndə̂ mo mbô rə̂ lâme, kä ndə̂ andjë gï rə̂ sə̈ mö ëngbânə̈. 13Praâbalë âdə mo âmbo kɨ̈zɨ̂ kpülü, äwäpä mo e a-earə̂ yûkü, azü ndə̂ tchâme-tə̂ andjê ngêwele, azü ndə̂ ngâ da andjê ndɨ̂, la a-earə̂ föla. 14Mo âwa me la mômô bëte andjê giabô rə ndə̂ zə̈ sə̈ mö ëngbânə̈ tee-a. Ndjapä âgiadje rə̂ sə̈ mö ëngbânə̈, tə̂ lo nə̈ ndə̂ adjîrə̂ azü joadje lə̂ kuzü.»
Pö ndə̂ gbölö kpülü
(Mat 22.1-10)
15Ndə̂ andjë djê pö lâme, ngânə̈ balë lə̂ gûtə̂ azü ndə̂ andjë zɨ̂ rə nə̈ tô rə̂ sə̈ Jezü päkëdə̂: «Mômô kä tə̂ akrə ndə̂ tche zɨ̂ kɨ̈zɨ̂ ndə̂ yê bhâlə̂ Gbölö gö-gbïɛ̈ ndə̂ Ndjapä!» 16Jezü tô rə̂ sə̈ tchë päkëdə̂: «Ngâ köchë mbö ngâ gbölö kpülü, kə̈ ê angbängbä azü ndə̂nə̈. 17Lə̂ dalo ndə̂kə̂ zɨ kɨ̈zɨ̂ nə̈, tche wân earə̂ kua ndə̂ yê ndə̂kə̂ to rə̂ sə̈ azü ndə̂ a ê andjê ndə̂ kpülü nə̈ lâme päkëdə̂: ‹Nyë nə̈ atâ; bëte a nyîkrə rə gbɛ̂ bëte nyê nə̂.› 18Praâbalë azü nə̈ balë balë gbɛ̂ sə̂ lakə̂ to dju nə̈ ndə̂ andjë nyîâbô nyîndə̂ kə̂ nə-ê. Dokʉ̈ akrə nə̈ tô rə̂ sə̈ earə̂ kua nə̈ päkëdə̂: ‹Më yö ngâ kɨ̈ndɨ̈, äwäpä më e ndə̂kə̂ wun rə̂, më zä da zə̈! Mê nəabô tee-a.› 19Ngânə̈ tô rə̂ sə̈ tchë päkëdə̂: ‹Më yö abâgala lə̂ könô gbɛ̂, më âe ndə̂kə̂ jetə̂ kua la andjê. Më zä da zə̈! Mê nəabô tee-a.› 20Ngânə̈ kä tô rə̂ päkëdə̂: ‹Më tö ɛ̈chë angaâtə; bëte rə̂ kä ndə̂ mê eabô tee-a.› 21Earə̂ kua nə̈ dôtə̂ yê, kə̈ tô ndə̂ma andjê gbɛ̂ sə̈ gbölö akrə ndə̂ yê. Gbölö akrə nə̈ djê pö lâme, tchə̂lə̂ yê kʉ̂ tchë, tche tô rə̂ sə̈ earə̂ kua ndə̂ yê päkëdə̂: ‹Amö êë gasa bhâsə̂ tchô ndə̂ azü pala tchê tə̂ andjê tâ, ndjë lə̂ ayɛ̈yɛ̈ köbo, kə̂ e a-earə̂ yûkü, azü ndə̂ ngâ tchâme-tə̂ andjê ndɨ̂, a-earə̂ föla, la azü ndə̂ ngâ da andjê ndɨ̂.› 22Pânə̈ earə̂ kua nə̈ kângbâ yê, kə̈ tô rə̂ päkëdə̂: ‹Gbölö akrə, ârâ mbô rə gbɛ̂ ndə̂ mo tô pö ndə̂nə̈ lâme nə̂, gbô adɨ̂ tchô kä po.› 23Käko gbölö akrə nə̈ tô rə̂ sə̈ earə̂ kua ndə̂ yê nə̈ päkëdə̂: ‹Êë kulə̂ ayɛ̈yɛ̈ köbo, kupâ agbadja, kə̂ e azü, kə̂ to rə̂ sə̈ andjê la gbôgbô pä andjë lîlï ndə̂kə̂ pa tchâalê nə̈ sɨ. 24Më tö rə̂ sə̈ nyê: Ngâ akrə balë lə̂ gûtə̂ azü ndə̂ a ê andjê dokʉ̈tchê lâme, zɨabô kɨ̈zɨ̂ ndə̂ mê tee-a!›»
Köbo ndə̂kə̂ watə̂ djisîpili ndə̂ Jezü
(Mat 10.37-38)
25Akpûlû azü sə̂ lakə̂ nə la Jezü pâ köbo. Tche djêtə̂ yê, kə̈ tô rə̂ sə̈ andjê päkëdə̂: 26«Âdə akrə ânyində̂ kə̂ nə ngbâ mê, ndə̂kə̂ watə̂ djisîpili ndə̂ mê, ânyë kə̈ kôâbô kôsə̂ bha nə̈ la anyï nə̈, la ɛ̈chë ndə̂ yê, la abechë ndə̂ yê, la ayîngâ yê, la anyînə̂ nə̂, ânyë kə̈ kôâbô ndjë sə̂ tə̂ yê la tə̂ yê kô-ê, tchê wabô tə̂ djisîpili ndə̂ mê tee-a. 27Akrə ndə̂ tche zâbô yö ndə̂ gba ndə̂ yê zâ, ânyë kə̈ nə̂âbô nə̂ ngbâ mê, tche kʉ̂âbo sə̂kə̂ watə̂ djisîpili ndə̂ mê-a.
28«Âdə ngâ akrə lə̂ gûtə̂ nyê ânyində̂ kə̂ mbo ngâ gbölö nda ndə̂ âgû atə̂ lafô, tche âza küma yê dokʉ̈tchê pâ makətche ndə̂ tche nyîndə̂ kə̂ mbo rə̂ la nda nə̈, ndə̂kə̂ wun rə̂ pä makətche nə̈ kʉ̂sə̂ nə̈ ndə̂kə̂ mbo rə̂ la nda nə̈ nə̂ gbɛ̂. 29Ârə̂ âdəabô də̂ käko, tche âkʉ täme nda nə̈ lə̂ cho, ânyë nda nə̈ kâbô kâ-ê, azü gbɛ̂ ndə̂ andjë wun nda nə̈ sə lakə̂ mo tchë, 30lakə̂ to rə̂ päkëdə̂: ‹Akrə âtə jëtə̂ kə̂ mbo nda, kə̈ wâbo la gbôgbô ndə̂kə̂ ka rə̂-a.›
31«Âdəndjë ngâ gbïɛ̈ ânyində̂ kə̂ e la kʉ̈ʉ̈ ndə̂ ngâ gbïɛ̈, tche âza küma yê kə̂ to rə̂ päkëdə̂: Tchê kʉadje aturûgu ndə̂ yê sâke lə̂ könô gbɛ̂ ndə̂kə̂ mbo kʉ̈ʉ̈ la ngâ yê ndə̂ tche wâ la aturûgu sâke tə̂ akrə gbɛ̂? 32Âdə tche âwun-abô sə̂ tə̂ yê wûn djîrə̂, kə̂ wan azü sə̈ ngâ yê gbïɛ̈ lâme ndə̂ tche sə̂ tʉ̂rʉ bhâchï, ndə̂kə̂ yukû nə̈ sə̈ tchë pä anyë mbo bata kʉ̈ʉ̈ mbô lə̂ gbâtə̂ anyê la tchë-ê.»
33Jezü kä tô rə̂ päkëdə̂: «Akrə lə̂ gûtə̂ nyê ndə̂ tche gbôâbo gbôtə̂ arə ndə̂ yê gbɛ̂, tchê wabô tə̂ djisîpili ndə̂ mê tee-a.»
Pö ndə̂ ngbro
(Mat 5.13; Mar 9.50)
34«Ngbro wätə̂ tchôtchô rə. Praâbalë âdə kötchô nə̈ âyu lə̂nə̈ nə̂, a âmbo tâ atöko ânyë âdaka? 35Âmboabô tchôtchô rə lə̂ cho, âdəndjë kɨ̈ndɨ̈ balë tee-a. A âkʉ rə̂, kə̂ yi rə̂ fiî. Akrə ndə̂ tche wâ la tü ndə̂kə̂ dje pö la rə̂, äwäpä tche dje pö âtə!»
Šiuo metu pasirinkta:
Lûke 14: lnl
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Wycliffe Bible Translators, Inc.