MARKUS 11
11
Pinopodaka'mo na i Yesus ninsoop i Yerusalem
(Mat. 21:1-11, Luk. 19:28-40, Yoh. 12:12-19)
1Tempo'nyo mongohanimo Yerusalem, aha tinokamo i kota' Betfage ka' i Betania, i tengke nu Bungkutnyo nu Zaitun. I kiijo' ua'aha na mian anu saja' mombatuki Ia sinaimo i Yesus namba imoona. 2“Lako'mo mokiijo' i kampung anu o ahopintomo aijo',” koonyo i Yesus hi aha. “Salatan komiu minsoopmo i kampung aijo', komiu montoa sa'angu' na anak nu keledai hau-haunyo pinosegot, anu ma'isa toho' sinake'an nu mian. Bukai mae na keledai aijo' ka' boamae. 3Ka' de ko mian anu mompokilawa hi komiu, apaa na sababnyo komiu mombukai keledai aijo', taloakon, ‘Tumpu mompalaluimo, ka Ia malia-lia'je po'ule' monsule'akon mae.’ ”
4Ua-ua'aha anu saja' mombatuki Yesus aijo' namba, ka' nontokai sa'angu' na anak nu keledai hau-haunyo sinegot i tumban nu laigan i sambiha' nu jalan. Sahingga aha nombukaimo keledai aijo'. 5To mia-mian anu tinjo-tinjo kiijo' nompokilawa hi aha, “Hee, momposiamo na komiu? Kadaka' mombukai anak nu keledai aijo'?”
6Tinaaman nu aha, sumo apaa na anu tinaloakonmo i Yesus hi aha. Sahingga mian haha aijo' nompojohokmo aha momboa keledai aijo'. 7Salatan tinokamo hi Yesus, tonga' nu keledai aijo' i latasan nu aha nu jubah nu aha, lantas i Yesus sinumake'mo i tonga'nyo. 8Da'isan na mian nompolatas jubah nu aha i jalan, daagi' mule' ko anu monsagakon i totonga' nu jalan to panga-panga' ise' anu ingala mae nu aha i ale'. 9#Mzm. 118:26 To mia-mian anu lumajang mamba imoona ka' to mia-mian anu mombatuki lengkat i hiku iwi-iwi' molo-moloboo', “Puji'mo na Tumpu! Obalakatiakon na ia anu tinoka tiba sanggo nu Tumpu! 10Higahiyakon na kapalentahan-Nyo anu tokaje mae – pamalentahan i Daud mompolee'to! Puji'mo na Tumpu Anu Matangkas na Kuasa-Nyo!”
11Ahennyo i Yesus tinoka i Yerusalem, lantas ninsoop i Laigan nu Tumpu. I kiijo' Ia nompalahatikan titikub-Nyo. Panyo kalana ohanimo pikat, Ia nambamo nokiijo' i Betania nohingga-hinggat tiba aha sampulu' ka' ohua' na anu saja' mombatuki Ia.
I Yesus nongkutukimo kau' ara
(Mat. 21:18-19)
12Dodododopnyo, salatan aha hau-haunyo lumajang nosabatmo lengkat i Betania, i Yesus no'ohopmo. 13Daagi' majo'on Ia nontoamo sampu'un na kau' ara, hoonnyo talalo booko'. Jadi Ia namba i pu'unnyo aijo' da montoa pa' ko bua'nyo. Panyo salatan Ia tinoka i pu'unnyo aijo', Ia madi' nontoa apa-apaa, sambiha'nyo to ho-hoonnyo, sabab tempo'nyo aitu ma'isa pe'e tempo'nyo mimbua' na kau' ara. 14Lantas i Yesus notatae i pu'unnyo aijo', “Mulai tempo' u'uka madi'mo daagi' ko samian na anu mongkaan bua'um!”
Anu saja' mombatuki Yesus nohongomo potatae aijo'.
I Yesus ninsoopmo i Laigan nu Tumpu
(Mat. 21:12-17, Luk. 19:45-48, Yoh. 2:13-22)
15Salatan aha tinokamo i Yerusalem, ka' i Yesus namba mule' i Laigan nu Tumpu. I kiijo' Ia nontampu'uni nolaa' iwi-iwi' na mian anu mobaluk ka' mongoli i tampat aijo'. Ia nombali-balikakon to meja-meja' nu anu montolosi doi, ka' to kasu-kasuhangan nu anu mompobaluk tomonsi' malapati. 16Ka' madi' ko samian pe'e na pinoloas-Nyo momboa apa-apaa motulu natan nu Laigan nu Tumpu aijo'. 17#Yes. 56:7, Yer. 7:11 Lapas aijo' i Yesus nongajanmo to mia-mian i kiijo'. Ia notatae, “I uno nu Kitab nu Tumpu tinulis sumo u'uka: Tumpu notatae, ‘Laiganku osanggohi laigan tampat balado'aan nu iwi-iwi' bansa'.’ Panyo komiu mompotimbali petaa nu tololang!”
18To Kapa-kapala nu imam ka' to gulu-gulu' agama nohongo potatae aijo'. Sahingga aha nontampu'unimo nolio jalan da mompatei Yesus. Aha nabuhuk hi Ia, kalana iwi-iwi' na mian bangang na mohongo ajalan-Nyo.
19Ohanimo pihi, i Yesus ka' anu saja' mombatuki Ia nambamo nompala'i kota' aijo'.
Pangajalan susumo kau' ara
(Mat. 21:20-22)
20Dodododopnyo daagi' subu-subu, tempo'nyo aha notulu i kau' aijo', aha nontoa kau' ara aijo' inanggasmo toka i baka-bakatnyo. 21Lantas i Petrus tinolo inau' i kajadian sansinaan anu ma'isa pe'e han aijo' jinadi. Sahingga i Petrus notatae hi Yesus, “Tuumangku Gulu', soba toa! Kau' ara anu kinutukan nu kita Tuuma, i nanggasmo!”
22Tinaaman i Yesus, “Palesayamo hi Tumpu. 23#Mat. 17:20, 1Kor. 13:2 Totu'u komiu moko potatae i bungkutnyo aiya, ‘Polalin ka' pokaiyong i ambai!’ Jadi han aijo' timbali obau miu; asan komiu madi' bata-bata, ka' komiu palesaya saba' apaa na anu otaloakon miu aijo' totu-totu'u timbali. 24Kalana aijo' inau' na aiya: De komiu balado'a ka' mompoita apa-apaa, palesayamo saba' Tumpu nombee'imo hi komiu apaa na anu opoita miu, sahingga komiu montalimamo. 25#Mat. 6:14-15 Ka' de komiu balado'a, panyo kinyonyoaum madi' sanang hi samian ka' samian, ampuni pe'e na mian aijo', da Tuumaum i suluga' mule' mongampuni dosa-dosa'um. [ 26De komiu madi' mongampuni mian sangga'at, Tuumaum anu i suluga' madi' mongampuni dosa-dosa'um.]”
Anu mompokilawa mongkona hak i Yesus
(Mat. 21:23-27, Luk. 20:1-8)
27Aha ninsusule' mule' i Yerusalem. Ka' tempo'nyo i Yesus ilumajang monsongkohi uno nu Laigan nu Tumpu, kapala nu to imam-imam, gulu-gulu' agama, ka' to pola-polaya' nu Yahudi tinoka hi Ia. 28Aha nompokilawa, “Apaa na bau pintoongan nu Beleyum mombau anu iwi-iwi' aiya? Ihee na nombee' hak aijo' hi Beleyum?”
29Tinaaman i Yesus, “Aku mule' kahanda' mompokilawa hi komiu. Taami ka' Aku montaloakonje hi beleyum tiba hak ihena Aku mombau hahan aiya. 30I Yohanes mompalamandikan tiba hak ihe, Tumpu kabai mian?”
31Lantas to kapa-kapala nu imam, ka' to pola-polaya' nu Yahudi nontampu'unimo mombisalaakon i totonga' nu aha. Aha notatae, “De kita montaloakon, ‘Tiba hak nu Tumpu,’ Ia tantu montaloakon, ‘Kadaka' komiu madi' palesaya hi Yohanes?’ 32Panyo susa' hondo na motatae, ‘Tiba hak nu mian.’ ” Kalana aha mabuhuk hi mian da'isan, kalana iwi-iwi' na mian monsangka i Yohanes samian na nabi. 33Jadi, tinaaman nu aha, “Kami madi' monsumbu'.”
Lantas i Yesus notatae hi aha, “Desumo itina', Aku suele madi' mompoto'i hi komiu, tiba hak ihe na Aku mombau iwi-iwi' aiya.”
Šiuo metu pasirinkta:
MARKUS 11: LAILOE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės