YAHYA 11
11
Madena la Lazarus
1 #
Luk. 10:38-39
Sab̄ua dou ma ngara la Lazarus nge'e d̄i Betania sama-sama lab̄o amancawana la Maria ro la Marta. 2#Yah. 12:3 Maria eded̄u dou siwe ma lua mina mengi d̄i ed̄i Ruma, ro ma'osa kamango kai honggona. D̄isab̄ua wakatu la Lazarus hengge. 3La Maria ro la Marta kahabana d̄i Ruma Isa, ”Ruma, amania madad̄oho rameci ra ca'u b̄a Ita ede wunga henggena.”
4Wakatu ringa b̄a Ruma Isa haba ede, nggahi Sia, ”Supu ake wati d̄i madekai. Ake ndad̄ikaina loakud̄u d̄i kadese ra kantasakai Ruma Hatalla, ro b̄ara ndedena Ana Ruma Hatalla d̄i kad̄ese ra kantasa rau.”
5Ruma Isa nameci ra ca'uku la Marta, Maria ro la Lazarus. 6Pala wakatu Ruma Isa ringa haba b̄a one la Lazarus wunga henggena, Sia sangaja ngge'e d̄i hid̄i-Na d̄ua nai wali. 7Sawa'u b̄a ede Sia ampona nggahi d̄i anamorid̄oho-Na, ”Maira ndai talaoku dula mbali aka Yudea.”
8Cambe b̄a siad̄oho, ”Pa Guru, b̄ou podapu dou-dou Yahudi mane'e tob̄a Ita kai wadu ro ake Ita mane'eku dula mbali ta aka?”
9”Sab̄ua lainsi aimarai ntoina sampuru d̄ua jam?” nggahi Ruma Isa. ”Dou ma lampa d̄i wakatu aimarai, wati satununa b̄ara sia na'edaku taroa dunia ake. 10Pala dou ma lampa d̄i wakatu aimangad̄i, nasatunuku, b̄ara wati wara taroa d̄indaina.” 11Ndedeku nggahi b̄a Ruma Isa. Edempara nggahi wali b̄a Sia, ”Soba ndai la Lazarus wa'ura maru, pala Nahu d̄imalao katu'una sia.”
12Nggahi anamori Ruma Isa, ”Ruma, nggarasi la Lazarus maru, peasi sia d̄imataho.”
13Aona nggahi Ruma Isa eded̄u b̄a one la Lazarus wa'ura made. Pala kacai b̄a siad̄oho aona nggahi Ruma Isa eded̄u b̄a one la Lazarus maru biasa. 14B̄ara ndedena nggahi Ruma Isa d̄i siad̄oho kai ngoa ntirina, ”Lazarus wa'ura made. 15Pala Nahu neo ade rauku Nahu wati wara ta aka, b̄ara nancewi tahopu d̄i ru'u b̄a nggomid̄oho, loakud̄u nggomid̄oho imbi. Mai ndai talaora ake d̄i la Lazarus.”
16Tomas d̄ipehekai ”La Ndua” manggahi d̄i lengad̄ohona masama-sama anamori Ruma Isa, ”Mai ndaita lao b̄atu, co'opu ndai made sama lab̄o Sia!”
Ma kamori mbali ro mambei mori
17Wakatu Ruma Isa rongga d̄i hid̄i ede, la Lazarus wa'ura upa nai ntoina ra'umbu. 18Betania d̄eni lab̄o Yerusalem, kira-kira tolu kilo mete d̄o'ona. 19Mboto dou Yahudi mawa'ura mai tio la Marta ro la Maria d̄imarere siad̄oho b̄ara made amaniana.
20Wakatu ringa b̄a la Marta b̄a one Ruma Isa mamai, sia losa weha aona Ruma Isa, pala la Maria ngge'e d̄i uma. 21Nggahi la Marta d̄i Ruma Isa, ”Ruma, paina wara Ruma ta ake wakatu ede, pasti amania mada wati d̄imamade. 22Konena ndede b̄ade b̄a mada b̄a one wakatu ake wa'u Ruma Hatalla d̄imambei au-au rad̄iraho b̄a Ita d̄i Sia.”
23”Amaniamu d̄imamori mbali,” nggahi Ruma Isa d̄i Marta.
24Cambe b̄a la Marta, ”Mada kab̄ade la Lazarus d̄imamori mbali wakatu kamori mbali dou mamade peasi d̄i Ainaina Kiama.”
25”Nahuku ma mbei mori ro makamori mbali dou mamade,” nggahi Ruma Isa d̄i Marta. ”Dou ma imbi d̄i Nahu d̄imamori mbali, konena sia wa'ura made. 26Ro dou mamori ma imbi d̄i Nahu, santoi-ntoina wati d̄imamade. Sab̄ua ma'imbiku nggomi d̄i lampa rawi ede?”
27”Ruma,” cambe b̄a la Marta, ”mada ka'imbiku Ita Ana Ruma Hatalla, Sangaji Mambei salama d̄imamai d̄i dunia ake.”
Nangi Ruma Isa
28Sawa'u b̄a nggahi ndede la Marta, sia lao ouna la Maria, sa'ena ro ngoa kanarina d̄i sia, ”Pa Guru wara ta ake; Sia sod̄ina nggomi.” 29Ringana ede la Maria tu'u rocina, edempara lao rakana Ruma Isa. 30Wakatu ede, Ruma Isa watipu lu'una d̄i desa. Sia mbuipu d̄i hid̄i raweha aokai b̄a la Marta. 31Dou-dou Yahudi ma wunga rere la Maria d̄i uma, edana la Maria tu'u ro lao losa rocina; ndad̄i siad̄oho lao b̄atuna sia, b̄ara kacai b̄a siad̄oho sia nalao nangiku aka rade.
32Wakatu Maria rongga d̄i hid̄i Ruma Isa ro edana Sia, suju nemba b̄a la Maria d̄i tando Sia ro nggahina, ”Ruma, paisi wara Ita ta ake wakatu ede, pasti amania mada wati madena.”
33Wakatu eda b̄a Ruma Isa nangi la Maria, ro dou-dou Yahudi ma mai sama lab̄o la Maria manangi rau, nata ade-Na, ro Sia d̄i edamu na'ipiku ncoki ade-Na. 34Ndad̄i sod̄i b̄a Sia d̄i siad̄oho, ”Tab̄eku nggomid̄oho umbukaimu sia?”
”Mai tatiopu, Ruma,” cambe b̄a siad̄oho.
35Edempara nangi Ruma Isa. 36Ndad̄i nggahi b̄a dou-dou Yahudi ede, ”Tiopu, nawancuku meci ra ca'una d̄i la Lazarus!”
37Pala wara d̄i ade weki siad̄oho ma nggahi, ”Sia nandawiku dou mambuda ndad̄i loa eda, b̄ab̄auku Sia wati loana tapa loakud̄u la Lazarus aina madena?”
Lazarus kamori mbali
38Ruma Isa na'ipiku ncoki ade wali-Na, edempara laona aka rade. Rade ede eded̄u sab̄ua karombo rab̄onto kai wadu na'e.
39”Kiri pesopu wadu ede,” nggahi Ruma Isa.
Cambe b̄a la Marta, amancawa dou ma made ede, ”Pala, Ruma, sia wa'ura upa nai ra'umbu. Tantu wa'ura wou mbai!”
40Nggahi Ruma Isa d̄i la Marta, ”Wa'ura nggahi b̄a Nahu d̄i nggomi: Nggara ma'imbisi b̄a nggomi, nggomi d̄ima'eda, poda na'ipiku na'ena kuasa Ruma Hatalla!” 41Edempara siad̄oho pesona wadu ede. Edempara Ruma Isa d̄ongana langi ro nggahi-Na, ”Tarima kasi, Ama, b̄ara Ita wa'ura ringata Mada. 42Mada kab̄ade b̄a one Ita maringa ncauku Mada, pala Mada manggahi ake, d̄i ru'u b̄a dou-dou ma wara ta ake; loakud̄u siad̄oho imbina b̄a one Ita ma ranggadu Mada.” 43Sawa'u b̄a nggahi ndedena, Ruma Isa nggahi kana'ena, ”Lazarus losara!” 44Edempara losa dou ma wa'ura made ede. Rima ra ed̄ina mbuipu ra ponte kai salolo, ro pahuna rab̄onto kai satob̄e salolo pontekai pahu. ”Salo'apu salolona loakud̄u sia loa lampa,” nggahi Ruma Isa d̄i dou-dou ta ede.
Mafaka ne'e hade Ruma Isa
(Mat. 26:1-5, Mrk. 14:1-2, Luk. 22:1-2)
45Mboto dou-dou d̄i ade weki dou-dou Yahudi ma mai tio la Maria, imbi d̄i Ruma Isa wakatu siad̄oho edana lampa rawi mandad̄i ede. 46Pala pila-pila dou d̄i ade weki siad̄oho malao aka dou Farisi ro ngoana au wa'u rakarawi b̄a Ruma Isa. 47B̄ara ndedena dou-dou Farisi ro dou-dou mana'ekai imam mbolona lab̄o Mahkama Agama. Nggahi siad̄oho, ”Auku d̄i karawi b̄a ndai? Dou ake ndawina mboto rawi mab̄isa ra guna! 48Nggara co'o ntuwusi b̄a ndai Sia b̄une ake samenana dou d̄ima'imbi d̄i Sia. Cumpukaina dou mana'ekai Roma d̄imamai ro kalelina Bait Allah ro sara'a bangsa ndaita!”
49Sab̄ua dou d̄i ade weki siad̄oho ma ngara Kayafas, dou mana'ekai imam-imam wakatu mba'ana ede, manggahi, ”Nggomid̄oho wati b̄ademu au-au. 50Sab̄ua nggomid̄oho wati kawaramu weki b̄a one d̄i ru'u ela ra dou, natahopu sab̄ua dou mamade ntewi kaisi sara'ana bangsa maleli?” 51Sapodakaina Kayafas nggahi ndedena, laina rad̄i kananu ndaina. Pala kai dou mana'ekai imam-imam wakatu mba'ana ede sia makaronggana ranggahi Ruma b̄a one Ruma Isa d̄imamade d̄i ru'u b̄a bangsa Yahudi. 52Ro laina d̄i ru'u b̄a bangsa Yahudi mpoa, pala d̄imakab̄oro ro d̄imasab̄uana ana-ana Ruma Hatalla ma ncengga rero.
53Tampu'u ainaina ede dou-dou mana'ekai Yahudi mafakana ne'e hade Ruma Isa. 54B̄ara ndedena Ruma Isa wati walira kid̄i d̄i tando dou mamboto d̄i woha dou Yahudi, Sia tu'u wi'ina Yudea, edempara laona aka kota mangara Efraim d̄eni lab̄o so sarae. Ta ede Sia ngge'e samana lab̄o anamorid̄oho-Na.
55Wakatu ede wa'ura d̄eni Ainaina Aruraja Paskah Yahudi. Mbotora dou-dou rad̄i desa-desa wa'ura lao aka Yerusalem d̄i kalampakaina upacara karaso sarumbu sawatipu ndihakai ede. 56Siad̄oho ngupana Ruma Isa, ro wakatu kab̄oro weki d̄i Bait Allah, nggahi siad̄oho d̄i sab̄ua lab̄o masab̄uana, ”Auku kananu nggomi? Kombi Sia wati maina d̄i ndihakai ake,” 57Siad̄oho nggahi ndedekaina b̄ara dou-dou mana'ekai imam ro dou-dou Farisi wa'ura kalosana parenta b̄a one dou ma b̄ade tab̄e warakai Ruma Isa, pab̄uaku lapona loakud̄u Sia d̄i wa'u.
Šiuo metu pasirinkta:
YAHYA 11: LAIBHP
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės