ପ୍ରେରିତ 9
9
ଶାଉଲ୍ ମନ୍ ବଦ୍ଲାମାଡ଼୍ତଣ୍ଡ୍
(ପ୍ରେରିତ ୨୨:୬-୧୬; ୨୬:୧୨-୧୮)
1ଇଦ୍ ସମୟ୍ତେ ଶାଉଲ୍ ପ୍ରବୁନ୍ ଶିଷ୍ୟଡ଼୍କିଂଙ୍କ୍ ଆୱ୍କିତାନ୍ ଇଞ୍ଜ ଦମକ୍ ଇସମାତ୍ତଣ୍ଡ୍ । ମେଣ୍ଡେ ଅଣ୍ଡ୍ ମହା ଯାଜକ୍ତେ ଗାର୍ରେ ଆତ୍ତଣ୍ଡ୍ । 2ଦାମାସ୍କସ୍ତେ ଉପାସନା ଲଅକିନାଗ୍ ପ୍ରବୁନ୍ ଆର୍ଦିଙ୍କ୍ ୱାସମାନ୍ଦାନ୍ ନାରୁଡ଼୍ ବନ୍ଦିମାଡ଼ି ଯିରୁଶାଲେମ୍ତାଗ୍ ତାତାନ୍ ମାଇଦିଙ୍କ୍ ବେଡ଼ିୟି ଯାଜକ୍କନ୍ସ୍ ଆନୁମତି ଚିଟି ତାଲ୍କ୍ତଣ୍ଡ୍ ।
3ଶାଉଲ୍ ଦାମାସ୍କସ୍ ଟାୱୁନ୍ ଗାର୍ରେ ଏୱୁଦାନ୍ ୱେଲେ ହଟାତ୍ ସ୍ୱର୍ଗତାଗାଙ୍କ୍ ଅଣ୍ଡୟ୍ ୱେସ୍ ଅନ୍ ସାରେପାକ୍ ୱେସ୍ ଆତ୍ତେ । 4ଅଣ୍ଡ୍ ବୂମ୍ଦାଗ୍ ରାୟ୍ତଣ୍ଡ୍ ନୁ ଅଣ୍ଡୟ୍ଗଟ୍ କେଞ୍ଜ୍ତଣ୍ଡ୍, “ଶାଉଲ୍ ! ନିମ୍ ବାତେଙ୍କ୍ ନାକିଂଙ୍କ୍ ଗାଟିତିପାଲ୍ ମାଡ଼ୁତି ?”
5ଅଣ୍ଡ୍ କେତ୍ତଣ୍ଡ୍, “ପ୍ରବୁ ନିମ୍ ବେନ ?” ମେଣ୍ଡନ୍ନ୍ଦାମ୍ ଆଦେ ଗଟ୍ କେଞ୍ଜ୍ତଣ୍ଡ୍, “ନିମ୍ ବେନଙ୍କ୍ ଗାଟିତିପାଲ୍ ମାଡ଼ୁତିନ୍, ନାନ୍ ଅଣ୍ଡେ ଜିସୁ । 6ତେଦ୍ଦେ ଟାୱୁନ୍ତାଗ୍ ଅନ୍, ବାତ୍ ମାଡ଼ାନଙ୍କ୍ ଆଦ୍ତେ, ଆଗେ ନିକିଂଙ୍କ୍ କେସିଦ୍ତଡ଼୍ ।”
7ବେନଡ଼୍ କି ଶାଉଲ୍ତେ ତଡ଼୍ ଆଞ୍ଜ ମାତ୍ତଡ଼୍ ଅନ୍ ସାଙ୍ଗଡ଼୍ ଉଡ଼ି ବାକୁୱାହାସ୍ ନିତ୍ତଡ଼୍; ଅଡ଼୍ ଆଦେ ଗଟ୍ କେଞ୍ଜ୍ତଡ଼୍, ଇତ୍କେ ବେନଙ୍କ୍ ଉଡ଼ାଙ୍କ୍ ପାର୍ୱଡ଼୍ । 8ଶାଉଲ୍ ବୂମ୍ ତାଗାଙ୍କ୍ ତେଦି ଉଡ଼୍ତଣ୍ଡ୍, ଇତ୍କେ ଅଂକିଙ୍କ୍ ବାଆତେ ତଅନ୍ଦ । ଆଦିଙ୍କ୍ ଅଡ଼୍ କାୟ୍ଦିଙ୍କ୍ ପୟ୍ସ୍ ଦାମାସ୍କସ୍ ଏୱୁନା ଆର୍ ତଅସିତ୍ତଡ଼୍ । 9ମୁଣ୍ଡ୍ ଦିନା ଯାକ ଅଣ୍ଡ୍ ଉଡ଼ାଙ୍କ୍ ପାର୍ୱଣ୍ଡ୍ ନୁ ଆଦ୍ ଦିନାମ୍ ତିନ୍ଦାନ୍ ଉନ୍ଦାନ୍ ମାଡ଼ଣ୍ଡ୍ ।
10ଦାମାସ୍କସ୍ ହନନୀୟ ପେଦେର୍ତଣ୍ଡ୍ ୱେରଣ୍ଡ୍ କ୍ରିଷ୍ଟ ବିସ୍ୱାଶି ଶିଷ୍ୟ ମାତ୍ତଣ୍ଡ୍ । ଅଣ୍ଡ୍ ୱେରଡ଼୍ ଦର୍ଶନ୍ ଉଡ଼୍ତଣ୍ଡ୍, ପ୍ରବୁ ଅଂକିଙ୍କ୍ କେତ୍ତଣ୍ଡ୍, “ହନନୀୟ !” ଅଣ୍ଡ୍ ଉତ୍ତର୍ ହିତ୍ତଣ୍ଡ୍, “ହୋ ପ୍ରବୁ କେଲ୍ମ୍ ।”
11ପ୍ରବୁ କେତ୍ତଣ୍ଡ୍, “ସାୟେ ଆୟ୍ମୁଟ୍ । ‘ତିନାଙ୍କ୍’ ପେଦେର୍ତେ ରଟ୍ ପୟ୍ସ୍ ଯିହୁଦାନ୍ ଲନ୍ ଆନୁଟ୍ । ଆଗେ ତାର୍ଷିସ୍ କନ୍ସ୍ ୱାତ୍ତେ ୱେରଣ୍ଡ୍ ଶାଉଲ୍ ପେଦେର୍ତଣ୍ଡ୍ ନାରୁଙ୍କ୍ ମେହେକାଟ୍ । ଅଣ୍ଡ୍ ପ୍ରାର୍ତନା ମାଡ଼ୁତଣ୍ଡ୍ । 12ହନନୀୟ ପେଦେର୍ତଣ୍ଡ୍ ୱେରଣ୍ଡ୍ ନାରୁଣ୍ଡ୍ ୱାସ୍ ଅନ୍ ପର୍ର କାୟ୍ ୱାଟ୍ତଣ୍ଡ୍, ଅଣ୍ଡ୍ ମେଣ୍ଡେ ବେଲା ଉଡ଼୍ ପାର୍ଦ୍ତଣ୍ଡ୍ ଇଞ୍ଜ ଦର୍ଶନ୍ ଉଡ଼୍ତଣ୍ଡ୍ ।”
13ହନନୀୟ କେତ୍ତଣ୍ଡ୍, “ପ୍ରବୁ, ଇଣ୍ଡ୍ ପବିତ୍ର ନାରୁଣ୍ଡ୍ ଯିରୁଶାଲେମ୍ତାଗ୍ ନି ନାରୁଡ଼୍ ସେଙ୍ଗେ ବେନ୍ସାରେ କାରାପ୍ ପାଡ଼୍ୟି ମାଡ଼୍ତଣ୍ଡ୍, ଆଦ୍ ବିଷୟ୍ତେ ନାର୍ଗେ ନାରୁଡ଼୍ ନାକିଂଙ୍କ୍ କେତ୍ତଡ଼୍ । 14ମେଣ୍ଡେ ଅଣ୍ଡ୍ ମୁକ୍ୟ ଯାଜକ୍ତାଗାଙ୍କ୍ ଅଦିକାର୍ ଚିଟି ଆସ୍, ଦାମାସ୍କସ୍ ପେଦେର୍ତାଗ୍ ନିକିଂଙ୍କ୍ ଉପବାସ୍ ମାଡ଼ାନଡ଼୍କିଙ୍କ୍ ପୟ୍ସ୍ ଆଦାନ୍ ସେଙ୍ଗେ ୱାତ୍ତଣ୍ଡ୍ ।”
15ପ୍ରବୁ ଅଂକିଙ୍କ୍ କେତ୍ତଣ୍ଡ୍, “ଅନ୍, ଇସ୍ରାଏଲ୍ ନାରୁଡ଼୍ ନୁ ଅଣଇହୁଦୀ ନୁ ରାଜାଲଡ଼୍ ମୁନ୍ନେ, ନା ପେଦେର୍ କେତାନଙ୍କ୍ ନୁ ନାୱାଦ୍ ସେବା ମାଡ଼ାନଙ୍କ୍ ନାନ୍ ଅଂକିଙ୍କ୍ ହେଞ୍ଚ୍ତାନ୍ । 16ନା ପେଦେର୍ ସେଙ୍ଗେ ଅଣ୍ଡ୍ ବେନ୍ ସାରେ କଷ୍ଟ ପାଏମ୍ ଆଦ୍ତନ୍, ନାନ୍ ନିଜେ ଅଂକିଙ୍କ୍ କେତିତାନ୍ ।”
17ହନନୀୟ ଆତ୍ତଣ୍ଡ୍, ଶାଉଲ୍ ମାନ୍ଦାନ୍ ଲନ୍ ହସିମିକା ଅନ୍ ପର୍ର କାୟ୍ ୱାଟ୍ତଣ୍ଡ୍ । ଅଣ୍ଡ୍ କେତ୍ତଣ୍ଡ୍, “ବିଶ୍ୱାସୀ ଦାଦାଲ୍ ଶାଉଲ୍, ଇଗେ ୱାଦାନ୍ ମୁନେଙ୍କ୍ ନାକିଙ୍କ୍ ପ୍ରବୁ ଜିସୁ ନାକିଂଙ୍କ୍ ଦର୍ଶନ୍ ହିତ୍ତଣ୍ଡ୍, ଅଣ୍ଡ୍ ନାକିଂଙ୍କ୍ ରହତ୍ତଣ୍ଡ୍, ବେଲାକି ନିମ୍ ମେଣ୍ଡେ ଦୃଷ୍ଟି ପାଏମ୍ଆଦ୍ତି ନୁ ପବିତ୍ର ଆତ୍ମାତଡ଼୍ ବର୍ତ୍ତି ଆଦ୍ତିଡ଼୍ ।” 18ଆସୁଟେ ସାଙ୍ଗେ ସାଙ୍ଗେ ଶାଉଲ୍ତେ କଣ୍ଡ୍ତାଗାଙ୍କ୍ କିକେ ଉୟ୍କା ଲେକାମ୍ ବାତ୍ ରାୟ୍ତେ ନୁ ଅଣ୍ଡ୍ ମେଣ୍ଡନ୍ନ୍ଦାମ୍ ଉଡ଼ାନଙ୍କ୍ ପାର୍ତ୍ତଣ୍ଡ୍ । ଅଣ୍ଡ୍ ତେଦି ଏର୍ଦିକ୍ଷା ଗ୍ରହନ୍ ମାଡ଼୍ତଣ୍ଡ୍, 19ନୁ ଦାମାସ୍କସ୍ତିଙ୍କ୍ ତିନ୍ଦାନ୍ ଉନ୍ଦାନ୍ ମାଡ଼୍ନାଦ୍ ଶକ୍ତି ଦର୍କ୍ତେ । ଶାଉଲ୍ କ୍ରିଷ୍ଟ ବିଶ୍ୱାସି ଶିଷ୍ୟଡ଼୍ ତ ବେସ୍କ୍ ଦିନା ମାତ୍ତଣ୍ଡ୍ ।
ଦାମାସ୍କସ୍ତାଗ୍ ଶାଉଲ୍ତେ ପ୍ରଚାର୍
20ଅଣ୍ଡ୍ ସିଦା ଉପାସନା ଲୋକିନାଗ୍ ଆଞ୍ଜ୍ ଜିସୁ ଇଶ୍ୱର୍ତେ ମାର୍, ଇଦ୍ ଗଟ୍ ପ୍ରଚାର୍ ମାଡ଼ାଙ୍କ୍ ପସ୍ପ୍ତଣ୍ଡ୍ ।
21ବେନଡ଼୍ ଅନ୍ ଗଟି କେଞ୍ଜ୍ତଡ଼୍, ଅଡ଼୍ ଦାଦ୍ରିଲି ପାଚ୍ରାମାଡ଼୍ତଡ଼୍, “ଯିରୁଶାଲେମ୍ତାଗ୍ ଜିସୁନ୍ ପେଦେର୍ତେ ଉପବାସ୍ ମାଡ଼ାନଡ଼୍କିଙ୍କ୍ ବେନ ହାୱ୍କ ମାତ୍ତଣ୍ଡ୍, ଇଣ୍ଡ୍ ଅଣ୍ଡ୍ ଆୟନ୍ କି ? ଅଡ଼୍କିଂଙ୍କ୍ ମୁକ୍ୟ ଯାଜକ୍ତେ ବକେତ୍ ପୟ୍ସ୍ ଆଦାନଙ୍କ୍ ଅଣ୍ଡ୍ ଇଗେ ଦାମାସ୍କତା ୱାସ୍ ମାନଣ୍ଡ୍ ?”
22ବାତେଙ୍କ୍ ଇତ୍କେ ଶାଉଲ୍ତେ ପ୍ରଚାର୍ ଗାଟି ଶକ୍ତି ମାତ୍ତେ, ଜିସୁ ହୋ ମସୀହା, ଇଦ୍ ବିଷୟ୍ତେ ଅନାଦ୍ ପ୍ରମାନ୍ ଗାଟି ଯୁକ୍ତି ମାତ୍ତେ ଜେ ଦାମାସ୍କସ୍ତାଗ୍ ବାସେ ମାଡ଼ାନଡ଼ି ଇହୁଦୀଡ଼୍, ଅନାଦ୍ ବେନ୍ ଗଟ୍ତେ ମିକା ଉତ୍ତର୍ ହିଦାଙ୍କ୍ ପାର୍ୱଡ଼୍ ।
23 #
୨ କରନ୍ତିୟ ୧୧:3୨,33. ନାର୍ଗେ ଦିନ୍ ଆତ୍ତେ ପେର୍କେ ଇହୁଦୀଡ଼୍ ଅଣ୍ଡୟାଗେ ଆସ୍ ଶାଉଲ୍ତିଙ୍କ୍ ହାୱ୍କାଙ୍କ୍ ସେଙ୍ଗେ ହାଲ୍ସ୍ତଡ଼୍, 24ଶାଉଲ୍ତିଙ୍କ୍ ଆୱୁକାନଙ୍କ୍ ନାର୍କେତ୍ ପାୟାଲ୍ । ଅଡ଼୍ ନାର୍ ମାର୍ ସାରେତାଗ୍ କେପିମାତ୍ତଡ଼୍ । 25ବାତେଙ୍କ୍ ଇତ୍କେ ଅଣ୍ଡ୍ ଦିନ୍ ନାର୍କେତ୍ ୱେଲେ ଶାଉଲ୍ତେ ଶିଷ୍ୟଡ଼୍ ଅଂକିଙ୍କ୍ ୱେରଡ଼୍ ଜୁଡ଼ିତାଗ୍ ୱାଟି ପାଚେରିତ୍ କୁଲାମାନ୍ଦାନ୍ ଜର୍କାତାଲାନ୍ ମଦଲ୍ ରାପିତ୍ତଡ଼୍ ।
ଯିରୁଶାଲେମ୍ତାଗ୍ ଶାଉଲ୍
26ଶାଉଲ୍ ଯିରୁଶାଲେମ୍ତାଗ୍ ଆଞ୍ଜ୍ ତାମ୍ ଶିଷ୍ୟଡ଼୍ ତଡ଼୍ କାଇଲାନଙ୍କ୍ ଆଲ୍ସି ମାଡ଼୍ତଣ୍ଡ୍ । ବାତେଙ୍କ୍ ଇତ୍କେ ଅଣ୍ଡ୍ ୱେରଣ୍ଡ୍ ଶିଷ୍ୟ ଇଞ୍ଜ ଅଡ଼୍ ବିଲ୍କୁଲ୍ ବିଶ୍ୱାସ୍ ମାଡ଼ଡ଼୍ । ସାରେତଡ଼୍ ଅଂକିଙ୍କ୍ ୱେର୍ତଡ଼୍ । 27ବାତେଙ୍କ୍ ଇତ୍କେ ପେର୍କେ ବର୍ଣ୍ଣବା ଅଂକିଙ୍କ୍ ପ୍ରେରିତ ଶିଷ୍ୟଡ଼ାଗ୍ ଆସ୍ ଦାମାସ୍କସ୍ ହାର୍ଦାଗ୍ ଶାଉଲ୍ ବେଲା ପ୍ରବୁନ୍ ଦର୍ଶନ୍ ପାଏମ୍ ଆତ୍ତଣ୍ଡ୍ ନୁ ପ୍ରବୁ ବେଲା ଅଂକିଙ୍କ୍ ଗଟି ତିରିୟି ମାତ୍ତଣ୍ଡ୍, ଇଦ୍ ସାରେ ବିଷୟ୍ ଅଡ଼୍କିଂଙ୍କ୍ ବୁଜା ମାଡ଼୍ତଣ୍ଡ୍ । ଦାମାସ୍କସ୍ତାଗ୍ ଜିସୁନ୍ ପେଦେର୍ତେ ଶାଉଲ୍ ବେଲା ୱେର୍ୱେକନ୍ସ୍ ପ୍ରଚାର୍ ମାଡ଼ିମାତ୍ତଣ୍ଡ୍, ଅଡ଼୍କିଂଙ୍କ୍ ସାୟେ ତିଆର୍ ମାଡ଼ି କେତ୍ତଣ୍ଡ୍ । 28ଇଦିନ୍ ପେର୍କେ ଶାଉଲ୍ ପ୍ରେରତ ଶିଷ୍ୟଡ଼୍ ତଡ଼୍ ମାତ୍ତଣ୍ଡ୍ ନୁ ଯିରୁଶାଲେମ୍ତାଗ୍ ସାରେ ଏକାମ୍ ଆଞ୍ଜ୍ ସାହାସ୍ ତଡ଼୍ ପ୍ରବୁନ୍ ପେଦେର୍ତେ ପ୍ରଚାର୍ ମାଡ଼୍ତଣ୍ଡ୍ । 29ଇଦ୍ ସାରେ ବିଷୟ୍ତେ ଅଣ୍ଡ୍ ଗ୍ରୀକ୍ ଗଟ୍ତଡ଼୍ ଇହୁଦୀଡ଼୍ ତଡ଼୍ ମିକା ତର୍କବିତର୍କ ମାଡ଼୍ତଣ୍ଡ୍, ବାତେଙ୍କ୍ ଇତ୍କେ ଅଡ଼୍ ଅଂକିଙ୍କ୍ ଆୱୁକାନଙ୍କ୍ ଆଲ୍ସି ମାତ୍ଡ଼୍ । 30ବିଶ୍ୱାସୀଡ଼୍ ଦାଦାଲ ଇଦ୍ ଗଟ୍ ପୁଞ୍ଜ୍ ମିକା, ଶାଉଲ୍ତିଙ୍କ୍ କାଇସରିଆତାଗ୍ ଆତ୍ତଡ଼୍ ନୁ ଆଗାଙ୍କ୍ ଅଂକିଙ୍କ୍ ତାର୍ଷିସ୍ତାଗ୍ ରହସିତ୍ତଡ଼୍ ।
31ଯିହୁଦା, ଗାଲିଲୀ ନୁ ଶମିରୋତାଗ୍ ମାନ୍ଦାନ୍ କ୍ରିଷ୍ଟୀୟ ମଣ୍ଡଲି ଆଦ୍ ସମୟ୍ତେ ଶାନ୍ତି ମାତ୍ତେ ନୁ ପବିତ୍ର ଆତ୍ମାତ୍ ସାର୍ଦେତଡ଼୍ ଅଡ଼ାଦ୍ ନାରୁଡ଼୍ ସଂଖ୍ୟା ନାର୍ଗେ ଆତ୍ତେ ନୁ ଅଡ଼୍ ଶକ୍ତିନଡ଼୍ ଆତ୍ତଡ଼୍ । କ୍ରିଷ୍ଟ ବିଶ୍ୱାସୀଡ଼୍ ପ୍ରବୁଙ୍କ୍ ୱେର୍ସ୍ ମିକା ବାଦ୍କ୍ତଡ଼୍ ।
ଲୁଦା ନୁ ଯୋପ୍ପାତାଗ୍ ପିତର୍
32ପିତର୍ ପିନା ପଡ଼ିୟେ ଉଡ ଉଡ ଅନ୍ଦାମ୍ ଲୁଦାତାଗ୍ ବାସେ ମାଡ଼ମାନ୍ଦାନ୍ ପ୍ରବୁନ୍ ନାରୁଡ଼୍କ୍ ପବିତ୍ର ମାଡ଼ାଙ୍କ୍ ଆତ୍ତଣ୍ଡ୍ । 33ଆଗେ ଏନିୟ ପେଦେର୍ତଣ୍ଡ୍ ୱେରଣ୍ଡ୍ ନାରୁଙ୍କ୍ କାଇଲ୍ତଣ୍ଡ୍ । ଅଂକିଙ୍କ୍ ପକ୍ୟାଗାତ୍ ରୋଗ୍ ହାସ୍ ଆଟ୍ ହେଣ୍ଡ୍କ୍ କାଟୁଲ୍ତାଗାଙ୍କ୍ ତେଦାଙ୍କ୍ ପାର୍ୱେ ମାତ୍ତଣ୍ଡ୍ । 34ପିତର୍ ଅଂକିଙ୍କ୍ କେତ୍ତଣ୍ଡ୍, “ଏନିୟ, ଜିସୁ କ୍ରିଷ୍ଟ ନିକିଂଙ୍କ୍ ସୁସ୍ଥ ମାଡ଼୍ତଣ୍ଡ୍ । ତେଏଦେ ନିୟାଦ୍ କେତ୍ ତେଏମ୍ ।” ଆସୁଟେ ସାଙ୍ଗେ ସାଙ୍ଗେ ଏନିୟ ତେଦି ନିତ୍ତଣ୍ଡ୍ । 35ଇଦ୍ ଉଡ଼ି ଲୁଦା ନୁ ଶମିରୋଣତାଗ୍ ବାସେ ମାଡ଼ାନ୍ ନାରୁଡ଼୍ ସାରେତଡ଼୍ ପ୍ରବୁନାକ୍ ମନ୍ ମାଲ୍ପ୍ତଡ଼୍ ।
36ଯୋପାତାଗ୍ ଟାବିଥା ପେଦେର୍ତେ ୱେରଡ଼୍ ବିଶ୍ୱାସୀ ନାଟାଡ଼୍ ବାସେ ମାଡ଼ମାତ୍ତେ । ଆଦିନାଦ୍ ଗ୍ରୀକ୍ ପେଦେର୍ ଦର୍କାସ୍ ଇତ୍କେ ଇଦ୍ ଅର୍ତ “ହରିଣୀ,” ମାତ୍ତେ । ଆଦ୍ ତାନାଦ୍ ସାରେ ଦିନାମ୍ ସାୟେକାମ୍ ଦାଗ୍ ନୁ ଗରିବ୍ ନାରୁଡ଼୍କ୍ ସେବା ମାଡ଼ାନାଗ୍ ହିସମାତ୍ତେ । 37ଆସୁଟେ ରୋଗ୍ ଆସ୍ ଆଦ୍ ଡଲ୍ତେ । ସାଙ୍ଗଡ଼୍ ତାନ୍ ମେନ୍ଦୁଲ୍ତିଙ୍କ୍ ଏର୍ ମିସ୍ସ୍ପି ପରତ୍ ବାକ୍ଡ଼େତାଗ୍ ପାଟ୍ପିସ୍ତଡ଼୍ । 38ଯୋପ୍ପା ଲୁଦାତ୍ ବକେତ୍ ମାତ୍ତେ । ପିତର୍ ଲୁଦାତାଗ୍ ମିନ୍ଦେଣ୍ଡ୍ ଇଞ୍ଜ କେଞ୍ଜି, ଯୋପାତାଗ୍ ମାନ୍ଦାନ୍ ବିଶ୍ୱାସୀ ଶିଷ୍ୟ ଇର୍ୱୁଡ଼୍ ନାରୁଡ଼୍କ୍ ରହତଡ଼୍, “ଅନୁରଦ୍ ମାଡ଼ୁତମ୍ ସିଟ୍ପାଟ୍ ମା ବକେତ୍ ୱାଡ଼େ ।” 39ପିତର୍ ତିଆର୍ ଆସ୍ ଅଡ଼୍ତଡ଼୍ ଆତ୍ତଣ୍ଡ୍ । ଆଗେ ଏୱୁତ୍ତେ ସାଙ୍ଗେ ସାଙ୍ଗେ ନାରୁଡ଼୍ ଅଂକିଙ୍କ୍ ପରତ୍ ବାକ୍ଡ଼େତାଗ୍ ଆତ୍ତଡ଼୍ । ଆଗେ ରାଣ୍ଡିକି କେୟି କେୟି ଦର୍କାସ୍ ମାତ୍ତେ ସମୟ୍ତେ ସିଲେୟ୍ ମାଡ଼୍ତେ ଚକା ନୁ ସିଲେ ତଅତ୍ତା । 40ପିତର୍ ସାରେତଡ଼୍କିଂଙ୍କ୍ ବାୟିଦେ ପେସ୍ସ୍ପିତଣ୍ଡ୍ ନୁ ମର୍ମିଣ୍ଡା ଇସ୍ ପ୍ରାର୍ତନା ମାଡ଼୍ତଣ୍ଡ୍ । ତାନ୍ ପେର୍କେ ଅଣ୍ଡ୍ ଦର୍କାସ୍ତେ ଡଲ୍ତେ ମେନ୍ଦୁଲ୍ତିଙ୍କ୍ ଉଡ଼ି କେତ୍ତଣ୍ଡ୍, “ଟାବିଥା, ତେଏଦେ !” ଦର୍କାସ୍ କଣ୍ଡା ତେର୍ତଣ୍ଡ୍ ନୁ ପିତର୍ତିଙ୍କ୍ ଉଡ଼ି ତେଦି କୁଦ୍ତଣ୍ଡ୍ । 41ପିତର୍ କାୟ୍ ହାଆସ୍ ଆଦିଙ୍କ୍ ତେହେତ୍ତଣ୍ଡ୍ । ତାନ୍ ପେର୍କେ ଗୁଡ଼ିମାନ୍ଦାନ୍ ସାରେ ବିଶ୍ୱାସୀ ନୁ ରାଣ୍ଡି ନାଟାକିଙ୍କ୍ କାର୍ଙ୍ଗି ଜିୱୁନ୍ ପବିତ୍ରଆତ୍ମାତିଙ୍କ୍ ଅଡ଼୍ କାୟ୍ଦେ ହିତ୍ତଣ୍ଡ୍ । 42ଇଦ୍ ଗଟ୍ ଯୋପାତେ ସାରେ ପାକ୍ ପୁତ୍ତଡ଼୍ ନୁ ନାର୍ଗେ ନାରୁଡ଼୍ ପ୍ରବୁଙ୍କ୍ ବିଶ୍ୱାସ୍ ମାଡ଼୍ତଡ଼୍ । 43ପିତର୍ ନାର୍ଗେ ଦିନା ଯୋପାତେ ଶିମୋନ୍ ପେଦେର୍ତଣ୍ଡ୍ ୱେରଣ୍ଡ୍ ତଲ୍କା ବେପାରିନ୍ ଲୋନ୍ ମାତ୍ତଣ୍ଡ୍ ।
Šiuo metu pasirinkta:
ପ୍ରେରିତ 9: NTKaa20
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The New Testament in Koya Language © The Word for the World International and Koya Translation Samithi, Malkangiri, Odisha 2020