ପ୍ରେରିତ 10
10
ପିତର୍ ନୁ କର୍ଣ୍ଣୀଲିୟ
1କାଇସରିଆତଣ୍ଡ୍ କର୍ଣ୍ଣୀଲିୟ “ଇଟାଲୀୟ ବାହିନୀ,” ପେଦେର୍ତେ ରୋମୀୟ ସୈନ୍ୟବାହିନୀତେ ଶତସେନାପତି ମାତ୍ତଣ୍ଡ୍ । 2ଅଣ୍ଡ୍ ୱେରଣ୍ଡ୍ ଦାର୍ମିକ୍ ନାରୁଣ୍ଡ୍ ମାତ୍ତଣ୍ଡ୍ । ଅଣ୍ଡ୍ ନୁ ତାମ୍ ପରିବାର୍ତେ ସାରେତଡ଼୍ ଇଶ୍ୱର୍ତିଙ୍କ୍ ଉପାସନା ମାଡ଼ମାତ୍ତଡ଼୍ । ଅଣ୍ଡ୍ ଯିହୁଦି ଗରିବ୍ ନାରୁଡ଼୍କିଂଙ୍କ୍ ନାର୍ଗେ ସାହାଯ୍ୟ ମାଡ଼ମାତ୍ତଣ୍ଡ୍ ନୁ ସାରେଦାମ୍ ଇଶ୍ୱର୍ତିଙ୍କ୍ ପ୍ରାର୍ତନା ମାଡ଼ମାତ୍ତଣ୍ଡ୍ । 3ଅଣ୍ଡ୍ଦିନ୍ ପାୟାଲ୍ ମୁଣ୍ଡ୍ ଗାଣ୍ଟା ସମୟ୍ତେ ଅଣ୍ଡ୍ ସାୟ୍ ଅଣ୍ଡୟ୍ ଦର୍ଶନ୍ ଉଡ଼୍ତଣ୍ଡ୍ ଯେ ଇଶ୍ୱର୍ତେ ଦୂତ୍ ୱାସ୍ ଅଂକିଙ୍କ୍ କାର୍ଙ୍ଗୁତଣ୍ଡ୍, “କର୍ଣ୍ଣୀଲିୟ ।”
4ଅଣ୍ଡ୍ ୱେର୍ ସ୍ୱର୍ଗ ଦୂତତାକ୍ ଉଡ଼ି କେତ୍ତଣ୍ଡ୍, “ପ୍ରବୁ ବାତ୍ କେତୁତିନ୍ ?” ଦୂତ୍ ଉତ୍ତର୍ ହିତ୍ତଣ୍ଡ୍, “ଇଶ୍ୱର୍ ନିୟାଦ୍ ପ୍ରାର୍ତନା ନୁ ଦାନ ଉଡ଼ି ସାର୍ଦେ ଆତ୍ତଣ୍ଡ୍ ନୁ ଆଦିଙ୍କ୍ ନିକିଂଙ୍କ୍ ଉପହାର୍ ହିଦାଙ୍କ୍ ତିଆର୍ ଆତ୍ତଣ୍ଡ୍ । 5ଇଞ୍ଜେ ଶିମୋନ୍ ପିତର୍ ପେଦେର୍ତଣ୍ଡ୍ ୱେରଣ୍ଡ୍ ନାରୁଙ୍କ୍ କାର୍ଙ୍ଗି ତାତାନ୍ ମାଇଦିଙ୍କ୍ ଯୋପାତାଗ୍ ନାରୁଡ଼୍କ୍ ରହମୁଟ୍ । 6ଅଣ୍ଡ୍ ଗଦାଡ଼୍ ହାଞ୍ଚିନାଗ୍ ବାସେ ମାଡ଼ମାନ୍ଦାନ୍ ଶିମୋନ୍ ପେଦେର୍ତଣ୍ଡ ୱେରଣ୍ଡ୍ ତଲ୍କା ବେପାରିନ୍ ଲନ୍ ମିନ୍ଦେଣ୍ଡ୍ ।” 7ଇଦ୍ କେସ୍ ଦୂତ୍ ଆତ୍ତଣ୍ଡ୍ । କର୍ଣ୍ଣୀଲିୟ ତାମ୍ ଲୋତ୍ତେ ଇର୍ୱୁଡ଼୍ ଦାସ ନୁ ୱେରଣ୍ଡ୍ ସୈନିକ୍ତିଙ୍କ୍ ପେର୍ରକେ ଆଦାନଙ୍କ୍ କାର୍ଙ୍ଗ୍ତଣ୍ଡ୍ । 8ଅଣ୍ଡ୍ ଅଡ଼୍କିଂଙ୍କ୍ ସାରେ ବିଷୟ୍ କେସ୍ ଯୋପାତାଗ୍ ରହତଣ୍ଡ୍ ।
9ମେଣ୍ଡେଅନ୍ଦିନ୍ ପାୟାଲ୍ ଅଡ଼୍ ଯୋପ୍ପାତ୍ ଗାର୍ରେ ଏୱୁଦାନ୍ ୱେଲେ, ପିତର୍ ପ୍ରାର୍ତନା ମାଡ଼ାନ୍ ସେଙ୍ଗେ ମୁର୍ସିନାଗ୍ ଆଞ୍ଜ୍ମାତ୍ତଣ୍ଡ୍ । 10ଅଣ୍ଡ୍ କାର୍ପୟ୍ତ୍ତାଙ୍କ୍ ସୁଦୁଟ୍ ତିନ୍ଦାନଙ୍କ୍ ହାଲ୍ସ୍ତଣ୍ଡ୍ ନୁ କାଦି ତିଆର୍ ଆତ୍ତେ ସମୟ୍ତେ ଅଣ୍ଡ୍ ଅଣ୍ଡୟ୍ ଦର୍ଶନ୍ ଉଡ଼୍ତଣ୍ଡ୍ । 11ଅଣ୍ଡ୍ ଉଡ଼୍ତଣ୍ଡ୍, ସ୍ୱର୍ଗ କୁଲେମ୍ ଆତ୍ତେ ନୁ ଅଣ୍ଡୟ୍ ବେଡ଼୍ୟାଦ୍ ଡୁପଟ୍ ନାଲୁ ମୁଲାନାଗ୍ ଉଙ୍ଗିମିକା ପୃତିବିତାଗ୍ ପର୍ର ଡିଗୁତ୍ । 12ସ୍ୱର୍ଗ ନାର୍ଗେ ରକମ୍ତାୱ୍ ଜୀୱାକ୍, ପୃତିବିତାଗ୍ ବେନ୍ ଜିୱାକ୍ ନେଲ୍ ମେନ୍ଦୁଲ୍ ମସ୍ସ୍ପି ତାଆକାନାୱୁ ଜିୱାକ୍ ନୁ ଗୁପେତ୍ ପିଟ୍ଟେ ମିନ୍ଦେ । 13ମେଣ୍ଡେ ଅଣ୍ଡ୍ ଅଣ୍ଡୟ୍ ଗଟ୍ କେଞ୍ଜ୍ତଣ୍ଡ୍, “ପିତର୍ ! ତେଏଦେ, ହାୱ୍କି ମିକା ତିନ୍ !”
14ବାତେଙ୍କ୍ ଇତ୍କେ ପିତର୍ କେତ୍ତଣ୍ଡ୍, “ଇଲ୍ଲେ ପ୍ରବୁ, ନାନ୍ ପାର୍ୱନ୍ ! ନାନ୍ନେ ବେସୁଟ୍ ଅଶୁଚି ନୁ କାରାପ୍ ମାନ୍ଦାନ୍ ଜିନିଷ୍ ତିନନ୍ ।”
15ମେଣ୍ଡେ ଅଣ୍ଡ୍ କେଞ୍ଜ୍ତଣ୍ଡ୍; “ଇଶ୍ୱର୍ ବେନଙ୍କ୍ ଶୁଚି ମାଡ଼୍ତଣ୍ଡ୍, ନିମ୍ ଅଂକିଙ୍କ୍ କାରାପ୍ ଇଞ୍ଜ ହାଲ୍ସ୍ମା ।” 16ମୁଣ୍ଡ୍ଦାମ୍ ଇଦ୍ ରକମ୍ ଆତ୍ତେ ପେର୍କେ, ଡୁପଟ୍ତିଙ୍କ୍ ସ୍ୱର୍ଗତାକ୍ ତେଇସ୍ ଆତ୍ତଡ଼୍ ।
17ପିତର୍ ତାନ୍ ଦର୍ଶନ୍ ଉଡ଼୍ତେ ଇତ୍କେ ଆଲ୍ସି କାବା ଆତ୍ତଣ୍ଡ୍ । ଆସୁଟେ କର୍ଣ୍ଣୀଲିୟ ବେନଡ଼୍କ୍ ରହସ୍ମାତ୍ତଣ୍ଡ୍, ଅଡ଼୍ ଶିମୋନ୍ତେ ଲନ୍ ତିଙ୍କ୍ ଦର୍ସ୍କି ମାର୍ ବକେତ୍ ନିଶ୍ମାତ୍ତଡ଼୍ । 18ଅଡ଼୍ କାର୍ଙ୍ଗି ପାଚ୍ରାମାଡ଼୍ତଡ଼୍, ଶିମୋନ୍ ପିତର୍ ପେଦେର୍ତେ ଇଗେ ୱେରଣ୍ଡ୍ କୁଟ୍ମାମ୍ ନାରୁଡ଼୍ ମିନ୍ଦେଣ୍ଡ୍ କି ?
19ପିତର୍ ଆସୁଟ୍ ଯାକ ଦର୍ଶନ୍ତାଦ୍ ଅର୍ତ ବୁଜେମ୍ ଆଦାଙ୍କ୍ ଆଲ୍ସମାତ୍ତଣ୍ଡ୍, ଆସୁଟେ ପବିତ୍ର ଆତ୍ମା କେତ୍ତେ, “ଉଡ଼େ, ଇଗେ ମୁୱୁଡ଼୍ ନାରୁଡ଼୍ ନିକିଂଙ୍କ୍ ମେହେକୁତଡ଼୍ । 20ତିଆର୍ ଆସ୍ ମଦଲ୍ ଅନ୍ ନୁ ଅଡ଼୍ ତଡ଼୍ ଆଦାନଙ୍କ୍ ଆଲ୍ସାନାଦ୍ ଇଲେ, ବାତେଙ୍କ୍ ଇତ୍କେ ନାନ୍ ଅଡ଼୍କିଂଙ୍କ୍ ରହତ୍ତାନ୍ ।” 21ପିତର୍ ମଦଲ୍ ଆଞ୍ଜ୍ ଆ ନାରୁଡ଼୍କିଂଙ୍କ୍ କେତ୍ତଣ୍ଡ୍, “ମିଡ଼୍ ବେନଙ୍କ୍ ମେହେକୁତିଡ଼୍, ନାନ୍ ଅଣ୍ଡେ । ମିଡ଼୍ ବାତେଙ୍କ୍ ୱାତ୍ତିଡ଼୍ ?”
22ଅଡ଼୍ ଉତ୍ତର୍ ହିତ୍ତଡ଼୍, “ସେନାପତି କର୍ଣ୍ଣୀଲିୟ ମାକିଂଙ୍କ୍ ରହତ୍ତଣ୍ଡ୍ । ଅଣ୍ଡ୍ ୱେରଣ୍ଡ୍ ସାୟେତ୍ ନାରୁଣ୍ଡ୍ । ଅଣ୍ଡ୍ ଇଶ୍ୱର୍ତିଙ୍କ୍ ପ୍ରାର୍ତନା ମାଡ଼ାନଣ୍ଡ୍ ନୁ ଇହୁଦୀ ନାରୁଡ଼୍ ସାରେତଡ଼୍ ଅଂକିଙ୍କ୍ ସନ୍ମ୍ମାନ୍ ହିଦ୍ତଡ଼୍ । ନିକିଂଙ୍କ୍ ତାମ୍ ନାର୍ କାର୍ଙ୍ଗି ମିକା ନିୟାଦ୍ ଗଟି କେଞ୍ଜାନ୍ ମାଇଦିଙ୍କ୍ ଇଶ୍ୱର୍ତେ ୱେରଣ୍ଡ୍ ପବିତ୍ର ଦୂତ୍ ଅଂକିଙ୍କ୍ ଗଟ୍ ହିତ୍ତଣ୍ଡ୍ ।” 23ପିତର୍ ଅଡ଼୍କିଂଙ୍କ୍ ଲୋପେ କାର୍ଙ୍ଗି ଆସ୍ ଆଦ୍ ନାର୍କେତ୍ ଆଗେ ମାନ୍ଦାନ୍ ମାଇଦିଙ୍କ୍ ଅନୁରଦ୍ ମାଡ଼୍ତଣ୍ଡ୍ । ମେଣ୍ଡନ୍ଦିନେ ତିଆର୍ ଆସ୍ ଅଡ଼୍ ତଡ଼୍ ଆତ୍ତଡ଼୍ । ଯୋପାତାଗ୍ ବେସ୍ତୁଡ଼୍ ବିଶ୍ୱାସିଡ଼୍ ଦାଦାଲଡ଼୍ ମିକା ଅଡ଼୍ ତଡ଼୍ ଆତ୍ତଡ଼୍ । 24ପେର୍ନେଟି ଅଡ଼୍ କାଇସରିଆତାଗ୍ ଏୱୁତ୍ତଡ଼୍ । ଆଗେ କର୍ଣ୍ଣୀଲିୟ ତାନ୍ ସାଙ୍ଗ ନୁ ଲୋତ୍ତେନଡ଼୍ ତଡ଼୍ ପିତର୍ତିଙ୍କ୍ କେପିମାତ୍ତଡ଼୍ । 25ପିତର୍ ଲୋପେ ଆଦ୍ଦାନ୍ ୱେଲେ କର୍ଣ୍ଣୀଲିୟ ଅଂକିଙ୍କ୍ କାଇଲିମିକା ଡେକେତ୍ ମଦଲ୍ ରାଲି ପ୍ରଣାମ୍ ମାଡ଼୍ତଣ୍ଡ୍ । 26ଇତ୍କେ ପିତର୍ ଅଂକିଙ୍କ୍ ତେଇସ୍ କେତ୍ତଣ୍ଡ୍, “ତେଏଦେ, ନାନ୍ ନିଜେ ୱେରଣ୍ଡ୍ ନାରୁନ୍ ।” 27ପିତର୍ କର୍ଣ୍ଣୀଲିୟ ତଡ଼୍ ତିର୍ୟ ତିର୍ୟ ଲୋତ୍ତେ ଲୋପେ ହସ୍ତଣ୍ଡ୍ ନୁ ଆଗେ ନାର୍ଗେ ନାରୁଡ଼୍କିଂଙ୍କ୍ ଅଣ୍ଡୟାଗେ ଗୁଡ଼ିମାନ୍ଦାନାଦ୍ ଉଡ଼୍ତଣ୍ଡ୍, 28ଅଡ଼୍କିଂଙ୍କ୍ କେତ୍ତଣ୍ଡ୍, “ମିଡ଼୍ ସାୟେ ପୁଞ୍ଜ୍ ମାନୁଟ୍, ୱେରଣ୍ଡ୍ ଇହୁଦୀ ନାରୁଡ଼୍ ତାନ୍ ବିଶ୍ୱାସ୍ ଲେକାମ୍ ଅବିଶ୍ୱାସୀ ନାରୁଡ଼୍ ତଡ଼୍ କାଇଲାନଙ୍କ୍ ପାର୍ୱଣ୍ଡ୍ । ଇତ୍କେ ଇଶ୍ୱର୍ ନାକିଂଙ୍କ୍ କେତ୍ତଣ୍ଡ୍, ବେନଙ୍କ୍ ବା କାରାପ୍ ବା ଅପବିତ୍ର ହେର୍କା ମାଡ଼ାନାଦ୍ ଅଶୁଚି ଆୟ୍ୟ । 29ଆଦିଙ୍କ୍ ମିଡ଼୍ ବେସୁଟ୍ ନାକିଂଙ୍କ୍ କାର୍ଙ୍ଗ୍ତିଡ଼୍, ନାନ୍ ବାତେମିକା ଆପତ୍ତି ମାଡ଼୍ୱେ କନ୍ସ୍ ୱାତ୍ତାନ୍ । ନାନ୍ ପୁନ୍ଦାଙ୍କ୍ ଇଚ୍ଛା ମାଡ଼ୁତାନ୍, ମିଡ଼୍ ବାତେଙ୍କ୍ ନାକିଂଙ୍କ୍ କାର୍ଙ୍ଗ୍ତିଡ଼୍ ?”
30କର୍ଣ୍ଣୀଲିୟ କେତ୍ତଣ୍ଡ୍, “ନାଲୁ ଦିନା ମୁନେଙ୍କ୍ ଇଦ୍ ସମୟ୍ତେ ପାୟାଲ୍ ମୁଣ୍ଡ୍ ଗାଣ୍ଟାତ୍ ୱେଲେ ନାନ୍ ନା ଲୋନ୍ ପ୍ରାର୍ତନା ମାଡ଼ମାତ୍ତାନ୍ । ହଟାତ୍ ପାଣ୍ଡ୍ରି ଚକାସିଲେ କେର୍ତେନଣ୍ଡ୍ ୱେରଣ୍ଡ୍ ନାରୁଡ଼୍ ନା ମୁନ୍ନେ ନିତ୍ତଣ୍ଡ୍; ଅଣ୍ଡ୍ କେତ୍ତଣ୍ଡ୍ 31‘କର୍ଣ୍ଣୀଲିୟ ! ଇଶ୍ୱର୍ ନିୟାଦ୍ ପ୍ରାର୍ତନା କେଞ୍ଜ୍ତଣ୍ଡ୍ ନୁ ଗରିବିଡ଼୍କ୍ ଦାନ୍ ମାଡ଼ାନ୍ ସେବାକାମ୍ ଉଡ଼୍ତଣ୍ଡ୍ । 32ଶିମୋନ୍ ପିତର୍ ପେଦେର୍ତଣ୍ଡ୍ ୱେରଣ୍ଡ୍ ନାରୁଙ୍କ୍ ତାତାନ୍ ସେଙ୍ଗେ ଯୋପାତାଗ୍ ନାରୁଡ଼୍କ୍ ରହମୁଟ୍ । ଅଣ୍ଡ୍ ଗଦାଡ଼୍ତେ ବକେତ୍ ମାନ୍ଦାନ୍ ତଲ୍କା ବେପାରିନ୍ ଲନ୍ କୁଟ୍ମାମ୍ ଆସ୍ ମିନ୍ଦେଣ୍ଡ୍ ।’ 33ଆଦିଙ୍କ୍ ସାଙ୍ଗେ ସାଙ୍ଗେ ନାନ୍ ନିକିଂଙ୍କ୍ କାର୍ଙ୍ଗ୍ତାନ୍ ନୁ ନିମେ ଦୟା ମାଡ଼ି ୱାତ୍ତିନ୍ । ପ୍ରବୁ ନିକିଂଙ୍କ୍ ବାତ୍ କେତାନଙ୍କ୍ ବୁଦ୍ଦ୍ ହିତ୍ତଣ୍ଡ୍, ଆଦ୍ କେଞ୍ଜାନଙ୍କ୍ ମାମ୍ମେ ସାରେତମ୍ ଇଞ୍ଜେ ଇଶ୍ୱର୍ତେ ବକେତ୍ ମିନ୍ଦେମ୍ ।”
ପିତର୍ତେ ଗଟ୍
34ପିତର୍ ଶିକ୍ଷା ହିଦାନଙ୍କ୍ ଆରାମ୍ ମାଡ଼ି କେତ୍ତଣ୍ଡ୍, “ଇଞ୍ଜେ ନାନ୍ ନିଜାମ୍ ବୁଜେମ୍ ଆତ୍ତାନ୍ ଯେ ପ୍ରକୃତ୍ତେ ଇଶ୍ୱର୍ ସାରେତଡ଼୍କିଂଙ୍କ୍ ସାମାନ୍ ଉଡ଼ୁତଣ୍ଡ୍ । 35ବେନ୍ ନାର୍ଦେନଣ୍ଡ୍ ଆୟି ନାରୁଣ୍ଡ୍ ପ୍ରବୁଙ୍କ୍ ପ୍ରାର୍ତନା ମାଡ଼୍କେ ନୁ ଅନ୍ କଣ୍ଡେତେ ସତ୍ କର୍ମ ମାଡ଼୍କେ ପ୍ରବୁ ଅଂକିଙ୍କ୍ ଗ୍ରହନ୍ ମାଡ଼ିତନ୍ । 36ମିଡ଼୍ ପୁତ୍ତିଡ଼୍ ଯେ ଇଶ୍ୱର୍ ଇସ୍ରାଏଲ୍ ନାରୁଡ଼୍କ୍ ଗାରେ ବେନ୍ କାବୁର୍ ରହସ୍ମାତ୍ତଣ୍ଡ୍, ଆଦେ ଜିସୁ ଦ୍ୱାରା ଗଷଣା ମାଡ଼୍ତାଦ୍ ଶାନ୍ତି ସୁସମାଚାର୍ । ହି ଜିସୁ କ୍ରିଷ୍ଟ ସାରେ ତଡ଼୍ ପ୍ରବୁ । 37ଯୋହନ୍ ମନ୍ ପରିବର୍ତ୍ତନ୍ ନୁ ଏର୍ ଦୀକ୍ଷା କାବୁର୍ ପ୍ରଚାର୍ ମାଡ଼୍ତେ ପେର୍କେ, ଗାଲିଲୀତାଗାଙ୍କ୍ ଆରାମ୍ ମାଡ଼ି ସାରେ ଯିହୁଦା ଦେଶ୍ତାଗ୍ ବେନ୍ ଗଟନା ଗଟେମ୍ ଆତ୍ତେ, ଆଦ୍ ମିଡ଼୍ ପୁତ୍ତିଡ଼୍ । 38ମିଡ଼୍ ନାଜରିତ ଜିସୁନ୍ ବିଷୟ୍ତେ ନୁ ଇଶ୍ୱର୍ ବେଲା ଅଙ୍କ୍ ଏଞ୍ଚି ଅନ୍ ପର୍ର ପବିତ୍ର ଆତ୍ମା ନୁ ଶକ୍ତି ହିତ୍ତଣ୍ଡ୍, ଆଦ୍ ପୁତ୍ତିଡ଼୍ । ଅଣ୍ଡ୍ ସାରେ ପାକ୍ ଆଞ୍ଜ୍ ସାୟେତ୍ ପାଡ଼୍ୟି ମାଡ଼୍ତଣ୍ଡ୍ । ଶୟ୍ତାନ୍ ଅଦିନ୍ତେ ମାନ୍ଦାନ୍ ନାରୁଡ଼୍କ୍ ସୁସ୍ଥ ମାଡ଼୍ତଣ୍ଡ୍, ବାତେଙ୍କ୍ ଇତ୍କେ ଇଶ୍ୱର୍ ଅନ୍ ତଡ଼୍ ମାତ୍ତଣ୍ଡ୍ । 39ଯିହୁଦା ଦେଶ୍ତାଗ୍ ନୁ ଯିରୁଶାଲେମ୍ ଦେଶ୍ତାଗ୍ ଅଣ୍ଡ୍ ବେନ୍ ସାରେ ପାଡ଼୍ୟି ମାଡ଼୍ତଣ୍ଡ୍, ମାମ୍ମେ ଆୱ୍ ସାରେତ୍ ସାକ୍ଷି । ତାନ୍ପେର୍କେ ଅଂକିଙ୍କ୍ ଅଡ଼୍ କ୍ରୁଶବିଦ୍ଦ ମାଡ଼ି ହାୱ୍କ୍ତଡ଼୍ । 40ଇତ୍କେ ଇଶ୍ୱର୍ ମୁଣ୍ଡ୍ ଦିନା ଲୋପେ ଅଂକିଙ୍କ୍ ଡଲ୍ତାଗାଙ୍କ୍ ମେଣ୍ଡନ୍ନ୍ଦାମ୍ ଜିୱେ ମାଡ଼୍ତଣ୍ଡ୍ । ଅଣ୍ଡ୍ ନାରୁଡ଼୍ ବକେତ୍ ପ୍ରକାଶଆସ୍ ତଅନ୍ଦ୍ତଣ୍ଡ୍ । 41ଅଣ୍ଡ୍ ସାରେତଡ଼୍କିଂଙ୍କ୍ ତନ୍ଦଣ୍ଡ୍, ଇଶ୍ୱର୍ ବେନଙ୍କ୍ ସାକ୍ଷି ଲେକାମ୍ ହେଞ୍ଚ୍ତଣ୍ଡ୍ ଅଡ଼୍କିଂଙ୍କ୍ ତନ୍ଦ୍ତଣ୍ଡ୍ । ଇଶ୍ୱର୍ ଅଂକିଙ୍କ୍ ମେଣ୍ଡେଜିୱେ ମାଡ଼୍ତେ ପେର୍କେ ମାମ୍ମେ ଅନ୍ତଡ଼୍ ତିନ୍ଦାନ୍ଉନ୍ଦାନ୍ ମାଡ଼୍ତମ୍ । 42ନାରୁଡ଼୍ ଗାର୍ରେ ସୁସମାଚାର୍ ପ୍ରଚାର୍ ମାଇଦିଙ୍କ୍ ନୁ ଇଶ୍ୱର୍ ଯେ ଅଂକିଙ୍କ୍ ଜିୱେ ମାନ୍ଦାନଡ଼୍କିଙ୍କ୍ ନୁ ଡଲ୍ତେ ନାରିଡ଼୍ ବିଚାର୍ କର୍ତ୍ତାଲ୍ ଲେକାମ୍ ନିଯୁକ୍ତି ମାଡ଼୍ତଣ୍ଡ୍, ଇଦ୍ ଗଟ୍ତାଦ୍ ସାକ୍ଷ୍ୟ କେତାନ୍ ସେଙ୍ଗେ ଅଣ୍ଡ୍ ମାକିଂଙ୍କ୍ ଆଜ୍ଞା ହିତ୍ତଣ୍ଡ୍ । 43ସାରେ ବାବବାଦୀଡ଼୍ ଅନ୍ ବିଷୟ୍ତେ ପ୍ରଚାର୍ ମାଡ଼ି ଇଦ୍ ଗଟ୍ କେସ୍ ମାତ୍ତଡ଼୍, ଯେ ବେନ ଅଂକିଙ୍କ୍ ବିଶ୍ୱାସ୍ ମାଡ଼ିତନ୍, ଅନ୍ ପେଦେର୍ତେ ଶକ୍ତିତଡ଼୍ ଅନାଦ୍ ପାପ୍ କ୍ଷମା ଆଦ୍ତେ ।”
ଅଣଇହୁଦୀଡ଼୍ ପବିତ୍ର ଆତ୍ମା ପାଏମ୍ଆତ୍ତଡ଼୍
44ପିତର୍ ଶିକ୍ଷା ହିଦାନ୍ ୱେଲେ ବେନଡ଼୍ ଅନାଦ୍ ଶିକ୍ଷା କେଞ୍ଜ ମାତ୍ତଡ଼୍, ଅଡ଼୍ ସାରେତଡ଼୍ ପର୍ର ପବିତ୍ର ଆତ୍ମା ହସ୍ତେ । 45ଅଣଇହୁଦୀଡ଼୍ ପର୍ର ଗାଲା ଇଶ୍ୱର୍ ଅନାଦ୍ ପବିତ୍ର ଆତ୍ମା ଇସ୍ ମାନ୍ଦାନାଦ୍ ଉଡ଼ି ପିତର୍ ତଡ଼୍ ୱାସ୍ ମାନ୍ଦାନ୍ ଯୋପ୍ପାତେ ସୁନ୍ନତଇହୁଦୀ ବିଶ୍ୱାସୀଡ଼୍ କାବା ଆତ୍ତଡ଼୍ । 46ବାତେଙ୍କ୍ ଇତ୍କେ ଇହୁଦୀ ବିଶ୍ୱାସୀଡ଼୍ ଅଡ଼୍କିଂଙ୍କ୍ ଇଶ୍ୱର୍ତେ ପ୍ରସଂଶା ମାଡ଼ମାନ୍ଦାନାଦ୍ ନୁ ୱେରେ ଗଟ୍ତେ ତ୍ରିୟାନାଦ୍ କେଞ୍ଜ୍ତଡ଼୍ । ପିତର୍ କେତ୍ତଣ୍ଡ୍, 47“ମା ଲେକାମ୍ ଇଡ଼୍ ନାରୁଡ଼୍ ଗାଲା ପବିତ୍ର ଆତ୍ମା ପାଏମ୍ ଆତ୍ତଡ଼୍ । ଏର୍ ଦୀକ୍ଷା ଆଦାନ୍ ସେଙ୍ଗେ ବାତ୍ ବେନ ବାଦା ଇଦେ ପାର୍ଦ୍ତଣ୍ଡ୍ ?” 48ଆଦିଙ୍କ୍ ଅଣ୍ଡ୍ ଅଡ଼୍କିଂଙ୍କ୍ ଜିସୁ କ୍ରିଷ୍ଟ ପେଦେର୍ତେ ଏର୍ ଦୀକ୍ଷା ଆଦାନ୍ ମାଇଦିଙ୍କ୍ ଗଟ୍ କେତ୍ତଣ୍ଡ୍ । ତାନ୍ପେର୍କେ ଅଡ଼୍ ଅଂକିଙ୍କ୍ ମେଣ୍ଡେ ବେସ୍କ୍ ଦିନା ଅଡ଼୍ ତଡ଼୍ ମାନ୍ଦାନଙ୍କ୍ ଅନୁରଦ୍ ମାଡ଼୍ତଡ଼୍ ।
Šiuo metu pasirinkta:
ପ୍ରେରିତ 10: NTKaa20
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The New Testament in Koya Language © The Word for the World International and Koya Translation Samithi, Malkangiri, Odisha 2020