Mwa 3
3
Kũvalũka kwa Mũndũ
1 #
Ũvu 12.9; 20.2 Katĩ wa nyamũ ila Mwĩai Ngai woombie, nzoka nĩyo yaĩ nzeleke mũno kwĩ syonthe. Kwoou nĩyakũlilye ũla mũndũ mũka atĩĩ, “Kwa w'o Ngai nĩwamwĩie mũikaaye matunda ma mũtĩ o na wĩva ũla wĩ mũũndanĩ ũũ?”
2Mũndũ mũka asũngĩa nzoka atĩĩ, “Nĩtũtonya kũya matunda ma mĩtĩ yonthe ĩla yĩ mũũndanĩ, 3ĩndĩ Ngai aisye, ‘Mũikaaye matunda ma mũtĩ ũla wĩ mũũndanĩ katĩ, o na mũikaaũkiite mũikese kũkw'a.’ ”
4Nzoka nĩyamũsũngĩie yamwĩa atĩĩ, “Aiee ũu ti w'o. Mũikw'a. 5Ngai amwĩie ũu nĩkwĩthĩwa nĩwĩsĩ kana yĩla mũkaya matunda ma mũtĩ ũsu mũkeethĩwa mũilyĩ ta Ngai na mũkamanyaa ũseo na ũthũku.”
6Yĩla mũndũ mũka ũsu woonie ũndũ mũtĩ ũsu waanakavĩte na ũndũ matunda maw'o maseũvĩte ma kũĩwa, na o ta ũu asũanĩa kana mũtĩ ũsu waĩ mũseo wa kũnenga mũndũ ũĩ, nĩwatwie matunda maw'o na aya. Nĩwanengie mũũme amwe, o nake aya. 7Mamina kũya matunda asu oou, nĩmeethĩiwe na ũmanyi, na mamanya kana nĩ athei. Kwoou nĩmatumanisye matũ ma mũkũyũ meevw'ĩka.
8Mũthenya ũsu ĩa mawĩoo, mũndũ ũsu na mũka nĩmeewie Mwĩai Ngai aitembeela mũũndanĩ na mamwĩvithĩla mĩtĩnĩ. 9Ĩndĩ Mwĩai Ngai eeta mũndũ-ũme ũsu amũkũlya atĩĩ, “Ũĩva we?”
10Nĩwasũngĩie amwĩa atĩĩ, “Nĩneew'a matuu maku ũitembeela mũũndanĩ, na nakwatwa nĩ w'ĩa nũndũ nĩĩ mũthei na kwoou neevitha.”
11Mwĩai Ngai amũkũlya atĩĩ, “Nũũ ũkwĩie wĩ mũthei? Ko ũĩe matunda ma mũtĩ ũla nakwĩaĩie ndũkaaye?”
12Mũndũ ũsu asũngĩa atĩĩ, “Mũndũ mũka ũla wanengie nĩkalanasye nake nĩwe ũnengie matunda asu nakwa naya.”
13 #
2Ako 11.3; 1Tim 2.14 Mwĩai Ngai nĩwakũlilye ũla mũndũ mũka, “Wĩkie ũu nĩkĩ?”
Mũndũ mũka asũngĩa atĩĩ, “Nzoka nĩyo ĩngengie nakwa naya.”
Ngai Anengane Ũsilĩlo na Ũkany'o
14Mwĩai Ngai nĩweeie nzoka atĩĩ,
“Nĩkwĩthĩwa nĩwĩkie ũu, wĩ mũumanĩe mbee wa nyamũ syonthe,
sya mũsyĩ na sya kĩthekanĩ.
Ũkaendaa na ĩvu
na ũkaĩsaa mũthanga ĩvindanĩ yonthe ya thayũ waku.
15 #
Ũvu 12.17
Nĩngwĩkĩa ũthũ katĩ waku na mũndũ mũka,
na katĩ wa ũsyao waku na nzyawa yake.
Nzyawa ĩsu ĩkatumba mũtwe waku,
naku ũkaũma kĩtiinyo kyake.”
16Nĩwamwĩie mũndũ mũka atĩĩ,
“Ngaingĩvya mũno woo waku yĩla ũũsyaa;
ũkeethĩawa na woo yĩla ũũsyaa.
Ĩndĩ ũu wĩ o vo ũkeethĩawa wĩ na wendi wa mũũme waku,
nake akeethĩawa na ũkũmũ ĩũlũ waku.”
17 #
Aevl 6.8
Nĩvo ĩndĩ Mwĩai Ngai weeie Atamu atĩĩ,
“Nĩkwĩthĩwa nĩwĩthukĩĩisye mũka waku,
na waya ĩtunda ya mũtĩ ũla nakwĩaĩie ndũkaye,
nĩngũumanĩa nthĩ nũndũ waku,
kwa nzĩa ya kũtethya wĩa mũito ũkakwataa lĩu kuma mũthanganĩ mĩthenya yonthe ya thayũ waku.
18Nthĩ ĩkameaa mĩw'a na ĩia ĩthũku,
naku ũkaĩsaa lĩu kuma mĩmeanĩ.
19Ũkathũkũmaa wĩa mũito ũkanoa,
nĩ kana ũkwate lĩu wa kũya,
nginya yĩla wĩsyoka mũthanganĩ, nũndũ nĩvo waumiw'e.
Woombiwe kuma mũthanganĩ,
na ũkatw'ĩka mũthanga ĩngĩ.”
20Atamu nĩwanengie mũka ĩsyĩtwa amwĩta Awa, nũndũ nĩwe waĩ inyia wa andũ onthe. 21Mwĩai Ngai nĩwaseũvĩisye Atamu na mũka ngũa sya ithuma na amavw'ĩka.
Atamu na Awa Mailũngw'a kuma Mũũndanĩ wa Eteni
22 #
Ũvu 22.14
Mwĩai Ngai nĩwaisye atĩĩ, “Yu aa nĩmekalile taitũ, na me na ũmanyi wa ũseo na ũthũku. Mayaĩlĩte kũekwa mese kũtw'a ĩtunda kuma mũtĩnĩ ũla ũnenganae thayũ na kũyĩya, na kwĩkala thayũ tene na tene.” 23Kwoou Mwĩai Ngai nĩwamalũngilye kuma mũũndanĩ wa Eteni, mathi makaĩmae mũthanganĩ vala maumiw'e. 24Amina kũmalũngya kuma mũũndanĩ ũsu, Mwĩai Ngai nĩwaiie ngalĩko ya wumĩlonĩ wa syũa syũmbe syĩ nthwau syĩtawa akelũvi, na ũvyũ wakanĩte mwaki weethyũũaa ngalĩko syonthe, ũsiĩĩe mũndũ o na wĩva ndakathengee mũtĩ ũsu ũnenganae thayũ.
Šiuo metu pasirinkta:
Mwa 3: KAMBA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
BIBLE SOCIETY OF KENYA © 2011