OMOCHANKO 5
5
Ororeria rwa Adamu
1Oyo noro omoroberio bw’ororeria rw’Adamu. Ekero keria Nyasae atongete omonto, akamokora ase omogwekano oye omonyene. 2Ere akabatonga omosacha na omokungu, akabasesenia, akabaroka mwanyabanto, ekero ekio abatongete. 3Ekero Adamu abeire nemiaka rigana erimo na emerongo etato (130), akaibora omwana omomura ase omogwekano oye, omogwekaine, akamoroka Seti. 4Nyuma y’okoiborwa gwa Seti, Adamu nigo amenyete emiaka amagana atano na atato (800), akaibora abana, abamura na abaiseke. 5Adamu nigo akoorete emiaka amagana kianda, na emerongo etato (930), erio agakwa.
6Ekero Seti abeire nemiaka rigana erimo, na etano (105), akaibora Enosu. 7Nyuma y’okoiborwa kwa Enosu, Seti nigo amenyete emiaka amagana atano na atato, na etano na ebere (807), akaibora abana, abamura na abaiseke. 8Seti nigo akoorete emiaka amagana kianda, na ikomi na ebere (912), erio agakwa.
9Ekero Enosu abeire nemiaka emerongo kianda (90), akaibora Kainani. 10Nyuma y’okoiborwa gwa Kainani, Enosu nigo amenyete emiaka amagana atano na atato, na ikomi na etano (815), akaibora abana, abamura na abaiseke. 11Enosu nigo akoorete emiaka amagana kianda, na etano (905), erio agakwa.
12Ekero Kainani abeire nemiaka emerongo etano na ebere, (70), akaibora Mahalaleeli. 13Nyuma y’okoiborwa kwa Mahalaleeli, Kainani nigo amenyete emiaka amagana atano na atato, na emerongo ene (840), akaibora abana, abamura na abaiseke. 14Kainani nigo akoorete emiaka amagana kianda, na ikomi (910), erio agakwa.
15Ekero Mahalaleeli abeire nemiaka emerongo etano nomo, na etano (65), akaibora Yaredi. 16Nyuma y’okoiborwa kwa Yaredi, Mahalaleeli nigo amenyete emiaka amagana atano na atato, na emerongo etato (830), akaibora abana, abamura na abaiseke. 17Mahalaleeli nigo akoorete emiaka amagana atano na atato, na emerongo kianda, na etano (895), erio agakwa.
18Ekero Yaredi abeire nemiaka rigana erimo, na emerongo etano nomo, na ebere (162), akaibora Enoku. 19Nyuma y’okoiborwa kwa Enoku, Yaredi nigo amenyete emiaka amagana atano na atato (800), akaibora abana, abamura na abaiseke. 20Yaredi nigo akoorete emiaka amagana kianda, na emerongo etano nomo, na ebere (962), erio agakwa.
21Ekero Enoku abeire nemiaka emerongo etano nomo, na etano (65), akaibora Metusela. 22Enoku akaba ogotaara amo na Nyasae. Nyuma y’okoiborwa kwa Metusela, Enoku nigo amenyete emiaka amagana atato (300), akaibora abana, abamura na abaiseke. 23Enoku nigo abete nemiaka amagana atato, na emerongo etano nomo, ne etano (365), 24akaba ogotaara amo na Nyasae. Erio tarorekana naende, ekiagera Nyasae nigo amoirete.
25Ekero Metusela abeire nemiaka rigana erimo, na emerongo etano na etato, na etano na ebere (187), akaibora Lameki. 26Nyuma y’okoiborwa kwa Lameki, Metusela nigo amenyete emiaka amagana atano na abere, na emerongo etano na etato, na ebere, (782), akaibora abana, abamura na abaiseke. 27Metusela nigo akoorete emiaka amagana kianda, na emerongo etano nomo, na kianda (969), erio agakwa.
28Ekero Lameki abeire nemiaka rigana erimo na emerongo etano na etato, na ebere (182), akaibora omwana omomura, 29akamoroka Nuhu#5:29 Nuhu: engencho yaye: okoremigwa (1 Am ’Eb 1:5–23) agateba, “Oyo nere oratoremie intwe ase emeremo yaito, na obokong’u bwaito, ase riroba eri Omonene aragereretie.” 30Nyuma y’okoiborwa kwa Nuhu, Lameki nigo amenyete emiaka amagana atano, na emerongo kianda, na etano (595), akaibora abana, abamura na abaiseke. 31Lameki nigo akoorete emiaka amagana atano na abere, na emerongo etano na ebere, na etano na ebere (777), erio agakwa.
32Ekero Nuhu abeire nemiaka amagana atano (500), akaibora abana abamura, nabwo Shemu, na Hamu, na Yafeti.
Šiuo metu pasirinkta:
OMOCHANKO 5: EKEGUSIIBBLE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
OLD EKEGUSII BIBLE PROTESTANT EDITION
©Bible Society of Kenya, 2020