Luka 5
5
Jesû nîwetire arutwa ake a mbere
(Mat 4.18-22; Mar 1.16-20)
1 #
Mat 13.1-2; Mar 3.9-10; 4.1 Mûthenya ûmwe, Jesû nîwarûngamîte rûtererî rwa îria rîa Genesareti. Nao andû nîmaamûvatîkîte makîenda kwîgua ndûmîrîri ya Ngai. 2Vîndî wa îo Jesû nîwonire tûtarû twîrî tûgucagucîtue rûtererî rwa îria. Nao ategi a nthamaki nîmaaumîte tûtarûrî tûu na makambîrîria kûthambia neti ciao. 3Nake Jesû nîwatwîre gatarûrî kamwe ka mûndû wetagwa Simioni, na akîmwîra akagendagendie vanini nîguo kaumaume rûtererî rwa îria. Jesû nîwacokire agîkara nthî kûu gatarûrî na akîambîrîria kûthomithia kîrîndî.
4Rîrîa Jesû aarîkirie kûthomithia kîrîndî kîu, nîwerire Simoni atîrî, “Gendagendia gatarû na kûrîa kûrî manjî marikîru na mûcoke mwikie neti cienyu kuo nîguo mûtege nthamaki.”
5 #
Joh 21.3
Nake Simoni nîwerire Jesû atîrî, “Mwathani! Tue tûrarutire wîra mûmû ûtukû mûgima na gûtirî kîndû tûragwatirie. Nwatî nîûndû we nîwambîra mbikie neti manjîrî, nie nîngwîka guo.” 6#Joh 21.6 Na rîrîa ategi acio maaikirie neti ciao manjîrî, nîmaagwatirie nthamaki nyîngî mûno nginya neti ciao igîtigaria vanini mûno gûtuîka. 7Kwoguo nî maaveenerie arata ao arîa maarî gatarûrî kau kengî nîguo mathiî mamatethererie. Na rîrîa arata acio ao maathiîre kûmatethereria, nîmecûririe nthamaki tûtarûrî tuoîrî, nginya tûkîambîrîria kûvorokera. 8Nake Simoni Petero ona ûguo, nîwaturîrie Jesû maru na akîmwîra atîrî, “Nthengutîra Mwathani nîûndû nie nîrî mûndû mwîvia!”
9Simoni na arata ake onthe nîmaamakire mûno nîûndû wa wîngî wa nthamaki irîa maagwatirie. 10Nao Jakuvu na Johana; ariû a Zebedii, arîa maarutithanagia wîra na Simoni, nîmaamakire. Nwatî Jesû nîwerire Simoni atîrî, “We Petero, tiga kwîgua guoya, nîûndû kwambîrîria rîu ûgaategaga andû.”
11Nao ategi acio a nthamaki, nîmaagucagucirie tûtarû twao rûtererî rwa îria, magîtiga indo cionthe ciao na makîmûrûmîrîra.
Jesû nîwavonirie mûndû warwarîte mûrimû mûcûku wa ngothi
(Mat 8.1-4; Mar 1.40-45)
12Rîrîa Jesû aarî îtûûrarî rîmwe, mûndû ûmwe warwarîte mûrimû mûcûku wa ngothi nîwathiîre varîa Jesû aarî. Na vîndî îrîa mûndû ûcio oonire Jesû, nîwegwîthirie nthî mbere yake na akîmûthaitha atîrî, “Mwathani! Ûngîenda nwa ûntherie!”
13Nake Jesû nîwatambûrûkirie njara yake, akîmûvutia na akîmwîra atîrî, “Nie nîngwenda, ûrothera!” Nake Mûndû ûcio warwarîte mûrimû mûcûku wa ngothi nîwavonire wa rîmwe. 14#Ala 14.1-32 Nake Jesû nîwerire mûndû ûcio atîrî, “We ndûkeere mûndû wa na ûmwe ûndû ûyû. Nwatî thiî ûkarorue nî mûthînjîri-Ngai na ûrute îgongoona wata ûrîa Musa aathanire. Na weka ûguo, andû onthe nîmakûmenya atî nîwatherua.”
15Nayo Ngumo ya Jesû nîyatambire vûrûrirî wonthe na andû eengî makîgomana nîguo mamûthikîrîrie na mavonue mîrimû yao. 16Nwatî Jesû nîwamatigire na akîthiî werûrî kûvoera kuo.
Jesû nîwavonirie mûndû warwarîte mûrimû wa gûkua ciîga
(Mat 9.1-8; Mar 2.1-12)
17Mûthenya ûmwe rîrîa Jesû aathomithanagia, Afarisai amwe wana arimû a Watho arîa maaumîte matûûrarî monthe ma Galili, Judea na Jerusalemu, nîmeekarîte vakuvî na varîa Jesû aarî. Nake Jesû aarî mûve vinya wa kûvonia andû nî Mwathani. 18Nao andû amwe nîmaathiîre makuuîte mûndû warî mûkuû ciîga cia mwîrî amamîrîte kîvarî. Na rîrîa maakinyire varîa Jesû aarî, nîmaageririe kûmûtonyia nyomba nîguo mamwige vau mbere ya Jesû. 19Nwatî vîndî îrîa maaturire vandû va kûmûvîtûkîrîria nîûndû kîrîndî nîkîavatîkanîte mûno, nîmaatwîre nyomba îgûrû mamûkuuîte, magîcoka makîthondeka mwanya, makîmûnyûrûkîria mwanyarî ûcio wa amamîrîte kîvarî, na makîmwiga gatagatîrî ka andû vau mbere ya Jesû. 20Rîrîa Jesû oonire atî andû acio maarî na wîtîkio mûnene nîwerire mûndû ûcio atîrî, “Mûrata wakwa, nîwoverwa mevia maku.”
21Nao arimû a Watho na Afarisai nîmaambîrîrie kûrania atîrî, “Mûndû ûyû ûraruma Ngai nîkwa arî û? Nî ûrîkû ûngîvota kwovera mûndû mevia tiga Ngai wenga?”
22Nake Jesû nîwamenyire meciria mao na akîmaûria atîrî, 23“Nîndûî kîratûma mwîcirie maûndû ta mau ngororî cienyu? Ûndû ûrîa mûvûthû nî ûrîkû, nî kuga mûndû ûyû, ‘We nîwoverwa mevia maku’ kana nî kuga, ‘Ûkîra na wîthiîre?’ 24Nie nîngûmwonia atî Mûrû wa Mûndû arî na wathani wa kwovera andû mevia gûkû nthî.” Na kwoguo Jesû nîwerire mûndû ûcio warwarîte mûrimû wa gûkua ciîga, atîrî, “Nie nîrakwîra atîrî, ûkîra, woce kîvarî gîaku na wînûke!”
25Na wa rîmwe, mûndû ûcio nîwaûkîrire andû onthe mamûroretie, agîoca kîvarî kîrîa aamaamîrîte na akînûka agîkumagia Ngai. 26Nao andû onthe nîmaamakire mûno, makîgua guoya na makîambîrîria gûkumia Ngai makiugaga atîrî, “Na kaî ûmûnthî ûyû nîtwona maûndû ma magegania-î!”
Jesû nîwetire Lawi
(Mat 9.9-13; Mar 2.13-17)
27Nake Jesû arîkia gwîka ûguo, nîwaumire nja na akîona mwîtia wa mbeca cia gooti wetagwa Lawi, ekarîte wavicirî yake na akîmwîra atîrî, “Nûmîrîra.” 28Nake Lawi nîwaûkîrire, agîtiga indo cionthe na akîmûrûmîrîra.
29Lawi nîwacokire akîthondekera Jesû kîrugo kînene mûno gwake mûciî. Gîkundirî Kîam ageni arîa meetîtwe, kwarî na etia eengî a mbeca cia gooti wa vamwe na andû arîa engî. 30#Luka 15.1-2 Nao Afarisai amwe wana arimû a Watho arîa maarî a gîkundi Kîamo, nîmaanegenirie arutwa a Jesû makîmeeraga atîrî, “Nîndûî gîtûmaga mûrîcanîre na mûnyunyanîre na etia a mbeca cia gooti wa vamwe na evia?”
31Nake Jesû nîwamacokerie atîrî, “Andû arîa methagîrwa marî na vata wa ndagîtarî nî arîa arwaru, nwatî tî arîa matarî arwaru. 32Nie ndiûkîte gwîta andû arîa athingu, nwatî mbûkîte gwîta evia nîguo merire.”
Kîûria kîgiî kwînyerekia
(Mat 9.14-17; Mar 2.18-22)
33Andû amwe nîmeerire Jesû atîrî, “Arutwa a Johana nîmenyerekagia keengî na makavoya, wana nginya arutwa a Afarisai nîmekaga wa guo, nwatî arutwa aku nîmarîcaga na makanyua?”
34Nake Jesû nîwameerire atîrî, “Mûreciria nwamûvote gûtûma andû arîa metîrîtwe ûviki menyerekie vîndî îrîa mûvikania arî vamwe nao? Ûguo gûtingîvoteka! 35Nwatî mûthenya nîûgaakinya rîrîa mûvikania akaathengutua gatagatîrî kao, na vîndî îo nîmakenyerekia.”
36Wana rîngî Jesû nîwamerire na ngerekano atîrî, “Gûtirî mûndû ûtinagia kîraka kuuma nguorî îno njerû akînagîtumîrîra nguorî îno ngûrû. Mûndû ûcio angîka ûguo, nwa atembûre nguo îo njerû na kîraka kîu kîrege gwocana na nguo îo ngûrû. 37Wana gûtirî mûndû wonoragîria ndivei ya kûvivwa warîo mboororî îno ngûrû. Ndivei ya kûvivwa warîo nwa îtarûre mbooro îo na îgacoka îgeetîka na mbooro îo îkavaragana viû. 38Vandû va ûguo, ndivei ya kûvivwa warîo nwa nginya îkîrwe mboororî îno njerû! 39Wana gûtirî mûndû wîthagîrwa anyuîte ndivei îno ngûrû wendaga kûnyua ndivei ya kûvivwa wa rîo, nîûndû nîaugaga atîrî, ‘Ndivei îrîa ngûrû nî mbaro gûkîra ndivei ya kûvivwa warîo.’ ”
Šiuo metu pasirinkta:
Luka 5: KKB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©Bible Society of Kenya, 2019