Luka 15
15
Avaykınçına şadvalla
İne xhebne misaalayna mə'na akaraba vobna. Mane hekayebışe I'sa peyğambaree yuşan ha'an, Allah, bınahnanbışika goruşmuş ıxhang'a nimeeyiy şad eyxhe.
1Gırgın nalok'bı sa'anbıyiy bınahbınanbı abaylenbıniy I'saysqa, Mang'ulqa k'ırı gyaqqas. 2Fariseyariy Tavratne mə'əllimaaşe ğud-ğudniy ha'ana:
– Mana insan bınahbınanbışika yuşan ha'a, manbışika kar otxhan!
3Manke I'see inəxbına misaala ts'ıts'av'u:
4– Fıkır ooxhne, vuşde neng'ukame vəş vəq'ə vobna, çinab sa avguna. Mang'vee yüç'əle yüç'üb uxhiyxhanne cigee g'alebçı, avguna sa t'abal haa'as üqqəs dişde? Nya'a, avaykasmee mang'vee mana t'abal haa'as dişde? 5Avaykımeyib, şadvalika cune mıgabışilqa gyuvxhes. 6Xaaqar qarımee, qoot'alasınbı cun hambazar, g'onşubı manbışik'le eyhesın: «Zaka sacigee şadepxhe! Zasqa avaykına, avguna vəq'ə!»
7Qiyğa I'see eyhen:
– Mançilqa şak-şupa mooxhe, xəybışee bınahbışile xıl ts'ıts'avuyne sang'us geeb şadeepxhes. Yüç'əle yüç'ürne qopkuyne, bınah deşinbışis manimee şadeepxhes deş.
8Sayıb inəxbına misaala:
Sa xhunaşşeyqa yıts'ılle nuk'rayn pıl eyxhe, mançınıd sa yicee agval ha'an. Nya'a, məng'ee bazir qaahas dişde, xhıris üvxəs dişde, xav alyak-valyak ha'as dişde man nuk'rayn pıl aveekasmee? 9Aveekımee, qoot'alasınbı cen hambazariy, g'onşu yedar. Manbışik'le eyhesın: «Zaka sacigee şadepxhe! Zak'le, aguyn nuk'rayn pıl, avaykıyn!»
10Qiyğa I'see eyhen:
– Mançilqa şak-şupa mooxhe, sa bınahbışike tovba hav'uyne insannimeeyid Allahne malyaa'ikaaşdab şadvalla həməxübna vuxhes.
11I'see inıd yuşan ha'uyn: «Sa adamiyqa q'öyre dixniy vor.
12K'ınne dixee dekkık'le eyhen:
– Dek yiğın var-devlet, ğu yişde aree bit'al he'e, zalqa gexhan qale.
Dekkee var-devlet dixbışdı aree bit'al ha'an.
13Sabara yiğbışile k'ınne dixee, cus huvuyn dekkee var-devlet massa huvu, ayk'anna əqənane ölkeeqa. Ark'ınne cigeeyid azğunna ı'mı'r vukku, gırgın kar ak'an ha'an.
14Mane gahıl hamane ölkee giyğalanbı it'umun mıssın vaxtbı, mang'uned ı'mı're giyğalanbı dağamın yiğbı. 15Manke mana hayk'anna mane cigaynbışde sang'usqa iş hivqas. Mang'vee mana g'ixelena cune çolbışeqa vokkar uxhiyxhana'as. 16Dix həməxürniy mıs qıxha vorna, vokkaşee otxhanan kar huvuynxhiy geerniy şad ixhes, mang'us vuççud heli ıxha deş.
17Mana culqa qarı eyhen:
– Yizde dekkıqa geeb işçer vob, manbışde gırgıng'vee gıney otxhan, hale hexxadad axvan, zımee inyaa'ar mıssınçe qek'a. 18Dekkısqa sark'ıl eyhesın: «Dek zı yiğniyiy Allahne ögee bınahna iş hav'u. 19Zı yiğna dix ixhes layiq'ra deş vorna. İcaza hevle yiğne işçeeşina sa ixhes».
20Mana ayk'anna dekkısqa. Dekkik'le mana əq'ənançecar quvats'ı rəhı'm qavayli. Dek mang'une ögiylqa g'adayxhvan qarı, xhılibışeqa sa'u, ubba ha'a.
21Dixee eyhen:
– Dek, zı yiğniyiy, Allahne ögee bınahna iş hav'u. Zı yiğna dix ixhes layiq'ra deş vorna.
22Dekkee cune nukaraaşik'le eyhen:
– Zaraba, nekke yugun alya'an karbı alle, mang'ulqa ale'e, t'ubelqana tucvayiy, g'elilqan g'elilinbı hele. 23Qavale kokav'una dana, gyuvk'e. Qudoora otxhun-ulyodğuybı ha'as. 24Ho'o dişde, yizda dix qik'uniy vor, üç'ür qıxha, agunaniy, avaykına.
Manbı giviyğalanbı otxhan-ulyoğa.
25Mane gahıl xərna dix çoleeniy vor. Mana xaasqana qıxhamee, g'iyxhenbı mə'niybıyiy huvaagan sesbı.
26Mang'vee nukaraaşina sa qort'ul qidghın ha'uyn:
– Hucoone haynyaa eyxhe?
27Nukaree eyhen:
– Yiğna çoc sak'ı, dekkeeyib mana sağra-salamatra sak'ıva kokav'una dana givk'u.
28Xərna dix it'umra qəllamışxha, xaaqa ikkeç'es ıkkiykan deş. Manke dek qığeç'u mana mizel aqqaqqa giyğal.
29Xərne dixee dekkık'le eyhen:
– Haynimene senbına zı vas nukar xhinne işlemiş ıxha, hammaşed ğu uvhuyn ha'u. Hambazaaşika otxhun-ulyoğas, ğu zas mısacab çepiçıb huvu deş. 30Yiğın var-devlet otxhunne, pozğunne yedaaşika iykırne dixes, ğumee, sak'ı qarıng'a kokav'una dana givk'u.
31Dekkee mang'uk'le eyhen:
– Dix, ğu hammaşe zaka vor, in gırgın zaqa vodunmen kar yiğın vodun. 32Həşdiyle şadepxhes, otxhun-ulyoğas ıkkan: yiğna çoc qik'uniy vor, üç'ür qıxha, agunaniy, avaykına.»
Šiuo metu pasirinkta:
Luka 15: YIQSUM
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės