Yn. LIMANYISIA
LIMANYISIA
Elomo Endayi nga yaandikwa ne Yoana yekesia Yesu khuba Elomo eya Wele eya mindali, “Owekela omundu mala amenya mwifwe” (YN. 1.14) Nga sitabu sisiene ne siboola, Elomo Endayi yino yaandikwa nio babaandu bakisoma boole khusuubila bali Yesu ali Omwana owa Wele Omuonia owasuubisibwa, ne khubirira mu lisuubila liabwe mu niye boole khuba ne bulamu (Yn. 20.31).
Enyuma we limanyisia liliekesia lili Elomo eya mindali eya Wele eli Yesu, sitonyi sie khunyoa sie sitabu sino siekesia kamayia kamakali kakekesia kali Yesu ali Omuonia owasuubisibwa, ooli Omwana owa Wele. Kano kaloondelwa ne lilomaloma liliinoosia ako kafunuulwe ne kamayia kewe. Sitonyi sino mu sitabu sia Yoana siboola nga babaandu balala ne basuubila mu Yesu mala bekela babeeka bewe, ne babaandi nabo bamuyingania mala baloba khu suubila. Kimiliango 13—17 kiaandikwa mu buleeyi khu busangaanilo bwa siimbi nibwo Yesu aaba nabwo alala ne babeeka bewe siilo nisio aambilwakho. Lundi kiboola kamakhuwa kewe ke lirekekha ne khubaramo kumwoyo ekolooba nio busie bamwire khu musalaba. Kimiliango kimimaliilisi kiboola ke liaambwa lia Yesu ne liyaalwa liewe, libaambwa, lilamukha ne libonekhana liewe khu beeka bewe enyuma we lilamukha.
Lukano lwo mukhasi owaambilwa mu bueeyi (Yn. 8.1-11) lwakabukhasibwa khukhwama mu maandiko kakaandi sikila bakaluukhasi be bitabu bikali bie khunyoa se baluandika tawe, ne babaandi nabo balutubakho abuundu aandi.
Yoana aandalasia siianwa sie bulamu bwa mindali khubirira mu Kristo, siianwa sino siliio luno mala siicha khwaabo bafukiilila Yesu nga engila, bung'ali, ne bulamu. Liiba liboofu lie khuukia lia Yoana lili khurumikhira chingano che bibiindu bibiamanyikhana bie limenya lia buli ndaalo bibiekesia bung'ali bwa roho, nga kameechi, kumukaati, buwaanga, omwaayi ne kamakheese kewe, ne kumusabibu ne kamatuunda kaakwo.
Kaalimo mu bwimbi
Limanyisia 1.1-18
Yoana Omubatiisi ne babeeka ba Yesu be khunyoa 1.19-51
Kimilimo kia Yesu mu baandu 2.1—12.50
Chindaalo chimaliilisi mu Yerusalemu 13.1—19.42
Lilamukha ne libonekha lio Mwami 20.1-31
Limaliilisia: Libonekha liliindi mu Kalilaya 21.1-25
Šiuo metu pasirinkta:
Yn. LIMANYISIA: LUBUKUSU
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©Bible Society of Kenya, 2019