Gha ta Wəshi 8
8
1Pa Shala zəzəte yɛ Nowɛ le wəshi keseɗa nyi ki ghɛ ba'a nyi hwa gamba nyi mbe kwambelə yite. Pa ŋkɛ vɛte sefə te hɛɗi, ntake yɛmə kagweɗakwe geva. 2Jejaslɛ ɗasle nyi mbe hɛɗi ba'a wəfela nyi pelɛ ghweme ŋzleŋzlete geva, pa va fɛake geva keme. 3Zayɛ zayɛ yɛmə hasemte geva te hɛɗi. Mbe hɛ gwəmsə ba'a mcɛfemsə shifəakɛ shifə yɛmə. 4Te kwa meŋe mberefaŋeghəmbe ta hɛa tere kwa mberefaŋe ghereŋenyɛ kwambelə pelɛ ghəa ghweme ta Ararat. 5Nda shifə yashifə yɛmə pa te kwa meŋe ta tere. Ma te kwa ghate ta hɛa terea shɛ ne, kanewe newe ghəa yɛ ghweme mbeli kancɛ geva.
6Ma kwetere wəmbəa hɛ wəfaɗemsə ne, pa Nowɛ ghwenemte wəfela nya slate ŋkɛ te kwambelə. 7Waɗe ŋkɛ pelakɛ ghame shave mbe. Pərə ghame zlə kashave, lelə ba'a zhezhɛneke geva. Yɛmə yaneghe ŋkɛ kahase te hɛɗi. 8Kwetere wəmbəa ŋkɛ ne, pa Nowɛ ghwenakɛ gheɗepe kanewe kenza nde nahe yɛmə keshifə te hɛɗi. 9Ama kenakɛ ŋkwa kempekwe gheɗepea shɛ we. Pa ŋkɛ zhɛneghe geva kase kadzembe kwambelə yitea Nowɛ, kwa nza nde mba yɛmə bətə kənəa hɛɗi. Pa Nowɛ haghe dzeve, kelete ŋkɛ ba'a zhɛneyi ŋkɛ mbe kwambelə. 10Pa ŋkɛ neghete hɛ mberefaŋe, zhɛne, pa ŋkɛ pelakɛ ŋkɛ kashave. 11Ma kwa tɛhwɛɗi ne, pa gheɗepe zhɛneke geva kase sha Nowɛ. Slekea bekele kakwateɗa ya mbe mɛ ve. Ma tagha gɛ ne, pa Nowɛ ɗepete nahe yɛmə kegweɗakwe te hɛɗi. 12Pa ŋkɛ neghete hɛ mberefaŋe zhɛkwa, pa ŋkɛ pelakɛ gheɗepe kashave, ama kezhɛneke geva nde kase shɛ we.
13Ma mbe va kwa gwəmsə ŋkwaŋe ba'a kwetɛŋe se te ya ta Nowɛ, mbe kwa ghate ta hɛa ŋkɛ ne, kehase hase yɛmə te hɛɗi. Pa Nowɛ felaŋemte wəsə nya kənəa kwambeləa shɛ, newe ke ne, kehase hase ŋkwa nya te hɛɗi. 14Ma mbe tere kwa bake, mbe hɛ bakemsə mberefaŋeghəmbe ne, keghwele ghwele hɛɗi fate fate.
15Tagha, ma ke Shala sha Nowɛ: 16«Shave mbe kwambelə le male ta ŋa, ŋwalea ŋa ba'a makwashia ŋa. 17Fəakave wəshi keseɗa pɛtɛ nyi mbe yitea gha, mama ta 'yɛ, wəshi keseɗa nyi jama jama ba'a nyi ɓɛhwɛ ɓɛhwɛ nyi kedzeghwa te hɛɗi. Viɗikɛ hɛɗi hɛ ba'a yate ya hɛ kwele kwele.» 18Cape yɛ Nowɛ kashave mbe kwambelə le ŋwalea ŋkɛ, male ta ŋkɛ ba'a ka makwashia ŋkɛ. 19Pɛtɛ wəshi keseɗa nyi jama jama ba'a nyi ɓɛhwɛ ɓɛhwɛ, yɛ 'yɛ ba'a wəshi nyi kedzeghwa te hɛɗi kashave mbe kwambelə perə kehwelefe kehwelefe.
20Pa Nowɛ pate nda reghwetɛ ke Mahwətə. Pa ŋkɛ ntave zake zake hwa wəshi keseɗa nyi jama jama nyi wɛŋe wɛŋe ba'a hwa 'yɛ nyi wɛŋe wɛŋe ba'a dzeghekɛ nda melɛ kwa tere tere te reghwetɛa shɛ. 21Pa Mahwətə fate zəŋwəa wəshi melɛa shɛhɛ ganyɛke. Ma ke mbe ghəa ŋkɛ: «Katezhɛne 'ya kabezla hɛɗi tewəmbəreke mbeli we. Kaganda ne, wəsə kwa ndiremi ya mbe wənəa nci se kawəzege. Ama katezhɛne 'ya kaza sebe te wəshi nyi nza mpi hwe zhɛkwa kala nya menete nya 'ya we.
22Kala nya tetemə hɛɗi ne,
katetemə yɛ tsawe wəshi ba'a mene wəshi se te wəve,
yɛ ntasle le hwələ,
yɛ cimə le feghwe
ba'a yɛ veci le viɗi.»
Šiuo metu pasirinkta:
Gha ta Wəshi 8: BEKDC12
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
La Bible en langue Kapsiki avec les livres deutérocanoniques © Alliance Biblique du Cameroun 2012.