Gha ta Wəshi 4
4
Yɛ Kayin le Abɛl
1Ntake yɛ Adam kaɓelahe le male ta ŋkɛ Ɛve. Pa nde dzawa hwə ba'a yake Kayin, ma ke: «Nahe 'ya keyake za te zlaɓa ta Mahwətə.» 2Pa nde zhɛne kayake wəza meghekɛa Kayin, Abɛl sləa ŋkɛ.
Kande ya wəshi se Abɛl, kande wəza Kayin. 3Ma kwa wetɛaŋe və ne, pa Kayin keleke nda wəshi nyi kese te wəve ke Mahwətə. 4Pa Abɛl le ŋa ŋkɛ perə fəke nda zhɛgwəa lɛməa timɛti nyi keghate kaya hwa wəshi keseɗa ta ŋkɛ. Pa ŋkɛ ndeke nda zhɛzhi nyi ganji ganji ba'a merege ke Mahwətə. Pa Mahwətə kemaneve yɛ Abɛl le wəsə nya ndeke nda ŋkɛ megela. 5Ama pa ŋkɛ zhɛremte kema ta ŋkɛ va yɛ Kayin le wəshi nyi keleke nda ŋkɛ. Pa Kayin hwepete wənə kwele kwele ba'a heɗete kema. 6Ma ke Mahwətə shɛ: «Yitea wa hwepete wənə ba'a heɗete kema na wa? 7Ma kemenete na ndeɗekə ne, katesate ŋa na te ŋkwa. Ma keɗema na kemenete ndeɗekə ne, wa nya jaɗafa nya kala pərətiməa wəsə keseɗa meɓelahe yitea mɛa cɛa ŋa kezha cɛha ŋa. Ama va gha ŋkɛ kezha hərəte ŋkɛ.» 8Ama ma ke Kayin sha wəza meghekɛ: «Mbara ɓə kadzemte.» Ma kwa dzemte hɛ ne, zhibədikə Kayin kənəa wəza meghekɛ Abɛl, pa ŋkɛ peslekɛ ŋkɛ.
9Ma ke Mahwətə sha Kayin: «Tema wəza meyɛ ŋa Abɛl wa?» Ma ke Kayin zhɛnete: «Keɗepe 'ya we. 'Ya nza kande ya wəza meyɛ ɗa na?» 10Ma ke Mahwətə shɛ: «Wa wəsə nya menete nya na wa? Nahe mimia wəza meyɛ ŋa ketsate ɗa lewela same kwagha te hɛɗi. 11Kebezla bezla na tsetsenya, keŋka ŋka na te hɛɗi nya keghwenete geva kezha tawe mimia wəza meyɛ ŋa nya kesheke te dzeve ta ŋa. 12Ma vəa ŋkwa nya tewəza na ne, katemene ŋa wəshi hɛɗi we. Tahe tedzeghwa na ba'a katendeŋe na te hɛɗi.»
13Ma ke Kayin sha Mahwətə: «Keɗaŋeɗa yaka nya te 'ya kakele. 14Ma keŋkamte ɗa na se te hɛɗi ganyɛ nya ɓeshi ne, katewəfərə ɗa 'ya cakeɗake le gha. Tahe tedzeghwa 'ya ba'a katendeŋe 'ya te hɛɗi, ma yayata wəndə nya ketenakɛ ɗa ne, katepesle ɗa ŋkɛ.» 15Ma ke Mahwətə shɛ: «Ewə, ma kepeslekɛ ŋa wəndə ne, mberefaŋe zhigə tewa geva ŋkɛ.»
Tagha gɛ, pa Mahwətə ɗahate wəsə te Kayin kezha ɗema yayata wəndə nya kekeme le kapesle ŋkɛ. 16Cape Kayin slənyɛ kwa kema ta Mahwətə, pa ŋkɛ nzanyɛ te hɛɗia Nod, laka ŋkwa kesame ta veci yitea Ɛdɛn.
Hwelefefia Kayin
17Pa Kayin ɓelahe le male ta ŋkɛ, njehe nde le hwə, pa nde yake Ɛnok. Ntake Kayin kaŋsle kwete meleme, pa ŋkɛ hekate nda sləa wəzege ta ŋkɛ Ɛnok ke melemea shɛ. 18Ɛnok ya kayiteyɛa Irad, Irad ya kayiteyɛa Mɛhəwyayɛl, Mɛhəwyayɛl ya kayiteyɛa Mɛtəwshayɛl, Mɛtəwshayɛl ya kayiteyɛa Lɛmɛk.
19Pa Lɛmɛk wəmeve mi bake. Ada sləa kwa ghate, Sila sləa kwa bake. 20Pa Ada yake Yabal nya kashia mbeli nyi kenzanji mbe yɛ cɛ lekwesa ba'a nyi nza wəshi keseɗa va hɛ. 21Ma wəza meghekɛa Yabal ne, Yəwbal sləa ŋkɛ. Gheŋkɛ ya kashia ka tsa ŋgwəleŋə ba'a ka vɛ shela. 22Pa Sila le ŋa nta perə yake wəzege teza nya nza sləa ŋkɛ kaTəwbal-Kayin. Gheŋkɛ ya kande vɛsə wəshi mze kwa tɛawetɛa ba'a nde gezla wəshi nyi le lɛ. Ma wəzha ta meghekɛa Təwbal-Kayin ne, Na'ama sləa nta.
23Ma ke Lɛmɛk sha mia ŋkɛ:
«Ada ba'a Sila, fa mə ghena ta ɗa,
mia Lɛmɛk, ve mə sleme yitea ghena nya geze 'ya!
Ma kempave ɗa wəndə ne, kapesle wəndə kwetɛŋe 'ya,
ma keɗakɛ ɗa wəndə le zhi ne, kapesle wəzege 'ya.
24Ma kenza nde zhili mberefaŋe yampə mbeli
kezha wa Kayin ne,
zhili mberefaŋemsə mberefaŋeghəmbe yatempə mbeli kezha wa ɗa.»
25Pa Adam ɓelahe le male ta ŋkɛ zhɛkwa, pa nde yake wəzege teza nya hekate nda sləa nde kaSɛt, kwa nza ŋkɛ ma ke: «Nahe Shala kendeke ɗa kwete wəzege teza te ŋkwa Abɛl nya peslekɛ Kayin.»
26Pa Sɛt yake wəzege teza perə, pa ŋkɛ hekate nda slə kaƐnos. Se tagha ghate mbeli kasəkwə Shala, kaheka ŋkɛ le sləa Mahwətə.
Šiuo metu pasirinkta:
Gha ta Wəshi 4: BEKDC12
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
La Bible en langue Kapsiki avec les livres deutérocanoniques © Alliance Biblique du Cameroun 2012.