Jon 2
2
Lagiana la Vanua Kena
1Atagun gubwen̄ gairua lagiana vwate lol bwatutun vanua Kena lol vanua Kalili. I ratahin Jisas mulei aia, 2i Jisas maira non roron̄tai mulei ran warera huri lagiana. 3Batena waen mwa nogo ratahin Jisas mwa mai mwa bevea lalainia be, “Mara waen nu nogo, i waen mulei sigai.”
4Take Jisas mwa bwaliua be, “Gosav vev te ginau lalaiau be namen lolia. Taron noḡu lalaḡova mwa hav mai te radu.”
5Haḡe ratahin Jisas mwa bevea lalai ira atatun rovoga be, “Havanau be vi vevea lalai kimiu giv lolia.”
6Ira Jius nora silo abena huri bwaga melmeloi, bwatuna gea bwelehun wai gaiono ran tu aia, gaituvwa nu dadariha huri tovtovon wai kun lita vudolua. 7Jisas mwa bevea lalai ira atatun rovoga be, “Gin hogon bwelehu kera gea gin wai.” Haḡe ram hogon bamasirinira, 8i mwa bevea lalainira be, “Gin utu dagai wai rituai ba laia lalai wani be lavoa huri ginaganiana.” Haḡe ram lai wai lalainia, 9gabe nu vogi huba mwa mai gi waen, i kea mwa damuhi ron̄oe. Kea mwa hav iloe tehe be waen uhu nu mai nin halabehe (take, ira atatun rovoga gabe ran utu wai ram iloe); i mwa uloi wani gabe mwa lagi, 10mwa bevea lalainia be, “Atatu dodolua ram lai waen tavuha lalai ira tausala la bwativuna, i ataguna be ram mwin waen gaivua huba, kea mwa siv lai waen gabe nu hav tavuha tehe. Take giḡo gom dau waen tavuha vaivotu kadogaha!”
11Jisas nu lol muan ginau dan̄an̄a geki Kena lol vanua Kalili; aia kea nu lol bisirai sarisarina, i non roron̄tai ram binihimwasiginia. 12Atagun ginau geki, Jisas mai ratahina, ira tuana maira roron̄tai ram bano vai Kapanium i ram dogo aia huri gubwen̄i rituai.
Jisas mwa Ḡoro luara Ram Lealeahi i ram Bolvoli lol Imwan God
(Mat 21.12-13; Mak 11.15-17; Luk 19.45-46)
13Mwa sosori huba gin gubwen̄i huri Samsamwaran Halbisḡalau, Jisas mwa bano vai Jerusalem. 14Aia lol Imwa Tataro, kea mwa ḡita atatu be ram salei bilara buluki, sipsip, manu i atatu mulei gabe ram leahi homu, ram dogo la nora tebol. 15Haḡe mwa lol gao ririgi huri gai vivilisi i mwa ḡoro lua nani mai buluki mai sipsip nin Imwa Tataro, i mwa dabe burigai nora tebol be ram leahi homu i mwa ḡaburai kaburai nora homu; 16haḡe mwa bevea lalainira gabe ram salei manu be, “Gin lai dagainira nin ute geki! Gisav lol te imwan Tamaḡu gi tanon volvoligi!” 17Haḡe non roron̄tai ram binihi dum ravrava sabuga be mwa bevea be, “Noḡu doroniva huri imwamwa God, nuḡun gabi be mwa oda aloloku.”
18Haḡe ira lavoa non ira Jius ram bwaliua be, “Gov lol dum havanau dan̄an̄a be vi dovon̄ainia lalai kamai be nom mwasigi abena be gov lol ginau geki?”
19Jisas mwa bwaliura be, “Nav salan̄ai Imwa Tataro geki, i atagun gubwen̄ gaitolu nav haḡo domarei muleinia.”
20Haḡe ram bevea lalainia be, “Nu lai taul n̄avul gaivasi domwan gaiono be men haḡoana na imwa geki! Kun hanigi be gov haḡo domareinia atagun gubwen̄ gaitolu!”
21Take imwa tataro be Jisas mwa avo aluna, kea rebehina sibona. 22Batena be nu tomare mulei nin mateana, non roron̄tai ram binihi dumwia be nu vev ginau uhu amua, i ram binihimwasigi ravrava sabuga i havanau Jisas nu vevea.
Jisas mwa Ilo Alen̄an Atatu
23Batena be Jisas mwa dogo Jerusalem lol Samsamwaran Halbisḡalau, kera ivusi ran vinihi mwasiginia batena ran gita ginau dan̄an̄a be nu lolira. 24Take Jisas mwa hav vinihi te mwasiginira, bwatuna be mwa ilora duluai. 25Mwa hav tu tehe be atatu dolua men vevera lalainia, bwatuna kea sibona mwa ilo ginau duluai be mwa dogo alolora.
Šiuo metu pasirinkta:
Jon 2: HNB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible Society of the South Pacific