मरकुस 11
11
येसु येरुसलेम होनमळ
1पजा ओर अंटोर येरुसलेम सहरता दग्गेरा जय्तुन मराकुना गुट्टापोर्रो मनना बैतपागे आनि बेतानिया इनना नाह्कुना दग्गेरा एव्तुर. पजा येसु ओना इव्वुर सिस्युल्कुन केय्सि, 2ओर्क इल्हा वेह्चि नाटे लोहतोर. “मी मुन्ने दिस्सना नाटे होंट. अद नाटे होळियता होळयुळे, बस्केने बोरे उद्दुवद उंदि गाडदि पोरि दोह्चि मत्तद मीकु दिसंता, दान लेहकुंचि पीसि वटु. 3ओक्कला अदुन पीसि वायनेंके, इल्हा बारि कीसंतिर? इंचि बोरन्ना पूसकीते, सामिंक दीना अव्सरम मंता इंचि वेहट. अस्के ओर बिराना अदुन इग्गे लोहानुर,” इत्तोर.
4येसु वेहताप ओर अद नाटे होत्तुर. अगा हर्दा पक्काते उंदि लोता तल्पुना दग्गेरा गाडदि पोरि दोहचि मत्तद ओर्क दिसता. अस्के अदुन लेहतुर. 5अगा नित्तिसि मत्तुर इच्चुर लोकुल्क हूळसि, “मिमेट बतल कीसंतिर? गाडदि पोरिन बारि लेहसंतिर?” इंचि पूसकीतुर. 6ओर येसु वेहतापे ओर्क वेहतस्के, आ लोकुल्क ओर्कुन होना हीतुर. 7ओर अद गाडदि पोरिन येसुनगा तच्चि, दानपोर्रो ओरा कपडिं वाटतुर. अस्के येसु दानपोर्रो उद्तोर. 8वेल्लेटुर लोकुल्क ओर केर्ता कपडिं तेंडसि, येसु होनना हर्दे तारतुर. इंकिच्चुर लोकुल्क अय्ते नेलिने मत्ता मराकुना कोम्मां नर्किसि हर्दे तारतुर. 9-10येसुना पज्जो-मुन्ने ताकाना लोकुल्क वरगेयसेके इल्हा इनुंदुर, “सामिना पोरोलते वायानोंक, पेनदा आसिर्वाद दोर्किकाटीं, होसन्ना! होसन्ना!#11:9-10 होसन्ना इत्ते-पेनदुन तल्सकुनमळ. दाविदनालेसीं राज्येम कियालय वायानोंक, पेनदा आसिर्वाद दोर्किकाटीं, स्वर्गमते मंदना पेनदुक दन्यवाद,” इंचि इत्तुर.
11इल्हा येसु येरुसलेम सहरते होळियतोर. पजा गुळितगा होंचि, सुट्टु अन्नि वस्तुकुन तिरियसि हूळतोर. पोळ्दु होत्ता इंचि ओना पन्नेंड सिस्युल्कुन पीसि बेतानिया नाटे होत्तोर.
पंडि हिलुवा अंजिर मरा
12इंकुंदि रोजु येसु बेतानिया नाटेनाल वायनेंके ओन्क कर्वेस्ता. 13हर्दाल इच्चुर लक्कु उंदि पच्चटा अंजिर मरातुन हूळसि, दानकु पंडिं मंतां बारे इंचि आ मरातगा होत्तोर. गानि आ मराकु आकिं तप्पा बतांगे मनाहिल्लें. बारित्ते अद पंडिं हादाना वेला आयो. 14अस्के येसु अद मरातुन, “इंदकेटाल नीवा पंडिं बस्केने बोरे तिन्नुर,” इंचि इत्तोर. अद पोल्लेतुन ओना सिस्युल्कु केंजतुर.
गुळितगा अम्मानोर्कुन येसु गेदमंतोर
15ओर येरुसलेम एव्ता पजा येसु गुळिते होत्तोर. अगा गुळिते बोर अय्ते अम्मुमळ-अस्सुड कीसेक मत्तुर, ओर्कुन पलाते गेदुमतोर. अल्हेने कोत्तां अदला-बदला कियानोरा बल्लन आनि मोक्कु हियालय पावरेम पिट्टें अम्मानोर्कुना कुर्सिन मिळ्हाचि वाटतोर. 16अल्हा कीसि गुळिताल बोने बदे वस्तु पीसि होनुळ-वायुळ किया हिया हिल्लोर. 17पजा ओर्क इल्हा वेहालय दल्गतोर. “नावा लोतुन दुनियाता अंटोर लोकुल्क पारतना कियाना जेगा इनानुर, इंचि दर्मसास्त्रमते रासि हिल्लेना? गानि मिमेट दीन दोंगाल्क मक्कना जेगा कीतिर,” इत्तोर. 18इल्हा अंटोर लोकुल्क येसु वेहाना पोल्लें केंजसि इचंत्रम आयुंदुर. अदुनहाटीं पेर्मालोर, दर्मसास्त्रम कराहना गुरुल्क येसुन हव्कालय हूळुंदुर. गानि ओन अल्हा बतलन्ना कियालय ओर वेरियुंदुर. 19पजा येसु, ओना सिस्युल्कु पोळ्दु होत्तारिते येरुसलेमताल पेय्सि होत्तुर.
वतसि होत्ता अंजिर मरा
20इंकुंदि रोजु हक्केरेने मर्रा येरुसलेमतेके वायानेंके ओर अद अंजिर मरातुन हूळतुर, अस्के अद मरा हिह्कुनाल अय्ते कोस्सादाका पूरा वतसि होंचि मत्ता. 21येसु अद मरातुन इत्ता पोल्ले पत्रुंक मति वाता. अस्के ओर येसुन, “अद हूळा गुरु#11:21 गुरु गुरु, रब्बी उंदे पोल्ले आंदुर.! निमे सापनेम हीता अंजिर मरा वतसि होत्ता,” इंचि इत्तोर. 22-23अस्के येसु ओर्कु इल्हा जवाब हीतोर. “मिमेट पेनदापोर्रो विस्वासम इर्राट. नना मीकु निजम वेहांतन, बोरन्ना इद गुट्टातुन, ‘इग्गेटाल तेदसि समुद्रमते होंचि अर्रा’ इंचि बतले अनमानम हिलाकोंटा विस्वासमते इनानय्ते, अद होंचि अर्रार. 24अदुनहाटीं नना मीकु वेहांतन, मिमेट विस्वासमतोनि पारतनाते बतल तल्किना, अद मीकु दोर्कता इंचि विस्वासम कीम्टु, अस्के अद मीवादे आंता. 25अल्हेने मीवा मनसुनेगिंटा बोना पोर्रोनना पगा मत्ते, मिमेट पारतना कियालय निततस्के मुन्ने ओन मापि कीम्टु. अस्के स्वर्गमते मंदना पेनबाबालगुडा मीवा तप्पुकुन मापि कींतोर. 26मिमेटगिंटा इंकावरोना तप्पुकुन मापि कियाकोंटे, स्वर्गमते मंदना पेनबाबालगुडा मीवा तप्पुकुन मापि किय्योर,” इंचि वेहतोर.#11:26 इद वचनम कोन्नि पांडु लिपिने हिल्ले.
येसुना अदिकारमता बारेमते पूसकियमळ
27ओर येरुसलेम सहरते मर्रा वातस्के, येसु गुळिते तिरियसेक मत्तोर. अस्के पेर्मालोर, दर्मसास्त्रम कराहना गुरुल्क आनि यहुदि पेद्दाल्क येसुनगा वातुर. वासि, 28“निमे ई कबाह्क बद अदिकारमते कीसंतिन? नीकु ई कबाह्क कियालय अदिकारम बोर हीतोर?” इंचि पूसकीतुर. 29अस्के येसु ओर्कुन इत्तोर. “ननागुडा मीकुन उंदि सवाल पूसकींतन. मिमेट जवाब हियानय्ते, नना बद अदिकारमते इव कबाह्क कीसंतन इत्तद वेहंतन. 30अय्ते जवाब हीम्टु, योहानुंक बापतिस्मा हियाना अदिकारम बगाटाल दोर्कता? स्वर्गमताला हिलाकोंटे मनकालोराहेंदाल दोर्कतना?” इत्तोर. 31-32अस्के, ओर-ओरे इल्हा वळ्ककुनालय दल्गतुर, “ओक्कला स्वर्गमताल दोर्कता इंचि मनम इनानय्ते, ‘मिमेट योहानुन बारि नम्मिर’ इंचि इनानुर. ओक्कला मनम मनकालोराहेंदाल दोर्कता इनानय्ते, लोकुल्कुना वेर्रे! बारित्ते योहान निजमे पेनदा कबुरतोर इंचि ओर नम्मंतुर,” इत्तुर. 33अदुनहाटीं ओर, “माक एर्का हिल्ले,” इंचि इत्तुर. अस्के, “अल्हा अय्ते, इव कबाह्क बद अदिकारमते कीसंतनो ननागुडा मीकु वेहोन,” इंचि येसु इत्तोर.
Šiuo metu pasirinkta:
मरकुस 11: ESG
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Wycliffe Bible Translators, Inc. All rights reserved.