MAK 4
4
A tavaluileo huri na tangaloi na kaburaki biu
(Mat 13.1-9; Luk 8.4-8)
1Vunu i Jisas mo tinakaki taliku mo huhuira mana Kwai* Tokatoka Lakua Galili*. A vao lakua haburu ramo vileki dalia, vunu mo galo tilolo aga mo hugu lolona. A aga hi aia lolo kwai tokatoka lakua, a vao ramo tu auta. #Mak 3.7-9; Luk 5.1-3 2I Jisas u tuku huhuira kina kinau rusa lo tavaluileo.
Lo nona huhuiana mo huhuira, mo viti, #Mat 13.34; Mak 4.33-34 3“Tulu gwerongo huri na vevehuri hika. A tangaloi u vano kwara ne kaburaki bulana biu. 4Lolona mo toko kaburaki na biu hi, tuaki rau sovi tilo hala, vunu a manu ra va vanamai ra va kani savia. 5Tuaki rau sovi tilo guruguru vatu, vae ramo tubu bulu maia, huri a tanoki he bua tea. 6Vae a mataniaho mo kwalao hake a tano mo salangi na rivurivu karagwa vano hini ramo goru, huri a kakwariga rau hivo he bua tea. 7A biu tuaki rau sovi tilo tano lolo livuka na karo a kasiki eia, vae a karo vano hi ramo mauri, ramo tali korokoro na rivurivu vano hi, vae a kwaiga va tikei. 8Vae a biu ratuaki rau sovi tilo tano karea, ramo tubu ramo mauri ramo kwai, tuaki a kwaiga ngavu kaitolu, tuaki a kwaiga ngavu kaiono, tuaki vidolua.”
9Vunu i Jisas mo kwaha maira mo viti kwara, “A gweromiu eia. Tulu rongohuri tabetabeki na leo vano hi.” #Mat 11.15; 13.43; Mak 4.23; Luk 14.35; Rev 2.7,11,17,29; 3.6,13,22
?Kworoho i Jisas mo toko kwaha tavatavalui leo hokinia hi?
(Mat 13.10-17; Luk 8.9-10)
10Hikani a vao ramo mulemule vunu mo rovo, i Jisas u huguhugu kahea, tuaki hinea ramo hugu dalidalia mana nona ngwalagelo hangavulu dongwana kairua ramo uhia kwara ne matangwasaraki na tavaluileo vano hi lakwara. #Mat 15.15; Mak 7.17 11I Jisas mo darakinira mo viti “I God u masinge kwara tulu ne kikilai na hala hinea rau eno tavuniki tuai kwara aia ne hugwe kworohokinia koro na bulana tangaloi. Vae a tangaloi tavalavarea rana rongo na kinau savia kina tavaluileo. 12Hikani u vai kwehi kwara vae
‘Rana taga, vae ranahe taga kikilakinia tea,
diko rana rongo, vae ranahe rongo kikilakinia tea.
Hikani u vai kwehi huri kwara vae diko rau rongo utuhakinia,
rana bohi na domiga vaki mai God,
vae i God ne domidomi koro lakwara.’ ” #Aes 6.9-10; Sione 12.40; Bol 28.26-27
I Jisas mo matangwasaraki na tavaluileo huri na tangaloi na kaburaki biu
(Mat 13.18-23; Luk 8.11-15)
13I Jisas mo uduhuri kinira mo viti kwara, “?I kamu tulu he kikilai na tavaluileo tea hika? ?Vae tulu ne kikilai kworohoki na tavaluileo ratuaki? 14A tangaloi na kaburaki biu hi aia hoki na tangaloi u heretuvaki na leo noi God. 15Taroki a leo vano hi ramo heretuvakiana, a tangaloi ramo rongora, vae i Setano* mo vanamai bulu maia, mo lavi na leo vano hi leletiu tina domiga, hoki na biu hi mo sovi tilo hala. 16A tangaloi tuaki aira hoki na biu vano hi ramo sovi tilo guruguru vatu. Ramo rongo na leo rau lai lagwalagwakinia, 17vae rahe tu tea kwara ne tuai huri he hivo tea tilolo domiga kwara ne bua. Vae lolona a rongoana hati mo kihira, diko a tangaloi rau vai bulakikinira huri na leo hi, ramo tiraki bulu maia nga. #Mat 26.31; Mak 14.27 18A tangaloi tuaki aira hoki na biu vano hi hinea ramo sovi tilo tano lolo livuka na karo a kasiki eia. Aira hi ramo rongo na leo, 19vae a domiga rau kwalao laliki huri na kinau na varamana hika, rau lagwa mana vivilagoki rusa, rau lengai na kinau ratuaki vake. Vunu a domidomi vano hi rau gunu matei na leo hi, vae a kwaiki va tikei. #Mat 19.23-24; Mat 10.23-24; Luk 12.15-21; 18.24-25 20Vae a tangaloi tuaki aira hoki na biu vano hi ramo sovi tilo tano karea. Ramo rongo na leo hi, ramo kwiribibia, vunu mo kwai, tuaki a kwaiga ngavu kaitolu, tuaki ngavu kaiono, tuaki a kwaiga vidolua.”
A tavaluileo huri na laeti
(Luk 8.16-18)
21Vunu i Jisas mo vano nga lo leona mo viti kwara, “?Tulu domi kwara te tangaloi ne vai lai ne lavi na laeti, ne gworovi koroa kina bakete, diko ne taua tavuti na here? !Hetea! Vae ne taua lo tutu na laeti. #Mat 5.15; Luk 11.33 22A havakinau hi u eno tavuniki, vae i God ne lavia tivarea vaki na ngwasara. Vake a havakinau hi a tangaloi u gui koroa, vae i God ne lavia tivarea vaki lo leleha. #Mat 10.26; Luk 12.2 23A gweromiu eia. Tulu rongohuri tabetabeki na leo vano hi.” #Mat 11.15; 13.43; Mak 4.9; Luk 14.35; Rev 2.7,11,17,29; 3.6,13,22
24Aia mo kwaha maira taliku mo viti kwara, “Tulu lai tabetabeki a havakinau tulu mo rongo. Tulu ne lai lavi na leo ne taritarisa hokinia hi tulu mo toko karohuri luna. Vunu i God ne bete a kikikila vakevake lakwakamu. #Mat 7.2; Luk 6.38 25A tangaloi hinea u rongo kikilaki na nogu leo ba, aia ne rongo kikilakinia vakevake. Vae aia hinea he rongo kikilakinia te vohoki, vae a nona kikikila kelekele i God ne lavia tiua.” #Mat 13.12; 25.29; Luk 19.26
A tavaluileo huri na mamauriana na biu
26Vunu i Jisas mo vano nga mo viti “A hala hinea i God mo toko boloki vae ne hugwe koro na bulana tangaloi, aia hoki na mamauriana na biu. A tangaloi u kaburaki na biu lolo bulana agoago*. 27Mo bongi va maturu, vae mo rani va toko lakao. A biu na rivurivu hi ramo tubu ramo mauri. Vae aia he kikilai tea kwara a biu vano hi rau mauri kworohokinia. #Sem 5.7 28A tano aia kehekeheki u vai na biu mo tubu. A rivurivu hi mo mauri hake, mo tau rauki, vunu mo vira, mo tau kwaiki. 29Vae lo taroki mo sea, a tangaloi hi mo vano mo vileki na kwaiki.” #Joel 3.13; Rev 14.15
A tavaluileo huri na biu na vibaga
(Mat 13.31-32; Luk 13.18-19)
30I Jisas mo uduhuri kinira mo viti kwara, “?Na va dumuki kworohoki na hala hinea a bolokiana noi God ne mauri, ne matala, kwara i God ne hugwe koro na bulana tangaloi? ?A hava tavaluileo hinea kwara ne matangwasarakinia? 31Aia hoki na biu na vibaga. Lolona mo sovi tilo vikai katukwale u kelekele sileti na biu na vikai savia lo varamana, #Mat 17.20; Luk 17.6 32vae mo tubu, mo mauri hake, mo mulemai kina vikai viu lakua. U lakua sileti na vikai savia. A rangaki rau lalakua, a manu ramo tiu valavalaga luna.” #Esik 17.23; 31.6; Dan 4.12,21
I Jisas mo huhui na tangaloi kina tavaluileo kehekeheki
(Mat 13.34-35)
33I Jisas mo heretuvaki na leona lakwa na tangaloi, u kwahakwaha kina tavaluileo rusa hokinira hi. Mo viti na leo lakwara u taritarisa maira kwara rana kikilai. 34A nona leo he matangwasarakinira te lakwara, vae u kwaha maira kina tavaluileo kehe nga. Vae lolona hinea ramo huguhugu kahera mana nona ngwalagelo, mori matangwasaraki na kinau vunuhia lakwara.
I Jisas mo kwaha suri na navo mana langi
(Mat 8.23-27; Luk 8.22-25)
35Lo raviraviki lo rani hi, i Jisas mo kwaha mana nona ngwalagelo mo viti lakwara kwara, “Ta vano utu vaki tavalakwai tokatoka lakua tavaluki.”
36Vunu a nona ngwalagelo ramo tiraki na vao, ramo lavi i Jisas lo aga hi aia lolona ba, ramo vano. A aga ratuaki vake ramo hurira. 37Hika a langi lakua mo maraka, a navo ramo tinakaki ramo rahu tilolo aga lolona, kelekele mo eno kwara ne kukwere. 38I Jisas u hugu lo aga takuni, u ngwalulu u lungwa lo lungwana u maturu. Ramo vakaradae ramo viti “?Tisa, kohe domi huri tea? !Hika tana sala!”
39Hikani i Jisas mo maraka mo suri na langi mo viti “!Hugu butu!” Vunu mo kwaha mana navo mo viti kwara, “!Ko magemu!”
Hikani a langi mo hivo, a kwai tokatoka lakua mo tangwata medemedekinia. 40Vunu mo kwaha maira mo viti kwara, “?Kworoho tulu mo mataku haburu? ?A nomiu hauhuriana tikei radu?”
41Vae rau mataku haburu, ramo kwahakwaha mulekinira ramo viti “!E! ?A hava tangaloi aia hika? !A langi mana navo vake raru mo rongohuria!”
Šiuo metu pasirinkta:
MAK 4: HWT
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Havakinau New Testament © Bible Society of the South Pacific, 2016.