Йуһʼәнна Пешготьн
Пешготьн
Ль гора фькьра гәләк зана, ньвискʼаре ве кʼьтебе хьлазийа сәдсалийа пешьнда әва сәрһатийа ньвисийә. Ньвискʼар хԝәха наве хԝә кʼьтебеда надә. Ле те фәʼмкьрьне, кӧ ньвискʼар йәк жь һәр донздәһ шагьртед Иса буйә, аԝа готи Йуһʼәннайе кӧрʼе Зәбәди. Иса һьнге гази ԝи кьр, гава әԝ һе мәʼсигьр бу (Мәтта 4:21; Марԛос 1:19; Луԛа 5:10). Ӧса жи те фәʼмкьрьне, кӧ Йуһʼәнна әԝ шагьрт бу, бона кʼижани кӧ аһа ньвисар ә: «Шагьрте кӧ Иса же һʼьз дькьр» (Йуһʼәнна 13:23; 19:26; 20:2; 21:7, 20, 24).
Йуһʼәнна сәр пьрса жийина һʼәта-һʼәтайе дьсәкьнә, кʼижани кӧ мәрьв дькарә бьстинә. Бәле Йуһʼәнна дьньвисә кӧ мәрәме ве ньвисаре әв ә, ԝәки хԝәндәван баԝәр бькә, кӧ Иса йә Хьлазкьре создайи, Кӧрʼе Хԝәде у пе ве баԝәрийе жийина һʼәта-һʼәтайе бьстинә (20:31).
«Мьзгинийа ль гора Йуһʼәнна» һьндава һәр се Мьзгинийед майинда (йа Мәтта, Марԛос у Луԛа) тьһәрәки дьн бәрчʼәʼв дьбә. Ве Мьзгинийеда хԝәндәван рʼасти чәнд ԛәԝьмандьна тен, йед кӧ мьзгиндаред майин ньвисаред хԝәда нәданә кʼьфше. Мәсәлә: дәʼԝата Ԛанайеда, хәбәрдана Исайә тʼәви Никодемо, кʼӧлфәта самәри, ԛәнщбуна йе Бәйтһастайеда у йе жь зькмакийеда кор, ӧса жи сахкьрьна Лазаре мьри. Мьзгиндаред майин Мәтта, Марԛос у Луԛа гәләки ль сәр кьред Исайә Щәлиледа дьсәкьньн, ле Йуһʼәнна ль сәр кьред Оршәлимеда дьсәкьнә. Ӧса жи кʼьтебеда чәнд щара әв готьн һәнә: «Әз ьм фьлан тьшт йан беван тьшт» у гәләк жь ԝан готьна жи бь нишанед (кʼәрәмәтед) Исава гьредайи нә. Мәсәлә, Әԝ дәрһәԛа Хԝәда аһа дьбежә: «Әз ьм нане жийине» (6:35), «Әз ьм рʼонайа дьнйайе» (8:12), «Әз ьм дәре пез» (10:7), «Әз ьм шьване ԛәнщ» (10:11), «Әз ьм рʼабун у жийин» (11:25), «Әз ьм рʼе, рʼасти у жийин» (14:6) у «Әз ьм кʼола тьрийейә рʼаст» (15:1).
Мьзгиндаред майин һинкьрьна Иса бь мәсәла дьбежьн, ле Йуһʼәнна ашкәрә бона һәләԛәтийа Исайә тʼәви Баве Хԝә Хԝәде дьбежә. Ӧса жи Иса наве Хԝәдетийе бона Хԝә бь кʼар тинә: «ӘЗ ӘԜ ЬМ» (8:24, 28; 13:19) у «ӘЗ ҺӘМӘ» (8:58).
Кʼьтеб бәлайи сәр чәнд пʼара дьбә. Пешготьна хԝәда Йуһʼәнна дьньвисә кӧ Хәбәра Хԝәдейә һʼәта-һʼәтайе у Иса йәк ьн.
Пʼара кʼьтебейә пешьн жь сәре 2-а һʼәта 11-а бона гәләк кʼәрәмәта дьбежә у әԝ һʼәму жи әʼйан дькьн кӧ Иса Мәсиһ ә, Әԝ Хьлазкьре создайи йә у Кӧрʼе Хԝәде йә. Әв пʼара кʼьтебе дәрһәԛа ԝан мәрьвада дьбежә, йед кӧ баԝәрийа хԝә Иса анин бунә пәйчуйед Ԝи, ле һʼәрче майин мьԛабьли Ԝи сәкьнин у нәхԝәстьн Ԝи баԝәр бькьн.
Пʼара дӧда жь сәре 13-а һʼәта 17-а дьбежә, кӧ Иса бәри гьртьн у хачбуна Хԝә тʼәви шагьрта чаԝа пьсмам хәбәр дьдә, кӧ ԝан бьшьдинә.
Пʼара сьсийада жи жь сәре 18-а һʼәта 21-е дәрһәԛа гьртьн, хачбун, мьрьн, жь мьрьн-рʼабуне у жорһьлатьна Ԝида дьбежә.
Кʼьтеба Мьзгинийа Йуһʼәнна дьдә кʼьфше кӧ Иса «Хәбәра Хԝәде» йә, кӧ бь бәдәни һат нава мәда һеԝьри. Әԝ ә Хьлазкьре дьнйайе (4:42), Рʼонайийа кӧ һʼәму мәрьва рʼонайи дькә (1:9), Әԝ Хԝәха нишана һʼьзкьрьна Хԝәде йә, һьндава һʼәму мәрьвед дьнйайеда (3:16). Йуһʼәнна дина хԝә дьдә сәр даннасини у фькьра Иса, бь кʼижана Хԝәдетийа Иса у гәләк рʼастийед дьн әʼйан дьбьн. Нава даннасинийед Исада фькьра мерьв дьчә сәр ԝан хәбәра, йед кӧ һәр рʼож тенә бькʼаранине, ле Иса әԝ чаԝа нишанед сӧрʼ нава рʼастийа рʼӧһʼанида данә хәбате, кӧ йәк бькарьбә фәʼм бькә. Аԝа мәсәлә: нан, ав, рʼонайи, шьван, пәз, бахчә у тьштед майин.
Сәрәщәма фькьра кʼьтебе
Пешготьн (1:1-18)
Йуһʼәннайе ньхӧмдар у шагьртед Исайә пешьн (1:19-51)
Шьхӧлед Исайә ль дор-бәре чʼәме Урдӧне у нав Щәлиле (2:1–12:50)
Иса хатьре Хԝә жь шагьртед Хԝә дьхԝазә, дьл дьдә ль бәр ԝан у бона ԝан дӧа дькә (13:1–17:26)
Гьртьн, диԝанкьрьн, хачкьрьн у дәфьнкьрьна Иса (18:1–19:42)
Рʼабуна Исайә жь мьрьне у хӧйабуна Ԝи (20:1-31)
Пашготьн: Хӧйабунәкә дьн Щәлиледа (21:1-25)
Šiuo metu pasirinkta:
Йуһʼәнна Пешготьн: KmrNTC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Институт перевода Библии, 2000, 2011