यूहन्ना 14
14
येशूजी चेलामैंए सैं क्होमिंब
1“क्हेमैंए सैं खैता-खैता आङ्हाँन्। क्हेमैंइ परमेश्वरए फिर बिश्वास लमुँ, छलेन ङए फिरै या बिश्वास लद। 2ङए आबाए धिंर टिबै क्ल्ह्योमैं ल्हें मुँ। ङ क्हेमैंए ल्हागिर टिबै क्ल्ह्यो तयार लबर ह्यासिन् मुँ। छ आङिस्याँ ङइ क्हेमैंने चु ताँ आबिमल। 3ङ ह्यासि क्हेमैंए ल्हागिर क्ल्ह्यो तयार लल् खाँबै लिउँइँ ङ धबै युब्मुँ, धै क्हेमैं ङ ङाँर बोयाब्मुँ। झाइले ङ टिबै क्ल्ह्योर क्हेमैं या टिल् योंब्मुँ। 4ङ खनिर ह्यारिइमुँ, चर ह्याबै घ्याँ क्हेमैंज्यै या सेब्मुँ।”
घ्रि मत्त्रे घ्याँ येशून् ग
5थोमाइ येशूने बिइ, “ओ प्रभु, क्हि खनिर ह्यासिन् मुँ ङिइ आसे, छतसि ङिइ घ्याँ खैले ङो सेब?”
6येशूजी चने बिइ, “घ्याँ, क्ह्रोंसेंन्बै ताँ, नेरो छ्ह ङन् ग। ङउँइँले बाहेक् खाबै या परमेश्वर आबा ङाँर फेनेल् आखाँ। 7क्हेमैंइ ङलाइ ङो सेस्याँ ङए आबालाज्यै ङो सेमल। तारे क्हेमैंइ खीलाइ ङो सेब्मुँ, तलेबिस्याँ क्हेमैंइ खीलाइ म्रोंल् खाँइमुँ।”
8फिलिपइ खीने बिइ, “ओ प्रभु, ङिने आबा उँइँमिंन्। छ लमिंस्याँ ङिलाइ तोइ आचैदि।”
9येशूजी चने बिइ, “ओ फिलिप! च्हौ ल्हें त्हिंइ समा ङ क्हेमैंने बालुन् टिइ, अझै क्हिइ ङलाइ ङो आसे वा? ङलाइ म्रोंब्मैंइ आबालाज्यै या म्रोंइँमुँ। छतसि ‘ङिने आबा उँइँमिंन्?’ बिसि क्हिइ खैले बिल् खाँमुँ? 10ङ आबाने मुँ, आबा या ङने बालु मुँ बिबै ताँ क्हिइ आक्वें वा? ङइ क्हेमैंने बिबै ताँमैं ङ ह्रोंसए सैंर मैंसि पोंब् आङिं। दिलेया ङने टिबै आबाजी ङउँइँले ह्रोंसए केमैं लम। 11ङ आबाने मुँ आबा या ङने मुँ बिबै ताँ क्वेंन्। आक्वेंस्याँ ङइ लबै केमैं म्रोंसि क्वेंन्।
12“क्ह्रोंसेंन ङ क्हेमैंने बिमुँ, ङलाइ बिश्वास लब्मैंइ ङइ लबै केमैं लब्मुँ। च भन्दा थेबै केमैं या लब्मुँ। तलेबिस्याँ ङ आबा ङाँर ह्यासिन् मुँ। 13क्हेमैंइ ङए मिंर तो ह्रिलैया च्हउँइँले आबाए मान तरिगे बिसि क्हेमैंइ ह्रिबै सैमैं ङइ पूरा लमिंब्मुँ। 14क्हेमैंइ ङए मिंर तोइ सै ह्रिलेया ङइ पिंब्मुँ।
पबित्र प्ल्ह पिंम् बिबै ताँ
15“क्हेमैंइ ङलाइ म्हाँया लम् बिस्याँ ङइ बिबै ताँमैं या ङिंब्मुँ। 16झाइले ङ आबाने यो छ्युँ लब्मुँ, धै खीजी क्हेमैं ङाँर अर्को ल्होमिंबै थु कुलब्मुँ। धै खी क्हेमैंने खोंयोंन् बिलै तरिब्मुँ। 17खी क्ह्रोंसेंन्बै ताँ लोमिंबै पबित्र प्ल्ह ग। ह्युलर्बै म्हिमैंइ खीलाइ आक्वें, तलेबिस्याँ ह्युलर्बै म्हिमैंइ खी म्रोंइ आम्रोंइमुँ, सेइ आसेइमुँ। दिलेया क्हेमैंमि खीलाइ सेइमुँ। तलेबिस्या खी क्हेमैंने बालुन् टिमुँ, धै खी क्हेमैंनेन् तरिब्मुँ।
18“ङइ क्हेमैं आबा आरेब्मैं धोंले पिथेंरिब् आरे। ङ धबै क्हेमैं ङाँर युब्मुँ। 19तारे तिस्याँदे लिउँइँ ह्युलर्बै म्हिमैंइ ङ म्रोंरिब् आरे। दिलेया क्हेमैंइ बिस्याँ ङ म्रोंब्मुँ। ङ सोगों तबइले क्हेमैं या सोगों तरिब्मुँ। 20ङ ङए आबाने मुँ, क्हेमैं ङने मुँ, धै ङै या क्हेमैंने मुँ बिब च त्हिंइर क्हेमैंइ सेब्मुँ। 21ङइ बिबै ताँ ङिंब्मैं ङलाइ म्हाँया लब्मैं ग। धै ङलाइ म्हाँया लब्मैंने ङए आबाजी म्हाँया लब्मुँ। ङज्यै या चमैंलाइ म्हाँया लब्मुँ, झाइले ङ चमैं ङाँर म्रोंयुब्मुँ।”
22यहूदइ (इस्करियोतथें आङिं) येशूने “प्रभु, क्हिजी तो बिब् जा छ बिब क्हि ङि ङाँर मत्त्रे म्रोंयुम्मा? ह्युलर्बै म्हिमैं ङाँर आम्रोंयु वा?” बिसि ङ्योएमा।
23येशूजी चने बिइ, “खाबइ ङलाइ म्हाँया लमुँ, चइ ङए ताँ ङिंमुँ, धै ङए आबाजी चलाइ म्हाँया लब्मुँ, झाइले आबा नेरो ङ च ङाँर युसि चने बालु टिब्मुँ। 24ङलाइ म्हाँया आलब्मैंइ ङए ताँ आङिं। क्हेमैंइ थेरिबै ताँ ङल् आङिं, ङ कुल्मिंबै आबाल् ग।
25“ङ क्हेमैंने बालु मुँमन् ङइ चु ताँ क्हेमैंने बिइमुँ। 26आबाजी ङए मिंर क्हेमैंलाइ ल्होमिंबै पबित्र प्ल्ह कुलमिंब्मुँ। खीजी क्हेमैंलाइ तोन्दोंरि ताँमैं लोमिंब्मुँ। धै ङइ क्हेमैंने ओंसोंन् बिबै ताँन् ताँमैं क्हेमैंलाइ चिमिंब्मुँ।
27“ङए शान्ति क्हेमैंने पिंथेंब्मुँ। ङ ह्रोंसए शान्ति क्हेमैंलाइ पिंब्मुँ। चु ह्युलर्बै म्हिमैंइ पिंब् धोंबै शान्ति ङइ क्हेमैंलाइ आपिं। छतसि क्हेमैंए सैं खैता-खैता आतदु धै आङ्हिंन्। 28‘ङ ह्यासिन् मुँ, धबै क्हेमैं ङाँर’ युब्मुँ बिसि ङइ बिबै ताँ क्हेमैंइ थेइ। क्हेमैंइ ङलाइ म्हाँया लस्याँ ङ आबा ङाँर ह्यासिन् मुँ बिब् थेसि क्हेमैं सैं तोंमल। तलेबिस्याँ ङ भन्दा थेब आबा मुँ। 29च ताँ तखबै त्हेर क्हेमैंइ ङए ताँ क्वेंरिगे बिसि ङइ चु ताँ तब् भन्दा ओंसोंन् क्हेमैंने बिमिंइँमुँ। 30तारे चु ह्युलर्बै म्रुँ खसिन् मुँ। छतसि ङ क्हेमैंने ल्हें पोंरिब् आरे। चइ ङए फिर तोइ लल् आखाँ। 31दिलेया ङइ आबाने म्हाँया लम् बिब ह्युलर्बै म्हिमैंइ सेरिगे बिसि आबाजी ङने लद् बिबै केमैं ङ लरिमुँ।
“रेद्, ङ्यो छुइले ह्याले।”
Šiuo metu pasirinkta:
यूहन्ना 14: GCMB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Wycliffe Bible Translators, Inc. All rights reserved.