यूहन्ना 12
12
येशू बेथानिया बिबै क्ल्ह्योर
(मत्ती २६:६-१३; मर्कूस १४:३-९)
1दुःखने फ्रेबै चाडए टुरो ओंसों येशू बेथानिया बिबै नाँसर खइ। चर येशूजी सिबउँइँले सोगों लमिंबै लाजरस बिबै म्हि टिमल। 2खीए थुमैंइ चर खीए मान लबर ङेसर्बै चब् चबर हुइल। मार्थाइ चबै सैमैं पिंसेन् मुँल। लाजरसै या खीने बालु चब् चबर टिब्मैं न्होंर्बै घ्रि मुँल। 3च त्हेर्न मरियमइ सै ल्हें फेबै लिंबै थाँ खबै जटामसिए अत्तर तिम्नादे पखसि येशूए प्हलेर फोमिंइ। धै ह्रोंसए क्रप्होइ फ्योमिंइ। छलमा धिं तिगोंन् अत्तरए लिंबै थाँ नाँइ।#लूक ७:३७-३८ 4येशूए चेलामैं न्होंर्बै खीलाइ क्हाल् म्हैबै इस्करियोतथें यहूदाइ बिइ। 5“चु अत्तर सोंब्रा चाँदिए सिक्कर#12:5 सिक्कर सिक्क घ्रि म्हि घ्रिए तिदिंबै नों सै ग। चुँसि योंबै मुइ ङ्हाँदुमैं पिंस्याँ आतमल् वा?” 6चइ ङ्हाँदुमैंए फिर ल्हयो खसि चु ताँ बिब् आङिंल। तलेबिस्याँ च ह्यो मुँल। मुइ झोंबै नेंदो चने मुँल। छतसि च नेंदोउँइँले चइ मुइ ह्योब्रें लमल।
7दिलेया येशूजी बिइ, “लरिगे, चने तोइ आबिद्! ङ पाबै त्हिंइए ल्हागिर चइ लिंबै थाँ खबै अत्तर ओंसोंन् फोमिंब् ग। 8तलेबिस्याँ ङ्हाँदुमैं खोंयोंइ या क्हेमैंने तरिम्। ङ बिस्याँ खोंयोंइ क्हेमैंने बालु आत।”#व्य १५:११
लाजरस सैल् म्हैब
9ल्हें यहूदी म्हिमैंइ येशू बेथानिया नाँसर मुँ बिब् सेसि ल्हें म्हि चर खइ। चमैं येशूलाइ मत्त्रे ङ्योबर आङिं, दिलेया खीजी सिबउँइँले सोगों लमिंबै लाजरसै या ङ्ह्योब् बिसि खल। 10छतमा ख्रो पिंबै खेगि चिब्मैंइ लाजरसलाज्यै या सैबै मत लइ। 11तलेबिस्याँ येशूजी लाजरस सोगों लमिंमा ल्हें यहूदीमैंइ यहूदी चिब्मैं पिवासि येशूए फिर बिश्वास लबर होंल।
येशू यरूशलेमर ह्याब
(मत्ती २१:१-११; मर्कूस ११:१-११; लूका १९:२८-४०)
12प्हँन्हाँग्धों दुःखने फ्रेबै चाडर खबै म्हिए हुलइ येशू यरूशलेमर खइनामुँ बिब् थेइ। 13झाइले चमैंइ छोडाए हाँगमैं छेसि
“होसन्ना!
याहवेहए मिंर युबै इस्राएलर्बै म्रुँए जय जय तरिगे!” बिदै ओरदै खीए मान लबर त्होंइ।#भज ११८:२५-२६
14धै येशूजी गधा झज घ्रि स्यासि चए फिर क्रेइ। चु ताँए बारेर परमेश्वरए छ्वेर छले प्ह्रिथेंमुँ:
15सियोनए च्हमि आङ्हिंन्!
ङ्ह्योद्! क्हेमैंए म्रुँ गधा झजए फिर क्रेसि खइनमुँ।#जक ९:९
16खीए चेलामैंइ ओंसों चु ताँमैं आक्होल। दिलेया येशू सिबउँइँले सोगों तसि स्वर्गर्बै मान योंबै लिउँइँ मत्त्रे खीए बारेर चु ताँ छ्वेर प्ह्रिब् मुँन धै चु केमैं खीए मान लबै ल्हागिरि यरूशलेमथेंमैंइ लना बिसि चमैंइ क्होइ।
17येशूजी लाजरस छगोंउँइँले हुइसि सिबउँइँले सोगों लमिंमा। खीने बालु मुँबै म्हिमैंइ खीए ग्वाइ अरूमैंने बिरिल। 18छलेन खीजी चु औदिबै के लइमुँ बिब् थेसि म्हिए हुल खीने त्होबर खल। 19छतमा फरिसीमैंइ खेंमैंए न्होंर “ङ्ह्योत्ति! कहेमैंइ तोइ लल् खाँरिब् आरे। म्रोंइँमुँ वा, ह्युलर्बै ताँन् म्हिमैं चए लिलि ल्हैदिल् खाँइ बिबर होंइ।”
येशूजी ह्रोंस सिल् त्हुबै ताँ ओंसोंन् बिमिंब
20चाड म्हाँदिबर ह्याब्मैं न्होंरि को-कोइ ग्रिक ह्युलर्बै म्हिमैं या मुँल। 21चमैंइ गालीलर्बै बेथसेदाथें फिलिप ङाँर खसि “ओ चिब, ङि येशूने त्होदा ङ्हाँइमुँ,” बिसि यो छ्युँ लइ।
22छबिमा फिलिप ह्यासि अन्द्रियासने ताँ लइ। झाइले चमैं ङ्हिंना ङ्हिंन् येशू ङाँर ह्यासि च ताँ बिमिंइ। 23येशूजी चमैंने बिइ, “तारे म्हिए च्हजी थेबै मान योंबै त्हे तखइमुँ। 24क्ह्रोंसेंन ङ क्हेमैंने बिमुँ, गहुँए फुँ सर तेसि आक्राँइ बिस्याँ च फुँ घ्रिन् तरिम्। दिलेया च फुँ सर तेसि क्राँइ बिस्याँ चइ ल्हें रोमैं रोम्।#12:24 चु पदए अर्थ, म्हिमैं परमेश्वर ङाँर बोबै ल्हागिर ङ म्हिए च्ह तसि सिल् त्हुम् बिब् ग। 25ह्रोंसए ज्यु म्हाँया लब्मैंला ज्यु नास तयाब्मुँ। दिलेया परमेश्वरए केए ल्हागिरि सिलन् त्हुलेया तो धोंइ आङ्हाँन्ले प्रब्मैंइ बिस्याँ खोंयोंइ आखाँबै छ्ह योंब्मुँ।#मत्ती १०:३९; १६:२५; मर्क ८:३५; लूक ९:२४; १७:३३
26“ङए सेवा लदा ङ्हाँब्मैं ङए लिलि प्ररिगे। छलमा ङ खनिर टिमुँ, ङए सेवा लब्मैं चर्न तब्मुँ। ङए सेवा लब्मैंलाइ ङए आबाजी मान लब्मुँ।”
27“तोगो ङए सैं खैता-खैता ङ्हाँइमुँ। छतसि ङइ तो बिले? ‘ओ आबा, चु खबि छेबै दुःखउँइँले ङ जोगेमिंन्,’ बिब् उ? आङिं, तलेबिस्याँ चु दुःख नोबै ल्हागिर्न ङ चु ह्युलर युब् ग। 28छतसि, ओ आबा, क्हिए मिंए थेबै मान तल् पिंन्।”
बिबै तोदोंन् “ङए मिंए मान ङइ तल् पिंइँमुँ, धबै तल् पिंब्मुँ बिबै कै घ्रि स्वर्गउँइँले युइ।”
29चर रारिबै म्हिए हुलइ च कै थेसि “मु ङ्हेब् ग,” बिइ। कोइइ “स्वर्गदूत खीने पोंब् ग,” बिइ।
30येशूजी चमैंने बिइ, “चु स्वर्गउँइँले युबै कै ङए ल्हागिर युब आङिं, क्हेमैंइ थेरिगे बिसि युब् ग। 31तलेबिस्याँ तारे परमेश्वरजी चु ह्युलर्बै म्हिमैंए निसाफ लब्मुँ, धै चु ह्युलर्बै म्रुँलाइ बैरु भ्योंवाब्मुँ। 32झाइले ङलाइ कैंडो क्वेवामा ङइ ताँन् म्हिमैं ङ ङाँइन चैंब्मुँ।” 33खी खैले सिल् त्हुम्#12:33 खैले सिल् त्हुम् प्रभु येशूए अर्थ ह्रोंस क्रूसर च्योसि सियाबइले ताँन् ह्रेंर्बै म्हिमैं जोगेमिंब्मुँ। बिबै ताँ म्हिमैंइ क्होरिगे बिसि खीजी चु ताँ बिल।
34चर्बै म्हिमैंइ खीने “परमेश्वरजी कुल्मिंबै म्रुँ ख्रीष्ट खोंयोंन् बिलै तरिम् बिबै ताँ छ्वेउँइँले ङिइ थेइमुँ। दिलेया म्हिए च्ह कैंडो क्वेलन् त्हुम् बिसि क्हिजी खैले बिल् खाँमुँ? चु म्हिए च्ह बिब् खाब् जा?” बिसि ङ्योएइ।#भज ११०:४; यशै ९:७; इज ३७:२५; दान ७:१४
35येशूजी चमैंने बिइ, “अझै तिस्याँदे समा चारबै ह्वे क्हेमैंनेन् तब्मुँ। मिछु खैबइ क्हेमैं आहुरिगे बिसि चारबै ह्वे क्हेमैंने मुँरिबर्न प्ररिद्। मिछु खैबर प्रबै म्हिइ ह्रोंस् खनिर ह्यारिइमुँ बिसि सेल् आखाँ। 36क्हेमैं चारबै ह्वे योंब्मैं तरिगे बिसि ह्वे क्हेमैंने मुँरिबर्न चारबै ह्वेर बिश्वास लद्।”
येशूए फिर बिश्वास आलबै म्हिमैं
चु ताँ बिबै लिउँइँ येशू च क्ल्ह्योउँइँले ह्याइ, धै चमैंउँइँले लोसि टिइ। 37येशूजी यहूदीमैंए उँइँर ल्हें औदिबै चिनुमैं लल। दिलेया चमैंइ खीए फिर बिश्वास आल। 38यशैया अगमबक्ताइ बिबै ताँ पूरा तरिगे बिसि चु तलन् त्हुमल।
“ओ याहवेह, ङिइ बिबै ताँ खाबइ क्वेंइ?
धै याहवेहजी लबै शक्तिए केमैं खाब्ने उँइँमिंइ?” बिसि यशैयाइ बिल।#12:38 यशैयाइ बिबै अर्थ, म्हिमैंइ अझै याहवेहए बारेर क्होल् आम्है। (यशैया ५३:१)#यशै ५३:१
39छतसि चमैंइ बिश्वास लल् आखाँ। तलेबिस्याँ यशैयाइ धबै छ बिइमुँ,
40ङइ चमैंलाइ सल् लमिंल् आत्हुरिगे बिसि
चमैंए मिइ आम्रोंरिगे, खोंइ आक्होरिगे,
धै चमैं सैं एसि ङ ङाँर आखरिगे बिसि
ङइ चमैंए मि म्रोंल् आखाँब् लमिंइँमुँ,
धै चमैंए खों सारो लमिंइँमुँ,
बिसि परमेश्वरजी बिइमुँ।#यशै ६:१०
41यशैयाइ येशूए थेबै मान म्रोंसि खीए बारेर चु ताँ बिल।
42छान् तलेया यहूदी चिबनाँब्मैंए न्होंरि ल्हें म्हिइ येशूए फिर बिश्वास लइ। दिलेया चमैं फरिसीमैंने ङ्हिंसि “म्हि च्हों धिंउँइँले तेवाम् उ?” ङ्हाँसि खेंमैंइ येशूए फिर बिश्वास लबै बारेर खाबने या आबिमल। 43तलेबिस्याँ चमैंइ परमेश्वरउँइँले योंबै मान भन्दा म्हिमैंउँइँले योंबै मान खोमल।
येशूए ताँ आक्वेंब्मैं दोषि ठर्दिम्
44येशूजी थेबै कैले बिइ, “ङए फिर बिश्वास लब्मैंइ ङए फिर मत्त्रे आङिं, ङ कुल्मिंबै आबाए फिरै या बिश्वास लमुँ। 45ङलाइ म्रोंब्मैंइ ङ कुल्मिंबै आबालाज्यै या म्रोंब्मुँ। 46ङए फिर बिश्वास लब्मैं मिछु खैबर टिल् आत्हुरिगे बिसि ङ ह्युलर चारबै ह्वे तसि युइमुँ। 47ङइ बिबै ताँमैं थेसेया च ताँ आङिंइ बिस्याँ, ङइ चए निसाफ लरिब् आरे, तलेबिस्याँ ङ ह्युलर्बै म्हिमैंए निसाफ लबर युब आङिं, दिलेय ह्युलर्बै म्हिमैं जोगेमिंबर युब् ग। 48ङलाइ आम्हाँदिब्मैं नेरो ङए ताँ आक्वेंब्मैंए ल्हागिर नियाधिश घ्रि मुँ। चु ह्युल नुयाबै त्हिंइर ङइ पोंबै ताँमैंइन चमैंए निसाफ लब्मुँ। 49तलेबिस्याँ ङइ च ताँमैं ह्रोंसए सैंउँइँले पोंब आङिं। ङइ बिल् त्हुबै ताँ नेरो पोंल् त्हुबै ताँ ङ कुल्मिंबै आबाजीन् ङलाइ ‘पोंन्’ बिसि ल्हैदिइमुँ। 50खीजी ल्हैदिबै ताँउँइँले म्हिमैंइ खोंयोंइ आखाँबै छ्ह योंम् बिसि ङइ सेइमुँ। छतसि आबाजी ल्हैदिब् धोंलेन् ङइ पोंम्।”
Šiuo metu pasirinkta:
यूहन्ना 12: GCMB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Wycliffe Bible Translators, Inc. All rights reserved.