चेला चिब्मैंए केमैं 8
8
शाऊलइ चर्चलाइ ह्रुगुदिब
1शाऊल या स्तिफनस सैबै म्हिमैंने क्ह्रिल।
च त्हिंइ सेरोन् यरूशलेमर मुँबै चर्चए फिर थेबै दुःख तबर होंइ। छान् तलेया कुल्मिंबै चेला चिब्मैं चर्न टिइ। अरू चेलामैं बिस्याँ येहूदिया नेरो सामरिया ह्युलउँइँ प्हुँयाँइ। 2परमेश्वर म्हाँदिब्मैं को-कोइ बेल्ले क्रोदै स्तिफनसए सिनु बोसि छगोंर पाथेंइ।
3शाऊल बिस्याँ धिं-धिंर होंसि चर्च नास लरिल। चइ मुँयुँमैं नेरो च्हमिरिमैं स्याला म्हालाले चैंबोसि झेलर च्युवामाल।#चिब्मैं २२:४,५; २६:९-११
फिलिप सामरिया ह्युलर ह्याब
4च त्हेर प्हुँयाँबै चेलामैंइ खन्तोंदोंन् ह्यासि येशूउँइँले खबै सैं तोंबै ताँ बिप्रइ। 5फिलिप बिस्याँ सामरिया ह्युलर्बै सहर घ्रिर ह्यासि चर्बै म्हिमैंने परमेश्वरजी कुल्मिंबै म्रुँ ख्रीष्टए बारेर बिमिंइ। 6फिलिपइ बिबै ताँमैं थेसि, धै चइ लबै औदिबै चिनुमैं म्रोंसि, चर्बै ल्हें म्हिइ सैं घ्रिन् तसि चए ताँ छेनाले थेइ। 7तलेबिस्याँ ल्हें म्हिउँइँले मोंमैं थेबै कैले ओरसि त्होंमल। छलेन यो प्हले ओलेल् आखाँबै ल्हें स्याले म्हिमैं या सल् लमिंइ। 8छले च सहरर्बै म्हिमैं बेल्ले सैं तोंइ।
जादु लबै सिमोन
(व्यवस्था १८:९-१४)
9च सहरर सिमोन बिबै म्हि घ्रि मुँल। चइ ओंसों ओंनोंन् चर जादु लसि सामरियार्बै म्हिमैं प्लेटोयाल् लमल, धै चइ ङम् ङन् ग बिसि प्हैंमल। 10छतमा च ह्युलर्बै थेब च्योंब ताँनइ “चु परमेश्वरए थेबै शक्ति मुँबै म्हि मुँन!” बिमल। 11चइ ल्हें त्हे ओंनोंन् जादु लसि म्हिमैं प्लेटोयाबै केमैं लरिल। छतसि चमैंइ च म्हिलाइ म्हाँदिमल। 12दिलेया लिउँइँ परमेश्वरए ग्याल्सर्बै ताँमैं नेरो येशू ख्रीष्ट उँइँले खबै सैं तोंबै ताँमैं फिलिपइ बिमिंमा चर्बै म्हिमैंइ चए ताँ क्वेंइ, धै मुँयुँमैं, च्हमिरिमैं ताँनइ बप्तिस्मा किंइ। 13चु ताँमैं च जादु लबै सिमोनज्यै क्वेंइ, धै चज्यैया बप्तिस्मा किंसि फिलिपने बालु प्रइ। झाइले फिलिपइ लबै थे-थेबै औदिबै चिनुमैं म्रोंसि च प्लेटोयाइ।
14सामरियाथेंमैंइ परमेश्वरए ताँ क्वेंइ रो बिब् थेसि यरूशलेमर मुँबै कुल्मिंबै चेला चिब्मैंइ पत्रुस नेरो यूहन्ना चमैं ङाँर कुलइ। 15पत्रुस नेरो यूहन्ना चर खसि चर्बै बिश्वासीमैंइ पबित्र प्ल्ह योंरिगे बिसि चमैंए ल्हागिर प्राथना लमिंइ। 16तलेबिस्याँ च त्हे समा चमैं खाबै फिरै या पबित्र प्ल्ह आयुल। चमैंए बप्तिस्मा प्रभु येशूए मिंर मत्त्रे तल। 17छतसि पत्रुस नेरो यूहन्नाइ चमैंए फिर यो थेंसि प्राथना लमिंमा चमैंइ पबित्र प्ल्ह योंइ।
18छले कुल्मिंबै चेला चिब्मैंइ यो थेंमा पबित्र प्ल्ह योंब् म्रोंसि सिमोनइ छ बिदै चमैंलाइ मुइ पिंबर होंइ, 19“ङइ खा-खाबै फिर यो थेंमुँ चमैंइ पबित्र प्ल्ह योंरिगे बिसि ङलाज्यै या छाबन् शक्ति पिंन्।” 20छबिमा पत्रुसइ बिइ, “क्हिए मुइ क्हिनेन् नास तयारिगे, तलेबिस्याँ परमेश्वरए बरदान मुइइ किंल् खाँम् बिसि क्हिइ मैंइ! 21परमेश्वरए उँइँरि क्हिए सैं छ्याँब आरेना। छतसि चु के क्हिइ कति लल् आयों! 22छतसि क्हिइ ह्रोंसए चु दुष्ट केउँइँले सैं एद् धै प्रभुने प्राथना लद्, छलस्याँ क्हिइ मैंबै आछ्याँबै ताँमैं क्षमा योंलै। 23क्हिए सैं इखइ प्लिंब नेरो क्हिलाइ पापइ फैथेंब ङइ म्रोंइँमुँ।”
24चु ताँ थेसि सिमोनइ बिइ, “क्हेमैंइ बिबै तोइ ताँ या ङए फिर आतरिगे बिसि, ङए ल्हागिर प्रभुने प्राथना लमिंन्।”
25झाइले चमैंइ प्रभुए बारेर ग्वाइ पिंसि प्रभुए ताँ लोमिंल् खाँबै लिउँइँ सामरीमैंए नाँसजरे सैं तोंबै ताँ बिमिंदै चमैं यरूशलेमर एखइ।
फिलिप नेरो इथियोपिया ह्युलर्बै क्रथे
26च लिउँइँ प्रभुए स्वर्गदूत घ्रिइ फिलिपलाइ बिइ, “रेसि ल्हुँउँइँ (दक्षिण) ह्यासि म्हि आटिबै क्ल्ह्योर्बै घ्याँर ह्याद्। च घ्याँ यरूशलेमउँइँले गाजा ह्युलउँइँ ह्याम्।” 27छबिमा फिलिप रेसि ह्यामा इथियोपियार्बै हिचड घ्रिने त्होइ। च यरूशलेमर परमेश्वर म्हाँदिसि धिंउँइँ एखरिल। च इथियोपिया ह्युलर्बै म्रुँस्यो कन्दाकिए थेबै पदर के लब नेरो ताँन् सै न्होरए कोषाध्यक्ष मुँल। 28च रथर क्हुँसि यशैया अगमबक्ताइ प्ह्रिबै कितब खेरिल। 29पबित्र प्ल्हइ फिलिपने “च रथए ङाँर ह्याद्,” बिइ। 30फिलिप च रथ ङाँइ न्हेह्यामा चइ यशैया अगमबक्ताइ प्ह्रिबै कितब खेरिब् थेसि चइ “क्हिइ खेरिबै ताँ क्होइमुँ वा?” बिसि चने ङ्योएइ।
31छबिमा चइ बिइ, “खाबज्यै आबिमिंस्याँ ङइ खैले क्होल् खाँमुँ?” च्हौ बिसि चइ फिलिपने “रथर क्रेसि ङने बालु टिद्,” बिइ। 32चइ खेरिबै कितबर्बै ताँ चु मुँल,
“सैबर बोबै क्यु
नेरो पै प्ह्रेबै क्यु पै प्ह्रेबै म्हिए उँइँर तोइ आबिल्ले टिब् धोंले,
खीजी ह्रोंसए सुँउँइँले तिजी या आपों।
33खीलाइ म्हि आच्हिसि च्योंरि लबै त्हेरै या खीजी निसाफ आयों।
खी पृथ्बीउँइँले सियाबै लिउँइँ खीए सन्तानए बयन खाबइ लब?”#यशै ५३:७-८
34झाइले च हिचडइ फिलिपने बिइ, “अगमबक्ताइ चु ताँ खाबै बारेर बिब् जा? ह्रोंसए बारेर बिब् उ अरूए बारेर बिब् जा? गार आम्हाँदिल्ले ङने बिमिंन्।”
35छबिमा फिलिपइ परमेश्वरए छ्वेर्बै च खण्डउँइँलेन् येशूउँइँले खबै सैं तोंबै ताँ चने बिमिंइ। 36धै चमैं घ्याँर ह्याना-ह्यान् क्यु मुँबै क्ल्ह्यो ङाँर फेनेमा च हिचडइ बिइ, “ङ्ह्योत्ति, चुर क्यु मुँन। ङ बप्तिस्मा किंबउँइँले तो सैइ क्वेल् खाँम्?”
37[फिलिपइ चने बिइ, “क्हिइ ह्रोंसए खों न्होंउँइँलेन् प्रभु येशूए फिर बिश्वास लम् बिस्याँ क्हिइ बप्तिस्मा किंल् खाँम्।”
चइ बिइ, “येशू ख्रीष्टन् परमेश्वरए च्ह मुँन बिसि ङइ क्वेंम्,”]#8:37 धाँसे ओंसोंबै योइ प्ह्रिबै कितबमैंर चु ब्राकेट न्होंर्बै ताँफुँमैं आप्ह्रिल। 38झाइले हिचडइ “रथ न्हद्!” बिइ। धै फिलिप नेरो हिचड ङ्हिंना-ङ्हिंन् क्युर तसि फिलिपइ चलाइ बप्तिस्मा पिंइ। 39झाइले चमैं क्युउँइँले बैरु त्होंखबै लिउँइँ प्रभुए प्ल्हजी फिलिप बोयाइ। हिचडइ फिलिप धबै आम्रोंलेया सैं तोंदै ह्रोंसए घ्याँ क्हाइ। 40दिलेया फिलिप अश्दोद बिबै क्ल्ह्योर म्रोंखइ, धै कैसरिया आफेन् समन् ताँन् नाँसजरे सैं तोंबै ताँ बिमिंदै प्रइ।
Šiuo metu pasirinkta:
चेला चिब्मैंए केमैं 8: GCMB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Wycliffe Bible Translators, Inc. All rights reserved.