चेला चिब्मैंए केमैं 14
14
आइकोनियन सहरर पावल नेरो बारनाबास
1पावल नेरो बारनाबास आइकोनियन सहरर ह्यामा एन्टिओखिया सहरर तब् धोंलेन् चरै या तइ। चमैं येहूदिमैंए च्हों धिंर होंसि प्रभु येशूउँइँले खबै सैं तोंबै ताँ छेनाले बिमिंमा चर्बै ल्हें यहूदीमैं नेरो ग्रिकमैंइ येशूए फिर बिश्वास लइ। 2दिलेया चमैंए ताँ आक्वेंबै यहूदीमैंइ बिस्याँ अरू ह्रेंमैं होंसिदिसि प्रभुए फिर बिश्वास लबै अलि-अङाँमैंए बिरोध लसि चमैंए सैं ककाँ क्युँक्युँ ङ्हाँन् लवाइ। 3पावल नेरो बर्णाबास ल्हें त्हिंइ समा च सहरर टिसि चमैंइ प्रभुए फिर भर थेंसि प्रभुए बारेर आङ्हिंन्ले पोंइ। छतमा प्रभुजी चमैंए योउँइँले औदिबै केमैं नेरो चिनुमैं तल् पिंइ, छतमा खीए बेल्ले थेबै म्हाँयाए बारेर चमैंइ लोमिंबै ताँ क्ह्रोंसेन् ग बिसि ग्वाइ पिंइ। 4दिलेया सहरर्बै म्हिमैं आक्ह्रिबर होंइ, धै कोइ यहूदीमैंने त्हुँयाँइ, कोइ कुल्मिंबै चेला चिब्मैंने त्हुँइ। 5छतमा अरू ह्रेंमैं नेरो यहूदीमैं ङ्हिंना-ङ्हिंनइ खेंमैंए चिबनाँब्मैंने त्हुँसि पावल नेरो बारनाबास ह्रुगुदिब नेरो युँमाइ ल्हिबै मत लइ। 6चमैंइ चु ताँ सेसि लुकोनिया ह्युलर्बै सहरमैं लुस्त्रा, डर्बि नेरो च खागुबै क्ल्ह्योजरे भौदिह्याइ। 7चरै या चमैंइ सैं तोंबै ताँ बिप्रइ।
लुस्त्रार पावल नेरो बारनाबास
8लुस्त्रा सहरर प्हले ओलेल् आखाँबै म्हि घ्रि मुँल। च फिब् ओंनोंबै डुँड मुँल, छतमा च खैमैंइ आप्रल। 9पावलइ पोंरिमा चइ थेरिल। च ङाँइ ङ्ह्योमा “ङ सल् खाँम्” बिबै बिश्वास चने मुँन बिसि पावलइ सेइ। 10छतसि पावलइ थेबै कै तेसि चने बिइ, “क्हिए प्हलेर राद्!” छबिमा च म्हि रेसि प्रबर होंइ। 11चर्बै ल्हें म्हिइ पावलइ लबै के म्रोंसि चमैंइ खेंमैंए लुकोनिया क्युइर थेबै कैले बिइ, “देवतामैं म्हिए क्हो किंसि ङ्यो ङाँर तयुना।” 12चमैंइ बारनाबासने जिउस बिबै देवता धै पावल ताँ पोंल् ह्रबै चिब तबइले चने हेर्मेस बिबै देवता#14:12 जिउस...हेर्मेस बिबै देवता ग्रिक धर्मर धाँसे थेबै देवताए मिं जिउस मुँल, झाइले हेर्मेस अरू देवतामैंए ल्हागिरि सउँसर पिंबै देवता मुँल। बिइ। 13च सहरए उँइँर मुँबै जिउसए मन्दिरर्बै ख्रो पिंबै खेगिइ मुल म्रामैंर क्ल्यामैं नेरो टए मालामैं पखइ, तलेबिस्याँ चर्बै म्हिमैंने क्ह्रिसि चइ बारनाबास नेरो पावलए उँइँर ख्रो पिंबै सैं लइ।
14चु ताँ थेसि कुल्मिंबै चेला चिब्मैं बारनाबास नेरो पावलइ खेंमैंए क्वें ट्होसि ओरदै च म्हिए हुलर न्हेयासि छ बिइ, 15“ओ म्हिमैं! क्हेमैंइ तले छाबै के लमुँ? ङि या क्हेमैं धोंबन् दुःख सुख भुँदिबै म्हिमैंन् ग। चु स्योलिबै के पिसि क्हेमैं परमेश्वरउँइँ सैं एखरिगे बिसि ङिइ खीउँइँले खबै सैं तोंबै ताँ बिमिंब् ग। मु, पृथ्बी, मा ङ्युँइ नेरो चर मुँबै तोन्दोंरि सैमैं बनेबै सोगों परमेश्वर खीन् ग।#प्रस २०:११; भज १४६:६ 16खीजी ओंसोंबै पुस्तए ताँन् ह्रेंमैं ह्रों-ह्रोंसए रोसर्न प्रल् पिंइ। 17दिलेया खीजी क्हेमैंए फिर ल्हयो खसि स्वर्गउँइँले नाँ कुलसि रा-रोमैं रोबै त्हेर क्हेमैं चल् योंरिगे बिसि ल्हें रोमैं रोमिंइ धै क्हेमैं सैं तोंल् पिंइ। छाबै के लसि क्हेमैंए उँइँर परमेश्वरजी खीए ग्वाइ पिंइँमुँ।” 18चु ताँमैं बिसि चमैंइ बेल्ले गारले च म्हिमैंलाइ ख्रो पिंबै पूजा लल् आपिं।
लुस्त्रा बिबै सहरर पावललाइ युँमाइ ल्हिब
19च लिउँइँ एन्टिओखिया नेरो आइकोनियनउँइँले को-कोइ यहूदीमैं चर फेखइ, धै चमैंइ चर्बै म्हिमैं वाँसि पावललाइ युँमाइ ल्हिल् पिंइ, धै पावल सियाइ बिब् मैंसि सहर बैरु चैं बोइ। 20दिलेया चेलामैं पावलए कारग्युले रारिमा च रेयाइ, धै सहरउँइँ ह्याइ। प्हँन्हाँग्धों पावल नेरो बारनाबास डर्बि सहरर ह्याइ।
21चमैंइ च सहररै या सैं तोंबै ताँ बिमिंसि ल्हें चेलामैं बनेइ। झाइले चमैं ङ्हिं लुस्त्रा, आइकोनियन ततै एन्टिओखियार एइ। 22चमैंइ च क्ल्ह्योर्बै चेलामैंए सैं भोंब् लमिंदै “खोंयोंन् बिलै परमेश्वरए ताँर बिश्वास लसि टिरिद्,” बिसि अर्थि पिंइ, धै “परमेश्वरए ग्याल्सर होंबै ल्हागिर ङ्योइ ल्हें दुःख सैदिल् त्हुम्,” बिबै ताँ या लोमिंइ। 23झाइले चमैंइ ताँन् चर्चर एल्डरमैं त्हाँइ, धै बर्त टिसि प्राथना लसि चमैंइ च एल्डरमैं खेंमैंइ बिश्वास लबै प्रभुए जिम्मार पिंवाइ।
सिरिया ह्युलर्बै एन्टिओखिया सहरर एखब
24च लिउँइँ चमैं पिसिदिया तदै पामफिलिया ह्युलर युमा 25चमैंइ पर्गा सहररै या परमेश्वरए ताँ बिमिंसि अटालिया नाँसर तयुइ। 26च क्ल्ह्योउँइँले चमैं क्यु झाजर क्रेसि सिरिया ह्युलर्बै एन्टिओखियार एखइ। चर्बै बिश्वासीमैंइ ओंसों पावल नेरो बारनाबास परमेश्वरए दयाम्हाँयार प्रभुए के लबर कुलल। तोगो च केमैं लल् खाँसि चमैं चर्न एखल।
27झाइले चमैं एन्टिओखियार फेखसि चर्चर्बै म्हिमैं खागु लसि परमेश्वरजी खेंमैंउँइँले लबै ताँन् केमैं सुनेइ, धै परमेश्वरजी खैले अरू ह्रेंमैंए ल्हागिर प्रभुए फिर बिश्वास लबै म्रा थोंमिंइ बिबै ताँ या बिइ। 28धै चर चमैं चेलामैंने ल्हें त्हिंइ समा टिइ।
Šiuo metu pasirinkta:
चेला चिब्मैंए केमैं 14: GCMB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Wycliffe Bible Translators, Inc. All rights reserved.