San Mateo 1
1
Sota tonton ni naypolipoli‐an nen Jesucristo
1Si Jesucristo, poli nen David tan si Abraham. Nem ẃara pay iray eshom, jet sajay iray ngarangaran sha: 2Si Abraham, ama nen Isaac; jet si Isaac, ama nen Jacob; jet si Jacob, ama nen Joda, asan ẃara pay iray potot to ja agi nen Joda. 3Jet si Joda nen Tamar, anak sha si Piris nen Sara. Jet si Piris, ama nen Isrom; si Isrom, ama nej Aram. 4Si Aram, potot tos Aminadab; si Aminadab, ama nen Naason; si Naason, ama nen Salmon. 5Jet si Salmon nen Rahab, anak sha si Boos; jet si Boos, inesawa to si Ruth et anak sha si Obid; jet si Obid, ama nen Jesse. 6Si Jesse, ama nen David ja nan‐ari, jet si David, inpotot tos Solomon. (Say ina nen Solomon sota istay aseẃa nen Orias.) 7Si Solomon, ama nen Roboan; si Roboan, ama nen Abias; jet si Abias, potot to si Asa. 8Si Asa, ama nen Josapat; si Josapat, ama nen Joram; jet si Joram ama nen Osias. 9Potot ngo nen Osias ma si Joatam; si Joatam, ama nen Akas; jet si Akas, ama nen Isikias. 10Jet si Isikias ama nen Manasis; si Manasis ama nen Amon, jet si Amon ama nen Josias. 11Jet si Josias potot to si Jikonias, tan ẃara pay iray a‐aki nen Jikonias. Sajay iren a‐aki nen Jikonias, pati si‐kato, nay‐anak ira nonta timpon in‐ilaw sha sota toon i‐Israel ja maybedod shima dogad ja kowan sha ey Babilonia.
12Idi nonta ẃara ma ira shi Babilonia, ẃaray inpotot nen Jikonias ja inpanngaran to ni Salatiil, jet si Salatiil, inpotot to ngo si Sorobabil. 13Naytoltoloy ja naypolipoli ira jay jet si Sorobabil, ama nen Abiod. Si Abiod i ama nen Iliakim; si Iliakim, ama nen Asor; 14si Asor, ama nen Sadok; si Sadok, ama nen Akim; si Akim, ama nen Iliod; 15si Iliod, ama nen Eleazar et si Eleazar ama nen Matan. Si Matan ma i ama nen Jacob. 16Jet si Jacob, potot to si Jose et si‐kato may maka‐aseẃa so nen Maria ja engi‐nak so nen Jesus, ja ineẃagan sha met laeng ja si Cristo.
17Jet sajay iren nanpolipoli, manshoki so nen Abraham ingkato so nen David, sampolo tan epat ta apo. Jet manshoki mowan so nen David ingkato nonta timponindaw sha so nonta tood Israel shima dogad ja kowan sha ey Babilonia, sampolo tan epat mowan na apo. Manshoki mowan nonta ẃara ired Babilonia ingkato ngo nonta inkay‐anak nen Cristo, sampolo tan epat ta apo mowan.
Sota inkay‐anak nen Jesucristo
18Iyay i shoki‐an ni inkay‐anak nen Cristo. Nonta aneng pay laeng nga may‐enak si Cristo, si Maria ja mengi‐nak ali son si‐kato, naykari ja esaw‐en nen Jose. Jet si Maria, nonta eg ira pay laeng nan‐aseẃa nen Jose, na‐amta‐an ey malokon. Nem sotan na dokon to, in‐iyan gayam ni Ispirito Santo nen Apo Shiyos. 19Nem si Jose ja naykarin mengesawa so nen Maria ali, kowan to ey eg to itoloy ya esaw‐en si Maria. Nem piyan ton dibas i pesing ton mengisi‐jan, ta eg to koston mebebaingan si Maria. Si Jose, na‐anos sa daki, isonga sajay i kowan to ey pesing to. 20Nem idi sajay i toka nemnemnema ja kowan to ey dag‐en to, nanpa‐sas i anghil nen Apo Shiyos shi kokokip to, ja kowan nonta anghil son si‐kato ey, “Jose ja poli nen Ari David, kareka manshanag ja mengesawa so nen Maria, ta sama dokon to, Ispirito Santo nen Apo Shiyos i engi‐jan so. 21Say i‐anak to ali, daki et say ingaran mo son si‐kato, Jesus (ja say olog to, mengisedakan), ta si‐kato diy mengisedakan ira nonta too to say eg ira meshosa pangkep ni basol sha.”
22Sajay ya emin i epasemak say mayto‐to‐ẃa sota kowan ni para padto nonta bayag da ja esel nen Apo Shiyos, 23ja kowan to ey, “Wara aliy balasang ja enshiy dakin en imaro‐arol so, nem on‐anak ali. Say i‐anak to ali, daki jet say ingaran sha so nontan na i‐anak to ali, si Emanuel.” (Say olog niyay ya ngaran shi esel ira ni Hodiyos, “Si Apo Shiyos, ẃara son si‐katejo.”)
24Jet idi bimangon si Jose, pinati to sota inkowan ni anghil nen Apo Shiyos shi kokokip to et inesawa to si Maria. 25Nem eg to ineshol si Maria nonta maramen malokon. Jet idi nay‐anak sota dokon nen Maria, inpanngaran nen Jose ni Jesus sota nga‐nga.
Šiuo metu pasirinkta:
San Mateo 1: DMP
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 1978, Wycliffe Bible Translators, Inc. All rights reserved.