Yohanis 2
2
Karisaa mausahae pani kota Kana
1Yesus iroma Natanael runa Pilipus tau ne mampusua suka, oyo nene poua pan san rei, karisaa mausahae isa pan kota Kana. Kota rei mo, wapan otoe Galilea. Tau rei, Yesus inai waimo karisaa rei oi. 2Yesus runa ami, ne mampusua iae, sio oima tau ahokama tau karisaa rei oi. 3Ne karisaa pusiki tewasi, tihu anggur pusire nea. Reiso Yesus inai iasau osiki iahata, “Ama! No tihu anggur pusire nea.”
4Yesus iasau ata, “Ina! Areini mo, nene orase tewasi tau uatuhete we kawasa. Reiso pene asau osi Au.”
5Ne Yesus inai iasau osi sio manorina ata, “Kahurae ouna sae man wan iaisosimo na ounai rei.”
6Pan rei mo, unena waron oapatau tihu tanre hua nome warumo. Unene osa reaiinu tihu kani liter 100. Sio Yahudiu oaiinu tihu tau unene san rei na osohu aio atua repusu no monna. 7Yesus iasau osi sio manorina. Iahata, “Mai na oaiinu tihu tau unena rai ee!”
Reiso oaiinu unena rai tau tihu rotu-tu taua ia-ia.
8Pusi, oyo iasau osiso ata, “Eu na ripa tihu mkane arihoni unene isa na roriki osi ia karisaa upue.”
Reiso orori tihu rei osi ia karisaa upue rei.
9Tau ia karisaa upue rei ininu rea tihu wan ororiki osiki rei mo, tihu rei mo, iahanai reneniki tau tihu anggur nea. Ia karisaa upue rei ianei tewa ata tihu anggur reimo, onanai on supa. Ne sio manorina wason ororiki rei oanei. Irea tihu anggur rei iake nai osa. Reiso ioi ia hanaie wain iaisenei rei. 10Iasau osiki ata, “Tau maisena mo, sio saka ohoka tihu anggur wan iake nai osa naone. Sani sio wason ohoka tau maisene rei oninu rotu okua tewa samatoro ihoka tihu anggur wan iake mainae tewa tau muie. Ne ano mo, ahoka tihu anggur wan iake mainae tewa naone samatoro ahoka tihu anggur wani iake reini tau muie.”
11Sae wan Yesus iunai pani kota Kana rei mo, ne sima-simane wan retuhete ata ne kawasa arihon Anahatana mataanoe. Sima-simane wani iunai rei mo, iatuhete ne kawasa wan mainae osi mansiau. Ne mampusua oparisaa tanui tau rei sirinia.
12Pusi oyo, Yesus na inai, ne waniu, runa ne mampusua oeuso na pan kota Kapernaum. Orueso pan rei onona inasa asi.
Yesus inei sio wason oahen roe Anahatana ne numa mainisie
13Haineke ami Yahudiu ma karisaa anoma rapeka na Anahatana ihoka ma upu momou arihon otoe Mesir nea, reiso Yesus ieui roe kota Yerusalem. 14Hoka roe, ieu roe Anahatana ne numa mainisie nene nusue. Inoo sio wasumo oahen koropou, rompau, runa manu puana na sio wason ohane oatanimare osi Anahatana. Inoo sio umau oi wasumo orueso noi no meyau tau otuka kepen Roma tau sio no kepen. 15Inoo san rei reiso isapa kasapute isa arihon awane. Oyo inei pusiso arihon Anahatana ne numa mainisie runa no koropou na no rompau pusire oi. Iuni hehi sio wason saka orue otuka kepen rei no meyau na iuna iahurara no kepen pusire oi. 16Oyo iasau osi sio wason oahen manu puana rai ata, “Oeumo runa mo manua rai! Pene ouna Au Amaku ne numa mainisie reini mo tau naniamo ohane oahen.”
17Yesus ne mampusua onoo Yesus iuna sani rei, oyo anoo rapeka runa sae wan okanui tau Anahatana ne anamanaya. Okanu ata Ia Aia wain Anahatana Ihitiki na Iapuheu Mansiau iasau,
“Anoku runa me numa mainisie.
Reiso onesiku rotu-tu umataku iae iake sirinia.
Hete sae, oamuira me numa.”#Kapatau 69:10
18Sio mainaya arihon akama Yahudi oasau osi Yesus. Oahata, “Atuhete osima ata me kawasa aneni ma monna. Mai na una sima-simane isa na ami anei ata Anahatana irui kawasa osia.”
19Oyo Yesus iasau osiso ata, “Okohu Anahatana ne numa mainisie reini, mka onona ua mani oo, uapuooi honu.”
20Sio Yahudiu oahata, “Ee! Anahatana ne numa mainisie reini mo, sio onanai musum hutu ate rahana nome, reiso pene asau ata mka apuooi tau onona ua man!”
21Ne oanei tewa sae wan Yesus iasaui rei. Tau sae wan Yesus iasau rerihoni Anahatana ne numa mainisie reimo, waimo iasau rerihoni ia ruai tinain. 22Imatai, oyo iamahaiki honu, samatoro ami, ne mampusua, anoma rapeka runa sae wan naone iasau rerihoni Anahatana ne numa mainisie rei. Anoma rapeka oyo, aparisaa Anahatana ne anamanaya waron raasau ata Ia Aia wain Anahatana Ihitiki na Iapuheu Mansiau mka iamahaiki honu. Aparisaa ata sae waron Yesus iasau runare reimo, titue.
23Yesus irue roe Yerusalem asi tau karisaa anoma rapeka na Anahatana ihoka ma upu momou arihon otoe Mesir. Reiso sio panesi onoo Yesus iuna sima-simana waron ratuhete ata ne kawasa arihon Anahatana oyo oparisaa tanui. 24Ne Yesus mo, iparisaa tau sio tewa. Areimo tau ianei pusiso anoo nea. 25Ianei mansia anoi, mansia ne hali nea. Reiso inina ia isa tewa na isima rerihoni mansia mo, tewa.
Šiuo metu pasirinkta:
Yohanis 2: ANA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© (Active), Wycliffe Bible Translators, Inc., All rights reserved.