Khuurakikha 10
10
Babetsukhulu ba Nowa
(1 Kim 1.5-23)
1Lwanyuma lwe khuusalaasala khwe kameetsi, basooleli ba Nowa baataru Shemu, Hamu ni Yafesi, nabo baasaala lisaaye liikali naabi.
2Basooleli ba Yafesi baaba nibo; Gomeri, Magogo, Madayi, Yavani, Tubali, Mesheki, ni Tirasi. 3Basooleli ba Gomeri baaba nibo; Ashikenazi, Rifasi, ni Togarima. 4Basooleli ba Yavani baaba nibo; Elisha, Tarushishi, Kitimu, ni Dodanimu. 5Mu bano mwaamamwo babaandu abe babaamenya khu ndulo khwe nyaantsa ni khu bikelemeesi. Bano boosi baaba babetsukhulu ba Yafesi babaamenya mu bisiintsa byaabwe, khuusiintsiila khu tsiingo tsaabwe, nga buli batweela khu nibo bali ni luulomo lwaabwe.
6Basooleli ba Hamu baaba nibo; Kushi, Misiri, Puti, ni Kanaani. 7Basooleli ba Kushi baaba nibo; Seba, Havila, Sabuta, Raama ni Sabuteka. Basooleli ba Raama baaba nibo; Sheba ni Dedani.
8Kushi ekyela paapa wa Nimurodi. Nimurodi yuno niye uwaba umuundu uwanyoowa khuuba umusaani uwe kamaani naabi khu shibala. 9Niye aaba umuyiifi uwe kamaani naabi mu moni ts'Omukasya, isho nisho shishakila babaandu baakyelawo baalomatsaka bari, “Ube nga Nimurodi uwaba umuyiifwi uwe kamaani mu moni ts'Omukasya.” 10Buyiinga bweewe bubwanyoowa bwaba Babeli, Ereki, ni Akadi. Bisiintsa bino byoosi nga bili mu shibala sha Babulooni. 11Nga waamile mu shibala sheene isho, waatsya wenjila mu Asiriya, woombakha biriimba Nineve, Rehobosi Iri, Kala 12ni Reseni, shishiili akari a Nineve ni Kala, shiriimba she kamaani.
13Misiri ekyela paapa wa Ludimu, Anamimu, Lehabimu, Nafutuhimu, 14Pasirusimu, Kasiluhimu (Mu niye mwaamamwo ba Firisitiya), ni Kafutorimu.
15Kanaani ekyela paapa wa Sidoni, nga niye umusooleli weewe umukiboole, ni Hesi, 16Kanaani mweene niye uwekyela kuuka uwe ba Yebusi, ba Amori, ni ba Girugashi, 17ni ba Hivi, ba Ariki, ba Sini, 18ba Arivadi, ba Zemari ni ba Hamasi. Lwanyuma buukuuka buukyeekhe bwe ba Kanaani bwaasalanila bwaamalatana oosi. 19Shisiintsa shino she ba Kanaani shabalaaha khukhwaamila ilala i Sidoni, khuutsya khukhwoola lubeka lwe Gerari, ni khuutsya khukhwoolela ilala i Gaza, ni khuutsya khu lubeka lwa Sodomu, Gomora, Adima, ni Zeboyimu, ni khuutsya khukhwoola i Lasha.
20Bano boosi baaba basooleli ba Hamu, khuusiintsiila khu tsiingo, bukuuka bukyeekhe, tsinimi ni kamanaambo kaabwe.
21Shemu, uwaba waandaaye umukhulu wa Yafesi, naye aasaala Eberi, uwaamamwo babaandu baakali busa. 22Basooleli ba Shemu baaba nibo; Elamu, Ashuri, Arupakusadi, Ludi ni Aramu 23Basooleli ba Aramu baaba nibo; Uzi, Huli, Geseri, ni Mashi. 24Arupakusadi ekyela paapa wa Shela, Shela naye wekyela paapa wa Eberi. 25Eberi naye aasaala basooleli babili, mutweela abe baamulaanga bari Pelegi#10.25 Pelegi: Lisiina lino mu Luheburaniya limanyisa Khukhwaawulamwo, lwekhuuba mu biifukhu byeewe, nimwo mweesi shibala shaawukhanilamwo, ni waandaaye lisiina abe bari Yokutani. 26Yokutani ekyela paapa wa Alumodadi, Shelefu, Hazarimavesi, Jera, 27Hadoramu, Uzali, Dikula, 28Obali, Abimayeli, Sheba, 29Ofiri, Havila, ni Yobabu. Bano boosi baama mu Yokutani. 30Shibala sheesi nibo baamenyamwo shaamila ilala i Mesha khuulola kwe Seferi, shishaba mu shibala she mu ngoongo she bwaama inyaanga.
31Bano nibo baaba babetsukhulu ba Shemu, babaaba bamenya khusiintsila khu bukuuka bwaabwe bukyeekhe, ni tsinimi tsaabwe, mu bisiintsa byaabwe ni kamanaambo kaabwe.
32Luruungo luno lumalayo babaandu babaama mu Nowa boosi, khuusiintsiila khu nyilili tsaabwe, ni kamanaambo kaabwe. Ni khukhwaama mubeene bano, kamanaambo koosi kaasalanila khuumala shibala shoosi lwanyuma lwe kameetsi.
Šiuo metu pasirinkta:
Khuurakikha 10: LCE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Lumasaaba Catholic Bible © The Bible Society of Uganda, 2017.