KUZOYA 27
27
Isaaka kumrasimia Jakobo
1Nao iji Isaaka waghosia na meso ghake kusera kira usedimagha kuwona, ukammbanga Esau mwana wake m'baa ukamzera, “Mwanwapo!” Nao ukadika, “Neko aha.” 2Ukamzera, “Ola ini naghosia, na ituku ja kifwa chapo sijimanyagha. 3Idana wada maswagha ghako, zaka yako na ndana yako, kughende kunidiwie nyamandu iboie. 4Nao kuniboisire vindo visingie seji nivikundagha, kuniredie nije nikurasimie imbiri nisefue.”
5Rebeka orekoghe ukisikiria ija ngelo Isaaka orededanyagha na mwana wake Esau. Nao iji Esau wafuma kughenda kudiwenyi, ughirede agho madiwo, 6Rebeka ukamzera mwana wake Jakobo, “Nasikira ndeyo ukidedanya na mwanyinyu Esau huwu: 7‘Kunidiwie nyamandu, kuniboisire vindo visingie, nipate kuja nani nikurasimie imbiri ya BWANA, nisefue.’ 8Idana mwanwapo sikira seji nikulaghiragha, nao kubonye woruwo. 9Ghenda chaghenyi, kuniredie wana wa mburi wawi, nipate kum'boisira ndeyo vindo visingie sa iji koni uvikundagha, 10na oho kuchamghenjera uje, upate kukurasimia imbiri usefue.” 11Ela Jakobo ukamzera mae, “Kumanye mwanidu Esau ni mundu uko na mafuri, na ini nadendere. 12Kewada aba uchaniadada na kunimanya angu naawuyamkalia, nani nichapatwa ni njowe wulalo ghwa irasimio.” 13Mae ukamzera, “Iyo njowe ndeikaie aighu yapo mwanwapo; oho sikira malagho ghapo tu, kughende kuniredie awo wana wa mburi wawi.” 14Jakobo ukaghenda ukawiwada wana wa mburi wawi, ukamredia mae, na mae ukaboisa vindo visingie sa iji koni ndee uvikundagha. 15Niko Rebeka ukawusa nguwo riboie ra Esau mwana wake m'baa, iro orekoghe naro nyumbenyi, ukamrusha Jakobo mwana wake mtini. 16Wokoni ukamrusha mirongo ya awo wana wa mburi, ukaikanda mikonunyi kwake na andu kudendere singonyi kwake. 17Niko aho ukamneka mwana wake Jakobo ivo vindo visingie chiaimweri na mkate oreghuboisireghe.
18Nao Jakobo ukaghenda kwa ndee ukamzera, “Aba!” Nao ukadika, “Neko aha; oho nani mwanwapo?” 19Jakobo ukamzera ndee, “Ini ne Esau mwana wako wa imbiri. Nabonya sa iji koni kunizerieghe, idana wuka kuje madiwo ghapo eri kunirasimie.” 20Ela Isaaka ukamzera mwana wake, “Yakaia wada kwaipata nyamandu shwa-shwa huwu mwanwapo.” Nao ukatumbulia, “Ni kwa kukaia BWANA Mlungu wako wanidimisha kupata.” 21Nao Isaaka ukamzera Jakobo, “Soghoda aha nikuadade mwanwapo, nimanye ngera loli koko mwanwapo Esau angu ngera ni tee.” 22Jakobo ukasoghoda kaavui na ndee, nao ukamuadada ukaghamba, “Lwaka ni lwaka lwa Jakobo, ela mikonu ni mikonu ya Esau.” 23Nao nderedimieghe kumtambua anduangi, kwa kukaia mikonu yake erekoghe na mafuri sa ya mruna Esau. Nao ukakunda kumrasimia; 24ela ukamkotia sena, “Loli ko mwanwapo Esau?” Nao ukatumbulia, “Ni ini moni.”
25Isaaka ukaghamba, “Niredie nipate kuja madiwo ghako mwanwapo, nikurasimie.” Ukamredia vindo ukaja, ukamredia na divei ukanywa. 26Niko ndee Isaaka ukamzera, “Soghoda kaavui kunisusughe mwanwapo.” 27Ukasoghoda ukamsusugha; na ndee ukanukilwa ni irumba ja nguwo rake, ukamrasimia ukighamba:
“Ola irumba ja mwanwapo,
ni karakara na irumba ja mbuwa iyo BWANA oreirasimieghe!#Waeb. 11.20
28Mlungu ndekuneke gha mami gha mlungunyi,
na gha manori gha ndoenyi,
na wungi ghwa viro na divei.
29Wandu ndewikudumikie,
na mbari nderikughoghomie.
Kukaie bwana aighu ya wanyinyu,
na wana wa mayo ndewikughoghomie.
Uo ose uchakuwasira njowe ndewado ni njowe;
na uo ose uchaakurasimia oho, nderasimilo.”#Kuz. 12.3
Esau kulomba irasimio kwa Isaaka
30Hata iji Isaaka wameria kumrasimia Jakobo, na Jakobo ukifuma kwa ndee woruwu, Esau mruna Jakobo ukangia kufuma kudiwenyi kwake. 31Nao moni ukaboisa vindo visingie, ukamghenjera ndee ukighamba, “Aba, wuka kuje madiwo gha ini mwana wako kunirasimie.” 32Nao ndee Isaaka ukamkotia, “Nani oho?” Ukatumbulia, “Ni ini mwana wako, mwana wako wa imbiri Esau.” 33Nao Isaaka ukasughusika nandighi ukaghamba, “Welee, nani uo waghenda ukadiwa nao ukaniredia madiwo, na ini ngaja putu imbiri oho kusechee, ngamrasimia? Ee, nao loli ucharasimilwa.” 34Esau uendasikira malagho gha ndee, ukalila kwa luwawo lubaa na ndighi, ukamzera ndee, “Nirasimie ini na ini wori ee aba!” 35Ela ndee ukamzera, “Mwanyinyu wacha aha kwa mikalo, nao wawusa irasimio jako.”
36Esau ukaghamba, “Ado loli ukawangwa Jakobo si hachi! Iji ni indo ja kawi Jakobo ukinikalia; ja imbiri oonisoka hachi ya kuvalwa kwapo kwa imbiri, nao ola hoku sena wanisoka irasimio japo.” Nao ukamkotia ndee, “Ndekunisighie irasimio jingi aba?”#Kuz. 25.29-34 37Isaaka ukamtumbulia Esau, “Ola nam'bonya ukaie bwana wako, na waruna wose nawibonya wikaie wadumiki wake, nani namneka viro na divei. Idana nikubonyereki mwanwapo?” 38Nao Esau ukamzera ndee, “Wele aba, kooka na irasimio jimweri tua? Nirasimie na ini wori ee aba.” Niko Esau ukalila kwa lwaka lubaa nandighi.#Waeb. 12.17 39Nao ndee Isaaka ukaghamba:
“Ola oho kuchakaia kula na manori gha ndoenyi,
wokoni kuchakaia kula na mami gha mlungunyi.#Waeb. 11.20
40Kuchakaia moyo kwa lufu lwako,
na oho kuchamdumikia mwanyinyu.
Ela iji kwafufunuka,
kuchaichikanya iyo ghongolo yake ifume
singonyi kwako.”#Kuz. 36.8; 2 Waz. 8.20
41Nao Esau ukazamilwa ni Jakobo kwa wundu ghwa jija irasimio orejipatireghe kwa ndee, ukaghora ngolonyi kwake, “Matuku ghemlilia aba ghalighisa; kawona ghasia, nicham'bwagha mwanidu Jakobo.”
42Ela Rebeka ukaghorelwa malagho gha Esau mwana wake wa imbiri, nao ukaduma ukammbanga Jakobo mwana wake mtini ukamzera, “Ola mwanyinyu Esau wawuyahoresha ngolo yake kwa kubonya mpango ghokubwagha. 43Idana sikira malagho ghapo mwanwapo. Wuka kukimbirie kwa mwanidu Labani uko Harani. 44Kukaie aho kutini hata machu gha mwanyinyu ghasia, 45na lubio lwake luinjike, na kughiliwa agho ghose kum'bonyere. Niko aho nichakudumiria kuwuye. Nisowekelwa wada ni wana kwa ituku jimweri?”
Isaaka kumghenja Jakobo kwa Labani
46Niko Rebeka ukamzera Isaaka, “Nawuyasirimika kwa wundu ghwa awa waka wa Kihiti wa Esau. Da Jakobo nao moni ukawuya ukalowua umu wa wai wa Kihiti lee, ikaiagha wada?”
Šiuo metu pasirinkta:
KUZOYA 27: TAITA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©Bible Society of Kenya, 1997
All rights reserved.