བཀོད་པ། 6
6
ལེའུ་དྲུག༌པ།
གདུག་རྩུབ་ཅན་གྱི་མིའི༌རིགས།
1དེ་ཡང་ས་སྟེང་དུ་མིའི་རིགས་ཇེ་མང་དུ་གྱུར་པ༌དང༌། ཁོ་རྣམས་ལ་བུ་མོ་སྐྱེ་བའི་དུས༌སུ། 2དཀོན་མཆོག་གི་བུ་#མཁས་པ་ལ་ལས་དཀོན་མཆོག་གི་བུ་ཞེས་པ་ནི་དཀོན་མཆོག་གི་ཕོ་ཉ་ཁག་ཅིག་ས་ལ་ལྷུང་སྟེ་བདུད་ཀྱི་རིགས་སུ་གྱུར་པ་ལ་གོ་དགོས་པར༌གསུངས། ཡང་མཁས་པ་ལ་ལས་ཨ་དམ་ནས་བརྒྱུད་པའི་སེད་ཐུ་ཞེས་བྱ་བའི་རིགས་རྒྱུད་ལ་ངོས་འཛིན་པ༌དང༌། དེ་ནི་ཀཱ་ཡན་གྱི་རིགས་རྒྱུད་ངན་པའི་བར་དུ་གཉེན་བཙུགས་པར༌གསུངས།རྣམས་ཀྱིས་མིའི་རིགས་ཀྱི་བུ་མོ་རྣམས་མཛེས་མ་ཡིན་པར་མཐོང༌སྟེ། རང་གི་འདོད་མོས་བཞིན་བདམས་ནས་ཆུང་མར་བླངས༌པས། 3དཀོན་མཆོག་ཡ་ཝཱེས་འདི་སྐད༌དུ། མི་ནི་ཤ་ཁྲག་གདོས་བཅས་ཀྱི་ཕུང་བོ་ཡིན༌ཏེ། བདག་གི་སེམས་ཉིད་ནི་དེ་དག་གི་ཁྲོད་དུ་ཇི་སྲིད་བར་དུ་མི་གནས༌ཀྱང༌། དེ་དག་ཚེ་ལོ་བརྒྱ་དང་ཉི་ཤུའི་རིང་ལ་འཚོ་ཐུབ་པར་བྱ་ཞེས་གསུངས༌སོ།།
4དེའི་དུས་སུ་ས་སྟེང་དུ་ནེ་ཕེ་ལིམ་པ་#ནེ་ཕེ་ལིམ་པ་ཞེས་པ་ནི་ཡ་ཧུ་དཱའི་སྐད་དོད་དེ་མི་སྟོབས་པོ་ཆེའི་དོན་ལ༌འཇུགརྣམས་ཀྱང་ཡོད་པ༌དང༌། རྗེས་སུ་དཀོན་མཆོག་གི་བུ་རྣམས་མིའི་བུ་མོ་རྣམས་ཀྱི་གྲས་སུ་ཚུད་ཅིང་དེ་དག་དང་འབྲེལ་ཏེ་བུ་སྐྱེས་པ༌ནི། གནའ་དུས་ཀྱི་མི་ཆེན་ཏེ་དཔའ་རྩལ་ཅན་དུ་གྲགས་པའི་མི་རྣམས་ཡིན༌ནོ།།
5དེ་ནས་དཀོན་མཆོག་ཡ་ཝཱེས་ས་སྟེང་གི་མི་རྣམས་ཀྱི་སྤྱོད་ངན་ཤིན་ཏུ་ཚབས་ཆེ་ཞིང་སེམས་སུ་དྲན་པ་ནི་ནམ་ཡང་ངན་པ་ཤ་སྟག་ཡིན་པར་གཟིགས༌ཏེ། 6ཁོང་གིས་འཇིག་རྟེན་དུ་མིའི་རིགས་བསྐྲུན་པར་འགྱོད་ཅིང་ཐུགས་སེམས་ཤིན་ཏུ་སྐྱོ༌བའོ།། 7དེ་ནས་དཀོན་མཆོག་ཡ་ཝཱེས་འདི་སྐད༌དུ། བདག་གིས་བསྐྲུན་པའི་མི༌དང༌། དུད་འགྲོ༌དང༌། ལྟོ་འགྲོ་འབུ༌སྲིན། ནམ་མཁའི་བྱ་དང་བཅས་པ་ཐམས་ཅད་ས་སྟེང་ནས་མེད་པར༌བྱའོ། །རྒྱུ་མཚན་ནི་དེ་རྣམས་བསྐྲུན་པ་ལ་བདག་འགྱོད་པའི་ཕྱིར་ཡིན་ཞེས་གསུངས༌སོ།། 8ནོ་ཨ་ཁོ་ནར་དཀོན་མཆོག་ཡ་ཝཱེའི་སྤྱན་སྔ་ནས་ཐུགས་རྗེ་ཐོབ༌བོ།།
དཀོན་མཆོག་གིས་ནོ་ཨ་ལ་གྲུ་གཟིངས་བཟོ་བར་བཀའ་གནང༌བ།
9དེ་ཡང་ནོ་ཨ་ཡི་རིགས་རྒྱུད་ནི་གཤམ་གསལ༌ལྟར། ནོ་ཨ་ནི་གཞུང་རྒྱུད་དྲང་པོ་ཞིག་ཡིན༌ཞིང༌། སྐབས་དེའི་མི་རབས་ལས་ཁོ་ནི་ཕུལ་དུ་བྱུང་བ་ཞིག་ཀྱང་ཡིན༌ལ། ཁོ་དཀོན་མཆོག་དང་ལྷན་དུ་བསྐྱོད་པ་ཡིན༌ནོ།། 10ནོ་ཨ་ལ་བུ་གསུམ་སྐྱེས་པ༌ནི། ཤེམ༌དང༌། ཧཱམ། ཡ་ཕེད་བཅས༌སོ།། 11དེ་ཡང་དཀོན་མཆོག་གི་སྤྱན་སྔར་འཇིག་རྟེན་ནི་ངན་རུལ་དུ་གྱུར་ཅིང་གདུག་རྩུབ་ཀྱིས་ཁེངས་ཡོད༌དོ།། 12ཁོང་གིས་འཇིག་རྟེན་ལ་གཟིགས༌པའི་ཚེ། ཀྱེ་མ། འཇིག་རྟེན་ནི་ངན་པས་ཁེངས་འདུག ཅིའི་ཕྱིར་ཞེ་ན། མི་ཐམས་ཅད་ཀྱིས་ས་སྟེང་དུ་རང་རང་གི་བྱ་སྤྱོད་ངན་པ་སྤེལ་བས་སོ།། 13དེ་ནས་དཀོན་མཆོག་གིས་ནོ་ཨ་ལ་འདི་སྐད༌དུ། ཤ་ཁྲག་གདོས་བཅས་ཀྱི་མི་དེ་དག་གི་མཇུག་འབྲས་བདག་གི་མདུན་དུ་སླེབས༌ཤིང༌། ས་སྟེང་དུ་དེ་དག་གི་གདུག་རྩུབ་ཀྱིས་བཀང་ཡོད་པའི༌ཕྱིར། ལྟོས༌དང༌། བདག་གིས་དེ་རྣམས་ས་གཞི་དང་མཉམ་དུ་མེད་པར༌བྱའོ།། 14ཁྱོད་ཀྱིས་རང་ཉིད་ལ་ཐང་ཤིང་གིས་གྲུ་གཟིངས་ཁང་མིག་མང་པོ་ཅན་ཞིག་བཟོ་བར༌གྱིས། གྲུའི་ཕྱི་ནང་གཉིས་ལ་ཐང་ཆུ་བསྐུས༌ཤིག 15གྲུ་གཟིངས་བཟོ་ཚུལ་ནི་འདི་ལྟ༌སྟེ། རིང་ཐུང་ཁྲུ་སུམ་བརྒྱ༌དང༌། ཞེང་ཚད་ཁྲུ་ལྔ༌བཅུ། མཐོ་ཚད་ཁྲུ་སུམ༌ཅུའོ།། 16གྲུའི་སྟེང་དུ་དཀར་ཁུང་མཐོ་ཚད་ཁྲུ་གཅིག་ཅན་ཞིག་བཟོ་བར༌གྱིས། གྲུའི་སྒོ་ནི་འགྲམ་དུ་འབྱེད་པར་བྱེད་པ༌དང༌། གྲུ་དེ་རིམ་པ་སྟེང་འོག་བར་གསུམ་དུ་ཕྱེས་ནས་བཟོས༌ཤིག 17ལྟོས༌དང༌། བདག་གིས་ས་སྟེང་དུ་ཆུ་ལོག་བཏང་ནས་གནམ་འོག་ཐམས་ཅད་མེད་པར་བྱས༌ཏེ། ས་སྟེང་གི་དབུགས་དང་ལྡན་པའི་སྲོག་ལྡན་མཐའ་དག་གཅིག་ཀྱང་མི་ལུས་པར་འཆི་བར༌བྱའོ།། 18འོན་ཀྱང་བདག་གིས་ཁྱོད་དང་ཁ་ཆད་འཇོག༌སྟེ། ཁྱོད་དང་རང་གི་ཆུང་མ༌དང༌། བུ་དང་མནའ་མ་རྣམས་གྲུ་གཟིངས་ནང་དུ་འཇུག༌དགོས། 19སྲོག་དང་ལྡན་པ་ཐམས་ཅད་ལས་ཕོ་མོ་ཆ་རེ་བྱས་ནས་ཁྱོད་ཀྱིས་གྲུ་གཟིངས་ནང་དུ་འཇུག་པར༌གྱིས། ཅིའི་ཕྱིར་ཞེ༌ན། དེ་དག་ཁྱོད་དང་མཉམ་དུ་སྲོག་བསྐྱབ་པར་འགྱུར་བའི་ཕྱིར༌རོ།། 20བྱ་དང་དུད༌འགྲོ། ས་སྟེང་གི་ལྟོ་འགྲོ་དང་འབུ་སྲིན་བཅས་པ་ཆ་རེ་བྱས་ནས་ཐམས་ཅད་རང་རང་གི་རིགས་བཞིན་དུ་སྲོག་སྐྱོབ་པའི༌ཕྱིར་ཁྱོད་ཀྱི་གནས་དེར་ཡོང་ངེས༌ཡིན། 21ཁྱོད་ཀྱིས་རང་ཉིད་དང་དེ་དག་གི་ཟས་སུ་བཟའ་ཆས་སྣ་ཚོགས་གསོག་པར་གྱིས་ཤིག་ཅེས་གསུངས༌སོ།། 22དེ་ནས་ནོ་ཨས་ཀྱང་དེ་ལྟར་བྱས་པ༌རེད། དཀོན་མཆོག་གིས་ཇི་ལྟར་བཀའ་གནང་བ་བཞིན་ཁོས་ཀྱང་དོན་ཐམས་ཅད་དེ་ལྟར་བསྒྲུབས༌སོ།།
Šiuo metu pasirinkta:
བཀོད་པ། 6: NTB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.