Aˇ dahˬ 33
33
Iˇsawˇ-ahˇ Yaˬkoˆ tahˬ puˬ-euˬ
1Iˇsawˇ tsawˇ haˬ oeˬ yaˇ gʼaˬ sheuˬ-awˇ laˇ luꞈ gaˇ Yaˬkoˆ ya mawˇ ngeh, Leˇaˬ, Laˬkeˬlaˇ hawˇ-eu, aˬ yawꞈ-euˬ ma nyiˇ nyiˬ gʼaˬ-ahˇ, zaˬ deuˬ biˇ nehˬ-awˇ bi sheuˬ-euˬ meh. 2Ma nyiˇ kʼoeˇ nyiˬ gʼaˬ hawˇ-eu aˬ yawꞈ nyaꞈ-euˬ zaˬ deuˬ-ahˇ mehˬ hu hu saˬ bi cah-awˇ, Leˇaˬ hawˇ-eu aˬ yawꞈ-euˬ zaˬ deuˬ-ahˇ mehˬ nah paw bi cah-euˬ meh. Laˬkeˬlaˇ hawˇ-eu Yoˇsehˆ aˬ nyaꞈ ma zaˬ-ahˇ aˬ cawˬ mehˬ nah nah saˬ bi cah-euˬ meh. 3Yaˬkoˆ gʼaˬ mehˬ hu hu saˬ cah-awˇ, Iˇsawˇ-euˬ dawˬ peh iˇ keuˆ ngeh, pawˬ tsuiꞈ pawˬ dmˬ dmˬ-awˇ, shiꞈ poˆ keuˆ ni uˬ duˬ miˇ tsa tuˆ ni awˆ byaˆ-eu laꞈ kʼoeˇ, yaw zeu baw nehˬ-euˬ meh. 4Ehˇ kʼawꞈ, Yaˬkoˆ jawˇ gaˇ Iˇsawˇ cehˆ gʼeh-awˇ, Yaˬkoˆ-ahˇ byaˇ cuꞈ-awˇ mehˬ cuˇ cuˇ nehˬ-euˬ meh. Kʼoeˇ ngeh, aˬ yawꞈ nyaꞈ nyiˬ mehˇ nmˇ luꞈ ngoeˇ-euˬ meh. 5Iˇsawˇ jawˬ jawˬ-ehˇ haw-awˇ, zaˬ miˬ zaˬ kʼoeˇ deuˬ hawˇ-eu zaˬ kʼoeˇ deuˬ-ahˇ ya mawˇ ngeh, “Nawˬ nehˬ-ehˇ oe-euˬ tsawˇ haˬ heu deuˬ aˬ suˇ gʼaˬ-a” lehˇ, Yaˬkoˆ-ahˇ naˇ haˬ-euˬmeh. Yaˬkoˆ gʼeh, “Heu deuˬ-aˬ, nawˬ-euˬ aˬ nyiˇ-ahˇ Miˬyehˇ gʼawˬ shaˬ gaˬ-awˇ biꞈ laꞈ-euˬ zaˬ deuˬ meh” lehˇ, Yaˬkoˆ ehˇ kʼoꞈ nehˬ-euˬ meh. 6Kʼoeˇ naˇ, ma nyiˇ kʼoeˇ nyiˬ gʼaˬ, aˬ yawꞈ nyaꞈ-euˬ zaˬ deuˬ sheuˬ-awˇ, awˆ byaˆ-eu laꞈ kʼoeˇ, Iˇsawˇ-ahˇ yaw zeu baw nehˬ-euˬ meh. 7Kʼoeˇ deuˬ-euˬ jeˬ nah, Leˇaˬ hawˇ-eu aˬ yawꞈ-euˬ zaˬ deuˬ oe-awˇ, awˆ byaˆ-eu laꞈ kʼoeˇ, Iˇsawˇ-ahˇ yaw zeu baw nehˬ-euˬ meh. Laˬkeˬlaˇ hawˇ-eu Yoˇsehˆ aˬ nyaꞈ ma zaˬ aˬ cawˬ jeˬ nah nah saˬ oe-awˇ, awˆ byaˆ-eu laꞈ kʼoeˇ, Iˇsawˇ-ahˇ yaw zeu baw nehˬ-euˬ meh.
8“Uˬ soe gaˇ pehˇ oe luꞈ-eu kʼoeˇ muˇ aˬ suˇ gʼaˬ-a. Aˬ jeˬ jahˇ-eu lehˇ oe luꞈ ta” lehˇ, Yaˬkoˆ-ahˇ Iˇsawˇ naˇ haˬ ngeh, “Nawˬ-ahˇ bi jahˇ tsaˬ le-eu lehˇ, ngaˬ neh bi oe huˬ-euˬ tsawˇ haˬ deuˬ ma” lehˇ Yaˬkoˆ ehˇ kʼoꞈ nehˬ-euˬ meh.
9“Aˬ nyiˇ-oˇ, aˇ doˆ yawˬ jeˬ na luꞈ tiˬ loꞈ jaˆ ma. Nawˇ kʼaˇ jaˆ-eu jeˬ nawˇ geuꞈ-awˬ” lehˇ Iˇsawˇ ehˇ-eu meh. 10Yaˬkoˆ paˇ ehˇ-eu, “Heu loꞈ-ehˇ taˬ ehˇ nehˬ laꞈ. Nawˇ ngaˬ-ahˇ ha geuꞈ mawꞈ ma lehˇ ngeuˇ naˇ, ngaˬ neh nawˬ-ahˇ kʼaˇ biꞈ-euˬ jeˬ yuˇ-awˬ. Nawˬ-euˬ myaˆ pyawˬ-ahˇ ya mawˇ-eu-aˬ, Miˬyehˇ-euˬ myaˆ pyawˬ-ahˇ ya mawˇ gaˇ duˇ miˇ-a. Nawˇ ngaˬ-ahˇ laˬ kʼaˬ cehˇ taˆ ni ha geuꞈ nehˬ laꞈ-eu miˇ neh, ngaˇ laˬ kʼaˬ cehˇ dui dui miˇ-a. 11Aˬ joˆ-ehˇ gʼeh-awˇ neh kʼawꞈ, ngaˬ neh nawˬ-ahˇ kʼaˇ biꞈ nehˬ laꞈ-euˬ jeˬ-ahˇ ha geuꞈ nehˬ laꞈ-awˬ. Miˬyehˇ ngaˬ-ahˇ gʼawˬ shaˬ gaˬ-eu laꞈ kʼoeˇ, ngaˇ kʼaˇ loˬ-eu jeˬ tiˬ byah tiˬ loꞈ biꞈ laꞈ-euˬ meh” lehˇ ehˇ-awˇ, Iˇsawˇ maˬ geuꞈ kʼoeˇ maˬ juˬ ni, Yaˬkoˆ neh dehˬ ahˇ nehˬ-euˬ meh.
12Kʼoeˇ naˇ, “Aˬ dui luˆ-iˇ kaˇ-euˇ. Ngaˇ nawˬ-euˬ mehˬ hu iˇ tawˬ ma” lehˇ, Yaˬkoˆ-ahˇ Iˇsawˇ ehˇ nehˬ-euˬ meh.
13Yaˬkoˆ ehˇ-eu, “Nawˇ mawˇ luꞈ-eu loꞈ-ehˇ, ngaˬ-euˬ zaˬ deuˬ yaw nyiˇ-a siˬ. Jeˬ zaˬ deuˬ laꞈ kʼoeˇ yaw nahˬ deuˬ kʼawꞈ keuˬ-a siˬ. Tiˬ nah laꞈ kʼoeˇ tehꞈ-ehˇ aˇ dzehˬ-ehˇ teh kawˇ dzeuˇ naˇ, shiˇ jiˇ tehꞈ-a. 14Teu miˇ neh, nawˇ jeˬ huˬ iˇ tawˬ. Ngaˇ aw lawˆ lawˆ-ehˇ caw teh leꞈ ma. Eˬdoˬ meuˬ-ahˇ nawˬ-euˬ mehˬ nah teh miˇ le ngeh keuˆ ni, jeˬ zaˬ heu deuˬ teh-awˇ, ngaˬ-euˬ zaˬ heu deuˬ sheuˬ-awˇ, kʼaˇ laˆ kawˇ nya-eu laˆ kawˇ laˆ kawˇ-ehˇ oe gʼeh leꞈ ma.”
15Iˇsawˇ ehˇ-eu, “Ngaˬ-euˬ tsawˇ haˬ tiˬ deuˬ nawˬ nehˬ-ehˇ bi jawˇ yaꞈ nya ma.” Yaˬkoˆ ehˇ-eu, “Nawˇ ngaˬ-ahˇ ha geuꞈ nehˬ laꞈ-eu tehꞈ-ehˇ kʼawꞈ aˇ dzehˬ dzeuˇ miˇ-a. Nawˬ-euˬ tsawˇ haˬ bi jawˇ yaꞈ-eu maˬ paˇ loˬ-eu duˇ.” 16Kʼoeˇ ngeh nah neh, Iˇsawˇ gʼaˬ Eˬdoˬ meuˬ-ahˇ gʼoꞈ-iˇ dzeuˇ-euˬ meh. 17Ehˇ kʼawꞈ, Yaˬkoˆ gʼaˬ Suˇkoˆ lehˇ kuˇ-eu jawˇ duˬ-ahˇ iˇ-awˇ, aˬ yawꞈ jawˇ-eu gʼaˇ duˬ nymˇ tiˬ nymˇ hawˇ-eu, jeˬ zaˬ kuˆ deuˬ tsoˆ-iˇ-euˬ meh. Kʼoeˇ miˇ neh, jawˇ duˬ kʼoeˇ tsahˇ-ahˇ Suˇkoˆ#33.17 ‘Suˇkoˆ’ lehˇ ehˇ-eu dawˬ tsuiꞈ-aˬ, ‘sehˬ gʼawˆ tiˬ deuˬ’ lehˇ ehˇ mawꞈ-eu meh. lehˇ myahˇ-euˬ meh.
18Yaˬkoˆ-aˬ, Maˬsoˬpoˬtaˬmiˇ miˇ kʼahˬ-ahˇ neh gʼoꞈ le-awˇ, tiˬ jeˬ-iˬ maˬ ca laˇ ni, Kaˬnaˬ miˇ kʼahˬ Sheˬkmˬ meuˬ-ahˇ oe keuˆ-euˬ meh. Meuˬ kʼoeˇ meuˬ dawˬ peh, deh ga-ahˇ aˬ yawꞈ jawˇ duˬ dah-euˬ meh. 19Sheˬkmˬ-euˬ aˬ da Haˬmawˬ-ahˇ pyuˇ maˇ byaˆ tiˬ yaˇ byaˆ biꞈ-awˇ, jawˇ duˬ kʼoeˇ tsahˇ aˬ yawꞈ zeuˇ tsehˆ-euˬ meh. 20Kʼoeˇ gaˇ lawˇ duˬ tiˬ hmˬ aˬ yawꞈ tsoˆ-awˇ, Iˇsaˬleˬlaˆ Miˬyehˇ-euˬ tsawˇ myahˇ yuˇ-awˇ, jawˇ duˬ kʼoeˇ tsahˇ-ahˇ Eˇloˬheˬ Iˇsaˬleˬlaˆ#33.20 ‘Eˇloˬheˬ Iˇsaˬleˬlaˆ’ lehˇ ehˇ-eu dawˬ tsuiꞈ-aˬ, ‘Iˇsaˬleˬlaˆ-euˬ Miˬyehˇ’ lehˇ ehˇ mawꞈ-eu meh. lehˇ myahˇ nehˬ-euˬ meh.
Šiuo metu pasirinkta:
Aˇ dahˬ 33: AHK
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Akha Bible Revision (Latin Script) © Thailand Bible Society, 2011.