Lukahtar 10
10
O bičhalipe thaj o iripe e eftavardeše amalengo. E Isusohće ašarimahći molitva e dadehće. Paramiči katar e lačhe odjehko Samarijako. E Marija thaj e Marta: Samo jekh trubuj.
1Akana lijah o Baro e avere eftavardeše dženen thaj bičhaldah len don po don angla pehte ande svako foro thaj them ande savo kamela vov te džal.
2Thaj phendah lengje: Ake, e žetva si bari, ali phujvane bućarde si cîr̄a. Molisajvon e Barehće te bičhalel e bucarnen te aven pe pi žetva.
3Džan tar, ake, me tumen bičhalav sar e bakror̄en maškar e ruva.
4Na te igjaren ni e ćisi, ni o galavo, ni e prnale, a e dromeha na te sikadon nikahće.
5Kana den andre ande savo god ćher, m’anglal te phenen: Neka avel lačhipe ando ćher.
6Pa te arakhadola inćate o čhavo e lačhimahko, tumaro miro, tumaro lačhipe ačhela pe lehte, a te niči avela okoringate, tumaro lačhipe irisajvola palpale tumende.
7Ačhen ande gova ćher, h̄an the pijen godova so si paša lende, kaj o bućalo manuš trubuj te lel piro poćinipe pala pi bući. Na te džan andar jekh ćher ande aver.
8Thaj kana tumen aven ande varesavo them, kaj lačhe dožaćaren tumen, h̄an sa so god andol angla tumende.
9Thaj sastaren e nasvalen save si ande gova foro thaj phenen lengje agadija: O Devlikano thagaripe pašol tumende.
10A kana avena ande khajekh them, kaj niči ažućarena tumen lačhe, tumen iklen avri pe lehće droma thaj phenen lengje.
11Ake, khosah amen vi o prah̄o, savo astardilah pe amaro hujravipe ande tumaro foro, a pale te džanen gova, kaj pašilah e Devlehko thagaripe, lehko rajipe tumende.
12Thaj mothovav tumee kaj ogole djivesehko avela maj loće vi e Sodomaće nego gole forohće.
13Pharipe thaj bibah̄ tuće, Horazine, phare tuće, Vitsaida, kaj te dikhona pe e čudujra ando Tiro thaj ando Sidono sar paša tumende, von odomut bešleha ando prah̄o, hujrade ande traste, kajindo pe.
14A pale maj loćipe avela e Tirohće thaj e Sidonohće nego tumengje.
15A tu, Kapernaume, tu, savo vazdinaljan dži ko del, tu kam pereh, tu kam peradoh tele dži bengjende, kam sa ćerdinajvo jogji.
16Gova savo ašunel i man, a savo tumenca prasape marel, prasal pe vi manca, a ko gova ćerel, lel ando prasape vi gole savo man bičhaldah akaringate.
17Akana irisalje gola eftavardeš manuša, dindo vorba dragostimaha: Bareja, amengje paćan thaj kanden amen ande ćiro alav vi e benga.
18A vov phendah lengje: Me dikhlem e bengje kana pelah tele sar e Devlehći jag, e munja, e strafin katar o del.
19Ake, dav tume akana o zuralipe te uštaven e sapen thaj e škorpijen thaj te aven gadija maj bareder katar o zuralipe e savor̄e džungalendar, a von tumee našti ćerena nisavo bilačhipe.
20Na te veselisajvon kana e benga kanden tumen, nego aven bah̄tale kaj tumare anava si ramome upre paša o Del.
21Akana, ande jekhvar avela dragostipe e Isusohće, lehko odji pherdilo jekhvaratar, obraduvisaljah ane po odji thaj phendah: Ašarav tu, Devla, Bareja e devlehko thaj e phujvako, kaj tu garudan gava katar e godjavere thaj katar e sikamne, a sikadan e ciknengje. Čače si gadija, Dade, kaj tu kamlan gadija.
22Thaj vov boldinaljah ke pe amala thaj phendah lengje: Sa si dino mangje katar mo dad, niko niči džanel ko si o čhavo, osim e dadehtar, thaj niko niči džanel ko si o dad, osim e čhavehtar thaj golehtar savehće o čhavo mothovel gova.
23Thaj boldindo pe pale ande rig ke pe amala phendah: Bah̄tale si gola jakha save dikhen gova so tumen dikhen.
24Kaj me mothovav tumee kaj but prorokujra thaj but šorune, carujra, kamleha te dikhen gova so tumen dikhen, a niči dikhle, a kamleha te ašunen gova so tumen ašunen, pa niči ašunde.
25Akana uštilah jekh zakoniko thaj zumavindo le phendah lehće: Sikamneja, so trubuj te ćerav te avel ma džuvindipe bi e mulimahko, trajo biagorehko.
26A vov lehće phendah: So ačhel ando zakoni? So dikheh tu?
27A vov dindo vorba phendah: Volisar e Bare, e Devle ćire, ćire celone odjeha, ćire saste ileha, ćire saste zoraha thaj ćire saste godjaha, thaj volisar ćire maj pašutne sar vi tut korkor̄e.
28Thaj vov phendah lehće pale: Lačhe dijan vorba, ćer gadija thaj kam aveh džuvdo.
29A vov kamlah te sikadol sar čačo, te čačol, thaj phendah e Isusohće: Ko si mrno pašuno manuš?
30A o Isuso dindo vorba mothodah lehće gaja paramiči: Varesavo manuš huljistah katar o Jerusalimo ando Jerihono pa astarde le e vošutne čora, huljarde le thaj nangjardele ratvarde, le thaj našletar gothar, a e ćhindjarde manuše mukle opaše mule.
31Akana huljistah gole dromeha nesavo rašaj, lilvarno, thaj dikhindo e ratvarde džene nakhlo tar pe aver rig.
32A vi jekh djakoni kana reslah pe gav than, dindo pe dopaš mule muruše, durilo tar pire bućaha.
33A nesavo Samarijako naćhindo kothar avilah dži golehte, e bibah̄tale manušehte thaj pharilah lehće dikhindo le gasave khundarde.
34Thaj pašilah polokor̄e lehte, paćardah lehće e pusade thana thal čhordah pe lehte zejtino thaj mol, bešaldah le pe po gra thaj andah le ande kafanava, ande kaljardi, thaj ačhilah paša lehte inćate.
35O dujto djive, oteharinaha iklindo avri, ikaldah vov duj kotora love thaj dijah len e gazdahće, e kaljardarehće, dindo vorba: Dikh pe lehte, arakh gale ratvarde manuše, pa te deha maj but love pala lehko parvaripe, me kam poćinav ćuće, kana irisajvava palpale.
36So tu gîndi, so tu ićareh, savo katar gola trin džene sah maj paše ke gov dženo, saveh dije daba e čorane manuša.
37A vov phendah pe gova: Lehće sah maj pašuno ogova savehće avilah pharipe pala lehće daba. A o Isuso mothodah lehće: Dža, pa vi tu ćer gadija.
38Thaj džando e dromeha vov dijah ande jekh gav, a varesavi džeji, savjako anav sah Marta, dožaćardah le thaj akhardah le ande po ćher.
39A late sah jekh phen, po anav Marija, savi bešli tar paša e prne e Isusohćere thaj ašundah lehći vorba thaj kandijah le.
40A e Marta h̄asardilah ande godji, kaj niči džanglah sar kam ćerel bući trujal lehte, ačhilah angla lehte thaj phendah: Bareja, pa tu niči dikheh mrne pheja savi muklah ma korkor̄e te me tut kandav? Phen laće nek i voj lel e bući ande va.
41A o Isuso lijah o alav thaj phendah laće: Marta, tu arakheh man but thaj tu san but sigarni e bućaće.
42A samo jekh jekhor̄i bući trubuj te ćerdol, a e Marija lijah jekh lačho kotor bući savo niči kam lel pe latar.
Šiuo metu pasirinkta:
Lukahtar 10: GURB1938
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Englezongo thaj avere Themengo Biblijako Amalipe 1938.