LUK 23
23
Pilat Ma don na Jisu
(Mat. 27:1-2,11-14; Mrk. 15:1-5; Jhn. 18:28-38)
1Han anmani an renga an thuia Jisu ha Pilat madonna an hong tuang jui. 2Anmanin Jisu ha nontak an pek an luiti, ‘hiva mi ning keini jat rakip hi aniluina lam ma anakaijui, Kaisar jiang pek rang suak ham a na kharra, hale a mahi Khrista reng kani a kan ti’.
3Han Pilat ning ama jiang a luiti, “Nang jiwngai rengpamo nani?” Han Jisun a sang, “Nang in nitiha adik”.
4Pilat ning thiampulianngai le mitamngai jiang a ti, ‘kein hiva mipa chunga a siatna khat om mu making’.
5Han anmani ning ator an kan talla anti, “Hiva mi hi Galili, Judia hale hiva ram tenna mingai jiang kan sual kanse tianga a manchu ani.”
Herod Jiang Jisu Antir
6Han Pilat ning a jet karra ading kel, ‘hiva mihi Galili mi mo ani?’ 7Hava suale Jisu hi Herod rengpa a ram sunga mi ani jarra, Herod omna hi om Jerusalem ani jarra, Jisu hi ama jiang atir khir ret jui. 8Herod ning Jisu a mu karra a ning a luisat, ajarko ama ning phat sot tak a Jisu ha kan mu pui ranga alui ngak ani, hale Jisu ning atho angakpa ngai ham alui mujot ani. 9Herod ning Jisu jiang chong tam adingkel, tak-ha Jisun chong khat om luisangmak. 10Thiampulianngai le dan ojangai ning Jisu chunga anilui chong tam an ri a Jisu ha nontak an lui pek. 11Herod ning a ralmingai le a kanrualla eselna le nuiso tak a Jisu ha reng puan an man tianga vei khat Pilat rengpa jiang antirretjui. 12Hava nikhuo tenna phut Herod le Pilat ha an kan jotretjui; ajarko anmani anni hi arapako an lui kan enda ani.
Jisu Thinarang Chong Pek
(Mat. 27:15-26; Mrk. 15:6-15; Jhn. 18:39—19:16)
13Pilat ning thiampulianngai achong che rakip a kui khomma, 14anmani jiang a ti, “Mirakip lung aletiang a keiruoi tia nang nin kei jiang nan hong tuanghi, kei ning ka en na, ama jiang nang nin nontak nan pek rakip, ama siatna ite khat jak om mu making. 15Han Herod ning om siatna mu mak, hale a man keini jiang ihong tirret ani, han, enru, a man thina ranga chuanko i om tho mak, 16hiva jarra kei ning ama hi vebak kata masua kati. 17Kanna ut kholai khang hin ama ning anmani ranga mi khat hi amasuarang a suak
18Tak-ha anmani ning an kan rualla an hong khekjui, “Hiva mihi thatru, hale keini ranga Barabas ha namasuapero”. 19Barabas ko khopuia mi that hale hele bai man suak ren inn na om ani.
20Hale Pilatning Jisu ha ama suajot jarra rasa ringa alui hongtiretjui, 21han anmanin an khek, “ama hi khros hin thatru, khros hin thatru” an luiti.
22Veithum tung na anmani jiang ati ret, “A satlui imo hiva mipa ning athojui? A ma chunga that na ranga alalna ite khat mu making, hava jarra kein ama hi ve kata masua kati”.
23Han anmanin Jisu ha khros chunga that na ranga rasa ringa an lui khek, 24Pilat ning an khek nuk juia that ranga an lam ha a jot pe jui. 25Pilat ning ren inn na a om mithatpa Barabas mi man kannokpa lam ama suajui, Jisu lam ha anmani lungdo tung na ranga an kut chunga apeklut jui.
Jisu Khros Anthat
(Mat. 27:32-44; Mrk. 15:21-32; Jhn. 19:17-27)
26Anmanin Jisu ha an tuang han khoralla a hong Simom anti ha anchur dea, Jisu a nuk tiang khros ha an manputjui.
27Hale mitamin ama ha an jui, han numei aviar ning chajang ansiarra Jisu ranga an lui chapjui. 28Jisun a kan heia a ti, “0h Jerusalem numeingai kei ranga chap maru, tak-ha nan tak rang le nan naingai ranga chapru”. 29“Ajarko enru nang ni karra naineilui numei, a nai ranu ilavai chilui ngaiha iduk ravan satmo anni, nanti na rang nikhuo ha hong rang ani jui. 30Hava phat han tangbung ning kan chunga nadetaro, hale tang bungte ngai jiang keini hi nakhu taro tia anmanin tirang anni jui. 31Ajarko thing kung a ring lai hin hingahin an tho aninko, thing kung a char karako imo ani tarang?”
32A satlui tho miring anninom that ranga Jisu le an lui hong tuang chun. 33Hinga hin anmani ning Lukorok anti mun han misatui anni, khat lam Jisu chang tiang, khat lam ha Jisu veitiang han an that chun jui.
34Jisu ning alui ti, “Opa anmani hi ngaidamro, anmanin imo kan tho tiha kan jet ma u,” hale anmanin Jisu puan ha an ektherra rasi an kan en na jui. 35Hale mingai ning an ngirra an en, hale Jiw lamkei ngainnom anner an man komma chong erro an ri a, ama ning midangko asanringtor, a mahi Khrista anti ha aninko, a tak a bing a kan san rase.
36Hale ral mingai ning om Jisu kolla an honga, thei thurri, athur tui an pek an hong mariam. 37“Nang jiwngai rengpa naninko na tak na binga kan san ringro an hong ti”.
38Jisu a lu chunga han “A ma hi jiwngai reng ani”, tia an lui jiak.
39Hale khros chunga an khai a satlui tho pa khat ning Jisu ha a mariamma a ti, “Nang Khrista ha nimak che mo? Natak na binga kan san ringro, hale keini om na san ringro”.
40Hale an khat pa ning aluikok, “Nang Pathian chitmak che mo? Nangom ama le a kan ang rip thina namumo nimak?” 41keini ko kan mu rang i suak thina ha kan lui tho nuk jui a kan mu ani, tak-ha hiva mipa hi ko ite khat a satlui atho na om mak. 42Han a man a ti, “O Jisu, na rengram natung karra, Puma nang in kei om nangaidonro”.
43Han Jisu ning ama jiang a ti, “Kei ning nang jiang a thianga ki na ri ani, ve enni nang kei le Paradais hin om suam rang kan ni jui.”
Jisu A thi
(Mat. 27:45-56; Mrk. 15:33-41; Jhn. 19:28-30)
44Hingahin dar karuk a hong chul jui, Simni ahongjingjui, dar kua ahong tung mak kar je ramuol pumpui hi pum jinga alui jingjui. 45Hale Pathian Innthianga puan duong ha alai tak a kan khuisenjui. 46Hava suale Jisun hesang tak a akhek a ti, “O apa, ka thavang hi na kut kana pek lut jui”, han Jisu ha athi jui.
47Han ralmi riakhat neipu pa ning hiva rakip a mu karra ‘hiva mihi Pathian jet, adik chuan tho mi ani,’ aluitia Pathian amanpak.
48Hiva rakip a mu mitam ngaining an jet karra an rop anbenna an kir jui. 49Hale Jisu le an lui kan jet mingai, le Galili tenna an phut Jisu a nuk hong jui numeingai ning hiva rakip an en na a lak det anlui om.
Jisu An phum
(Mat. 27:57-61; Mrk. 15:42-47; Jhn. 19:38-42)
50Hale enru ulianrup karra Josep anti chuan dik a tho pasal khat alui om. 51A ma ning ko mingain an lungdoa antho chuan ha luijotmak. Amai hi Judia khopui Arimathia tenna ahong Pathian rengram hong ranga angak chak mi khat ani. 52A ma ning Pilat jiang a chea Jisu takruak ha a lamjui. 53Han a man Limonpuannalla achunna, mi khat jak in num an la kanphumlui lungkhur than han puma ha a siak jui. 54Hiva nikhuo ha sernikhuo ranga kan ningna phat ani jui.
55Hale Jisu le an hong kan ruai Galili tenna numei rup ngai ning Puma aruok ha ijamo anphum tiha an hong en. 56Hava suale anmanin an hong kirra a rim hui sariak teiranga ankanningjui. Ha sernikhuo hin ko dan nuk juia pong an lui kansakjui.
Šiuo metu pasirinkta:
LUK 23: AIMOLBSI
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.