Yeneses 9
9
Godta Nowa dla yu itiyapo himili
1Godtapo Nowa mate ya꞉ akimlala mate dla epo atlaiyo, “Wua꞉ yimlala sikemte isukumama ta꞉lamoye pasatlepe. #Yen 1:28 2Alinepi hapuloma tea mate epo amalo mateta wua꞉ wowota꞉le mate ha꞉ha꞉lepe. Epapedeme yia꞉tapo wua꞉ta itiyamale isili tle ha꞉ha꞉lepe. 3Kotiyamale dla na꞉tapo wua꞉ye isikimi emale alisisi mate epo dlomoko mate dlomha꞉ha꞉iye duwapo. Amasiyama na꞉ ma wata wua꞉ watle atlema, alinepi hapuloma iye dlomha꞉ha꞉lepo depame.
4Amasiyama wua꞉ mo demama ala omali mate hallati podlowa. Adipalati, pasakaloye omali dulu dla halapo. #Leb 7:26-27, 17:10-14, 19:26; Dit 12:16, 23, 15:23 5Epedeme oplami antapo ya꞉mkale pasakaloye kestlepiye, ya꞉ ma asiyama yumilipe. Epame alinepi aditapo oplami pasakalo kestlepiye, asiyama alinepi e mape yumilipe. 6Epedeme oplami antapo ya꞉mkale omaliye olostlepiye, ya꞉ ma asiyama ya꞉ omaliye olostlepe. Adipalati, Godtapo oplamiye me-ya꞉ mila꞉pi sepele mita꞉puwapo. #Yen 1:26; Eke 20:13 7Epedeme Nowa wa꞉ mate epo wa꞉ akimlala mate, wua꞉ yimlala sikemte isukumaiya, wua꞉ mamadulotapo ta꞉lamo pato hema opa pasatlepo depame.” #Yen 1:28
8Epame Godta Nowa mate epo ya꞉ akimlala mate dla ma epo atlaiyo, 9“Na꞉ watapo yu itiyamaleye wua꞉ mate epo alotle wua꞉ mamadulota ha꞉ha꞉lowe mate dla himima. 10Epame wua꞉ mate koa dulu tle u-ulapo matiwa alinepi mila꞉pi meyelope meyelope dle mate dla ma himima. 11Yu itiyapo himili eye ipo. Na꞉ matle pasakalo ha꞉ha꞉ alisisi hapulomaye yú mate popoyuluwa. Epame matle ta꞉lamoye yú mate poyuluwa.
12Na꞉tapo wua꞉ mate wua꞉ mamadulo mate epo pasakalo ha꞉ha꞉lalo alinepi hapuloma mate dla yu itiyapo himmama ulu himiye ipo. 13Eye na꞉tapo pesepidoloye omapla di dla himima. Pesepidolo itapo na꞉ta wua꞉ dla yu itiyapo himi i imalalo hallepe. 14-16Epapedeme pesepidolota wuala dulu dla ella natilipiye, na꞉tapo wua꞉ mate epame alinepi hapuloma mate dla yu itiyapo himi iye malamolowepo. Epedeme yútapo matle pasakalo ha꞉ha꞉lalo alisisi hapulomaye popotimolowa. 17Adipalati, pesepidolotapo na꞉ta yu itiyapo himi i ya꞉ ulu himili halapo,” diyo.
Nowa ya꞉ akimlala
18-19Nowa ya꞉ akimlala iwolotapo koa dulu tle u-ulapo matiyo. Yia꞉ hiye Sem, epo Ham epame Yapet. Amasiyama Hamye Keinan ya꞉ apo. Epedeme akimlala dapahatlope iwolotapo ta꞉lamo opa hapulomata puale sitali halapo.
20Alotle Nowatapo osalo himpame gla꞉pi dlomoko emaiyo. 21Epame ya꞉ gla꞉pi dlomoko dala mate wain yú mita꞉pame depo yiyilamama aya dulu dla tidali siyapo elaiyo. 22Epalati Keinan ya꞉ a Hamta natipame Sem mate epo Yapet mate dla atlaiyo. 23Epalati Sem mate epo Yapet mateta yia꞉ ata tidali siyapo ellati natilala depame, tluka hame yia꞉ maka꞉ dla himme kawapo tuwame yia꞉ aye bopudiyo.
24Nowa kawata yulita mo-pa꞉lati yelepo yami mosukulu hamale Hamta koko halë dalepame epo atlaiyo, 25“Wotiyalle kokotapo Keinan dla pulupe. Epame ya꞉tapo ya꞉ bapadulo dulu dla isili ikadepe dla asiyama pa꞉le oko halalo hallepe.” 26Epame ya꞉ matle epo atlaiyo, “Lod, Sem ya꞉ God hi di dla ta꞉diya. Epame Keinanta Sem ya꞉ oko oplami halemama ya꞉ yu dla salladepo sela꞉lepe. 27Epame Godtapo Yapet watle ta꞉la pato hamilipe. Epame Yapettapo Sem ya꞉ aya dla hallepe. Epalati Keinantapo yia꞉ yu dla salladepo sela꞉mama yia꞉ oko oplami hallepe.”
28Yúta opa poyuli alotle Nowatapo 350 sokomoko halaiyo. 29Epedeme Nowatapo 950 sokomoko halepame powaiyo.
Šiuo metu pasirinkta:
Yeneses 9: xlaPB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2005, Wycliffe Bible Translators, Inc. All rights reserved.