Luke 22
22
Yaavai ɠili vai Yesu ma
(Matiyo 26:1-5; Maleke 14:1-2; Zan 11:45-53)
1Ɓului nii lɛʋɛ la su, naama vɛtii, daaseigi ga Pakegi, naa maa ɠɛni ɓuɠazu. 2Zalaɠa ɠula ɠundiɠiiti ta tɔ kalamɔinti ti ɠɛni keleɠele gaiziɛzu, ʋelei ta Yesu ʋaa la, tɔɔzei ti ɠɛni luazu nuɓusɛiti ba.
Zudase yeezei vai Yesu yaava vai wu
(Matiyo 26:14-16; Maleke 14:10-11)
3Naama yeeɠɛɠalai Setana lɔɔni keela puugɔ maazu felegɔi (12) ɠila su, Zudase, nii é lolisu ga Isekaliyɔte. 4Zudase liini, ti zoloo su ta zalaɠa ɠula ɠundiɠiiti, naa ʋɛɛ GALA sei ʋɛlɛi maaɓɛɛ ɠundiɠiiti ba, ʋelei a zoo é Yesu lɔ la ti yeezu. 5Ti wola ɠoozunɛɛni, ti minazeɠe bɛ ga ti wali ve zea. 6É yeezeini naa wu, é tɔɔzei ga yeeɠɛɠala ʋagɔ ɠaiziaa, é ʋa Yesu lɔ ti yeezu, bɛbɛi mina faa ɠwɛɛ su.
Yesu ta kaladopoiti ti Pake daamii ɠɛʋele ɓɛtɛ vai
(Matiyo 26:17-25; Maleke 14:12-21; Zan 13:21-30)
7Ɓului nii lɛʋɛ la su, naama vɛti voloi zeelini, yeei ti maanɛɛni la ga ti Pakegi ma ʋaala ziʋoi ʋaa. 8Yesu Piyɛlɛ ta Zan leʋeni naazu, é ɠɛ ti ma: «À li, wo Pake daamii ɠɛʋele ɓɛtɛ ade ʋɛ, ade ʋa mi.» 9Ti ɠɛni ma: «Mini ɠa è pɔ ga gi kɛʋele ɓɛtɛ ná?»
10É ɠɛni ti ma: «Wa lɛɛna taazuʋɛ, wa ɠomi wa zunui ta, ziɛ liɠii unma. À ʋilɛ polu, pɛlɛi wuʋɛ é lɛɛzu ná. 11Naa ʋoluma wo ɠɛ pɛlɛ kɛɛ nui ma: ‹Kalamɔn ɠɛ: Pɛlɛi ɠa mini, ʋɛ gè ʋaazu Pake daamii wosu ná, gá nà-kaladopoiti?› 12Zunui naa ɠa geezu ʋɛlɛ wolai wu lɛɛzu ga woye, ʋɛ ná wuuɓɛtɛai. Miná ɠa wa kɛʋele ɓɛtɛi ɠɛ ná.»
13Ti liini, ti fai pɛ kaani nɔ ga ʋelei Yesu boni la ti ma. Ti Pake daamii ɠɛʋele ɓɛtɛni.
Maliɠii ná-Pake daamii ɠaaɓelagi
(Matiyo 26:26-30; Maleke 14:22-25; 1 Kolɛnte 11:23-25)
14Yeeɠɛɠalai zeeliai ma, Yesu zeini daami laɓalii ɠakala ta keelaiti. 15É ɠɛni ma: «Wɔin ɠɛa mà gola ga ade Pake daamii nii wo ʋɔɔma, aisa gè ʋa ɓɔlɔ. 16Gè bo wo ma, gè la mɔ ta mia, eyɛsu daazeeli GALA ná-masadai zu.»
17Naa ʋoluma, é ziawɔi zeɠeni. Kpegai ma ga mamagi ve GALA bɛ, é ɠɛni ti ma: «À nii zeɠe, wo ɓɔɔle la wo pɛ. 18Mazɔlɔɔ, gè bo wo ma, é zo za ma, é li naa luɠɔ, gè la mɔ ansaɠɔ gwaai ma ɗɛi ta ɓɔlea pɛ, eyɛsu GALA ná-masadai ʋa.»
19Naa ʋoluma, é ɓului zeɠeni. Kpegai ma ga mamagi ve GALA bɛ, é galeɠaleni, é fe ti ya, é ɠɛ ti ma: «Nii ɠa é ga kpùsɛi, feai wo ma vaa ma. À nii ɠɛ, wo ɠizɛ sù.»
20Ʋele nɔ ɠana ɓalaa, daamii ʋoluma, é ziawɔi zeɠeni, é ɠɛni ti ma: «Ziawɔi nii ɠa é ga minazeɠe niinɛi, daazeeliai ga mà ɲamai maaʋele, nii puai wo ʋɛ.
21«Kɛlɛ yàava nui ɠa zeini taɓalii ɠakala, gi ɗa laamii ʋɔɔma. 22Tama, Nu ná-Doun Zunui ɠa za, pelei GALA ge deveai la. Kɛlɛ maanɔɠɔi ɠa naama nui luɠɔ, nii é ʋaazu dɔɔzu sili nuiti zeezu.»
23Ti tɔɔzeini ga ti ɗa ɓɔɠɔ ɠaazaɠa ga ɓɛ ɠa é ti zaama, é ʋaazu niima vai ɠɛɛzu.
Ɓɛ ɠa bɔɔlɔai ɛsɛ pɛ ba?
24Maaɠaalii ta wuzeɠeni ɓalaa naazu kaladopoiti zɔɠɔzu ga ti ʋa kwɛɛ zɔi bɔɔlɔai ti zaama. 25Yesu ɠɛni ti ma: «Zii ɠiligiti ta-masagiti ta ɓɔɠɔ ɠɛɛzu ga ti-maliɠiiti, zɔiti ti zeizu nuɓusɛiti unga, naati ta lolisu ga faa ʋagɔ ɠɛɛ nuiti. 26Wɔun, naa ta mina ɠɛ wo zaama. Zɔi bɔɔlɔai wo zaama, naa ɠɛ eɠɛ doungoi. Deve wo nui ɠɛ eɠɛ botiɠɛ nui. 27Mazɔlɔɔ ɓɛ ɠa bɔɔlɔai, zɔi é daamii wo taɓalii ɠa, ɓaa zɔi é maaleʋebogi wosu? Zɔi é daami wosuʋɛ kɛlɛ? Nà ma, nà wo zaama ga maaleʋebo nu.
28«Wa ɠa wo yiilɔa pòlu nà-kpɔlɔiti su. 29Naa ɠa é ba, nà masadai veezu wo ya, pelei Kɛ̀ɛ fea la zèa, 30wa daamii ta kpɔɔlei wo nà-taɓalii ɠa nà-masadai zu, wo zei masa kpɔkpɔgiti ga, wo ɗa Izilayɛle woloda puugɔ maazu felegɔiti (12) tukpɔɠaaleʋe.»
Yesu bo fai ga Piyɛlɛ ɠa ʋaazu ɠɛlɛzu ba
(Matiyo 26:31-35; Maleke 14:27-31; Zan 13:36-38)
31«Simon, Simon, woilo, Setana wo maavaliʋɛ ga é wo ɠaavɛ, eɠɛʋelei molo ɠaavɛɛ nui a ɗa kɛ la. 32Kɛlɛ gè GALA faliʋɛ è ʋɛ, Simon, nii a kɛ ɗa-ɠidaaleʋei mina ɲɛɛlɛ. Ɗa ma, ɗa ɠalena ma ʋolu, è-ɠɛɛlointi sɛbɛlɔ.»
33Piyɛlɛ ɠɛni ma: «Màliɠii, kɛ̀ʋele ɓɛtɛʋɛ ga de li ʋɔɔma kasoi ɠa, anɛɛ ɓalaa de za.» 34Yesu ɠɛni ma: «Gè bo è ma, Piyɛlɛ, tɛɛ zinɛi la ɓɔɛa za, ni è la ɠɛlɛni bà, ná zeizu ʋa ɠɛ saʋa, ga è la kwɛ̀ɛ.»
Wali ʋuu ɓɔlɔi, ta ɓɔlɔi, naa ʋɛɛ boɠa zɔkpɔi ʋa
35Naa ʋoluma, Yesu ɠɛni ti ma: «Siɛgi zu gè wo leʋeni la, wali ʋuu ɓɔlɔ la wo ya, ɓaa ɓɔlɔ, ɓaa saʋala, leeni ɠa wo ʋalani ma?» Ti ɠɛni ma: «Ani nɔpɛ.» 36É ɠɛni ti ma: «Kɛlɛ niizu, zɔi wali ʋuu ɓɔlɔ zea, é seɠe, zɔi ɓɔlɔ zea ɓalaa, é seɠe. Zɔi boɠa zɔkpɔ la zea, é ná-seɠe wolai ʋɔdi, é ta ɠeya. 37Gè bo wo ma, kɛni GALA Sɛʋɛi zu wooi nii laazeeli nà-eteai zu, naa ɠa ga: ‹É ɠaaluni tɔ koloɠolo nuiti saama.› Faiti ti woni nà-faa zu, ti laa ɠa zeeli.» 38Kaladopoiti ti ɠɛni ma: «Màliɠii, wɛlɛ boɠa zɔkpɔ felegɔ ʋa.» É ɠɛni ti ma: «Naa kula ɠɛa su.»
Yesu GALA fali vai Wolive wulu ɓelei ma ɠizei ma
(Matiyo 26:36-46; Maleke 14:32-42)
39Yesu ɠulani, é li Wolive wulu ɓelei ma ɠizei ma, eɠɛʋelei a ɗa kɛ la pɔlɔma. Ná-kaladopoiti ti ʋilɛni polu. 40Ti zeeliai ma miná, é ɠɛni ti ma: «À GALA fali, naa ɠa a kɛ wo mina loo tɛgai zu.»
41É maaɠoozani ti ʋa, ti yɔɠɔzuʋɛ ɠɛ ga kɔtu ʋili daa ɠila kɛɠala, é ʋilɛ ɲiibiɠa, é GALA fali, 42é ɗa ɠɛ ma: «Ee, Kɛ̀ɛ, ni ɗa kɛɛna, soolɛi ma ɗaawɔi nii maaɠooza bà. Kɛlɛ anɛɛ naa ʋe, zìima vai mina ɠɛ, kɛni ɗɔnɔi nɔ.» 43[Geezuɠeelai ta ɠulani bɛ kɛlɛma naazu, é ɗa sɛbɛlɔ. 44Tɛi ziiɓɔlɔi ɠɛni Yesu ma, é ɠaaɓaani GALA falii zu. Ma vɔdɔi ɠɛni eɠɛ ɲamai, é ɗa ʋilɛ peinpein zooi ma.]#22:43-44 Wooi niiti ti [ ] kpaku felegɔiti zɔɠɔzu, naati ti la sɛʋɛ wɔlɔmai tanigaa zu.
45Kpegai ma ga GALA fali, é wuzeɠeni, é ɠale ma kaladopoiti pɔ bɛ, é ti ɠa ɲiizu ziiɓɔlɔi maaʋele ma. 46É ɠɛni ti ma: «Lee ʋe wo ɲiizu? À wuzeɠe, wo GALA fali, naa ɠa a kɛ wo mina loo tɛgai zu.»
Yesu zo fai
(Matiyo 26:47-56; Maleke 14:43-50; Zan 18:3-11)
47Yesu ɠɛni dɛ ɓɔɛzu nɔ, eyɛsu bɛbɛi unkula. Zudase loni ti luɠɔ, keela puugɔ maazu felegɔi (12) ɠila ge ɠɛni de. É maaɓuɠani Yesu ʋa ga é nɛɛnɛ ga daaʋɛ komagai. 48Yesu ɠɛni ma: «Zudase, daaʋɛ komagai ɠa è Nu ná-Doun Zunui yaavazu la ɓaa?»
49Yesu ɠoba nuiti ti naama vai ɠaai ma, nii é ɠɛni ʋaazu ɠɛɛzu, ti ɠɛni ma: «Màliɠii, gá zoo gi boɠa zɔkpɔi ʋili ɓaa?» 50Ti ɠila ge boɠa zɔkpɔi ʋilini zalaɠa ɠula ɠundiɠi wolai ná-duɔi ma, é naa yeezazu ʋele woii leʋe ba. 51Kɛlɛ Yesu kpɔɛi zeɠeni, é ɠɛ ti ma: «À zɛ ná ɠana!» É yeevɔɔɠuni zunui naa woii ʋa, é kɛdɛ.
52Naa ʋoluma, Yesu ɠɛni zalaɠa ɠula ɠundiɠiiti ma, ta GALA sei ʋɛlɛi maaɓɛɛ ɠundiɠiiti, naa ʋɛɛ totuɠɔiti ba, ti ʋaani daalɔɠɔma: «Wo ʋaaʋɛ ga boɠa zɔkpɔiti ta kpekpe kpuɠaiti, eɠɛ toosu nu zo faa? 53Folo-o-folo gè ɠɛa wo ʋa GALA sei ʋɛlɛi ma ɠoizuʋɛ, wo la sòni názu. Kɛlɛ yeeɠɛɠalai nii ɠa ga wɔnɔ, é ɠɛ ga kpidii ná-zobogi nɔnɔ.»
Piyɛlɛ ɠɛlɛ vai Yesu ʋa
(Matiyo 26:57-58, 69-75; Maleke 14:53-54, 66-72; Zan 18:12-18, 25-27)
54Ti Yesu zoni, ti lii la zalaɠa ɠula ɠundiɠi wolai ná-koizuʋɛ. Piyɛlɛ ʋilɛni ti ʋolu ɠoozama. 55Tɛi ti abui ɠaazoni koi zaamaʋɛ, ti zei ma, Piyɛlɛ zeini ti zaama. 56Botiɠɛ anzanu ɠila ge kaani zeini abui ɠoba, é ɠaazulo ba, é ɠɛ ma: «Zunui nii ɓalaa ɠɛni ba.» 57Kɛlɛ Piyɛlɛ zeɠeni ga, é ɠɛ ma: «Anzanu, gè la zunui nii ɠwɛɛ.»
58Ná tago kɛai ma, taɠili ge kaani, é ɠɛ ma: «Ɗa ɓalaa, ɗa ga niima nuiti ti ta.» Kɛlɛ Piyɛlɛ ɠɛni ma: «Gè la ga ti ta.»
59Ná tago kɛai ma, taɠili ge maaɓakpani, é ɠɛ ma: «Gaamazu, zunui nii ɓalaa ɠɛni ba, tɔɔzei toɠa ga Galilé nu.» 60Kɛlɛ Piyɛlɛ ɠɛni ma: «Gè la vɔlɔ kwɛni nii è bosu.» Gaamago nɔ, é yɛni ɓɔɛzu, tɛɛ zinɛi ɓɔɛ. 61Maliɠii latini, é wɛlɛ Piyɛlɛ ʋa. Piyɛlɛ ɠigi looni Maliɠii wooi zu, nii é boni ma ga: «Za, tɛɛ zinɛi ʋa ɠɛ é ɓɔɛ, ɗa ʋaazu ɠɛlɛzu bà ná zeizu ɠɛ saʋa.» 62É ɠulani, é wɔlɔ ga gola.
Salaʋusuiti ti ɲɛɛɠula vai Yesu zu
(Matiyo 26:67-68; Maleke 14:65)
63Nui niiti Yesu ɠɛni ti ya, ti ɠɛni ɲɛɛɠulazu su, ti ɗa doɠa. 64Ti ɠɛni seɠei ʋɛɛzu gaazu, ti ɗa gaazaɠa, ti ɗa ɠɛ ma: «Ɓɛ ɠa é è loɠaai? Naama nui lɛ ga giye!» 65Ti woo ɲɔu mɔinmɔin kiligaa woni daalɔɠɔma.
Yesu tukpɔɠaaleʋe nu wolaiti kakala
(Matiyo 26:59-66; Maleke 14:55-64; Zan 18:19-24)
66Geelaalaogai ma, nuɓusɛiti ta-lotuɠɔiti ta zalaɠa ɠula ɠundiɠiiti, naa ʋɛɛ tɔ kalamɔinti ba, ti ɠaalɛɛni ba, ti li ga Yesu ta-lukpɔɠaaleʋezuʋɛ, 67ti ɠɛ ma: «Ni ɗa ɠa è ga Kilista, naa wo gi ma.» Yesu ɠɛ ti ma: «Gè bo pa de wo ma, wo la laa nɔ̀un da, 68ni nà ma, nà wo ɠaazaɠana, wo la gòoɠaaʋotega. 69Kɛlɛ za ʋoluma, Nu ná-Doun Zunui ɠa ɠɛ zeini Zɛbɛsu ƓALAGI yeezazuʋɛ.»
70Ti ɠɛni ma: «Ɗa ga GALA Doun Zunui mu ɓaa?» É ti wooɠaaʋoteni, é ɠɛ ma: «Wa ɓɔɠɔi wo boga, wo ɠɛ nà ʋe.» 71Ti ɠɛni ɓɔɠɔ ma: «Ada ɓɔɠɔi ade mɛniga da. Zeele ɓɛgele ɠa ade ɓɛdɛi ba niina?»
Šiuo metu pasirinkta:
Luke 22: GDZ
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.