Luke 17
17
Ɠɛɛɠɛlointi zɔɠɔzu vaiti
(Matiyo 18:6-7, 21-22; Maleke 9:42)
1Yesu ɠɛni ná-kaladopoiti ma: «Kɛɛɠeleɠele ge la ná, kɛni faiti ti ʋa, niiti ta nuiti too kotoi zu. Kɛlɛ maanɔɠɔ ɠa naama nui ʋɛ, nii é zɔiti toozu kotoi zu. 2A la vizɔ naama nui ma ga kɔtu wolai ɠili kɔgi ʋa, ti pili kpoloɗɛi wu, kɛlɛ é mina niima loungoi ɠila kpalaa too kotoi zu. 3Tɔ ɠa é ba, à ɓɔɠɔ zo kpaan. Ni è-ɠɛɛloin ɠa koto ɠɛɛna, zelii lo ma. Ni a ziɛ ʋelei maavalibona, suvaayɛ. 4Ni a kotoi ɠɛɛna è laalɔɠɔma ga seizu lɔfela foloi ma, seizu lɔfelai pɛ su é ɗa ʋa è ʋɔ, é ɗa bo ga toɠa siɛ ʋelei maavalibo, kɛni è suvaayɛ.»
Kidaaleʋei
5Keelaiti ti ɠɛni Maliɠii ma: «Ta ɓɔ gá-ɠidaaleʋei ʋa.» 6Maliɠii ti wooɠaaʋoteni, é ɠɛ ti ma: «Ni wa-ɠidaaleʋei ɠɛni ga mutaalede kaei ɠɛʋele, wa la zoo ɠɛɛzu sikɔmɔɔl gului nii ma: ‹Lɔɔɠula miná, è li, è ɓadɔ kpoloɗɛi wu,› a la ɠolo wo ʋɛ.»
Botiɠɛ nui losuʋɛ
7«Tanisu, ni botiɠɛ nu a ɠɛna wo gila zea, é ɗa wozai woli, ɓaa é ɗa togani ɓulugiti makɛ, siɛgi zu naa zeɠezu la kpalagaʋɛ, é ʋa, anɠɛ nɛi toɠa ɗa ɠɛ naa ma gaamago: ‹Ʋa fala, è zei daami wosuʋɛ›? 8Ɓa-o, toɠa ɗa ɠɛ ma: ‹Nà-kpɔkɔ ɠɔnɔgi ɓɛtɛ bɛ̀, ɓɔɠɔ maaɠili, è ɗa màaleʋebo, eyɛsu gè ɓe ga laamii, gè ɓɔɔle. Naa ʋoluma ɗɔun ɗa ʋa niina, è laami, è ɓɔɔle.› 9Kɛbɛ é la ʋaazu naa mamasu, naama wotii ɠɛɛ vai zu, nii é naa leveai ma, kɛlɛ? 10Wa ɓalaagi, ni wa naa nɔ ɠɛɛna, nii wo leveai ma, à ɠɛ ɓɔɠɔ ma: ‹Gá ga botiɠɛ nu ɲakaiti, gi naa nɔ ɠɛɛʋɛ, nii maa ɠɛni nɛɛni gi kɛ.› »
Gee nu puugɔi ɲade fai
11Yesu liizuʋɛ Zeluzalɛme, é ɠɛni Galilé yooi ta Samali yooi maaleʋesu. 12Tɛi é ɠɛni lɛɛzu taai ta zu, gee nu puugɔ daaɠomini, ti lo ɠoozama. 13Ti wooɠulani, ti ɠɛ ma: «Maliɠii, Yesu, gi maawɔinɠa.» 14É ti ɠaai ma, é ɠɛni ti ma: «À li, wo ɓɔɠɔ lɛ ga zalaɠa ɠula nui.» Ti liizuʋɛ, ti kaani ga ti ɲadega.
15Ti zaama, gila ge pɛtɛni ga é ɠɛdɛga, é ɠaleni ma ga ʋoluʋelei, é GALA dɛbi ga woo wola. 16É laaʋɛɛni kpulu Yesu ɠɔɠɔwu, é naa mama. É ɠɛni ga Samali nu.
17Yesu kpɔɛi zeɠeni, é ɠɛ ma: «Nu puugɔi pɛ ge la ɲadeni ɓaa? Mini ɠa mu mɔta taaʋuugɔiti ti ná? 18Tanɔpɛ ge la zɔlɔɔni, nii a ʋa ʋolu, é lɛbiyai ve GALA bɛ, kɛni wɛɛin nii nɔ?» 19Naa ʋoluma, é ɠɛni naa ma: «Wuzeɠe, è li, ɗa-ɠidaaleʋei è ʋaloa.»
GALA ná-masadai ʋaa vai
(Matiyo 24:23-28, 37-41)
20Faliziɛinti ti gaazaɠani, ti ɠɛ ma: «Siɛ kpɛgele ɠa GALA ná-masadai ʋaazu la?» É ti wooɠaaʋoteni, é ɠɛ ti ma: «GALA ná-masadai la ʋaazu, è ʋa ɠɛ ani nu kaazu ga ɠaazu. 21Daa la ɠɛa ga: ‹À wɛlɛ, toɠa ʋɛ!›, ɓaa: ‹Toɠa munu!›, mazɔlɔɔ GALA ná-masadai ɠa wo zaama.»
22É ɠɛni kaladopoiti ma: «Yeeɠɛɠalai ta ʋaazu, wɔin ɠa ɠɛ wo ma ga wo ɠaazula Nu ná-Doun Zunui ma, anɛɛ folo ɠila daawu, kɛlɛ wo la kaa. 23Ta ɠɛ wo ma naazu: ‹À wɛlɛ ʋɛ!›, ɓaa: ‹À wɛlɛ munu!›. Kɛlɛ à mina li, à mina ɓizɛ. 24Tɔɔzei ʋelei mainmain a ɗa saɠa la, é ɗa volo geeɠɔlɔgi ɠilazuʋɛ ɠwɛgi ma, é zeeli zɔɔla ʋelei, ʋele ɠana Nu ná-Doun Zunui a ɠɛ la ná-foloi zu. 25Kɛlɛ kɛni dɛ é ɓɔlɔ gola, niizuʋɛ nuɓusɛiti ti ɠɛlɛ ba.
26«Nu ná-Doun Zunui ná-siɛgi zu, faiti ta ɗa ɠɛ, eɠɛʋelei é ɠɛni ɠɛɛzu la Nowe ná-yeeɠɛɠalai zu. 27Nuiti ti ɠɛni daamii wosu, ti ɗa kpɔɔleiti bo, ti ɗa anzaiti fulu ɓɔɠɔ ʋɛ ta ti-lointi bɛ, eyɛsu naama voloi zeeli, yeei Nowe lɛɛni la kein wolai zu. Ziɛve golai ʋaani, é ti pɛ undaaʋili.
28«Toɠa ɠɛ ga Lote ná-siɛgi zu ɠɛʋele. Nuiti ti ɠɛni daamii ta kpɔɔlei wosu, ti ɗa aniiti geya, ti ɗa pɔdii loo, ti ɠɛni aniiti siinsu, ti ɗa pɛlɛiti to. 29Kɛlɛ voloi Lote ɠulani la Sɔdɔme ʋa, GALA ge timini abui ʋuuni, é ɠula geeɠɔlɔgi zu eɠɛ tonai, é ti pɛ undaaʋili. 30Ʋele ɠana a ɠɛ la, voloi Nu ná-Doun Zunui ɠulazu la kɛlɛma.
31«Naama voloi, ni nui ta a ɠɛna dooɠo bosuʋɛ ná-pɛlɛ ɠɔmaʋɛ, zeaɠɔligiti ti pɛlɛi wu, é mina yei ɠasɔ zeɠezu pɛlɛi wu. Zɔi ɓalaagi a ɠɛ kpalagaʋɛ, naa mina ɠale ma ʋoluʋelei. 32À ɠizɛ naa zu, nii é ɠɛɛni ga Lote anzai! 33Zɔi é pɔ ga é ɓaa zɛnvui maazu, toɠa ʋala ma. Kɛlɛ zɔi a ʋala zɛnvui ma, toɠa ɓaa maazu. 34Gè bo wo ma, naama ɓidii, nu felegɔ ɠa ɠɛ laani bete ɠilagi zu, gilagi ɠa zeɠe, zɔi yɛ ná. 35Anzanu felegɔ ɠa ɠɛ moloi ziɠazu ʋɔɔma, gilagi ɠa zeɠe, zɔi yɛ ná. 36[Zunu felegɔ ɠa ɠɛ kpalagaʋɛ, gilagi ɠa zeɠe, zɔi yɛ ná.]»#17:36 Wooi niiti ti [ ] kpaku felegɔiti zɔɠɔzu, naati ti la sɛʋɛ wɔlɔmai tanigaa zu.
37Kaladopoiti ti gaazaɠani, ti ɠɛ ma: «Màliɠii, mini ɠa naama vai ʋaazu ɠɛɛzu ná?» É ti wooɠaaʋoteni, é ɠɛ ma: «Ʋɛ nɔpɛ ani ʋoomai ná, miná ɠa ɗuaiti ta ɗa ɠaalɛ ba ná.»
Šiuo metu pasirinkta:
Luke 17: GDZ
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.