Kusintii Andunya 9
9
Akabuu iyi Ilaaɔ̃ í dĩ nŋu do Nowee
1Si anyii nŋu, Ilaaɔ̃ í weea Nowee do amaɛ ŋa fei í ni, i bí ku kpɔ ŋa hee ilɛ ku kɔ̃. 2Mɛɛmui sako fei a maa ce njo nŋɛi do yɛi ŋa fei do iŋa hai nɛ nto ŋa fei do cɛ̃ɛi inɔ inyi ŋa fei. An da nŋɛ si fei ndɛɛ awɔ. 3Andi mii iyi wa mi si ilɛ fei, ijɛ nŋɛi á jɛ. Si bɛi ǹ mu nŋɛ mii kú nɛ ngbo iyi í ya fita si ilɛ, bɛɛbɛ mɔi an mu nŋɛ fei ndɛɛ. 4Amma i maà ya ŋɔ iŋa do njɛɛ fei ajɔ ŋa, domi njɛɛu bɛi í jɛ kuwɛɛɛ. 5Ilaaɔ̃ í ni má, ǹ bi i mà sãa sãa ŋa, inɛ iyi í kpa inɛ gɔ, an sãa gbeseɛ. Bii í jɛ mɛɛmui í kpa amanɛ walakɔ bii inɛ gɔ í kpa amanɛ, an sãa inɛ iyi í kuu gbese.
6Inɛ iyi í kpa amanɛ,
amanɛi á kpa lafɛ̃ɛ mɔ,
domi ǹ taka amanɛi
bɛi amu takam.
7Iŋɛ mɔ i bí ku kpɔ nɔ i fangaa si andunya fei.
8Ilaaɔ̃ í sɔ̃ Nowee do amaɛ ŋa má í ni, 9wee ǹ wa n ba ŋɛ akabuu ku dĩ hee do dimi nŋɛ ŋa iyi aa na a maa bí do anyi nŋɛ fei, 10do mii ilu hunde iyi í wɛɛ nŋɛ fei, hai yɛi ŋa hee do mɛɛmui inɔ ilu ŋa do mɛɛmui sako ŋa fei ajɔ́ iyi iŋɛò ŋa ì fita wa hai inɔi akɔi inyiu fei de. 11Ǹ dĩ akabuum do iŋɛ. Kukɔ̃i inyi kaa ce nfei amanɛ ŋa do mɛɛmu ŋa fei má, kaa kpa irii andunya má.
12Ŋɔi Ilaaɔ̃ í ni, sɛɛdai akabuum nɔu wee iyi ǹ dĩ do iŋɛ do tɔku nŋɛ ŋa do mii ilu hunde ŋa hee do ajɔ fei. 13Ǹ jilɛ nŋɛ njoi Aɔ̃ lele iyi á jɛ sɛɛdai akabuu iyi ǹ dĩ amu do inɛi andunya ŋa. 14Bii ǹ jɔ̀ ijĩ í dũ, njoi Aɔ̃ á fita si, 15nɔ n ye gigii akabuu iyi ǹ dĩ do iŋɛ do mii ilu hunde fei. Inyi kaa kɔ̃ si ilɛ bɛi á ce nfei amanɛ ŋa do mii iyi wa mi fei má. 16Njoi Aɔ̃u á ya fita si kudũi ijĩ. Bii ǹ cɔɔ an ye gigii akabuu hai nɛ kɔɔ iyi í wa si aninii amu Ilaaɔ̃ do mii ilu hunde iyi í wa ilɛ fei. 17Nɔ Ilaaɔ̃ í sɔ̃ Nowee í ni, sɛɛdai akabuum nɔu mbɛ iyi ǹ dĩ do ilu hunde iyi í wa ilɛ fei.
Nowee do amaɛ ŋa
18Amai Nowee ŋa iyi à fita hai si inɔi akɔi inyiu wee. Sɛmu do Kamu do Zafɛti. Kamui í jɛ baai Kanaã. 19Nɔ hai bi ama mɛɛtaɛ ŋau bɛi inɛ ŋa à na à fangaa si andunya fei.
20Ŋɔi Nowee í sinti ku logoo nɔ í lɔ ama jĩi ŋa iyi à ya kpe rezɛ̃ɛ. 21Ŋɔi í mɔ atɛ̃i jĩi nɔu hee wa kpaa nɔ í koo wa sũ basĩ inɔ ilei acɔɛ. 22Ŋɔi Kamu, baai Kanaã, í yɛ basĩi baaɛ ŋɔi í bɔ waduude í koo í sɔ̃ igbãɛ ŋa. 23Ŋɔi Sɛmu do Zafɛti à so kumboo à lesi kɔngɔ nŋa à waa nɛ do anyi anyi à koo à biiò basĩi baa nŋa. Amma a kù yɔɔ domi à sinda waju nŋa. 24Si waati iyi atɛ̃u í fo si Nowee ŋɔi í gbɔ mii iyi kɔdaaɛ í ceaa. 25Ŋɔi í ni,
Ikpei á jɛ tɛɛ, awɔ Kanaã.
Aa jɛ arui inɛ ŋa
iyi à jɛ arui igbãɛ ŋa.
26Ŋɔi í ni má,
ka saabu Aɔ̃ Lafɛ̃ɛ, Lafɛ̃ɛi Sɛmu,
nŋu mɔ ku weea Sɛmu
nɔ Kanaã ku jɛ aruɛ.
27Aɔ̃ ku kɔ̃ɔsi kubai Zafɛti
nɔ ku jɔ̀ nŋu do Sɛmu a wa inya akã,
nɔ Kanaã ku jɛ aru nŋa.
28Si anyii inyi nlau Nowee í ce adɔ̃ cĩɔ mɛɛta do ciitaa (350). 29Adɔ̃i Nowee fei í cei cĩɔ mɛɛsã do ciitaa (950) í bɛi í ku.
Šiuo metu pasirinkta:
Kusintii Andunya 9: MKL
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
2021, SIM International et UEEB