Kusintii Andunya 18
18
Ilaaɔ̃ í ni Sara á na ku bí ama
1Ajɔ nŋu gɔ Aɔ̃ Lafɛ̃ɛ í faata wa si Aburahamu bii wa buba si inɔ agboi Maree andɛ koofai ilei acɔɛ zakai dasã. 2Yaase bɛi í faataò wa bi tɛɛ wee. Aburahamu í wu iju í cɔ ilu nɔ í yɛ inɛmɔkɔ mɛɛta gɔ ŋa à waa leekĩ si wajui nŋu. Iyi í yɛ ŋa bɛɛbɛ ŋɔi í sɛi í bɔ bi tu ŋa. Í koo í sɛɛbata si waju nŋa. 3Nɔ í sɔ̃ inɛ akã nŋa í ni, Lafɛ̃ɛ, ǹ wa n tɔɔ ŋɛi i naa i hoe bi tom ihɛ̃ ŋa. 4I jɔ̀ a naaò inyi wa ku ba i wiɛ kutɛ nŋɛ ŋa, nɔ i sĩmi jĩjĩi jĩi nɔu ihɛ̃ ŋa. 5An koo n naaò ijɛ wa i jɛ i ba gbugbã ŋa, i bɛi i dasi kpãa i nɛ nŋɛ ŋa. Si bɛɛbɛ, kunaa nŋɛ wa bi amu woo ce icɛ nŋɛ kaa jɛ ngbɛ.
Nɔ à sɔ̃ɔ à ni, to, koo ce bɛi ì fɔ.
6Nɔ Aburahamu í sinda do saasa í bɔ bi aboɛ inɔ ilei acɔɛu í ni, so araɛ ńya ńya, koo wã iyafũ gũa mɛɛta í fɔ́ɔ í sɔ̃ kaaɛ. 7Ŋɔi Aburahamu í sɛi í bɔ si inɔi kɛtɛɛ ŋa nɔ í mu ama kɛtɛ jiida akã í koo í na woo ce icɛɛ gɔ í ni ku kpaa ku soo wa ńya ńya. 8Ŋɔi í so ikpoi amɔ do amɔ do iŋa iyi à seu, í koo í jilɔɔ si wajui inɛ ŋau. Nɔ nŋu takaɛ í koo í leekĩ ikpa akã si jĩjĩi jĩi nɔu waati iyi inɛ ŋau à waa jɛ. 9Ŋɔi à beeɛ à ni, iwoi Sara aboɛ í wa.
Nɔ í ni, í wa ile.
10Ŋɔi Aɔ̃ Lafɛ̃ɛ í ni, kù nɛ sika kãma, an nyi wa bi tɛɛ ihɛ̃ adɔ̃ gɔ suku bɛi. Waati bɛɛbɛ aboɛ Sara á nɛ ama inɛmɔkɔ.
Wee Sara takaɛ í wa ikpa andɛi ile iyi í wa anyii inɛ njoo ŋau, í leekĩ wa gbɔ bɛi à waa fɔ. 11Aburahamu do Sara wee aŋa fei à gbo ntɔ ntɔ, nɔ Sara kù waa fɔ jaaɛ má. 12Waati iyi í gbɔ ideu, ŋɔi wa nyaanyi si idɔɛ í ni, zaka bii ǹ gbo n tou ihɛ̃, nɔ mɔkɔm takaɛ í gbo, iwoi an nɛ inɔ didɔ̃i sɛ̃ɛ ku tɔtɔɔ má.
13Ŋɔi Aɔ̃ Lafɛ̃ɛ í bee Aburahamu í ni, na mii í ce Sara í nyaanyi í ni, amu iyi ǹ gbo tã, an bí mbɛ ntɔ? 14Ntɔ ntɔ ǹ wa n sɔ̃ɛi, nkãma kù wɛɛ iyi í gaabum. Adɔ̃ gɔ suku bɛi, an nyi wa ihɛ̃ n naa n ba Sara í nɛ ama inɛmɔkɔ.
15Iyi Sara í gbɔ ideu nɔ í jã í ni, n kù nyaanyi. Í ni bɛɛbɛi si na iyi í jɔ̀ njo í muu. Amma Aɔ̃ Lafɛ̃ɛ í ni, iboi. Ì nyaanyi.
Aburahamu í tɔɔ Aɔ̃ Lafɛ̃ɛ suuru na irii inɛi Sodomu ŋa
16Si anyiɛ inɛ ŋau à dede à waa nɛ. À kã iri ikpa ilui Sodomu. Nɔ Aburahamu í bɔ ku leekĩ nŋa. 17Ŋɔi Aɔ̃ Lafɛ̃ɛ í ni, n kaa n singaa Aburahamu mii iyi an ce, 18si na iyi í jɔ̀ dimiɛ á na ku la nɔ ku nɛ gbugbã. Hai bi tɛɛi dimi fei á baò kuwee si andunya. 19An sɔ̃ɔi domi nŋui ǹ nya ku ba ku sɔ̃ amaɛ ŋa do tɔkuɛ ŋa a too kpãam, a maa nɛ dee dee nɔ a maa ce jiidaɛ. Bɛɛbɛi an kɔ̃ò kuwã iyi ǹ ceaau.
20Ŋɔi Aɔ̃ Lafɛ̃ɛ í sɔ̃ Aburahamu í ni, ǹ yɛ taalei inɛi Sodomu ŋa do inɛi Gomɔɔ ŋa jiida jiida domi dulum du ŋa í caa. 21Na ŋɔi í ce an kita n cɔ bɛi à waa ce ntɔ ntɔ si bɛi ǹ gbɔ laabaau nŋau. Bii kù jɛ bɛɛbɛi nɔ n mà.
22Inɛ minji ŋau à dasi kpãa nŋa à nɛ ikpa Sodomu. Amma Aburahamu wa leekĩ bɛ titã si wajui Aɔ̃ Lafɛ̃ɛ. 23Ŋɔi Aburahamu í sɛkɛɛ siɛ í ni, aa kpa inɛ jiida ŋa do inɛ laalɔ ŋau ajɔi? 24Waatɔ bii í jɛ amanɛ jiida ŋa à wa si iluu bɛi zakai aŋa ciitaa, aa kpa ŋa mái? I kaa cea inɛi ilu ŋau suuru na irii amanɛ ciitaa ŋau? 25Kù sĩa i kpa inɛ jiida ŋa do inɛ laalɔ ŋa fei ajɔ, aŋa fei a ba riba dimi akã. Aawo. Kù sĩa i ce bɛɛbɛ. Awɔ iyi ì waa kiiti inɛi ilɛu ihɛ̃ fei, kù sĩa i ce iyi í jɛ dee dee?
26Ŋɔi Aɔ̃ Lafɛ̃ɛ í ni, bii ǹ yɛ inɛ jiida ŋa si ilui Sodomu takaɛ zakai aŋa ciitaa, an cea inɛi ilu ŋau fei suuru na iri nŋa.
27Ŋɔi Aburahamu í so ide má í ni, amu de ǹ yɔkɔ ǹ ba Lafɛ̃ɛm ide ku fɔ, amu iyi n kù jɛ ngɔgɔ, ǹ yɛ bɛi ilùlù do ilúlu. 28Á yɔkɔ ku jɛ si amanɛ ciitaa ŋa iyi à jɛ dee deeu, miiu kù wa si. Na amanɛ miiu iyi í gaiziau, aa kpa inɛi ilu ŋau fei?
Ŋɔi Aɔ̃ Lafɛ̃ɛ í ni, bii ǹ ba amanɛ jiida ciiji do miiu n kaa n kpa iluu má.
29Ŋɔi Aburahamu í sɔ̃ɔ má í ni, bii i kù laakai amanɛ jiida ciijii à wa si iluu bɛ. Bii bɛɛbɛi, bɛirei aa ce.
Nɔ Aɔ̃ Lafɛ̃ɛ í ni, an jɔ̀ ŋa mɛɛ na irii amanɛ ciiji ŋau.
30Ŋɔi Aburahamu í ni, maà gbɛɛjim, an fɔ ide má. Bii amanɛ kuntaa mɔ ni.
Nɔ Aɔ̃ Lafɛ̃ɛ í ni, bii ǹ ba amanɛ kuntaa bɛ n kaa n kpa ŋa má.
31Nɔ Aburahamu í ni, amu de ǹ yɔkɔ ǹ wa n ba Lafɛ̃ɛm ide ku fɔ. Bii amanɛ kɔnfiai í wa bɛ mɔ ni.
Nɔ Aɔ̃ Lafɛ̃ɛ í ni, bii ǹ yɛ amanɛ kɔnfia n kaa n kpa ŋa má.
32Ŋɔi Aburahamu í ni má, maà gbɛɛjim, gbakã akãu ihɛ̃i an fɔ ide bɛi. Bii amanɛ mɛɛwai í wa bɛ ni.
Nɔ Aɔ̃ Lafɛ̃ɛ í ni, bii ǹ yɛ amanɛ mɛɛwa n kaa n kpa ŋa má. 33Iyi Aɔ̃ Lafɛ̃ɛ í ba Aburahamu ide ku fɔ í tã, ŋɔi í nɛɛ. Aburahamu mɔ í sinda í bɔ kpasɛ̃ɛ.
Šiuo metu pasirinkta:
Kusintii Andunya 18: MKL
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
2021, SIM International et UEEB