ယင်းအတွက်န အကျွန် ကိုယ့်ကိုကိုယ် ကိုယ်တော်အနားတို့ လာဖို့ ထိုက်တန်ရေ ဟို့လည်း မမှတ်ပါ။ ကိုယ်တော် သက်သက် နှုတ်တော်န ပြောရေဆိုကေ အကျွန့်မာ ကျွန် ကောင်းပါလိမည်။ ကိုယ်တော်၏ တန်ခိုးအာဏာ အကြောင်းကို အကျွန် သိပါရေ၊ အကြောင်းကား အကျွန်လည်း အခြားတစ်ယောက် စကားကို လိုက်နာရပါရေ အရာ စစ်သားရို့လည်း အကျွန့်စကားကို လိုက်နာရပါရေ။ အကျွန် တစ်ယောက်ကို ‘လားခီ’ ဟို့ ပြောရေဆိုကေ သူစာ လားခပါရေ၊ အခြားတစ်ယောက်ကို ‘လာလတ်’ ဟို့ ပြောရေဆိုကေ သူစာ လာပါရေ၊ အရာ အကျွန့်မာ ကျွန်ကို ‘ဒေသျှင့် လုပ်’ ဟို့ ပြောရေဆိုကေ သူစာ လုပ်ပါရေ။” သူ့စကားကို ကြားရို့ ယေရှုစာ အံ့ဩလီရေ အရာ သူစာ ကိုယ့်နောက်က လိုက်လာကတ်စာ လူပရိတ်သတ်ရို့ဖက်တို့ လှည့်ကြည့်ရို့ ပြောလီရေ၊ “ငါ ကိုယ်ဘင်ရို့ကို ပြောရေ၊ ဣသရေလလူမျိုးအထဲမာလည်း ဒေလှောက် ကြီးကျယ်စာ ကျုံခြင်းတရားကို ငါ တစ်ခါလည်း မမြင်ဖူးသိ။”