Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so á zéŋ ndé ŋ́gɛ: «O nɔŋ ŋghʉ̄ɛ ajū mīi, lepé Ndém é si nzɛ́ttɛ, o epá á wú á leghʉ á mvhɔ alāʼ, ŋ́gɛ mɛ́ ejʉ́ɔ. O ghʉɛ épúp, mbɔ Mɔʼɔ́ wu yīi a á athʉ́ lephū, a te piŋ etáŋ á wú ú. Ńdɔkɔ ŋ́gɛ, o nɔŋ ŋgɔ̄ á ŋgyá azō á mbū te kuʼ ánɛ azō, tɛ pfēeŋ ndʉʼ, tɛ alāʼ á zhɛ́. Megaŋ ŋkɔŋ menēk, é zeéŋ ŋghʉ azɔ́p áa épúp, á meŋgyā aswiŋte, mbɔɔ á methū mɛnzhɛ, éfāʼa ŋ́gɛ, epuɔ menɔŋ e ewūʼte á wɔ́p. Meŋ ké eshúŋɔ á wɛ́ á kwaʼ anuúnē, pɔ́ ndáʼ ŋgwɛ̄ ntaŋá wɔ́p. Ŋ́gɔ́ mé wu, mbɔ o nɔŋ ŋgɔ̄ á ŋgyá azō á mbū te kuʼ ánɛ azō, ndɛ́ʼ o eghʉ̄ʉ tɛ mbɔɔ esoó ntē wu, á zhɛ́ ajū mīi o ó si ŋghʉ̄ɛ. A etsīa épúp, ajū mīi o yáa á mbū te kuʼ ánɛ azō, a ezhō á ntsem. Páʼ Mɔʼɔ́ wu a jʉɔ́ ajū mīi á ntsem lā, a epiŋ ŋgyá ntaŋá wú.


«Ŋiŋ a nɔŋ ŋgɔ̄ á eswíŋte Ndém, ndɛ́ʼ á ghʉ páʼ megaŋ ŋkɔŋ menēk lā. Pɔ́ kɔɔ̄ŋ á wɔ́p á lege eswíŋte á Ndém, ńtshíte á ajʉʼ, á ŋgyā aswiŋte, mbɔɔ á methū mɛnzhɛ, ŋ́gɛ epuɔ e ejʉ́ɔ á wɔ́p. Meŋ ké eshúŋɔ á wɛ́ á kwaʼ anuúnē, pɔ́ ndáʼ ŋgwɛ̄ ntaŋá wɔ́p. Ŋ́gɔ́ mé wu, mbɔ o nɔŋ ŋgɔ̄ á eswíŋte Ndém, o ezíʼ ŋkó á tɛ á ntē ŋgyā wu, ŋ́kɛ̄ nchu ŋgyā, éswíŋte á Mɔʼɔ́ wu, a á éwú, ájʉʼ ntsem ega mɛ́t. Páʼ a jʉɔ́ ajū mīi o ghʉɛ á ntē ntsem lā, a epiŋ ŋgyá ntaŋá wú. O nɔŋ eswíŋtɛ á Ndém, ndɛ́ʼ o etswāŋ ashuŋne páʼ wɔ te zhɛ́‑Ndém lā. Pɔ́ kwaāŋ ŋ́gɛ, pɔ́ gɔ eshúŋne tɛ sāak, tɛ́ Ndém á ghʉ páʼ pɔ́ é si nzɛ́ttɛ. Púp, ndɛ́ʼ pɛ efʉ̄ʼne á wɔ́p. O zi ŋgē elɔ́ á Mɔʼɔ́ wu ajū mīi, á mbū wu ŋkíŋɛ páʼā, á zi nté njhʉ̄ nnɔŋ nzhɛ́ɛ. Á gɔ́ áa lɛ, pɛ nɔŋ eswíŋtɛ á Ndém, pɛ elé ŋ́gɛ:
“Mɔʼɔ́ wek yīi, a á lephū.
Lɛ ŋghʉ̄, epuɔ menɔŋ metsem e ezhɛ́ á légɛ, wu mé ndaʼ Ndém.
Lɛ eshʉ̄ʼ ŋgɔ́ á efɔ, ésáʼ epuɔ á ndo esī atsetsáʼ.
Lɛ ŋghʉ̄ ŋiŋ ntsem, a eghʉ̄ ajū mīi, o ó si ŋkɔ̄ŋɔ,
á ndo esī atsetsáʼ, páʼ mɛ́ athʉ́ lephū, ŋ́ghʉ̄ épúp.
Lɛ ŋgyá á wék,
etsō lejhʉ̄ tsīi, e kuʼ á mbū pek ánɛ ayáʼa.
Lɛ ndēkne mefa mék,
ńdeŋ ndeŋ páʼ pek é si ndēknɛ azék,
émi epuɔ pīi,
pɔ́ é fa á mbū pek.
Te cʉ́ʼ, pek gwhʉ̄ʉ ánɛ táté,
paʼne á wék paʼne, ánɛ mɛnzhɛ Sɛ́ta.
[A egɔ́ épúp melaʼ mīi, wu mé efɔ, mete ntsem
é gɔ́ á mbū wu.
Mɛ́ zéŋ nnɔ̄ŋ ŋgūʼtɛ áa ndaʼ wu, á meŋguʼ meŋguʼ. Á épúp.]”
«Ŋiŋ a faa á mbū wu, o lēkne mefa mɛ́t, mbɔ Mɔʼɔ́ wu yīi, a á athʉ́ lephū, a a zéŋ elekne mefa mú azí. O piŋɛ te lēkne mefa ŋiŋ ɛ́, mbɔ Mɔʼɔ́ wu mɛ́t, á gɔ le lēkne mefa mú azí í.

«A gɔ́ éyi ŋiŋ a a kɔŋ enáŋ nzi melaʼ Ndém, ndɛ́ʼ á ge enáŋ, ŋ́gwhīte eshhʉ̄ yí, páʼ megaŋ ŋkɔŋ menēk é ghʉʉ̄ épúp. Pɔ́ lɔɔ̄k nchʉ́ mbōk eshhʉ̄ wɔ́p, ńdɔkɔ ntswīi á mbū epuɔ á légɛ, pɔ́ é si nnáŋa nzi melaʼ Ndém. Meŋ eké eshúŋɔ á wɛ́ á kwaʼ anuúnē, pɔ́ é ndáʼ ŋgwɛ̄ ntaŋá wɔ́p. Ŋ́gɔ́ mé wu, o nɔŋ ŋgɔ̄ á nnáŋ nzi melaʼ Ndém, o esōok athū jú tɛ á pɔŋ, ńdɔ̄k mevɛ̄t mbɔŋ ntswɛ́t eshhʉ̄ wú. Ńdɔk mbɔ́k á wú á letswi á mbū epuɔ ŋ́gɛ, o ó si nnáŋa nzi melaʼ Ndém. Ndaʼ Mɔʼɔ́ wu yíléyī, ŋ́gɔ́ á lezēŋ wu á ntē ntsem, mé ezhɛ́. Páʼ Mɔʼɔ́ wu a jʉɔ́ ajū mīi, o ó si ŋghʉ̄ɛ á ntsem lā, a epiŋ ŋgyá ntaŋá wú.


«Ndɛ́ʼ ŋiŋ á táŋa lewūʼ tsí á ndo esī atsetsáʼ. Ájʉʼ zīi ayíŋ, mbɔɔ avlɛká á gɔ ejhʉ́. Ájʉʼ zīi metsɔ́ŋ é gɔ ezōoʼ ŋgyā, ńjʉ̄. Pɛ etáŋa lewūʼ tsɛ́ á athʉ́ lephū. Ájʉʼ zīi ayíŋ, mbɔɔ avlɛká á gɔ le jhʉ́. Ájʉʼ zīi metsɔ́ŋ é gɔ le zōʼ ŋgyā, ńjʉ̄ ʉ́. Pɛ ezhɛ́ á légɛ, ajʉʼ zīi o feéŋ lewūʼ cú éwú, ntē wú é tshií áa ajʉʼ mɛ́t.


«Menēk ŋiŋ é si ŋgɔ́ páʼ ŋkaʼ yīi, é mbe nnɛ̄t yí lā. Menēk mú é nɔŋ ndánɛ, mbɔ o o lɔk ejʉ́ɔ ejʉʼ tsem, á mbɔŋɔ́. Menēk mú é piŋɛ nnɔ̄ŋ eséŋɛ, mbɔ o o gɔ́ efʉʼ metsem, égɔ́ á ntē nzém. Menēk mú é náŋa tɛ eséŋ, mbɔ o o pú ecʉ́ʼɛ egɔ́ɔ áa ntē nzém.


«Taʼ ŋiŋ a gɔ le fāʼ, á mbū memɔʼɔ́ afaʼ mémpīa á taʼ legʉɔ ɔ́. A ghʉɛ épúp, mbɔ a a shʉʼ epa mmɔʼ, épiŋ ekɔŋ mmɔʼ. Ŋ́gɔ́ te épúp ɔ́, á júʼ nchu mmɔʼ, ḿbiŋ ŋgwák eyi mmɔʼ. Ŋiŋ a gɔ le júʼ á mbū Ndém, ḿbiŋ nzéŋ njúʼ á mbū ŋkāp á.
«Meŋ ndɔkɔ eshúŋɔ á wɛ́ ŋ́gɛ: ndɛ́ʼ pɛ ezéŋ ndā nnɛ̄t ŋ́gɛ, pɛ e pfɛ́t akɔ̄, [énú akɔ̄], tɛ́ elɔk egɔ́ éwú lɛ́. Ŋ́gɛ pɛ e lɔk menzhó egɔ́, tɛ́ emaʼ ánɛ pɛ lɛ́. Ŋiŋ á legɔ̄ éwú mé ŋkwɛ, ńtsyā etsō lejhʉ̄. Mbe nnɛ̄t ŋiŋ é piŋ ntshí mvhɔ, ánɛ nzhó zīi a gɔ emāaʼ. Pɛ epɛ́ efʉʼ ánɛ meséŋ. Pɔ́ té ŋgɔ̄ŋ jʉ́ʼ, ḿbiŋ te etsō faʼ. Pɔ́ té táŋa etsō á ntē ŋkiŋ ɛ́. Mɔʼɔ́ wɛ yīi a á athʉ́ lephū mé zeék á wɔ́p. Nzwiŋ wɛ́ é té tē á mbū Ndém, ńtɔ́k eyi meséŋ puɔ mɛ́t ɛ́ lɛ̄? Pɛ laa nnɛ̄t ánɛ etsō ŋgɔŋ cʉɔ páʼā, ŋ́gɔ́ yīi, ŋiŋ a gɔ le lɔ̄k épúp, ŋ́kūʼ á yí á letswiʼne tsɔ méŋ leleŋ njhʉ̄, ánɛ lenāŋ yi á esī atsetsáʼ á.
«Pɛ laa nnɛ̄t ŋ́gɛ, pɛ e lɔk menzhó egɔ́ lɛ́, melaʼ akɔ̄? Pɛ ecʉ̄te páʼ mvēŋ e é ŋkāʼ, ńtswhí tɛ esā, ḿbɔ̄ŋ épúp. E te amɔ̄ʼ afaʼ ghʉ̄ʉ, ḿbiŋ te mmɔʼ nzhó páʼ. Táʼ, meŋ shúŋɔ á wɛ́ ŋ́gɛ, mbɔɔ Efɔ Salomɔŋ a lɛ ŋgaŋ lewūʼ ezi ntií, ḿbiŋ ndáʼ te māʼ nzhó é pɔŋ, páʼ mmɔʼ mvēŋ mɛ́t ɛ́. Pɛ é páʼā, ńnɔŋ te nnéŋɛ ntē ánɛ Ndém ɛ́. Ndém a tswiīŋ mvēŋ zīi e tswhií ayáʼa, njhʉ̄ é lá, mɛ́ tsɔ́ʼ ntɔ̄ péʼe, tɛ ŋgʉɔ shɔ́ʼɔ́ ánɛ pɛ ɛ̄? Á gɔ́ áa lɛ, ndɛ́ʼ pɛ egɔ́ efʉʼ metsem, ńdā nnɛ̄t ŋ́gɛ, pɛ e pfɛ́t akɔ̄ lɛ́? Ŋ́gɛ pɛ e nú akɔ̄ lɛ́. Ŋ́gɛ pɛ e maʼ akɔ̄, á mbe nnɛ̄t pɛ lɛ́? Wɔ te zhɛ́‑Ndém mé laā nnɛ̄t efʉʼ metsem, ánɛ ntií ecū muɔ mɛ́t ntsem. Mɔʼɔ́ wɛ yīi a á athʉ́ lephū, a á si nzhɛ́ɛ á mbɔŋɔ́, ŋ́gɛ pɛ gɔ ewɛ̄ɛ ecū muɔ mɛ́t ntsem, ńdɔk ŋgɔ́ éwú. Pɛ ezī mvhɔ, ńnéŋ ntē wɛ́ ánɛ Lefɔ Ndém, ŋ́ghʉ̄ ajū mīi Ndém a á si ŋkɔ̄ŋɔ ŋ́gɛ mɛ́ eghʉ̄, a epiŋ nnáŋa ŋgyáa ecʉɔ etsō mɛ́t ntsem, á mbū pɛ. Ndɛ́ʼ pɛ elāa nnɛ̄t ŋ́gɛ, ezɔ́ e e shʉʼ egɔ́ lɛ akɔ̄ lɛ́. Ezɔ́ e e shʉʼ eshʉʼe, mé emí menu. Eziɛ́ ŋgʉɔ̄ʼ lɛ́, e kuūʼ ánɛ azí aleʼé. »

Klausytis Matío 6