Matío 6
6
Yɛɛ́so a á ega nzíʼnɛ epuɔ anu, ánɛ leyā azō á mbū mbūŋ
1Yɛɛ́so á zéŋ ndé ŋ́gɛ: «O nɔŋ ŋghʉ̄ɛ ajū mīi, lepé Ndém é si nzɛ́ttɛ, o epá á wú á leghʉ á mvhɔ alāʼ, ŋ́gɛ mɛ́ ejʉ́ɔ. O ghʉɛ épúp, mbɔ Mɔʼɔ́ wu yīi a á athʉ́ lephū, a te piŋ etáŋ á wú ú. 2Ńdɔkɔ ŋ́gɛ, o nɔŋ ŋgɔ̄ á ŋgyá azō á mbū te kuʼ ánɛ azō, tɛ pfēeŋ ndʉʼ, tɛ alāʼ á zhɛ́. Megaŋ ŋkɔŋ menēk, é zeéŋ ŋghʉ azɔ́p áa épúp, á meŋgyā aswiŋte, mbɔɔ á methū mɛnzhɛ, éfāʼa ŋ́gɛ, epuɔ menɔŋ e ewūʼte á wɔ́p. Meŋ ké eshúŋɔ á wɛ́ á kwaʼ anuúnē, pɔ́ ndáʼ ŋgwɛ̄ ntaŋá wɔ́p. 3Ŋ́gɔ́ mé wu, mbɔ o nɔŋ ŋgɔ̄ á ŋgyá azō á mbū te kuʼ ánɛ azō, ndɛ́ʼ o eghʉ̄ʉ tɛ mbɔɔ esoó ntē wu, á zhɛ́ ajū mīi o ó si ŋghʉ̄ɛ. 4A etsīa épúp, ajū mīi o yáa á mbū te kuʼ ánɛ azō, a ezhō á ntsem. Páʼ Mɔʼɔ́ wu a jʉɔ́ ajū mīi á ntsem lā, a epiŋ ŋgyá ntaŋá wú.
Yɛɛ́so a á ega nzíʼnɛ epuɔ ntií á lelɔk eswíŋte á Ndém
(Lúk 11.2-4)
5«Ŋiŋ a nɔŋ ŋgɔ̄ á eswíŋte Ndém, ndɛ́ʼ á ghʉ páʼ megaŋ ŋkɔŋ menēk lā. Pɔ́ kɔɔ̄ŋ á wɔ́p á lege eswíŋte á Ndém, ńtshíte á ajʉʼ, á ŋgyā aswiŋte, mbɔɔ á methū mɛnzhɛ, ŋ́gɛ epuɔ e ejʉ́ɔ á wɔ́p. Meŋ ké eshúŋɔ á wɛ́ á kwaʼ anuúnē, pɔ́ ndáʼ ŋgwɛ̄ ntaŋá wɔ́p. 6Ŋ́gɔ́ mé wu, mbɔ o nɔŋ ŋgɔ̄ á eswíŋte Ndém, o ezíʼ ŋkó á tɛ á ntē ŋgyā wu, ŋ́kɛ̄ nchu ŋgyā, éswíŋte á Mɔʼɔ́ wu, a á éwú, ájʉʼ ntsem ega mɛ́t. Páʼ a jʉɔ́ ajū mīi o ghʉɛ á ntē ntsem lā, a epiŋ ŋgyá ntaŋá wú. 7O nɔŋ eswíŋtɛ á Ndém, ndɛ́ʼ o etswāŋ ashuŋne páʼ wɔ te zhɛ́‑Ndém lā. Pɔ́ kwaāŋ ŋ́gɛ, pɔ́ gɔ eshúŋne tɛ sāak, tɛ́ Ndém á ghʉ páʼ pɔ́ é si nzɛ́ttɛ. 8Púp, ndɛ́ʼ pɛ efʉ̄ʼne á wɔ́p. O zi ŋgē elɔ́ á Mɔʼɔ́ wu ajū mīi, á mbū wu ŋkíŋɛ páʼā, á zi nté njhʉ̄ nnɔŋ nzhɛ́ɛ. 9Á gɔ́ áa lɛ, pɛ nɔŋ eswíŋtɛ á Ndém, pɛ elé ŋ́gɛ:
“Mɔʼɔ́ wek yīi, a á lephū.
Lɛ ŋghʉ̄, epuɔ menɔŋ metsem e ezhɛ́ á légɛ, wu mé ndaʼ Ndém.
10Lɛ eshʉ̄ʼ ŋgɔ́ á efɔ, ésáʼ epuɔ á ndo esī atsetsáʼ.
Lɛ ŋghʉ̄ ŋiŋ ntsem, a eghʉ̄ ajū mīi, o ó si ŋkɔ̄ŋɔ,
á ndo esī atsetsáʼ, páʼ mɛ́ athʉ́ lephū, ŋ́ghʉ̄ épúp.
11Lɛ ŋgyá á wék,
etsō lejhʉ̄ tsīi, e kuʼ á mbū pek ánɛ ayáʼa.
12Lɛ ndēkne mefa mék,
ńdeŋ ndeŋ páʼ pek é si ndēknɛ azék,
émi epuɔ pīi,
pɔ́ é fa á mbū pek.
13Te cʉ́ʼ, pek gwhʉ̄ʉ ánɛ táté,
paʼne á wék paʼne, ánɛ mɛnzhɛ Sɛ́ta.
[A egɔ́ épúp melaʼ mīi, wu mé efɔ, mete ntsem
é gɔ́ á mbū wu.
Mɛ́ zéŋ nnɔ̄ŋ ŋgūʼtɛ áa ndaʼ wu, á meŋguʼ meŋguʼ. Á épúp#6.13 Emɔ̄ʼ meŋwaʼne é té menu muɔ mīi é ntē [..] mɛ́t wɛ..]”
14«Ŋiŋ a faa á mbū wu, o lēkne mefa mɛ́t, mbɔ Mɔʼɔ́ wu yīi, a á athʉ́ lephū, a a zéŋ elekne mefa mú azí. 15O piŋɛ te lēkne mefa ŋiŋ ɛ́, mbɔ Mɔʼɔ́ wu mɛ́t, á gɔ le lēkne mefa mú azí í.
Yɛɛ́so a á ega eshúŋɔ anu ánɛ lekɔŋ nnáŋ nzi melaʼ Ndém
16«A gɔ́ éyi ŋiŋ a a kɔŋ enáŋ nzi melaʼ Ndém, ndɛ́ʼ á ge enáŋ, ŋ́gwhīte eshhʉ̄ yí, páʼ megaŋ ŋkɔŋ menēk é ghʉʉ̄ épúp. Pɔ́ lɔɔ̄k nchʉ́ mbōk eshhʉ̄ wɔ́p, ńdɔkɔ ntswīi á mbū epuɔ á légɛ, pɔ́ é si nnáŋa nzi melaʼ Ndém. Meŋ eké eshúŋɔ á wɛ́ á kwaʼ anuúnē, pɔ́ é ndáʼ ŋgwɛ̄ ntaŋá wɔ́p. 17Ŋ́gɔ́ mé wu, o nɔŋ ŋgɔ̄ á nnáŋ nzi melaʼ Ndém, o esōok athū jú tɛ á pɔŋ, ńdɔ̄k mevɛ̄t mbɔŋ ntswɛ́t eshhʉ̄ wú. 18Ńdɔk mbɔ́k á wú á letswi á mbū epuɔ ŋ́gɛ, o ó si nnáŋa nzi melaʼ Ndém. Ndaʼ Mɔʼɔ́ wu yíléyī, ŋ́gɔ́ á lezēŋ wu á ntē ntsem, mé ezhɛ́. Páʼ Mɔʼɔ́ wu a jʉɔ́ ajū mīi, o ó si ŋghʉ̄ɛ á ntsem lā, a epiŋ ŋgyá ntaŋá wú.
Yɛɛ́so a á ega eshúŋɔ ajʉʼ zīi ŋiŋ a gɔ eféŋ lewūʼ éwú
(Lúk 12.33-34)
19«Ndɛ́ʼ ŋiŋ á táŋa lewūʼ tsí á ndo esī atsetsáʼ. Ájʉʼ zīi ayíŋ, mbɔɔ avlɛká á gɔ ejhʉ́. Ájʉʼ zīi metsɔ́ŋ é gɔ ezōoʼ ŋgyā, ńjʉ̄. 20Pɛ etáŋa lewūʼ tsɛ́ á athʉ́ lephū. Ájʉʼ zīi ayíŋ, mbɔɔ avlɛká á gɔ le jhʉ́. Ájʉʼ zīi metsɔ́ŋ é gɔ le zōʼ ŋgyā, ńjʉ̄ ʉ́. 21Pɛ ezhɛ́ á légɛ, ajʉʼ zīi o feéŋ lewūʼ cú éwú, ntē wú é tshií áa ajʉʼ mɛ́t.
Yɛɛ́so a á ega ndʉ́ɛ́ ŋ́gɛ lezēk ŋiŋ é si ŋgɔ́ á láam
(Lúk 11.34)
22«Menēk ŋiŋ é si ŋgɔ́ páʼ ŋkaʼ yīi, é mbe nnɛ̄t yí lā. Menēk mú é nɔŋ ndánɛ, mbɔ o o lɔk ejʉ́ɔ ejʉʼ tsem, á mbɔŋɔ́. 23Menēk mú é piŋɛ nnɔ̄ŋ eséŋɛ, mbɔ o o gɔ́ efʉʼ metsem, égɔ́ á ntē nzém. Menēk mú é náŋa tɛ eséŋ, mbɔ o o pú ecʉ́ʼɛ egɔ́ɔ áa ntē nzém.
Yɛɛ́so a á ega ŋ́gɛ, á mbɔŋ á lenēŋ ntē ánɛ Ndém
(Lúk 16.13)
24«Taʼ ŋiŋ a gɔ le fāʼ, á mbū memɔʼɔ́ afaʼ mémpīa á taʼ legʉɔ ɔ́. A ghʉɛ épúp, mbɔ a a shʉʼ epa mmɔʼ, épiŋ ekɔŋ mmɔʼ. Ŋ́gɔ́ te épúp ɔ́, á júʼ nchu mmɔʼ, ḿbiŋ ŋgwák eyi mmɔʼ. Ŋiŋ a gɔ le júʼ á mbū Ndém, ḿbiŋ nzéŋ njúʼ á mbū ŋkāp á.
25«Meŋ ndɔkɔ eshúŋɔ á wɛ́ ŋ́gɛ: ndɛ́ʼ pɛ ezéŋ ndā nnɛ̄t ŋ́gɛ, pɛ e pfɛ́t akɔ̄, [énú akɔ̄], tɛ́ elɔk egɔ́ éwú lɛ́. Ŋ́gɛ pɛ e lɔk menzhó egɔ́, tɛ́ emaʼ ánɛ pɛ lɛ́. Ŋiŋ á legɔ̄ éwú mé ŋkwɛ, ńtsyā etsō lejhʉ̄. Mbe nnɛ̄t ŋiŋ é piŋ ntshí mvhɔ, ánɛ nzhó zīi a gɔ emāaʼ. 26Pɛ epɛ́ efʉʼ ánɛ meséŋ. Pɔ́ té ŋgɔ̄ŋ jʉ́ʼ, ḿbiŋ te etsō faʼ. Pɔ́ té táŋa etsō á ntē ŋkiŋ ɛ́. Mɔʼɔ́ wɛ yīi a á athʉ́ lephū mé zeék á wɔ́p. Nzwiŋ wɛ́ é té tē á mbū Ndém, ńtɔ́k eyi meséŋ puɔ mɛ́t ɛ́ lɛ̄? 27Pɛ laa nnɛ̄t ánɛ etsō ŋgɔŋ cʉɔ páʼā, ŋ́gɔ́ yīi, ŋiŋ a gɔ le lɔ̄k épúp, ŋ́kūʼ á yí á letswiʼne tsɔ méŋ leleŋ njhʉ̄, ánɛ lenāŋ yi á esī atsetsáʼ á.
28«Pɛ laa nnɛ̄t ŋ́gɛ, pɛ e lɔk menzhó egɔ́ lɛ́, melaʼ akɔ̄? Pɛ ecʉ̄te páʼ mvēŋ e é ŋkāʼ, ńtswhí tɛ esā, ḿbɔ̄ŋ épúp. E te amɔ̄ʼ afaʼ ghʉ̄ʉ, ḿbiŋ te mmɔʼ nzhó páʼ. 29Táʼ, meŋ shúŋɔ á wɛ́ ŋ́gɛ, mbɔɔ Efɔ Salomɔŋ a lɛ ŋgaŋ lewūʼ ezi ntií, ḿbiŋ ndáʼ te māʼ nzhó é pɔŋ, páʼ mmɔʼ mvēŋ mɛ́t ɛ́. 30Pɛ é páʼā, ńnɔŋ te nnéŋɛ ntē ánɛ Ndém ɛ́. Ndém a tswiīŋ mvēŋ zīi e tswhií ayáʼa, njhʉ̄ é lá, mɛ́ tsɔ́ʼ ntɔ̄ péʼe, tɛ ŋgʉɔ shɔ́ʼɔ́ ánɛ pɛ ɛ̄? 31Á gɔ́ áa lɛ, ndɛ́ʼ pɛ egɔ́ efʉʼ metsem, ńdā nnɛ̄t ŋ́gɛ, pɛ e pfɛ́t akɔ̄ lɛ́? Ŋ́gɛ pɛ e nú akɔ̄ lɛ́. Ŋ́gɛ pɛ e maʼ akɔ̄, á mbe nnɛ̄t pɛ lɛ́? 32Wɔ te zhɛ́‑Ndém mé laā nnɛ̄t efʉʼ metsem, ánɛ ntií ecū muɔ mɛ́t ntsem. Mɔʼɔ́ wɛ yīi a á athʉ́ lephū, a á si nzhɛ́ɛ á mbɔŋɔ́, ŋ́gɛ pɛ gɔ ewɛ̄ɛ ecū muɔ mɛ́t ntsem, ńdɔk ŋgɔ́ éwú. 33Pɛ ezī mvhɔ, ńnéŋ ntē wɛ́ ánɛ Lefɔ Ndém, ŋ́ghʉ̄ ajū mīi Ndém a á si ŋkɔ̄ŋɔ ŋ́gɛ mɛ́ eghʉ̄, a epiŋ nnáŋa ŋgyáa ecʉɔ etsō mɛ́t ntsem, á mbū pɛ. 34Ndɛ́ʼ pɛ elāa nnɛ̄t ŋ́gɛ, ezɔ́ e e shʉʼ egɔ́ lɛ akɔ̄ lɛ́. Ezɔ́ e e shʉʼ eshʉʼe, mé emí menu. Eziɛ́ ŋgʉɔ̄ʼ lɛ́, e kuūʼ ánɛ azí aleʼé. »
Currently Selected:
Matío 6: ybb
Highlight
Share
Copy
Want to have your highlights saved across all your devices? Sign up or sign in
© CABTAL