MATYOO 4

Satàn a fèèghrɛɛ Yeesus

(Mk. 1:12-13; Lk. 4:1-13)

1Ajɛ̀m ìnɛn nnɛ Ǹghay à kèngɛ̀ rì Yeesus ɓi-reɓ lɛ Satàn a feèghrɛn nyi. 2Yɛ̀ɛ Yeesus à ghagsighà ɓɛ̀ŋwos mɛtin mɛɓɛɛ̀ rì mɛ̀ru mɛ̀tin mɛɓɛɛ̀ wɔɔ kɛ̀ɛ ɗi com, nni zày ì kɔ̀ngà nyi. 3Fɔɔnnɛ ǹfèèghrɛ̀n-ɓum à tyɛ̀ɛ̀tɛ̀ngà nyi jàŋbog, à kpaa nyi lɛ: I ù rì Man à Bɛ̀ll kali gɔ̀g yi, yɛɛ ghay ɓìɗilàg.

4Yeesus à ɓàg nyi lɛ: Ki ri kì kànɛn lɛ: Àa ɓìɗilàg ɓyɔ rì ɓyɔ ɓyɛɛ ri ɓiì kìi lɛ mum a ghɛɓ, lɔŋ jɛ̀ɛ̀ bimiɗ ìnɛ ì kpaŋiì ɓi ŋwɔm wu Bɛ̀ll. 5Nni Satàn a tekà nyi, à kɛ̀n ɗì nyi ɓi bàn ìnɛ ì rì ǹtɛnɛn, à ɓɔgsì nyi ɓi fìran fi naà-Bɛ̀ll aɗyòò, 6à kpaa nyi lɛ: I ù rì Man à Bɛ̀ll lɛla ɓi zi, lɛ ki ri kì kànɛn lɛ: Bɛ̀ll à ɓiì kpaà ɓum ɓii ɓɛ titom lɛ, ɓɛɛ yu wɔ̀ kì lɛ̀ŋlɛŋi ɓi ɓyàg ɓyaa, lɛ kɔ̀ɔ tuusi ikòò ɓi gɔ̀g.

7Yeesus à kpaa nyi lɛ: Ki ri girig kì kànɛn lɛ:

Kɔ̀ɔ fèèghrɛn Kan Bɛ̀ll wɔ̀ɔ̀.

8Fɔɔnnɛ Satàn a tɛ̀gtìghà Yeesus lɛ leg à kɛ̀n ɗì nyi ɓi coo dòn aɗyoo à rèsi nyi ɓìlɔ̀ŋ ɓi ɓi ziinɛ ɓìcèm, rì rìkem ɗi ɓi ɓìlɔ̀ŋ ɓiǹ. 9À ki kpaa nyi lɛ: Ǹɗì wɔ̀ ɓiì faà ɓyom ɓi ɓìcèm di ù ɓaagh mɛ̀ mɛ̀ɗu asu, ù ɓɔgsì mɛ̀. 10Nni Yeesus à ɓàkà nyi lɛ: Satàn, pɛ̀sɛn mɛ̀ ɓi mis! Lɛ ki ri kì kànɛn lɛ:

Ù ghɛ̀ɛ̀sɛɛ kì ɓɔgsii Kan Bɛ̀ll wɔ̀ɔ̀, lɔŋ nyi cɛ̀ncii nnɛ ù kì kìsay. 11Fɔɔnnɛ Satàn à caɗkà min Yeesus. Ɓum ɓɛ titom ɓɛ yu nyi a nyoo, ɓɛ kikì nyi tìtom.

Yeesus à kɛ̀ɛ a Kapɛrinawum; à ɓɔ̀n ɓɛ̀yilàg ɓɛnin wɔɔ

(Mk. 1:14-20; Lk. 4:14—5:11)

12Yɛ̀ɛ Yeesus à wokà lɛ, ɓɛ mɓani Zyaŋ, ɓɛ piìg ɓi naà-zày, nni à kɛ̀ngà a Galile. 13À pɛ̀sɛ̀ngà a Naazarɛt, à kɛ̀n kì kɔ̀rii a Kapɛrinawum ànɛ à rì jàŋbog rì rìɓày à kìkòn, ɓi kìden ki zi ki ɓɔn ɓɛ Zaɓulon ri ɓɛ Nɛftalii. 14A kìghà fɔlɔɔ lɛ, a roòzi rìkpaa ɗi ǹkpaŋzì-ɓìɓan Ezayii à kpaaghà lɛ:

15Ziì Zaɓulon rì ì Nɛftalii, jaŋ yi yi ri ɓi bèn ì rìɓày, nsoò lɛ cɛcɛɗ ki Zyuridɛŋ, Galile à ɓumɓɛ ɓɛ a yin Ɓɛ̀yudɛ̀n! 16Kìlɔ̀ŋ ki ki ɓaghà kìkɔ̀kɔriyɛn ɓi birìm, ki ǹghɛɛ coo kitɛɛtɛ̀n; fɔɔnnɛ kìtɛɛtɛn ki ǹlòmi a ɓɛ̀roɓɛ ɓɛ ǹɗì ɓi kìlɔ̀ŋ ki ɓi birìm ì rìwu ɓi ɗùm.

17Ɓi cààmɛ̀n kiǹ innɛ Yeesus à tumɛ̀ngà rìkpaakpàà ɗi ɓìɓan ɓi Bɛ̀ll, à kakàlì ɓum lɛ: Lɔ̀ɔ̀ghrɛɛna mɛ̀rem, lɛ kìlɔ̀ŋ ki aɗyoo ki ti jàŋbog. 18Yɛ̀ɛ Yeesus à kɛ̀ɛ̀kɛ̀ɛ̀ghà ɓi bèn ì rìɓày ànɛ a Galile nni à ghɛngà rìgeni ɗi lɛ rì Simɔn ànɛ ɓɛ ǹɗegì lɛ Pyɛɛri rì Andire à geni di ɓɛɛ pìpig dam ɓi rìɓày lɛ ɓɛ ɓaghà ɓɛ̀pììgh-dam. 19Nni à kpaaghà ɓɔ lɛ: Nɔ̀ɔ̀tiina mɛ̀, di ǹki lɛ ɓi ɓa ɓɛ̀syoŋì-ɓum. 20Fɔɔnnɛ ɓɛ ghaskà kì naŋì dam yaa, ɓɛ nɔ̀ɔ̀tì nyi. 21Yɛ̀ɛ à kɛ̀ɛ̀dìghà tì beèbɛ̀y, nni à ghɛɛdìghà tì rìgeni ɗìdɛŋ ɓɛ̀sɛ̀ɛ̀ ɓɛɓɛɛ̀rɛn, lɛ rì Zyag rì Zyaŋ ɓɔn ɓɛ Zeɓede. Ɓɛ ɓaghà ɓi kìkɔm rì Zeɓede à seŋi wàà, ɓɛ ki pèeghpegsɛ̀n dam yaa, nni Yeesus à reŋìghà ɓɔ. 22Fɔɔnnɛ ɓɛ ghaskà kì rinii lɛ rì dam yaa, rì seŋi wàà, ɓɛ nɔɔ̀tì nyi.

23Yeesus à rerènìghà ziì Galile bimiɗ di a rèresi ɓum ɓìɓan ɓi Bɛ̀ll ɓi naa yi bɔ̀ŋzɛ̀n, à lààlàmɓɛ̀n Syeesyee à Ɓɔlɛ à kìlɔ̀ŋ ki Bɛ̀ll. À wɔ̀ɔ̀wɔ̀ɔ̀zì tìroɓ rì ɓìlɛm mɛ̀kuu mɛ̀cèm. 24Rìkem ɗii ɗi saaghà jàŋbimiɗ a Sirii, fɔɔnnɛ ɓɛ yuyùghày nyi lɛ, rì ɓum ɓɛ̀cèm ɓɛ ɓɛ roròɓkà tìroɓ mɛ̀kuu mɛ̀kuu rì, ɓɛ ɓɛ wowòkà rìkɛŋ bee lɛ bee, ri ɓɛ̀roɓɛ ɓɛ ɓaghà rì ɓìɓeɓtàg ɓi mɛghay, rì ɓɛ̀roɓì kìtìs, rì ɓìsɛkɛ̀rɛ̀, Yeesus à ki wɔ̀ɔwɔɔ̀zì ɓɔ. 25Ɓìtuu ɓi ɓum ɓi pɛsɛ̀ngày lɛ, rì a Galile, rì a bàn ǹtɛ̀ɗ, rì a Yorisalɛm, rì a Zyude, ri cɛcɛɗ ki Zyuridɛŋ, ɓi nɔɔ̀tì nyi.

Currently Selected:

MATYOO 4: BAFNT

Tya elembo

Copy

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo

Yekola Koleka na Ntina ya Bafia Nouveau Testament

MATYOO 4

Baverset oyo Eyebani Mpenza ewuti na
MATYOO 4

Yoka MATYOO 4

Biblia:

Bafia

Libongoli: Bafia Nouveau Testament - BAFNT

MATYOO 4

MATYOO 4

Baverset oyo Eyebani Mpenza ewuti na MATYOO 4

Yoka MATYOO 4

Biblia:

Bafia

Libongoli: Bafia Nouveau Testament - BAFNT

MATYOO 4

Baverset oyo Eyebani Mpenza ewuti na
MATYOO 4