San Mateo 9
9
Tinavij Jesús cacunꞌ tumé ꞌo̱ síí naꞌvee cache̱e̱ a
1Ga̱a ne̱ cavii Jesús rihoo chéé rihaan na, ne̱ caꞌanj soꞌ chumanꞌ ya̱nj soꞌ, ne̱ catúj soꞌ chumanꞌ yoꞌ a. 2Ne̱ nica̱j nii man ꞌo̱ síí naꞌvee cache̱e̱ táá rihaan yuvéé, ne̱ caꞌnaꞌ nii rihaan Jesús a. Ne̱ queneꞌen Jesús se vaa cuchumán uxrá rá nij yuvii̱ se vaa nahu̱un sa̱ꞌ síí naꞌvee cache̱e̱ yoꞌ quiꞌya̱j Jesús a. Cheꞌé dan cataj soꞌ rihaan síí ranꞌ yoꞌ a:
―Caꞌne̱j nucua̱j nimán so̱ꞌ cheꞌé se navij cacunꞌ xráá so̱ꞌ, na̱nj tinu̱j ―taj Jesús rihaan síí naꞌvee cache̱e̱ yoꞌ a.
3Dan me se ya̱nj do̱j síí naquiꞌyaj cu̱u stucua̱nj Moisés rá veꞌ ga̱ Jesús, ne̱ na̱nj nuchruj ra̱a̱ nij soꞌ a: “Qui̱j vaa nana̱ caꞌmii síí nihánj rihaan Yaꞌanj asânj”, guun nimán nij soꞌ a.
4Ne̱ queneꞌen Jesús da̱j nuchruj ra̱a̱ nij soꞌ, ne̱ cheꞌé dan cataj soꞌ a:
―Me cheꞌé avii ndoꞌo nana̱ chiꞌi̱i̱ nimán soj ga̱. 5Tuꞌva rma̱ꞌán ꞌu̱nj se vaa navij cacunꞌ xráá síí nihánj, rá soj a̱ naꞌ. Caꞌve̱e cata̱j u̱u̱n níꞌ navij cacunꞌ xráá síí nihánj naꞌ. Ase caꞌve̱e doj cata̱j níꞌ na̱xagaa soꞌ, ne̱ cache̱e̱ soꞌ cuaj, cata̱j níꞌ xa̱ꞌ. 6Dan me se me rá ꞌu̱nj xca̱j soj cuentá se vaa ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, no̱ xcúún ꞌu̱nj ti̱navíí ꞌu̱nj cacunꞌ xráá nij yuvii̱ ma̱n rihaan chumii̱ nihánj ado̱nj ―taj Jesús rihaan nij soꞌ a.
Dan me se cataj Jesús rihaan síí naꞌvee cache̱e̱ a:
―Na̱xaga̱a̱ so̱ꞌ, ne̱ nacue̱ so̱ꞌ tuvéé so̱ꞌ, ne̱ na̱nꞌ so̱ꞌ tucuá so̱ꞌ á ―taj Jesús rihaan síí na̱j rihaan yuvéé yoꞌ a.
7Ga̱a ne̱ naxaga̱a̱ soꞌ, ne̱ quinanꞌ soꞌ tucuá soꞌ ado̱nj. 8Ne̱ queneꞌen nij yuvii̱ se vaa nahuun sa̱ꞌ soꞌ, quiꞌyaj Jesús, ne̱ cheꞌé dan caráyaꞌa̱nj nij soꞌ, niꞌya̱j nij soꞌ man Jesús, ne̱ veꞌé uxrá caꞌmii nij soꞌ cheꞌé Yaꞌanj, se vaa guun nucua̱j Jesús racuíj ndoꞌo Jesús da̱nj man yuvii̱, quiꞌyaj Yaꞌanj ado̱nj.
Cataj Jesús rihaan Mateo se vaa canoco̱ꞌ soꞌ man Jesús a
9Ga̱a ne̱ cavii Jesús rej yoꞌ, ne̱ queneꞌen soꞌ man ꞌo̱ síí ya̱nj rihaan mesá rej aꞌnéj nii impuestó man yuvii̱ a. Mateo cuꞌna̱j soꞌ a. Dan me se cataj Jesús rihaan soꞌ a:
―Ca̱nocóꞌ so̱ꞌ manj, caꞌa̱nj níꞌ á ―taj Jesús rihaan soꞌ a.
Ga̱a ne̱ naxuma̱a̱n soꞌ, ne̱ canocoꞌ soꞌ man Jesús, caꞌanj soꞌ a.
Me rá Jesús ra̱cuíj soꞌ man nij síí tumé cacunꞌ a
10Dan me se ꞌo̱ güii cayáán Jesús rá veꞌ, ne̱ caꞌnaꞌ ndoꞌo tuviꞌ soꞌ síí aꞌnéj impuestó do̱ꞌ, ꞌó nij síí tumé ndoꞌo cacunꞌ do̱ꞌ, ne̱ catúj nij soꞌ rá veꞌ, ne̱ caꞌanj ca̱yáán nij soꞌ ga̱ Jesús, ne̱ dan me se ma̱n rcuaꞌa̱a̱n nij síí tucuꞌyón snana̱ Jesús do̱ꞌ, ne̱ chá cunuda̱nj nij soꞌ a. 11Ne̱ queneꞌen nij síí fariseo se vaa chá Jesús ga̱ nij síí aꞌnéj impuestó do̱ꞌ, ga̱ ꞌó nij síí tumé ndoꞌo cacunꞌ do̱ꞌ, ne̱ xnáꞌanj nij soꞌ man nij síí tucuꞌyón snana̱ Jesús, cataj nij soꞌ a:
―Síí tucuꞌyón nana̱ rihaan soj roꞌ, me cheꞌé chá soꞌ ga̱ nij síí aꞌnéj impuestó do̱ꞌ, ga̱ ꞌó nij síí tumé ndoꞌo cacunꞌ do̱ꞌ, rá núj a ―taj nij síí fariseo rihaan nij síí tucuꞌyón snana̱ Jesús a.
12Ne̱ cuno Jesús nana̱ caꞌmii nij soꞌ, ne̱ cataj soꞌ rihaan nij soꞌ a:
―Síí vaa nucua̱j roꞌ, ne nanoꞌ nij soꞌ man doctor naquiꞌyaj conoꞌó man yuvii̱ maꞌ. Ma̱an síí ranꞌ roꞌ, me síí nanoꞌ man doctor ado̱nj. 13ꞌO̱ se vaa cheꞌé caꞌa̱nj soj tu̱cuꞌyón soj me se me raj cata̱a nana̱ nihánj nana̱ no̱ rihaan Danj Yaꞌanj ado̱nj: “Ne uun niha̱ꞌ rá ꞌu̱nj niꞌya̱j ꞌu̱nj yuvii̱ rqué xcuu rihaan ꞌu̱nj maꞌ. Tana̱nj uun niha̱ꞌ rá ꞌu̱nj niꞌya̱j ꞌu̱nj yuvii̱ ꞌe̱e̱ rá man tuviꞌ ado̱nj.” Dan me se xca̱j soj cuentá se vaa ne caꞌna̱ꞌ ꞌu̱nj canacu̱nj ꞌu̱nj man síí sa̱ꞌ maꞌ. Cheꞌé nij síí tumé cacunꞌ caꞌnaj se vaa nuchra̱nꞌ nimán nij soꞌ ne̱ canoco̱ꞌ nij soꞌ snana̱j ado̱nj ―taj Jesús rihaan nij soꞌ a.
Nataꞌ Jesús me cheꞌé ne tocoꞌ nij síí tucuꞌyón snana̱ soꞌ xꞌnaa man maꞌa̱n nij soꞌ a
14Ga̱a ne̱ nij síí tucuꞌyón snana̱ síí cuꞌna̱j Juan Síí Utaꞌ Ne man yuvii̱ cuchiꞌ rihaan Jesús, ne̱ xnáꞌanj nij soꞌ man soꞌ, cataj nij soꞌ a:
―Me cheꞌé, ne̱ tocoꞌ núj xꞌnaa man maꞌa̱n núj cara̱a̱ gue̱e̱ núj rihaan Yaꞌanj, ne̱ tocoꞌ nij síí fariseo xꞌnaa man maꞌa̱n nij soꞌ uún, tza̱j ne̱ nij síí tucuꞌyón snana̱ so̱ꞌ me se ne tocoꞌ nij soꞌ xꞌnaa man maꞌa̱n nij soꞌ ga̱ ―taj nij soꞌ rihaan Jesús a.
15Ga̱a ne̱ cataj Jesús rihaan nij soꞌ a:
―Ase vaa síí cuchruj saꞌanj vaa ꞌu̱nj, ne̱ asa̱ꞌ caꞌve̱e toco̱ꞌ nij síí ma̱n ga̱j xꞌnaa man maꞌa̱n nij soꞌ, rá soj ga̱. Tza̱j ne̱ vaa güii, ne̱ gu̱un yaníj ꞌu̱nj rihaan nij soꞌ quiꞌya̱j yuvii̱, ga̱a ne̱ nano̱ rá nij síí nihánj, ga̱a ne̱ toco̱ꞌ nij soꞌ xꞌnaa man maꞌa̱n nij soꞌ ado̱nj.
Se̱ guun cuno̱ nij síí noco̱ꞌ tucuáán nga̱ snana̱ Jesús maꞌ
16’Tza̱j ne̱ ase vaa yatzíj sinꞌ vaa tucuáán nga̱ noco̱ꞌ soj, ne̱ se̱ guun naꞌne̱j níꞌ mantá naca̱ man yatzíj nga̱ yoꞌ maꞌ. ꞌO̱ se sese quiꞌya̱j níꞌ da̱nj, ne̱ güii quina̱nj yuvii̱ yatzíj yoꞌ, ga̱a ne̱ nagüe̱j mantá naca̱ yoꞌ, ne̱ sese cuxu̱u̱n yuvii̱ man yatzíj yoꞌ, ne̱ quisi̱nꞌ yoꞌ, ga̱a ne̱ cunu̱u xi̱j doj yuꞌuj a̱j ta̱j man yatzíj nga̱ yoꞌ na̱nj ado̱nj. 17Ne̱ ase vaa na vinó naca̱ vaa nana̱ tucuꞌyón ꞌu̱nj, ne̱ se̱ guun cara̱a yuvii̱ na vinó naca̱ rque nuj nga̱ maꞌ. Sese da̱nj quiꞌya̱j yuvii̱, ne̱ cuya̱nj na vinó cunu̱u xe̱e̱ na vinó, ne̱ se̱ cacuá nuj nga̱ maꞌ. Cheꞌé dan canu̱u̱ yoꞌ, ne̱ caya̱nj na vinó rihaan yoꞌóó a. Cheꞌé dan araa nii na vinó naca̱ rque nuj naca̱, ne̱ ꞌo̱ mán sa̱ꞌ na vinó rque nuj yoꞌ na̱nj ado̱nj ―taj Jesús rihaan nij síí tucuꞌyón snana̱ síí cuꞌna̱j Juan yoꞌ a.
Nahuun sa̱ꞌ ꞌo̱ chala̱ cunii do̱ꞌ, ꞌo̱ chana̱ chij do̱ꞌ, quiꞌyaj Jesús a
18Ga̱a caꞌmii Jesús nana̱ yoꞌ rihaan nij síí tucuꞌyón snana̱ síí cuꞌna̱j Juan, ne̱ cuchiꞌ ꞌo̱ síí nica̱j suun rihaan Jesús, ne̱ cayáán ru̱j soꞌ, cachíín niꞌya̱j soꞌ rihaan Jesús, cataj soꞌ a:
―Tiha̱j caviꞌ taꞌníj chala̱ cunii a. Tza̱j ne̱ qui̱ꞌyáá so̱ꞌ se ndoꞌo, caꞌa̱nj níꞌ, ne̱ cuta̱ꞌ so̱ꞌ raꞌá so̱ꞌ xráá noꞌ, ne̱ cunu̱u iꞌna̱ꞌ uún noꞌ na̱nj rugua̱nj ―taj soꞌ, cachíín niꞌya̱j soꞌ rihaan Jesús a.
19Ga̱a ne̱ naxuma̱a̱n Jesús, ne̱ canocoꞌ soꞌ do̱ꞌ, nij síí tucuꞌyón snana̱ soꞌ do̱ꞌ, man síí nica̱j suun yoꞌ a.
20Ga̱a ne̱ ta̱j niꞌyo̱n caꞌnaꞌ ꞌo̱ chana̱ rej xco̱ Jesús, ne̱ quisíj ꞌo̱ chuvi̱j yoꞌ xraꞌ ton man chana̱ yoꞌ, ne̱ canó raꞌa noꞌ do̱j tuꞌva saga̱nꞌ Jesús a. 21ꞌO̱ se guun rá noꞌ a: “Sese cano̱ raꞌaj saga̱nꞌ Jesús, ne̱ nahu̱un sa̱ꞌ ꞌu̱nj na̱nj ado̱nj”, rá noꞌ a. 22Ga̱a ne̱ canica̱j Jesús queneꞌen Jesús man noꞌ, ne̱ cataj soꞌ a:
―Nari̱ꞌ nucuaj nimán so̱ꞌ, nocoj. ꞌO̱ se cheꞌé se amán rá so̱ꞌ niꞌya̱j so̱ꞌ manj roꞌ, cheꞌé dan nahuun sa̱ꞌ so̱ꞌ ado̱nj ―taj Jesús rihaan chana̱ yoꞌ a.
Ne̱ veé ma̱an orá dan nahuun sa̱ꞌ chana̱ yoꞌ ado̱nj.
23Ga̱a ne̱ caꞌanj Jesús veꞌ tucuá síí nica̱j suun yoꞌ, ne̱ catúj soꞌ rá veꞌ, ne̱ queneꞌen soꞌ se vaa ma̱n síí achráá rihuu flauta, ne̱ queneꞌen soꞌ se vaa ma̱n ndoꞌo yuvii̱ rá veꞌ, ne̱ nanó ndoꞌo rá nij yuvii̱ cheꞌé se caviꞌ chala̱ cunii yoꞌ ado̱nj. 24Ga̱a ne̱ cataj soꞌ a:
―Cu̱riha̱nj soj xeꞌ á. ꞌO̱ se ne cavi̱ꞌ chala̱ cunii nihánj maꞌ. Ma̱an se otoj u̱u̱n noꞌ na̱nj á ―taj Jesús rihaan nij yuvii̱ ma̱n rá veꞌ yoꞌ a.
Ga̱a ne̱ caꞌngaꞌ naco̱o̱ nij yuvii̱ niꞌya̱j nij soꞌ man Jesús a.
25Ga̱a quisíj quirii Jesús man cunuda̱nj nij yuvii̱ xeꞌ, ne̱ catúj Jesús rej ta̱j chala̱ cunii yoꞌ, ne̱ taꞌaa soꞌ raꞌa noꞌ, ne̱ cunuu iꞌna̱ꞌ uún chala̱ cunii, ne̱ naxaga̱a̱ noꞌ ado̱nj. 26Ne̱ cuchiꞌ nana̱ rihaan cunuda̱nj nij yuvii̱ ma̱n rej yoꞌ cheꞌé se vaa quiꞌyaj Jesús a.
Naxraꞌ rihaan vi̱j síí tuchri̱i, quiꞌyaj Jesús a
27Dan me se ga̱a cavii Jesús tucuá síí nica̱j suun yoꞌ, ne̱ canocoꞌ vi̱j síí tuchri̱i man soꞌ a. Ne̱ caguáj ro̱j soꞌ, cataj ro̱j soꞌ a:
―Neꞌen rój se vaa Taꞌníí Taꞌnij Siꞌno̱ David síí cayáán ga̱a naá mé so̱ꞌ ado̱nj. Cheꞌé dan cunu̱u ꞌe̱e̱ rá so̱ꞌ man rój rugua̱nj ―taj ro̱j soꞌ, caguáj ro̱j soꞌ a.
28Dan me se catúj Jesús rá veꞌ, ne̱ cuchiꞌ ro̱j síí tuchri̱i yoꞌ rihaan soꞌ a. Ga̱a ne̱ cataj Jesús rihaan ro̱j soꞌ a:
―Amán rá ro̱j so̱j se vaa gu̱un nu̱cuáj naxra̱ꞌ rihaan ro̱j so̱j qui̱ꞌyáj naꞌ ―taj Jesús, xnáꞌanj Jesús man ro̱j soꞌ a.
―Amán rá rój, Señor ―taj ro̱j soꞌ rihaan Jesús a.
29Ga̱a ne̱ cutaꞌ raꞌa Jesús rihaan ro̱j soꞌ, ne̱ cataj Jesús a:
―Cheꞌé se amán rá ro̱j so̱j, ne̱ cheꞌé dan naxra̱ꞌ rihaan ro̱j so̱j ado̱nj ―taj Jesús a.
30Veé dan, ne̱ naxraꞌ rihaan ro̱j soꞌ na̱nj ado̱nj.
Ga̱a ne̱ caꞌneꞌ Jesús suun rihaan ro̱j soꞌ a:
―Tu̱mé uxrá ro̱j so̱j man ro̱j so̱j, ne̱ a̱ ꞌó yuvii̱ se̱ cuno se vaa quiꞌyáá ꞌu̱nj cheꞌé ro̱j so̱j maꞌ ―taj Jesús a.
31Tza̱j ne̱ curiha̱nj ro̱j soꞌ caꞌanj ro̱j soꞌ, ne̱ uxrá nataꞌ ro̱j soꞌ rihaan cunuda̱nj nij yuvii̱ ya̱nj nu̱ꞌ rej yoꞌ nana̱ cheꞌé se vaa quiꞌyaj Jesús na̱nj ado̱nj.
Caꞌmii ꞌo̱ síí yaꞌmi̱i, quiꞌyaj Jesús a
32Tanáj ro̱j soꞌ man Jesús, ne̱ dan me se cuchiꞌ yuvii̱ nica̱j man ꞌo̱ síí yaꞌmi̱i rihaan Jesús a. Síí yaꞌmi̱i yoꞌ me se nana̱ chre̱e nuû nimán soꞌ, ne̱ cheꞌé dan ne aꞌmii soꞌ, ꞌyaj nana̱ chre̱e yoꞌ a. 33Dan me se quirii Jesús man nana̱ chre̱e yoꞌ nimán soꞌ, ga̱a ne̱ guun cheꞌe̱ síí yaꞌmi̱i caꞌmii soꞌ na̱nj ado̱nj. Queneꞌen nij yuvii̱, ne̱ caráyaꞌa̱nj uxrá nij yuvii̱, ne̱ cataj nij soꞌ a:
―Xa̱ꞌ níꞌ si̱j israelitá, tza̱j ne̱ a̱ ꞌó síí ꞌyaj da̱nj ne queneꞌe̱n níꞌ a̱ maꞌ ―taj nij yuvii̱ cheꞌé Jesús a.
34Tza̱j ne̱ cataj nij síí fariseo a:
―Guun nucua̱j soꞌ quirii soꞌ man nana̱ chre̱e, cheꞌé se racuíj nana̱ chre̱e uun chij doj man soꞌ ado̱nj ―taj nij síí fariseo cheꞌé Jesús a.
Cunuu ꞌe̱e̱ ndoꞌo rá Jesús man nij yuvii̱ a
35Ga̱a ne̱ caꞌanj Jesús nu̱ꞌ nij chumanꞌ noco̱o nu̱ꞌ nij chumanꞌ cunii nu̱ꞌ, ne̱ tucuꞌyón soꞌ rihaan nij yuvii̱ ma̱n rá veꞌ tucuꞌyón nij yuvii̱ israelitá stucua̱nj Moisés a. Ne̱ caꞌmii natáj soꞌ nana̱ sa̱ꞌ cheꞌé da̱j vaa uun chij Yaꞌanj, ne̱ nahuun sa̱ꞌ ta̱ranꞌ nij síí ranꞌ do̱ꞌ, nij síí ninaj do̱ꞌ, quiꞌyaj uún soꞌ ado̱nj. 36Ne̱ ga̱a queneꞌen soꞌ man nij yuvii̱ ri̱i̱ yoꞌ, ne̱ cunuu ꞌe̱e̱ rá soꞌ man nij soꞌ a. ꞌO̱ se queneꞌen soꞌ se vaa ase vaa matzinj va̱j maꞌa̱n vaa nij yuvii̱, nuviꞌ síí tumé man nij soꞌ, ne̱ a̱j quiranꞌ ndoꞌo nij soꞌ sayuun, ne̱ ninaj ndoꞌo nij soꞌ ado̱nj. 37Ga̱a ne̱ cataj soꞌ rihaan nij síí tucuꞌyón snana̱ soꞌ a:
―Ya̱ uxrá, ne̱ vaa ndoꞌo suun rihaan níꞌ, tza̱j ne̱ nij síí ꞌyaj suun yoꞌ me se do̱j nij soꞌ na̱nj ado̱nj. 38Cheꞌé dan cachi̱nj niꞌya̱j uxrá soj rihaan Yaꞌanj si̱j uun chij ꞌni̱j raꞌa suun se vaa caꞌne̱j soꞌ doj yuvii̱ quiꞌya̱j se‑su̱u̱n soꞌ á ―taj Jesús rihaan nij síí tucuꞌyón snana̱ soꞌ a.
Currently Selected:
San Mateo 9: trc
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. 2024 segunda versión electrónica