San Mateo 8
8
Nahuun sa̱ꞌ ꞌo̱ síí ranꞌ luj riꞌyuj, quiꞌyaj Jesús a
1Ga̱a ne̱ nanij Jesús tacaan yoꞌ, ne̱ canocoꞌ ndoꞌo yuvii̱ man soꞌ a.
2Dan me se cuchiꞌ ꞌo̱ síí ranꞌ luj riꞌyuj rihaan Jesús, ne̱ cayáán ru̱j soꞌ rihaan Jesús, ne̱ cataj soꞌ a:
―Sese me rá so̱ꞌ, ne̱ caꞌve̱e naquiꞌya̱j sa̱ꞌ so̱ꞌ manj, Señor ―taj soꞌ rihaan Jesús a.
3Ga̱a ne̱ cutaꞌ Jesús raꞌa Jesús raa̱ síí ranꞌ, ne̱ cataj Jesús a:
―Me raj qui̱ꞌyáj da̱nj á. Na̱huún so̱ꞌ, qui̱ꞌyáj ado̱nj ―taj Jesús rihaan soꞌ a.
Nu̱ꞌ cataj Jesús da̱nj, ne̱ nu̱ꞌ navij luj riꞌyuj xráá síí ranꞌ a. 4Ga̱a ne̱ cataj Jesús rihaan soꞌ a:
―Tu̱mé so̱ꞌ mán so̱ꞌ se̱ cataj xnaꞌanj so̱ꞌ rihaan yuvii̱ cheꞌé se lu̱j quiꞌyáá ꞌu̱nj cheꞌé so̱ꞌ maꞌ. Ma̱an se cuchi̱ꞌ so̱ꞌ rihaan xrej, ne̱ ti̱haán so̱ꞌ mán so̱ꞌ rihaan xrej se vaa nahuún so̱ꞌ, ne̱ rque̱ so̱ꞌ rihaan Yaꞌanj se vaa cataj síí cuꞌna̱j Moisés ga̱a naá nda̱a vaa no̱ xcúún so̱ꞌ rque̱ so̱ꞌ rihaan Yaꞌanj á. Ga̱a ne̱ xca̱j nij xrej cuentá se vaa nahuún so̱ꞌ quiꞌyáj ado̱nj ―taj Jesús rihaan síí nahuun yoꞌ a.
Nahuun se‑mo̱zó ꞌo̱ tanuu capitán, quiꞌyaj Jesús a
5Dan me se catúj Jesús chumanꞌ Capernaum, ne̱ cuchiꞌ ꞌo̱ tanuu capitán romanó ꞌni̱j raꞌa cientó tanuu rihaan soꞌ a. Dan me se cachíín niꞌya̱j soꞌ rihaan Jesús, 6cataj soꞌ a:
―Canó chiꞌii̱ man se‑mo̱zó ꞌu̱nj, Señor. Ne̱ ne nasquiꞌ soꞌ maꞌ. ꞌO̱ se ꞌo̱ naj soꞌ rá veꞌ, ne̱ ranꞌ uxrá soꞌ sayuun, ꞌyaj chiꞌii̱ na̱nj á ―taj tanuu capitán yoꞌ rihaan Jesús a.
7Ne̱ cataj Jesús rihaan soꞌ a:
―Caꞌa̱nj níꞌ, ne̱ nahu̱un soꞌ, qui̱ꞌyáj á ―taj Jesús a.
8Ga̱a ne̱ cataj uún tanuu capitán yoꞌ a:
―Señor, né si̱j sa̱ꞌ mé ꞌu̱nj maꞌ. Ne nó xcúún ꞌu̱nj catu̱u̱ so̱ꞌ rá veꞌ tucuaj qui̱ꞌyáj a̱ maꞌ. Ma̱an se caꞌne̱ꞌ u̱u̱n so̱ꞌ suun se vaa nahu̱un se‑mo̱zó ꞌu̱nj, ga̱a ne̱ nahu̱un maꞌa̱n soꞌ ado̱nj. 9ꞌO̱ se vaa síí rii taꞌngaꞌ rihaan ꞌu̱nj, ne̱ rii taꞌngáꞌ ꞌu̱nj rihaan tanuu, ne̱ taj ꞌu̱nj rihaan ꞌo̱ tanuu se vaa caꞌa̱nj soꞌ, ne̱ ꞌanj soꞌ, ne̱ taj ꞌu̱nj rihaan ꞌó soꞌ se vaa caꞌna̱ꞌ soꞌ, ne̱ ꞌnaꞌ soꞌ rihaan ꞌu̱nj, ne̱ taj ꞌu̱nj rihaan se‑mo̱zó ꞌu̱nj da̱j quiꞌya̱j soꞌ, ne̱ veé da̱nj ꞌyaj soꞌ ado̱nj ―taj tanuu capitán yoꞌ rihaan Jesús a.
10Dan me se, ga̱a cuno Jesús nana̱ caꞌmii tanuu capitán yoꞌ, ne̱ caráyaꞌa̱nj Jesús, ne̱ cataj soꞌ rihaan nij síí noco̱ꞌ rej xco̱ soꞌ a:
―Ya̱ ya̱ cata̱j xnaꞌanj ꞌu̱nj rihaan soj se vaa taj va̱j a̱ ꞌó rej ne nari̱j man ꞌo̱ síí israelitá síí cuchumán ndoꞌo rá nana̱ aꞌmii ꞌu̱nj nda̱a vaa amán rá tanuu capitán síí yaníj nihánj a̱ maꞌ. 11Ne̱ cata̱j xnaꞌanj ꞌu̱nj rihaan soj se vaa asa̱ꞌ guun chij Yaꞌanj roꞌ, caꞌna̱ꞌ ndoꞌo yuvii̱ ma̱n rej síj güii do̱ꞌ, rej ataꞌ güii do̱ꞌ, ne̱ ca̱yáán nij soꞌ rihaan se‑mesa̱ Yaꞌanj, ne̱ cha̱ nij soꞌ ga̱ síí cuꞌna̱j Abraham do̱ꞌ, Isaac do̱ꞌ, Jacob do̱ꞌ ado̱nj. 12Tana̱nj nij síí israelitá roꞌ, no̱ xcúún nij soꞌ ca̱yáán nij soꞌ rej uun chij Yaꞌanj asuun tza̱j, tza̱j ne̱ naꞌvej rá nij soꞌ a̱ maꞌ. Cheꞌé dan quiriꞌi̱j ga̱nꞌ ndoꞌo nii man nij soꞌ rej rmi̱ꞌ, ne̱ taꞌve̱e uxrá nij soꞌ, ne̱ nda̱a cha̱ ru̱j maꞌa̱n nij soꞌ cúú yanꞌ nij soꞌ na̱nj ado̱nj ―taj Jesús rihaan nij yuvii̱ canocoꞌ man soꞌ a.
13Canica̱j uún Jesús cataj Jesús rihaan tanuu capitán yoꞌ a:
―Caꞌve̱e caꞌa̱nj so̱ꞌ ya̱j a. Ya̱ cuchumán rá so̱ꞌ se vaa nahu̱un se‑mo̱zó so̱ꞌ qui̱ꞌyáj a. Ne̱ nahu̱un soꞌ chugua̱nj ―taj Jesús rihaan soꞌ a.
Ne̱ veé ma̱an orá yoꞌ roꞌ, nahuun sa̱ꞌ se‑mo̱zó tanuu capitán yoꞌ, quiꞌyaj Jesús ado̱nj.
Nahuun nii che̱j Pedró do̱ꞌ, queꞌe̱e̱ uxrá ꞌó yuvii̱ do̱ꞌ, quiꞌyaj Jesús a
14Ga̱a ne̱ caꞌanj Jesús tucuá síí cuꞌna̱j Pedró, ne̱ queneꞌen soꞌ se vaa na̱j nii che̱j Pedró ranꞌ noꞌ chiꞌii̱ nacaa yuva̱a̱ a. 15Ne̱ canó Jesús raꞌa noꞌ, ga̱a ne̱ veé ma̱an orá dan nahuun noꞌ, quiꞌyaj Jesús, ne̱ naxaga̱a̱ noꞌ, ne̱ quiꞌyaj chuvi̱i noꞌ cha̱ nij soꞌ na̱nj ado̱nj.
16Rej tiꞌnuu cuchiꞌ yuvii̱ rihaan Jesús a. Dan me se nica̱j nij yuvii̱ man queꞌe̱e̱ uxrá síí nu̱u̱ nana̱ chre̱e nimán, cuchiꞌ nij yuvii̱ rihaan Jesús a. Ne̱ nana̱ u̱u̱n caꞌmii Jesús rihaan nij nana̱ chre̱e se vaa naxu̱u̱n nij soꞌ man nij soꞌ, ga̱a ne̱ veé dan ne̱ curiha̱nj nij nana̱ chre̱e nimán nij yuvii̱, ga̱a ne̱ cunuu sa̱ꞌ nimán nij yuvii̱ yoꞌ cuaj na̱nj ado̱nj. Ne̱ nahuun sa̱ꞌ cunuda̱nj nij síí ranꞌ, quiꞌyaj uún Jesús a.
17Dan me se quisíj ya̱ nu̱ꞌ nana̱ nihánj nana̱ caꞌmii síí cuꞌna̱j Isaías síí nataꞌ snana̱ Yaꞌanj ga̱a naá cheꞌé síí caꞌne̱j Yaꞌanj, se vaa cataj soꞌ a: “Ninaj níꞌ, ne̱ canó chiꞌii̱ man níꞌ, tza̱j ne̱ nahuun níꞌ, quiꞌyaj soꞌ na̱nj ado̱nj”, taj síí cuꞌna̱j Isaías ga̱a nataꞌ soꞌ ado̱nj.
Caꞌmii Jesús ga̱ vi̱j síí tiha̱j guun rá canoco̱ꞌ man soꞌ a
18Queneꞌen Jesús se vaa ma̱n ndoꞌo yuvii̱ anica̱j rej nicu̱nꞌ soꞌ niꞌya̱j man soꞌ a. Cheꞌé dan caꞌneꞌ soꞌ suun rihaan nij síí tucuꞌyón snana̱ soꞌ se vaa caꞌa̱nj nij soꞌ ga̱ soꞌ nda̱a níchrej na laguaná cuꞌna̱j Galilea a.
19Ga̱a ne̱ cuchiꞌ ꞌo̱ síí naquiꞌyaj cu̱u stucua̱nj Moisés ne̱ cataj soꞌ rihaan Jesús a:
―Ca̱nocóꞌ ꞌu̱nj mán so̱ꞌ me rej maꞌa̱n caꞌa̱nj so̱ꞌ, maestro ―cataj soꞌ rihaan Jesús a.
20Ga̱a ne̱ cataj Jesús rihaan soꞌ a:
―ꞌO̱ se nij chunee roꞌ, otoj sa̱ꞌ nij xoꞌ rá yuꞌuj ta̱j rque yoꞌóó, ne̱ nij xtâj chéé xta̱ꞌ roꞌ, vaa saca̱ꞌ nij xoꞌ a. Ne̱ xa̱ꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, tza̱j ne̱ taj a̱ ꞌó rej qui̱náá ꞌu̱nj coto̱j ꞌu̱nj a̱ maꞌ ―taj Jesús rihaan soꞌ a.
21Ne̱ vaa ꞌó síí tucuꞌyón snana̱ Jesús cuchiꞌ rihaan soꞌ, ne̱ cataj soꞌ a:
―Caꞌve̱j so̱ꞌ na̱nj tucuaj, ne̱ nda̱a caviꞌ réj, ga̱a ne̱ cachi̱nꞌ ꞌu̱nj man réj, ga̱a ne̱ ca̱nocóꞌ ꞌu̱nj mán so̱ꞌ, Señor ―taj ꞌó soꞌ a.
22Tza̱j ne̱ cataj Jesús rihaan soꞌ a:
―Caꞌne̱ꞌ rá so̱ꞌ cachi̱nꞌ maꞌa̱n nij síí caviꞌ nimán man tuviꞌ soꞌ xnangá á. Tza̱j ne̱ cuano̱ nihánj roꞌ, no̱ xcúún so̱ꞌ ꞌo̱ ca̱nocóꞌ so̱ꞌ manj ado̱nj ―taj Jesús rihaan ꞌó soꞌ a.
Caꞌneꞌ Jesús suun rihaan na do̱ꞌ, rihaan nana̱ do̱ꞌ, se vaa cunu̱u dínj yoꞌ a
23Ga̱a ne̱ catúj Jesús rque rihoo chéé rihaan na, ga̱a ne̱ catúj nij síí tucuꞌyón snana̱ soꞌ rque rihoo ga̱ soꞌ, ga̱a ne̱ caꞌanj nij soꞌ a. 24Veé dan, ne̱ ta̱j niꞌyo̱n nasquiꞌ nucua̱j ndoꞌo rihaan na laguaná, ne̱ me ndoꞌo rá na yoꞌ gu̱un nucua̱j yoꞌ ca̱ráán yoꞌ xráá rihoo a. Tza̱j ne̱ Jesús me se otoj soꞌ ado̱nj. 25Ga̱a ne̱ caꞌanj nij síí tucuꞌyón snana̱ Jesús rej na̱j soꞌ otoj soꞌ, ne̱ narii nij soꞌ nej rihaan soꞌ, ne̱ cataj nij soꞌ a:
―Ti̱nanii so̱ꞌ man níꞌ se̱ caviꞌ nu̱ꞌ níꞌ, maan Señor ―taj nij soꞌ rihaan Jesús a.
26Dan me se maꞌa̱n Jesús cataj a:
―Me cheꞌé chuꞌviꞌ ndoꞌo nimán soj ga̱. Yoꞌ me se ataa cuchuma̱n sa̱ꞌ rá soj ni̱ꞌyaj soj manj ado̱nj ―taj Jesús rihaan nij soꞌ a.
Ga̱a ne̱ canicunꞌ caya̱ soꞌ, ne̱ nucua̱j caꞌmii soꞌ rihaan na do̱ꞌ, rihaan nana̱ do̱ꞌ a. Ga̱a ne̱ cunuu dínj uxrá rihaan na laguaná yoꞌ, quiꞌyaj Jesús na̱nj ado̱nj. 27Ne̱ caráyaꞌa̱nj nij snóꞌo yoꞌ niꞌya̱j nij soꞌ man Jesús, cataj nij soꞌ a:
―Da̱j si̱j me síí nihánj ga̱. ꞌO̱ se nda̱a nana̱ nda̱a na uno aꞌmii soꞌ asunj ―taj nij soꞌ rihaan tuviꞌ nij soꞌ a.
Quirii Jesús man ri̱i̱ nana̱ chre̱e nimán vi̱j snóꞌo a
28Ga̱a ne̱ cuchiꞌ Jesús nda̱a níchrej na laguaná yoꞌ rej ya̱nj nij síí “gadareno” a. Ne̱ vaa yuꞌuj yuvej, rej cachinꞌ nij yuvii̱ xnangá a. Dan me se cavii vi̱j snóꞌo rej ta̱j nij yuꞌuj yuvej yoꞌ, ne̱ cuchiꞌ ro̱j soꞌ rihaan Jesús a. Ro̱j soꞌ me síí nu̱u̱ nana̱ chre̱e nimán, ne̱ qui̱j ndoꞌo yuva̱a̱ ro̱j soꞌ ado̱nj. Cheꞌé ro̱j soꞌ ne síj rá yuvii̱ cache̱n yuvii̱ chrej va̱j rej yoꞌ a̱ maꞌ. 29Dan me se caguáj ro̱j soꞌ rihaan Jesús, cataj ro̱j soꞌ a:
―Ya̱ neꞌen núj se vaa Taꞌni̱j Yaꞌanj mé so̱ꞌ á. Me cheꞌé caꞌnáꞌ so̱ꞌ rej ma̱n núj ga̱. Caꞌnáꞌ so̱ꞌ qui̱ꞌyáá so̱ꞌ sayuun man núj naꞌ. ꞌO̱ se ataa doj quisi̱j güii qui̱ꞌyáá so̱ꞌ sayuun man núj ado̱nj ―taj ro̱j soꞌ rihaan Jesús a.
30Dan me se rej xco̱ ro̱j soꞌ roꞌ, va̱j ꞌo̱ xꞌneꞌ xi̱j xcáá chá coj ma̱n tacaan a. 31Ne̱ nij nana̱ chre̱e nu̱u̱ nimán ro̱j snóꞌo yoꞌ roꞌ, cachíín niꞌya̱j nij soꞌ rihaan Jesús, cataj nij soꞌ a:
―Sese quiri̱i̱ so̱ꞌ man núj nimán ro̱j snóꞌo nihánj, ne̱ qui̱ꞌyáá so̱ꞌ se ndoꞌo caꞌne̱j so̱ꞌ man núj, catu̱u̱ núj nimán nij xcáá yoꞌ rugua̱nj ―taj nij nana̱ chre̱e yoꞌ rihaan Jesús a.
32―Caꞌa̱nj soj cuaj á ―taj Jesús rihaan nij soꞌ a.
Ga̱a ne̱ caꞌanj nij soꞌ catúj nij soꞌ nimán nij xcáá yoꞌ, ne̱ dan me se ruva̱a̱ uxrá tacaan nicu̱nꞌ tuꞌva na laguaná rej va̱j nij xcáá yoꞌ a. Ne̱ ga̱a catúj nij nana̱ chre̱e nimán nij xcáá yoꞌ, ne̱ ta̱j niꞌyo̱n cunánj ndoꞌo nij xoꞌ caꞌanj nij xoꞌ, ne̱ veé da̱nj vaj nij xoꞌ, ne̱ quinij cunuda̱nj nij xoꞌ rque na, ne̱ canó xráá nij xoꞌ, quiꞌyaj na na̱nj ado̱nj.
33Ne̱ nij síí tumé xcáá yoꞌ roꞌ, cunánj nij soꞌ caꞌanj nij soꞌ nda̱a chumanꞌ, ne̱ cataj xnaꞌanj nij soꞌ rihaan nij síí ma̱n chumanꞌ yoꞌ nu̱ꞌ se vaa quiranꞌ ro̱j snóꞌo do̱ꞌ, nij xcáá do̱ꞌ a. 34Ga̱a ne̱ curiha̱nj cunuda̱nj nij síí ma̱n chumanꞌ yoꞌ, guun rá nij soꞌ nari̱ꞌ nij soꞌ man Jesús a. Dan me se ga̱a queneꞌen nij soꞌ man soꞌ, ne̱ cachíín niꞌya̱j nij soꞌ rihaan soꞌ se vaa cu̱riha̱nj soꞌ rej ya̱nj nij soꞌ caꞌa̱nj soꞌ rej yaníj a.
Currently Selected:
San Mateo 8: trc
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. 2024 segunda versión electrónica