San Mateo 5
5
Cavii Jesús raa̱ tacaan ga̱ nij yuvii̱, ne̱ tucuꞌyón soꞌ man nij soꞌ a
1Queneꞌen Jesús se vaa ma̱n ri̱i̱ ndoꞌo yuvii̱ nu̱ꞌ anica̱j xꞌnúú soꞌ, ne̱ cheꞌé dan cavii soꞌ caꞌanj soꞌ raa̱ ꞌo̱ tacaan, ne̱ nda̱a dan caꞌanj ca̱yáán soꞌ, ga̱a ne̱ cuchiꞌ nij síí tucuꞌyón snana̱ soꞌ rihaan soꞌ a.
Cataj Jesús me yuvii̱ cavi̱i̱ sa̱ꞌ a
2Ga̱a ne̱ guun cheꞌe̱ Jesús tucuꞌyón Jesús rihaan nij soꞌ, cataj soꞌ a:
3―Cavi̱i̱ sa̱ꞌ ta̱ranꞌ nij síí vaa nica̱ꞌ nimán ado̱nj. ꞌO̱ se a̱j uun chij Yaꞌanj nimán nij soꞌ ado̱nj.
4’Cavi̱i̱ sa̱ꞌ ta̱ranꞌ nij síí nanó ndoꞌo rá ado̱nj. ꞌO̱ se gu̱un xe̱j nimán maꞌa̱n nij soꞌ, quiꞌya̱j Yaꞌanj vaa güii ado̱nj.
5’Cavi̱i̱ sa̱ꞌ ta̱ranꞌ nij síí niꞌya̱nj aꞌmii ado̱nj. ꞌO̱ se gu̱un toꞌóó maꞌa̱n nij soꞌ man nu̱ꞌ chumii̱ vaa güii ado̱nj.
6’Cavi̱i̱ sa̱ꞌ ta̱ranꞌ nij síí me ndoꞌo rá cunu̱u sa̱ꞌ nimán ado̱nj. ꞌO̱ se cunu̱u sa̱ꞌ maꞌa̱n nij soꞌ vaa güii, quiꞌya̱j Yaꞌanj ado̱nj.
7’Cavi̱i̱ sa̱ꞌ ta̱ranꞌ nij síí ꞌe̱e̱ rá man tuviꞌ ado̱nj. ꞌO̱ se cunu̱u ꞌe̱e̱ rá Yaꞌanj man maꞌa̱n nij soꞌ, ne̱ taj sayuun quira̱nꞌ nij soꞌ, quiꞌya̱j Yaꞌanj a̱ maan ado̱nj.
8’Cavi̱i̱ sa̱ꞌ ta̱ranꞌ nij síí vaa sa̱ꞌ nimán ado̱nj. ꞌO̱ se queneꞌe̱n maꞌa̱n nij soꞌ man Yaꞌanj vaa güii ado̱nj.
9’Cavi̱i̱ sa̱ꞌ ta̱ranꞌ nij síí ꞌyaj naꞌmii sa̱ꞌ yuvii̱ ga̱ tuviꞌ yuvii̱ ado̱nj. ꞌO̱ se cata̱j nii se vaa taꞌníí ya̱ Yaꞌanj me nij soꞌ vaa güii ado̱nj.
10’Cavi̱i̱ sa̱ꞌ ta̱ranꞌ nij síí ranꞌ sayuun ꞌyaj tuviꞌ cheꞌé se veꞌé sa̱ꞌ ꞌyaj nij soꞌ ado̱nj. ꞌO̱ se a̱j uun chij Yaꞌanj nimán nij soꞌ ado̱nj.
11’Ne̱ cavi̱i̱ sa̱ꞌ ndoꞌo soj sese caꞌmi̱i̱ yuvii̱ nana̱ nij rihaan soj do̱ꞌ, sese quiꞌya̱j yuvii̱ sayuun man soj do̱ꞌ, sese caꞌmi̱i̱ ne̱ yuvii̱ cata̱j yuvii̱ se vaa tumé ndoꞌo soj cacunꞌ do̱ꞌ, cheꞌé se me soj síí noco̱ꞌ mán ꞌu̱nj ado̱nj. 12Ga̱a ne̱ no̱ xcúún soj gu̱un niha̱ꞌ uxrá rá nimán soj, cheꞌé se quiꞌya̱j uxrá Yaꞌanj se sa̱ꞌ ga̱ soj asa̱ꞌ nucuiꞌ soj rej xta̱ꞌ ado̱nj. ꞌO̱ se ase vaa ꞌyaj nii sayuun man soj roꞌ, taꞌngaꞌ da̱nj quiꞌyaj nii sayuun man nij síí nataꞌ snana̱ Yaꞌanj rihaan yuvii̱ ga̱a naá uún ado̱nj.
Cataj Jesús se vaa ase vaa yaan do̱ꞌ, ase vaa yaꞌan chuguu̱n do̱ꞌ, da̱nj vaa níꞌ a
13’Ase vaa yaan roꞌ, da̱nj vaa soj ga̱ chumii̱ nihánj ado̱nj. Dan me se sese ne ꞌne̱ꞌ chá yaan yoꞌ, ga̱a ne̱ taj se qui̱ꞌyáꞌ cunu̱u sa̱ꞌ yaan yoꞌ ga̱a a̱ maꞌ. Taj se gúnꞌ man yaan yoꞌ ga̱a a̱ maꞌ. Ma̱an se quiriꞌi̱j nii man yaan yoꞌ xeꞌ, ne̱ cache̱e̱ u̱u̱n yuvii̱ xráá yaan yoꞌ na̱nj ado̱nj. Ne̱ da̱nj vaa uún soj ado̱nj.
14’Ne̱ ase vaa yaꞌan vaa soj chuguu̱n soj rihaan chumii̱ nihánj a. Neꞌen soj se vaa sese na̱j ꞌo̱ chumanꞌ raa̱ tacaan, ne̱ queneꞌe̱n cunuda̱nj yuvii̱ naj chumanꞌ yoꞌ raa̱ tacaan ado̱nj. 15Ne̱ ga̱a rmi̱ꞌ, ne̱ a̱ ꞌó yuvii̱ ne utaꞌ yaꞌan raa̱ agaꞌ yaꞌan ne̱ axríj yuve̱ nij soꞌ rque ꞌo̱ chrúún maꞌ. Tana̱nj achrón nii yaꞌan raa̱ agaꞌ yaꞌan ne̱ utaꞌ nii agaꞌ yoꞌ rej xta̱ꞌ, ne̱ da̱j a̱ nij yuvii̱ atúj rá veꞌ roꞌ, chuguu̱n niꞌya̱j nij soꞌ ado̱nj. 16Ne̱ veé da̱nj vaa gue̱e̱ soj, ne̱ ase vaa agaꞌ yaꞌan roꞌ, vaa soj rihaan chumii̱ nihánj ado̱nj. Ne̱ sese sa̱ꞌ quiꞌya̱j soj queneꞌe̱n nij yuvii̱, ne̱ veꞌé uxrá caꞌmi̱i̱ nij yuvii̱ cheꞌé Rej níꞌ Yaꞌanj si̱j nicu̱nꞌ xta̱ꞌ, quiꞌya̱j soj na̱nj ado̱nj.
No̱ xcúún ndoꞌo níꞌ cuno̱ níꞌ snana̱ Jesús a
17’Se̱ guun rá soj se vaa caꞌnáꞌ ꞌu̱nj ti̱ríꞌ ꞌu̱nj stucua̱nj Moisés do̱ꞌ, nana̱ caꞌmii natáj nij síí nataꞌ snana̱ Yaꞌanj ga̱a naá do̱ꞌ maꞌ. Tana̱nj caꞌnaj cheꞌé rej navi̱j quisi̱j nu̱ꞌ tucuáán yoꞌ ado̱nj. 18Ya̱ uxrá cata̱j xnaꞌanj ꞌu̱nj rihaan soj se vaa ga̱a ataa navi̱j chumii̱ nihánj do̱ꞌ, ga̱a ataa navi̱j xta̱ꞌ nihánj do̱ꞌ, ne̱ quiꞌya̱j Yaꞌanj nu̱ꞌ se vaa me rá Yaꞌanj quiꞌya̱j Yaꞌanj rihaan chumii̱ nihánj, ne̱ cheꞌé dan se̱ tanáj xco̱ níꞌ a̱ ꞌó suun caꞌneꞌ Yaꞌanj cuno̱ níꞌ maꞌ. 19Dan me se me maꞌa̱n ꞌo̱ síí tiri̱ꞌ ꞌo̱ suun leꞌe̱j nihánj ne̱ ino̱ vaa suun ti̱haa̱n soꞌ man nij tuviꞌ soꞌ, ne̱ asa̱ꞌ guun chij Yaꞌanj, ne̱ cata̱j nii se vaa síí noco̱ꞌ doj me soꞌ rej uun chij Yaꞌanj na̱nj ado̱nj. Tza̱j ne̱ sese me maꞌa̱n ꞌo̱ síí ꞌyaj ya̱ nda̱a vaa taj ꞌu̱nj nihánj ne̱ ti̱haa̱n ya̱ soꞌ man tuviꞌ soꞌ nda̱a vaa taj ꞌu̱nj nihánj, ne̱ cheꞌé síí nihánj roꞌ, cata̱j nii se vaa síí noco̱o doj me soꞌ rej gu̱un chij Yaꞌanj vaa güii ado̱nj.
20’ꞌO̱ se cata̱j xnaꞌanj ꞌu̱nj rihaan soj se vaa sese nij síí naquiꞌyaj cu̱u stucua̱nj Moisés ga̱ nij síí fariseo me se ꞌyaj sa̱ꞌ nij soꞌ rihaan yuvii̱, rá nij soꞌ, tza̱j ne̱ sese se̱ quiꞌyaj sa̱ꞌ soj doj rihaan nij yuvii̱ nda̱a vaa ꞌyaj nij síí naquiꞌyaj cu̱u stucua̱nj Moisés ga̱ nij síí fariseo, ga̱a ne̱ daj chiha̱a̱ míj se̱ cayáán soj ga̱ Yaꞌanj asa̱ꞌ guun chij Yaꞌanj a̱ maan ado̱nj.
Cataj Jesús se vaa sese aꞌmaan rá níꞌ niꞌya̱j níꞌ tuviꞌ níꞌ, ne̱ tumé níꞌ cacunꞌ a
21’A̱j neꞌen soj nana̱ nihánj nana̱ caꞌnaꞌ rihaan nij xi̱i soj síí ma̱n ga̱a naá ado̱nj: “Se̱ ticaviꞌ soj man yuvii̱ maꞌ. Dan me se cunuda̱nj yuvii̱ ticaviꞌ tuviꞌ roꞌ, tumé soꞌ cacunꞌ cata̱j síí nica̱j suun ado̱nj”, me nana̱ caꞌnaꞌ rihaan nij soꞌ a. 22Tza̱j ne̱ ꞌu̱nj nihánj me se cata̱j xnaꞌanj ꞌu̱nj, ne̱ a̱ me maꞌa̱n ꞌo̱ síí caꞌmaan rá niꞌya̱j man tinúú, ne̱ a̱j tumé soꞌ cacunꞌ cata̱j síí nica̱j suun, ne̱ quira̱nꞌ soꞌ sayuun ado̱nj. Ne̱ a̱ me maꞌa̱n síí cata̱j rihaan tuviꞌ: “Síí snúú rmaꞌa̱n mé so̱ꞌ ado̱nj”, ne̱ a̱j tumé ndoꞌo soꞌ cacunꞌ cata̱j Xꞌneꞌ Nij Síí Ata̱ Suun Noco̱o Doj ado̱nj. Ne̱ a̱ me maꞌa̱n síí cata̱j rihaan tuviꞌ: “Taj se gúnꞌ mán so̱ꞌ mei”, me se vaa cheꞌé caꞌa̱nj maꞌa̱n síí aꞌmii da̱nj rihaan yaꞌan caca̱a̱ soꞌ na̱nj ado̱nj.
23’Cheꞌé dan me sese caꞌa̱nj ni̱caj so̱ꞌ rasu̱u̱n rihaan chraan altar, rque̱ so̱ꞌ rasu̱u̱n rihaan Yaꞌanj, rá so̱ꞌ, ne̱ sese ninuj rá so̱ꞌ se vaa cutaꞌ ꞌo̱ tinúú so̱ꞌ cacunꞌ xráá so̱ꞌ, 24ne̱ se̱ guun rque̱ so̱ꞌ rasu̱u̱n yoꞌ rihaan Yaꞌanj maꞌ. Tana̱nj cuchru̱j so̱ꞌ rasu̱u̱n yoꞌ rihaan yoꞌóó, ne̱ caꞌa̱nj so̱ꞌ rej ya̱nj tinúú so̱ꞌ, ga̱a ne̱ naꞌmi̱i̱ sa̱ꞌ so̱ꞌ ga̱ soꞌ, ga̱a ne̱ ca̱nica̱j so̱ꞌ ne̱ rque̱ so̱ꞌ rasu̱u̱n yoꞌ rihaan Yaꞌanj ado̱nj.
25’Ne̱ so̱ꞌ me se sese vaa síí taj se vaa nij quiꞌyáá so̱ꞌ rihaan soꞌ, ne̱ ga̱a tiha̱j va̱j so̱ꞌ chrej ga̱ soꞌ, ne̱ naꞌmi̱i̱ sa̱ꞌ so̱ꞌ ga̱ soꞌ na̱nj á. Ne̱ sese se̱ quiꞌyáá so̱ꞌ da̱nj ga̱ soꞌ ga̱a tiha̱j va̱j ro̱j so̱j chrej, ne̱ ni̱caj soꞌ mán so̱ꞌ caꞌa̱nj soꞌ rihaan cuese̱, ne̱ cuese̱ yoꞌ roꞌ, ta̱cuachén mán so̱ꞌ raꞌa síí tumé tagaꞌ, ne̱ soꞌ me síí caxri̱i̱ tagaꞌ mán so̱ꞌ ado̱nj. 26Ne̱ yoꞌ me se gu̱un ra̱a̱n ndoꞌo so̱ꞌ, ne̱ nda̱a quisíj navij naruꞌvee so̱ꞌ nu̱ꞌ saꞌanj cheꞌé cacunꞌ quiꞌyáá so̱ꞌ, ga̱a ne̱ cu̱riha̱nj so̱ꞌ tagaꞌ na̱nj ado̱nj.
Cataj Jesús se vaa tu̱mé níꞌ man níꞌ se̱ quiꞌyaj níꞌ cacunꞌ ga̱ ꞌó chana̱ a
27’A̱j cuno soj nana̱ nihánj nana̱ caꞌnaꞌ rihaan xi̱i soj ga̱a naá a: “Se̱ cotoj so̱ꞌ ga̱ ꞌó yuvii̱ sese né ni̱ca̱ so̱ꞌ me maꞌ.” 28Tza̱j ne̱ cata̱j xnaꞌanj ꞌu̱nj rihaan soj se vaa na̱j guun síí niꞌya̱j niꞌya̱j man ꞌó chana̱ cheꞌé se uun ndoꞌo rá soꞌ coto̱j soꞌ ga̱ noꞌ roꞌ, ase vaa nimán síí otoj ga̱ ꞌó chana̱ né nica̱ me roꞌ, taꞌngaꞌ da̱nj vaa nimán síí niꞌya̱j ndoꞌo man ꞌó chana̱ yoꞌ na̱nj ado̱nj. Ne̱ tumé ya̱ soꞌ cacunꞌ ado̱nj.
29’Da̱nj na̱nj uún, ne̱ sese rlij rihaan so̱ꞌ rej nuva̱ꞌ so̱ꞌ me rá quiꞌya̱j cacunꞌ, ne̱ vaa cheꞌé a̱ doj quiri̱i̱ so̱ꞌ man yoꞌ, ne̱ taj se ꞌyaj maꞌ. Caꞌve̱e a̱ doj quiri̱ꞌ o̱rúnꞌ yoꞌ ne̱ se̱ cacaa nu̱ꞌ nee̱ mán so̱ꞌ rihaan yaꞌan maꞌ. 30Da̱nj na̱nj uún, ne̱ sese raꞌá so̱ꞌ rej nuva̱ꞌ so̱ꞌ me rá quiꞌya̱j cacunꞌ, ne̱ vaa cheꞌé a̱ doj se caꞌne̱ꞌ so̱ꞌ man yoꞌ, ne̱ taj se ꞌyaj maꞌ. Caꞌve̱e a̱ doj caꞌa̱nj niꞌya̱ o̱rúnꞌ yoꞌ ne̱ se̱ cacaa cunuda̱nj nee̱ man ma̱ꞌán so̱ꞌ rihaan yaꞌan maꞌ.
Caꞌmii Jesús cheꞌé síí me rá quiriꞌi̱j nica̱ a
31’Ne̱ ga̱a naá me se caꞌnaꞌ nana̱ nihánj rihaan xi̱i soj a: “Sese me rá ꞌo̱ soꞌ quiriꞌi̱j soꞌ nica̱ soꞌ, ne̱ na̱xcaj soꞌ ꞌo̱ yanj cata̱j xnaꞌanj se vaa ya̱ quiriꞌíj soꞌ nica̱ soꞌ á.” Da̱nj vaa nana̱ caꞌnaꞌ rihaan nij yuvii̱ ado̱nj. 32Tza̱j ne̱ cuano̱ nihánj me se cata̱j xnaꞌanj ꞌu̱nj rihaan soj se vaa sese ne coto̱j chana̱ nica̱ ꞌo̱ soꞌ ga̱ ꞌó snóꞌo, ne̱ sese riꞌíj soꞌ man chana̱ yoꞌ, ne̱ ꞌyaj soꞌ ꞌo̱ chana̱ tumé cacunꞌ otoj ga̱ ꞌó snóꞌo man noꞌ vaa ga̱a na̱nj ado̱nj. Ne̱ me maꞌa̱n snóꞌo xcaj man ꞌo̱ chana̱ riꞌíj nica̱ man roꞌ, tumé soꞌ cacunꞌ otoj ga̱ chana̱ né ni̱ca̱ soꞌ me ado̱nj.
Cataj Jesús se vaa se̱ cutaꞌ níꞌ raa̱ xta̱ꞌ do̱ꞌ, raa̱ chumii̱ do̱ꞌ maꞌ
33’Ne̱ a̱j neꞌen soj nana̱ nihánj nana̱ caꞌnaꞌ rihaan nij xi̱i soj síí ma̱n ga̱a naá ado̱nj: “Sese cataꞌ tuꞌvá so̱ꞌ rihaan Yaꞌanj Si̱j ꞌNi̱j Raꞌa man níꞌ se vaa qui̱ꞌyáá so̱ꞌ, ne̱ se̱ caꞌneꞌ rá so̱ꞌ qui̱ꞌyáá so̱ꞌ da̱nj a̱ maꞌ. Tana̱nj ya̱ qui̱ꞌyáá so̱ꞌ nu̱ꞌ se vaa cataꞌ tuꞌvá so̱ꞌ rihaan soꞌ na̱nj ado̱nj.” 34Tza̱j ne̱ cuano̱ nihánj roꞌ, cata̱j xnaꞌanj ꞌu̱nj rihaan soj se vaa asa̱ꞌ caꞌmii soj ꞌo̱ nana̱ guun ya̱ ya̱ rá soj quiꞌya̱j soj, ne̱ daj chiha̱a̱ míj se̱ cutaꞌ soj raa̱ xta̱ꞌ maꞌ. ꞌO̱ se xta̱ꞌ roꞌ, nicunꞌ maꞌa̱n Yaꞌanj ya̱ ya̱ na̱nj ado̱nj. 35Ne̱ raa̱ chumii̱ se̱ cutaꞌ soj maꞌ. ꞌO̱ se chumii̱ nihánj me rej ta̱j tacóó Yaꞌanj na̱nj ado̱nj. Ne̱ raa̱ chumanꞌ Jerusalén se̱ cutaꞌ soj maꞌ. Ese chumanꞌ yoꞌ yáán maꞌa̱n Yaꞌanj si̱j nica̱j yuꞌunj man níꞌ na̱nj ado̱nj. 36Ne̱ raa̱ maꞌa̱n soj se̱ cutaꞌ soj maꞌ. ꞌO̱ se se̱ guun nucua̱j soj naquiꞌya̱j catzi̱i̱ soj ꞌo̱ yuvé raa̱ soj, ne̱ se̱ guun nucua̱j soj naquiꞌya̱j maruu̱ soj ꞌo̱ yuvé raa̱ soj maꞌ. 37Veé dan ga̱a aꞌmii soj, ne̱ ase cata̱j soj “Ya̱ a”, ase cata̱j soj “Taj maꞌ”, ꞌo̱ na̱nj da̱nj cata̱j soj á. Sese nano̱ꞌ soj ꞌó nana̱, ne̱ chiꞌi̱i̱ vaa nimán soj na̱nj ado̱nj.
Da̱j quiꞌya̱j níꞌ man yuvii̱ ꞌyaj sayuun man níꞌ a
38’A̱j neꞌen soj nana̱ nihánj nana̱ caꞌnaꞌ rihaan xi̱i soj ga̱a naá a: “Sese curiha̱nj rlij rihaan so̱ꞌ quiꞌyaj tuvíꞌ so̱ꞌ, ne̱ caꞌve̱e cu̱riha̱nj rlij rihaan tuvíꞌ so̱ꞌ uún a.” Ne̱ sese curiha̱nj cúú yánꞌ so̱ꞌ, quiꞌyaj tuvíꞌ so̱ꞌ, ne̱ caꞌve̱e cu̱riha̱nj cúú yanꞌ tuvíꞌ so̱ꞌ uún a. Da̱nj vaa nana̱ caꞌnaꞌ rihaan yuvii̱ na̱nj ado̱nj. 39Tza̱j ne̱ cuano̱ nihánj roꞌ, cata̱j xnaꞌanj ꞌu̱nj rihaan soj se vaa se̱ quiꞌyaj soj sayuun man síí ꞌyaj sayuun man soj maꞌ. Tana̱nj sese vaa síí coxro ni̱chrej xruú so̱ꞌ, ne̱ ti̱cúnꞌ so̱ꞌ níchrej xruú so̱ꞌ coxro̱ soꞌ uún na̱nj á. 40Ne̱ sese me rá ꞌo̱ soꞌ cuta̱ꞌ soꞌ cacunꞌ xráá so̱ꞌ rihaan cuese̱ caꞌne̱e̱ soꞌ cotoó nu̱u̱ so̱ꞌ, ne̱ caxri̱i̱ u̱u̱n so̱ꞌ cotoó yoꞌ do̱ꞌ, nda̱a se‑ro̱to̱ so̱ꞌ do̱ꞌ, caxri̱i̱ so̱ꞌ ston soꞌ na̱nj á. 41Ne̱ sese caꞌne̱ꞌ ꞌo̱ soꞌ suun rihaan so̱ꞌ caꞌa̱nj ta̱náj so̱ꞌ siꞌyaj soꞌ ꞌo̱ kilómetro, ne̱ caꞌve̱j so̱ꞌ caꞌa̱nj ta̱náj so̱ꞌ siꞌyaj soꞌ nda̱a vi̱j kilómetro á. 42Sese achíín ꞌo̱ soꞌ rasu̱u̱n mán so̱ꞌ, ne̱ rque̱ so̱ꞌ se achiin man soꞌ á. Ne̱ sese me rá ꞌo̱ soꞌ ra̱cuíj so̱ꞌ saꞌanj man soꞌ, ne̱ se̱ cataj so̱ꞌ se vaa taj va̱j saꞌanj maꞌ. Ra̱cuíj so̱ꞌ man soꞌ á.
Ga̱a̱ ꞌe̱e̱ rá níꞌ man nij síí ta̱j riꞌyunj man níꞌ á
43’A̱j neꞌen soj nana̱ nihánj nana̱ caꞌnaꞌ rihaan xi̱i soj ga̱a naá a: “Ga̱a̱ ꞌe̱e̱ rá so̱ꞌ man tuvíꞌ so̱ꞌ, tza̱j ne̱ nachri̱ꞌ so̱ꞌ ni̱ꞌyaj so̱ꞌ síí ta̱j riꞌyunj mán so̱ꞌ á.” Da̱nj vaa nana̱ caꞌnaꞌ ga̱a naá na̱nj ado̱nj. 44Tza̱j ne̱ cuano̱ nihánj me cata̱j xnaꞌanj ꞌu̱nj ꞌo̱ nana̱ rihaan soj á: No̱ xcúún soj cunu̱u ꞌe̱e̱ rá soj ni̱ꞌyaj soj man nij síí ta̱j riꞌyunj man soj, ne̱ caꞌmi̱i̱ soj nana̱ lu̱j cheꞌé nij síí aꞌmii nana̱ qui̱j cheꞌé soj, ne̱ quiꞌya̱j soꞌ se lu̱j rihaan nij síí nachriꞌ niꞌya̱j man soj, ne̱ cachi̱nj niꞌya̱j soj rihaan Yaꞌanj cheꞌé nij síí ꞌyaj sayuun man soj á. 45Ga̱a ne̱ quiꞌya̱j soj ase ꞌyaj Rej soj Yaꞌanj si̱j nicu̱nꞌ xta̱ꞌ ado̱nj. ꞌO̱ se Yaꞌanj ꞌyaj síj güii, ne̱ oꞌ naán rihaan toꞌóó nij síí chiꞌi̱i̱ do̱ꞌ, rihaan toꞌóó nij síí sa̱ꞌ do̱ꞌ, ꞌyaj Yaꞌanj, ne̱ amanꞌ rihaan toꞌóó nij síí ꞌyaj sa̱ꞌ do̱ꞌ, rihaan toꞌóó nij síí ꞌyaj chiꞌi̱i̱ do̱ꞌ, ꞌyaj uún Yaꞌanj ado̱nj. 46ꞌO̱ se sese ꞌe̱e̱ rá soj man ina̱nj nij síí ꞌe̱e̱ rá man soj, ga̱a ne̱ me cheꞌé quiꞌya̱j Yaꞌanj se lu̱j ga̱ soj, rá soj ga̱. ꞌO̱ se neꞌen soj se vaa nda̱a nij síí tihaꞌ yuꞌunj man soj cheꞌé impuestó roꞌ, ꞌe̱e̱ rá nij soꞌ man tuviꞌ maꞌa̱n nij soꞌ ado̱nj. 47Cheꞌé dan, sese veꞌé aꞌmii soj ga̱ ina̱nj tinúú soj, ne̱ sa̱ꞌ doj vaa soj rihaan ꞌó nij yuvii̱, rá soj naꞌ. Taj maꞌ. Ne̱ nda̱a nij síí yaníj síí ne neꞌen da̱j vaa Yaꞌanj roꞌ, neꞌen soj se vaa ꞌe̱e̱ rá nij soꞌ man tuviꞌ maꞌa̱n nij soꞌ na̱nj ado̱nj. 48Cheꞌé dan sese né si̱j tihaꞌ yuꞌunj do̱ꞌ, si̱j yaníj do̱ꞌ, me soj, ne̱ no̱ xcúún soj gu̱un soj síí vaa sa̱ꞌ ina̱nj nimán ado̱nj. Ne̱ ase vaa síí sa̱ꞌ ina̱nj me Yaꞌanj roꞌ, da̱nj ga̱a̱ maꞌa̱n soj, síí sa̱ꞌ ina̱nj gu̱un soj ado̱nj.
Currently Selected:
San Mateo 5: trc
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. 2024 segunda versión electrónica